1 Chronicles 13
1ဒီးစီၤဒၤဝံးကူၣ်လိာ်အသးဒီးပှၤကထိတဖၣ်အခိၣ်,ဒီးပှၤကယၤတဖၣ်အခိၣ်,ဒီးကယဲၢ်တၢ်အခိၣ်ခဲလၢာ်လီၤ.
2ဒီးစီၤဒၤဝံးစံးလၢကယဲၢ်အံၣ်စရ့လးအတၢ်အိၣ်ဖှိၣ်ခဲလၢာ်,မ့ၢ်ဂ့ၤဒီးသု,ဒီးမ့ၢ်ဟဲလၢယွၤပကစၢ်ဒီး,မၢလီၤသကိးတၢ်ဆူခိ,ဆူပဒီပုၢ်ဝဲၢ်အအိၣ်တပူၤလၢ်လၢ်လၢအအိၣ်လီၤတဲာ်လၢကီၢ်အံၣ်စရ့လးအပူၤ,ဒီးဆူပှၤလုၢ်တၢ်အဒိၣ်,ဒီးပှၤလ့ၤဝံဖိလၢအအိၣ်ဒီးအီၤလၢအဝ့ၢ်ပူၤ,လၢအအိၣ်ဒီးအတၢ်အီၣ်ဆၣ်အလီၢ်,ဒ်သိးအကအိၣ်ဖှိၣ်ရိဖှိၣ်လၢပအိၣ်အံၤတက့ၢ်.
3ဒီးစိာ်က့ၤသကိးယွၤအတလါဆူပအိၣ်တက့ၢ်.အဂ့ၢ်ဒ်အံၤ,လၢစီၤစီလူးအမုၢ်နံၤတဖၣ်န့ၣ်ပတသံကွၢ်တၢ်လၢအအိၣ်ဘၣ်.
4ဒီးတၢ်အိၣ်ဖှိၣ်ခဲလၢာ်စံးဝဲလၢသါကမၤဒ်န့ၣ်လီၤ.အဂ့ၢ်ဒ်အံၤ,တၢ်တမံၤန့ၣ်လိၤဝဲလၢပှၤဂီၢ်မုၢ်ခဲလၢာ်အမဲာ်လီၤ.
5ဒီးစီၤဒၤဝံးဒုးအိၣ်ဖှိၣ်ရိဖှိၣ်အံၣ်စရ့လးခဲလၢာ်လၢၡံဃိၢ်ဘၣ်ဃးဒီးအဲၤကူပတူးပၢၢ်လၢတၢ်လဲၤနုာ်လၢဃၤမါသး,ဒ်သိးအကဟဲစိာ်ထီၣ်ယွၤတလါလၢကံးရယးယဧၤရံၣ်လီၤ.
6ဒီးစီၤဒၤဝံးလဲၤထီၣ်,ဒီးအံၣ်စရ့လးခဲလၢာ်ဆူဘဧၤလး,ဆူကံးရယးယဧၤရံၣ်လၢအဘၣ်ဃးဒီးယူဒၤ,ဒ်သိးအကဟဲစိာ်ထီၣ်ယွၤအတလါ,ယွၤတဂၤလၢအအိၣ်လၢခ့ရူာ်အဘၢၣ်စၢၤ,ဖဲပှၤကိးထီၣ်အမံၤန့ၣ်လီၤ.
7ဒီးစိာ်ယွၤအတလါလၢလ့ၣ်ကဟၣ်သီတဆိအပူၤလၢစီၤအဘံနဒးအဟံၣ်ပူၤ,ဒီးစီၤဧူးစၤ,ဒီးစီၤအဃံယိၤဆှၢလ့ၣ်ကဟၣ်န့ၣ်လီၤ.
8ဒီးစီၤဒၤဝံး,ဒီးပှၤအံၣ်စရ့လးဖိခဲလၢာ်ဒ့တၢ်ပှီၢ်တၢ်လၢအဂံၢ်အဘါခဲလၢာ်,အိၣ်ဒီးတၢ်သးဝံၣ်,လၢတနၢ်,ဒီးလၢသီတူၢ်,ဒီးလၢဒၢ,ဒီးလၢစှၢၣ်စှံး,ဒီးလၢကွဲၤလီၤ.
9ဒီးဟဲဝဲတုၤလၢစီၤနၤကိၣ်အကြဲၢ်ပူၤ,ဒီးစီၤဧူးစၤယူာ်ထီၣ်အစုဆူယွၤအတလါဒ်သိးအကဟံးဃာ်တလါန့ၣ်လီၤ.အဂ့ၢ်ဒ်အံၤ,ဂီၤဖံးတဖၣ်မၤဟူးဝးအီၤလီၤ.
10ဒီးယွၤအသးကဲၤထီၣ်ဘၣ်စီၤဧူးစၤ,ဒီးယွၤကျီကွံာ်အီၤလၢအယူာ်ထီၣ်အစုဆူတလါအဃိ,ဒီးသံဝဲလၢယွၤအမဲာ်ညါလီၤ.
11ဒီးမ့ၢ်ယွၤဘၢၣ်ဖျိတၢ်လၢစီၤဧူးစၤအလိၤဒီး,စီၤဒၤဝံးအသးကိၢ်ထီၣ်,ဒီးယုၢ်ဝဲတၢ်အလီၢ်အမံၤလၢဖ့ရ့းဧူးစၤတုၤမုၢ်မဆါတနံၤအံၤလီၤ.
12ဒီးစီၤဒၤဝံးပျံၤယွၤလၢမုၢ်တနံၤန့ၣ်,ဒီးစံးဝဲဒၣ်,ယကဟဲစိာ်ဘၣ်ယွၤအတလါန့ၣ်ဆူယအိၣ်ဒ်လဲၣ်.
13ဒီးတဟဲစိာ်ဘၣ်တလါန့ၣ်ဆူအအိၣ်,ဆူစီၤဒၤဝံးအဝ့ၢ်ပူၤဘၣ်,ဒီးစိာ်ဝဲဆူတၢ်ကပၤ,ဆူပှၤကံးတံးဖိစီၤဧိၤဘ့းအ့ဒိၣ်အဟံၣ်ပူၤလီၤ.
14ဒီးယွၤအတလါအိၣ်ဝဲလၢပှၤကံးတံးဖိစီၤဧိၤဘ့းအ့ဒိၣ်အဟံၣ်ပူၤန့ၣ်သၢလါလီၤ.ဒီးယွၤဆိၣ်ဂ့ၤစီၤဧိၤဘ့းအ့ဒိၣ်,ဒီးအပှၤဟံၣ်ဖိခဲလၢာ်လီၤ.