1 Chronicles 17
1ဒီးစီၤဒၤဝံးဆ့ၣ်နီၤဝဲလၢအဟံၣ်ပူၤ,ဒီးတၢ်မၤအသးလၢစီၤဒၤဝံးစံးဘၣ်ဝံနၤသၣ်,ကွၢ်ကွၢ်,ယအိၣ်ယဆိးလၢဟံၣ်သ့ၣ်ဆှိအ့ရ့းအပူၤ,မ့မ့ၢ်ယွၤအတၢ်အၢၣ်လီၤအီလီၤအတလါန့ၣ်အိၣ်ဝဲလၢယၣ်သဒၢတၢ်အပူၤလီၤ.
2ဒီးစီၤနၤသၣ်စံးဘၣ်စီၤဒၤဝံး,မၤကယဲၢ်တၢ်လၢအအိၣ်ဝဲလၢနသးကံၢ်ပူၤတက့ၢ်.အဂ့ၢ်ဒ်အံၤ,ယွၤအိၣ်ဝဲဒီးနၤလီၤ.
3ဒီးလၢမုၢ်တနၤန့ၣ်တၢ်မၤအသးလၢယွၤအကလုၢ်ဘၣ်စီၤနၤသၣ်,ဒီးစံးဝဲဒၣ်,
4လဲၤစံးဘၣ်တဲဘၣ်ယခ့ယပှၤစီၤဒၤဝံး,ယွၤစံးဝဲဒ်အံၤ,နတဘၣ်သူၣ်ယဟံၣ်လၢယကအိၣ်ကဆိးလၢအပူၤဘၣ်.
5အဂ့ၢ်ဒ်အံၤ,ယတအိၣ်တဆိးလၢဟံၣ်ပူၤလၢမုၢ်တနံၤလၢယဒုးဟဲထီၣ်ပှၤအံၣ်စရ့လးဖိတုၤမုၢ်မဆါတနံၤအံၤဘၣ်,ဒီးယလဲၤတၢ်လၢဒဲပူၤဆူဒဲပူၤ,ဒီးလၢတၢ်အိၣ်အလီၢ်ဆူတၢ်အိၣ်အလီၢ်လီၤ.
6လၢကယဲၢ်တၢ်ဖဲယလဲၤတၢ်ဒီးပှၤအံၣ်စရ့လးဖိခဲလၢာ်န့ၣ်ယကတိၤတၢ်ဒီးပှၤအံၣ်စရ့လးဖိအပှၤစံၣ်ညီၣ်ကွီၢ်လၢယမၤလိာ်အံးက့ၤကွၢ်က့ၤယပှၤဂီၢ်မုၢ်,ဒီးစံး,သုတသူၣ်ထီၣ်န့ၢ်ယၤလၢဟံၣ်သ့ၣ်ဆှိအ့ရ့းန့ၣ်မ့ၢ်အဘၣ်မနုၤလဲၣ်န့ၣ်ဧါ.
7ဒီးခဲကနံၣ်အံၤနဘၣ်စံးလၢယခ့ယပှၤစီၤဒၤဝံးဒ်အံၤ,တၢ်သုးမုၢ်ဂီၤမုၢ်အယွၤစံးဒ်အံၤ,ယဟံးထီၣ်ကွံာ်နၤလၢသိအကရၢဖဲနပိာ်သိအခံ,ဒ်သိးနကကဲထီၣ်တၢ်အခိၣ်လၢယပှၤဂီၢ်မုၢ်အံၣ်စရ့လးအဖီခိၣ်လီၤ.
8ဒီးဖဲနလဲၤတၢ်တပူၤလၢ်လၢ်န့ၣ်ယအိၣ်ဒီးနၤ,ဒီးယဒီၣ်တဲာ်ကွံာ်နဒုၣ်နဒါခဲလၢာ်လၢနမဲာ်ညါ,ဒီးယပာ်လံနမံၤ,ဒ်ပှၤအဒိၣ်လၢဟီၣ်ခိၣ်ချၢအမံၤအသိးလံ.
9ဒီးယကပာ်တၢ်အလီၢ်လၢယပှၤဂီၢ်မုၢ်အံၣ်စရ့လးအဂီၢ်,ဒီးယကသူၣ်လီၤအီၤဒ်သိးအကအိၣ်ကဆိးလၢအလီၢ်ဒၣ်ဝဲ,ဒီးတဟးလၢၤဘၣ်,ဒီးပှၤအၢဖိတမၤနးမၤဖှီၣ်လၢၤဘၣ်အီၤ,ဒ်လၢအခီၣ်ထံးအသိး,
10ဒီးဒ်လၢမုၢ်တနံၤလၢယမၤလိာ်ပှၤစံၣ်ညီၣ်ကွီၢ်လၢယပှၤဂီၢ်မုၢ်အံၣ်စရ့လးအဖီခိၣ်အသိးန့ၣ်ဘၣ်.ဒီးယကမၤနၢၤမၤဃၣ်နဒုၣ်နဒါခဲလၢာ်လီၤ.ဒီးယစံးဘၣ်နၤလၢယွၤကသူၣ်န့ၢ်နၤလၢဟံၣ်တဖျၢၣ်လီၤ.
11ဒီးတုၤနမုၢ်နံၤပှဲၤထီၣ်,ဒီးနကက့ၤက့ၤဆူနပၢ်တဖၣ်အအိၣ်ဒီး,ယကဒုးဂဲၤဆၢထၢၣ်ပှၤလၢနချံနသၣ်အကျါ,လၢနဖိခွါတဖၣ်အကျါ,ဒီးယကဒုးအိၣ်ဂၢၢ်ဆိးကျၢၤအဘီအမုၢ်လီၤ.
12အဝဲဒၣ်တဂၤန့ၣ်ကသူၣ်ဟံၣ်တဖျၢၣ်လၢယမံၤအဂီၢ်,ဒီးယကဒုးအိၣ်ဂၢၢ်ဆိးကျၢၤအလီၢ်ပစိာ်လီၤစိၤလီၤထီလီၤ.
13ဒီးယကကဲထီၣ်အပၢ်,ဒီးအဝဲဒၣ်န့ၣ်ကကဲထီၣ်ယဖိခွါလီၤ.ဒီးယတၢ်သူၣ်ကညီၤယတၢ်သးကညီၤန့ၣ်ယတဟံးထီၣ်ကွံာ်လၢအီၤ,ဒ်ယဟံးထီၣ်ကွံာ်အီၤလၢပှၤအိၣ်လၢနမဲာ်ညါတဂၤအသိးန့ၣ်ဘၣ်.
14ဒီးယကဒုးအိၣ်ဂၢၢ်ဆိးကျၢၤအီၤလၢယဟံၣ်ပူၤ,ဒီးလၢယဘီယမုၢ်အပူၤ,ဒီးအလီၢ်ပစိာ်ကအိၣ်လီၤစိၤလီၤထီလီၤ.
15ဒ်တၢ်ကတိၤခဲလၢာ်န့ၣ်အသိး,ဒီးဒ်ကယဲၢ်တၢ်ထံၣ်လၢညါခီအသိးန့ၣ်,စီၤနၤသၣ်ကတိၤတၢ်ဒီးစီၤဒၤဝံးဒ်န့ၣ်အသိးလီၤ.
16ဒီးစီၤဒၤဝံးလဲၤနုာ်,ဒီးဆ့ၣ်နီၤလၢယွၤအမဲာ်ညါဒီးစံးဝဲဒၣ်,ယမ့ၢ်မတၤတဂၤလဲၣ်,ကစၢ်ယွၤဧၢ,ဒီးယပှၤဟံၣ်ဖိလၢနဆှၢယၤတုၤခဲကနံၣ်အံၤမ့ၢ်မနုၤတဖၣ်လဲၣ်.
17ဒီးကစၢ်ဧၢ,တၢ်န့ၣ်မ့ၢ်တၢ်အဆံးလၢနမဲာ်ညါမ့မ့ၢ်နကတိၤလၢနခ့နပှၤအဟံၣ်ဖိအဂ့ၢ်အကျိၤယံာ်ယံာ်ကလဲာ်န့ၣ်,ဒီးကွၢ်ယၤဒ်ပှၤအိၣ်လၢတၢ်အလီၢ်ထီၣ်ထီအသိးန့ၣ်ကစၢ်ယွၤဧၢ.
18စီၤဒၤဝံးကစံးဒံးလၢနၤလၢနခ့နပှၤအလၤကပီၤအဂီၢ်လၢမနုၤတမံၤလဲၣ်.အဂ့ၢ်ဒ်အံၤ,နသ့ၣ်ညါနခ့နပှၤလီၤ.
19ယွၤဧၢ,လၢနခ့နပှၤအဃိ,ဒီးဒ်နသးဒၣ်နဲအသိးန့ၣ်နမၤတၢ်အဒိၣ်ခဲလၢာ်အံၤဒ်သိးနကဘိးဘၣ်သ့ၣ်ညါတၢ်ဒိၣ်ခဲလၢာ်အံၤလီၤ.
20ယွၤဧၢ,ဒ်နၤအသိးတအိၣ်ဘၣ်,ဒီးကစၢ်လၢနမဲာ်ညါတအိၣ်ဘၣ်,ဒ်ကယဲၢ်တၢ်လၢပနၢ်ဟူလၢပနၢ်အသိးန့ၣ်လီၤ.
21ဒီးနဟီထီၣ်ကွံာ်ပှၤကလုာ်တဖၣ်လၢနပှၤဂီၢ်မုၢ်အမဲာ်ညါလၢနပှ့ၤက့ၤအီၤလၢအဲၤကူပတူးအပူၤသတးဒီး,ပှၤတကလုာ်လၢဟီၣ်ခိၣ်ချၢလီၤဂာ်နပှၤဂီၢ်မုၢ်,အံၣ်စရ့လးလၢယွၤလဲၤပှ့ၤလၢပှၤတကလုာ်လၢအဂီၢ်ဒၣ်ဝဲ,ဒ်သိးအကပာ်နမံၤလၢတၢ်ဒိၣ်,ဒီးတၢ်ပျံၤအလီၢ်န့ၣ်မ့ၢ်မနုၤတကလုာ်လဲၣ်.
22အဂ့ၢ်ဒ်အံၤ,နပာ်လံနပှၤဂီၢ်မုၢ်အံၣ်စရ့လးလၢနပှၤတကလုာ်လၢနဂီၢ်အစိၤစိၤအဃၣ်ဃၣ်,ဒီးနဲဒၣ်ယွၤဧၢ,နကဲထီၣ်လံအကစၢ်လံ.
23ဒီးခဲကနံၣ်အံၤကစၢ်ယွၤဧၢ,တၢ်ကတိၤလၢနကတိၤတၢ်လၢနခ့နပှၤအဂ့ၢ်အကျိၤ,ဒီးလၢအဟံၣ်အဂ့ၢ်အကျိၤန့ၣ်,မၤဂၢၢ်မၤကျၢၤအီၤလီၤစိၤလီၤထီ,ဒီးမၤတၢ်ဒ်နကတိၤတၢ်အသိးန့ၣ်တက့ၢ်.
24ဒီးမ်တၢ်မၤအသးဒ်သိးတၢ်ကပာ်ဒိၣ်နမံၤလီၤစိၤလီၤထီ,ဒီးစံး,တၢ်သုးမုၢ်ဂီၢ်မုၢ်အယွၤမ့ၢ်အံၣ်စရ့လးအကစၢ်,ဒီးမ်နခ့နပှၤစီၤဒၤဝံးအဟံၣ်အိၣ်ဂၢၢ်ဆိးကျၢၤလၢနမဲာ်ညါတက့ၢ်.
25အဂ့ၢ်ဒ်အံၤ,နဲဒၣ်ယကစၢ်ဧၢ,နစံးဘၣ်နခ့နပှၤလၢနကသူၣ်န့ၢ်အီၤလၢအဟံၣ်တဖျၢၣ်လီၤ.မၤသးဒ်န့ၣ်ဒီးနခ့နပှၤထံၣ်န့ၢ်တၢ်လၢအကဘါထုကဖၣ်တၢ်လၢနမဲာ်ညါလီၤ.
26ဒီးခဲကနံၣ်အံၤယွၤဧၢ,နမ့ၢ်ကစၢ်တဂၤန့ၣ်,ဒီးနစံးဘၣ်တဲဘၣ်နခ့နပှၤလၢတၢ်ဂ့ၤတၢ်ဝါန့ၣ်လီၤ.
27ဒီးခဲကနံၣ်အံၤမ်အဘၣ်နသးလၢနကဆိၣ်ဂ့ၤနခ့နပှၤအဟံၣ်,ဒ်သိးအကအိၣ်လၢနမဲာ်ညါလီၤထူလီၤယိာ်တက့ၢ်.အဂ့ၢ်ဒ်အံၤ,နဆိၣ်ဂ့ၤတၢ်,ယွၤဧၢ,ဒီးနတၢ်ဆိၣ်ဂ့ၤအိၣ်ဝဲလီၤထူလီၤယိာ်လီၤ.