1 John 1
1တၢ်လၢအအိၣ်ဝဲလၢအခီၣ်ထံးလံၤလံၤ,လၢပနၢ်ဟူလံ,လၢပထံၣ်လၢပမဲာ်လံ,လၢပကွၢ်ထံအီၤ,ဒီးလၢပဟံးအီၤလၢပစု,ဘၣ်ဃးဒီးတၢ်မူအကလုၢ်န့ၣ်,
2ဒီးတၢ်မူန့ၣ်အိၣ်ဖျါတ့ၢ်,ဒီးပထံၣ်လံ,ဒီးပအုၣ်ပသး,ဒီးပစံးဘၣ်တဲဘၣ်သုလၢတၢ်မူအထူအယိာ်လၢအအိၣ်တ့ၢ်ဒီးပၢ်အသိးန့ၣ်,ဒီးအိၣ်ဖျါထီၣ်လၢပှၤအံၤ,
3တၢ်လၢပထံၣ်ဘၣ်,ဒီးပနၢ်ဟူဘၣ်န့ၣ်,ပစံးဘၣ်တဲဘၣ်သုဒ်သိးသုဝဲသ့ၣ်စ့ၢ်ကီးသုကရ့လိာ်သုသးဒီးပှၤလီၤ.ဒီးပတၢ်ရ့လိာ်အံၤ,မ့ၢ်ပရ့လိာ်ပသးဒီးပၢ်,ဒီးအဖိခွါယ့ၣ်ရှူးခရံာ်လီၤ.
4တၢ်န့ၣ်တဖၣ်ပကွဲးန့ၢ်သုဒ်သိးသုတၢ်သးခုကလၢထီၣ်ပှဲၤထီၣ်လီၤ.
5ဒီးတၢ်စံၣ်တဲၤတဲလီၤလၢပနၢ်ဟူလၢအီၤ,ဒီးပစံးဘၣ်တဲဘၣ်က့ၤသုမ့ၢ်အအံၤ,ယွၤမ့ၢ်တၢ်ကပီၤ,ဒီးတၢ်ခံးတအိၣ်ဘၣ်လၢအပူၤနီတမံၤဘၣ်.
6ပမ့ၢ်စံးလၢပရ့လိာ်ပသးဒီးအီၤ,ဒီးလဲၤတၢ်လၢတၢ်ခံးကျါဒီး,ပကတိၤတၢ်ကဘျံးကဘျၣ်,ဒီးပတမၤဘၣ်တၢ်မ့ၢ်တၢ်တီဘၣ်.
7မ့မ့ၢ်ပမ့ၢ်လဲၤတၢ်လၢတၢ်ကပီၤအပူၤ,ဒ်အဝဲဒၣ်အိၣ်လၢတၢ်ကပီၤအပူၤအသိးန့ၣ်ဒီး,ပရ့လိာ်ပသးသကိးသကိး,ဒီးအဖိခွါယ့ၣ်ရှူးခရံာ်အသွံၣ်န့ၣ်သ့စီကွံာ်ပှၤလၢပတၢ်ဒဲးဘးခဲလၢာ်လီၤ.
8ပမ့ၢ်စံးလၢပတၢ်ဒဲးဘးတအိၣ်ဘၣ်ဒီး,မ့ၢ်ပလီလီၤပသး,ဒီးတၢ်မ့ၢ်တၢ်တီတအိၣ်ဘၣ်လၢပပူၤဘၣ်.
9ပမ့ၢ်တဲာ်လီၤကျဲၤလီၤပတၢ်ဒဲးဘးဒီး,အဝဲဒၣ်အကလုၢ်တီ,ဒီးတီဝဲလိၤဝဲဒ်သိးအကပျၢ်ကွံာ်ပတၢ်ဒဲးဘး,ဒီးသ့စီကွံာ်ပှၤလၢကယဲၢ်တၢ်အၢတၢ်သီခဲလၢာ်လီၤ.
10ပမ့ၢ်စံးလၢပတမၤဘၣ်တၢ်ဒဲးဘးဒီး,မ့ၢ်ပပာ်အီၤလၢပှၤကတိၤတၢ်ကဘျံးကဘျၣ်,ဒီးအကလုၢ်အကထါတအိၣ်ဘၣ်လၢပပူၤဘၣ်.