2 Timothy 2
1မၤသးဒ်န့ၣ်ဒီးယဖိဧၢ,အိၣ်ဒီးနဂံၢ်ဆူၣ်ထီၣ်နဘါဆူၣ်ထီၣ်လၢတၢ်ဘျုးတၢ်ဖှိၣ်လၢအအိၣ်လၢယ့ၣ်ရှူးခရံာ်အပူၤတက့ၢ်.
2ဒီးတၢ်လၢနနၢ်ဟူလၢယၤလၢပှၤအုၣ်အသးအါဂၤအမဲာ်ညါန့ၣ်,ဟ့ၣ်လီၤက့ၤအဝဲန့ၣ်,လၢပှၤအကလုၢ်တီတဖၣ်အစုပူၤလၢအသိၣ်လိပှၤဂၤစ့ၢ်ကီးကသ့န့ၣ်တက့ၢ်.
3မ်ဒ်န့ၣ်ဒီး,ဒိးတၢ်နးတၢ်ဖှီၣ်,ဒ်ယ့ၣ်ရှူးခရံာ်အသုးဖိလၢအဂ့ၤတဂၤအသိးန့ၣ်တက့ၢ်.
4ပှၤလၢအဒုးတၢ်န့ၣ်,ဒ်သိးအကမၤဘၣ်ပှၤလၢအမၢအဒုးတၢ်တဂၤအသးဒီး,တမၤသဘံၣ်ဘုၣ်အသးဒီးတၢ်ဖံးတၢ်မၤဘၣ်ဃးဒီးအအံၤတဃၣ်နီတဂၤဘၣ်.
5ဒီးပှၤမ့ၢ်ပြၢတၢ်ဒီး,မ့ၢ်တပြၢဘၣ်ဒ်အလုၢ်အလၢ်အသိးဘၣ်ဒီး,တၢ်တဒုးကုာ်ဘၣ်အီၤလၢခိၣ်သလုးဘၣ်.
6ပှၤမၤဟီၣ်ခိၣ်ဖိလၢအမၤတၢ်တဂၤန့ၣ်,ဂ့ၤဒိးန့ၢ်ဆိအတၤသၣ်န့ၣ်လီၤ.
7တၢ်လၢယစံးဘၣ်တဲဘၣ်တဖၣ်န့ၣ်,ဆိကမိၣ်တက့ၢ်.အဂ့ၢ်ဒ်အံၤ,ကစၢ်ကဟ့ၣ်နသူၣ်ဖးနသးဖးလၢတၢ်ခဲလၢာ်လီၤ.
8သ့ၣ်နီၣ်ထီၣ်က့ၤယ့ၣ်ရှူးခရံာ်လၢအဂဲၤဆၢထၢၣ်က့ၤလၢတၢ်သံ,စီၤဒၤဝံးအချံအသၣ်,ဒ်ယတၢ်သးခုအကစီၣ်အသိးန့ၣ်တက့ၢ်.
9လၢအဝဲဒၣ်အဃိန့ၣ်ယဘၣ်တၢ်နးတၢ်ဖှီၣ်ပၢၢ်ဒၣ်လဲာ်လၢယဘၣ်တၢ်စၢဃာ်,ဒ်ပှၤမၤအၢတၢ်အသိးန့ၣ်လီၤ.ဘၣ်ဆၣ်ဒီးယွၤအကလုၢ်အကထါတဘၣ်ဘၣ်တၢ်စၢဃာ်ဘၣ်.
10မၤသးဒ်န့ၣ်ဒီးယဝံသးစူၤတၢ်ခဲလၢာ်လၢပှၤဘၣ်တၢ်ဃုထၢအီၤအဂီၢ်,ဒ်သိးအဝဲသ့ၣ်စ့ၢ်ကီးကတုၤလၢတၢ်အုၣ်က့ၤခီၣ်က့ၤလၢယ့ၣ်ရှူးခရံာ်အပူၤ,အိၣ်ဒီးတၢ်လၤတၢ်ကပီၤအထူအယိာ်လီၤ.
11တၢ်ကတိၤအမ့ၢ်အတီမ့ၢ်တၢ်အံၤ,ပမ့ၢ်သံဃုာ်ဒီးအီၤဒီး,ပကမူဃုာ်စ့ၢ်ကီးဒီးအီၤလီၤ.
12ပမ့ၢ်ဝံသးစူၤတၢ်ဒီး,ပကကဲဃုာ်စီၤပၤဒီးအီၤစ့ၢ်ကီးလီၤ.ပမ့ၢ်သမၢအီၤဒီး,ကသမၢစ့ၢ်ကီးပှၤလီၤ.
13ပမ့ၢ်တမၤတီဘၣ်ပကလုၢ်ဘၣ်ဆၣ်ဒီး,အဝဲဒၣ်န့ၣ်အိၣ်ဒီးအကလုၢ်တီဒၣ်တၢ်လီၤ.သမၢလီၤအသးတသ့ဘၣ်.
14ဒုးသ့ၣ်နီၣ်ထီၣ်က့ၤအီၤလၢတၢ်တဖၣ်န့ၣ်တက့ၢ်.ဒီးဒ်သိးအသုတတဲးလိာ်ဃိလိာ်လၢတၢ်ကတိၤအဂ့ၢ်အကျိၤတဂ့ၤဒီး,သိၣ်အီၤသပှၢ်ပှၢ်လၢကစၢ်အမဲာ်ညါတက့ၢ်.တၢ်န့ၣ်တဂိာ်တသီၣ်ဘၣ်တၢ်နီတမံၤဘၣ်.မ့ၢ်အမၤကဒံကဒါပှၤလၢအကနၣ်ဝဲတဖၣ်လီၤ.
15ကျဲးစၢးကဲထီၣ်လၢပှၤဘၣ်ယွၤအသး,ပှၤမၤတၢ်ဖိလၢအမဲာ်ဆှးအလီၢ်တအိၣ်ဘၣ်,ပှၤနီၤဖးတၢ်မ့ၢ်တၢ်တီအကလုၢ်အကထါအဆၢတီတီလိၤလိၤန့ၣ်တက့ၢ်.
16မ့မ့ၢ်တၢ်အၢတၢ်သီအတၢ်ကတိၤကလီကလီန့ၣ်,ဟးဆှဲးအီၤတက့ၢ်.အဂ့ၢ်ဒ်အံၤ,ကလဲၤဆူတၢ်တယူးတယီၣ်ဘၣ်ယွၤအါထီၣ်အါထီၣ်န့ၣ်လီၤ.
17ဒီးအတၢ်ကတိၤန့ၣ်အီၣ်ဂီၤတၢ်ဒ်တၢ်ပူၤလီၢ်ပူၤဃဲာ်အသိးန့ၣ်လီၤ.လၢအဝဲသ့ၣ်အကျါ,မ့ၢ်စီၤဟူၤမ့းနဲ,ဒီးစီၤဖံလ့ၤတူးန့ၣ်လီၤ.
18ပှၤတဖၣ်န့ၣ်ဃၣ်ကွံာ်အသးလၢတၢ်မ့ၢ်တၢ်တီ,ဒီးစံးဝဲလၢတၢ်ဂဲၤဆၢထၢၣ်န့ၣ်ပူၤကွံာ်လံ,ဒီးမၤကဒံကဒါပှၤတနီၤနီၤအတၢ်နာ်လီၤ.
19ဘၣ်ဆၣ်ဒီးတၢ်အခီၣ်ထံးဘၣ်ဃးဒီးယွၤအိၣ်ဂၢၢ်အိၣ်ကျၢၤ,ဒီးအိၣ်ဝဲဒီးတၢ်စဲဃာ်ပနီၣ်အအံၤ,ကစၢ်သ့ၣ်ညါပှၤလၢအမ့ၢ်အတၢ်လီၤ.ဒီးကယဲၢ်ပှၤလၢအပှ့ၤဘၣ်ကစၢ်အမံၤတဂၤလၢ်လၢ်န့ၣ်,မ်အဟးဆှဲးတၢ်တတီတလိၤဘၣ်တက့ၢ်.
20အိၣ်လၢဟံၣ်ဖးဒိၣ်အပူၤထဲသပၢၤထူဒီးသပၢၤစ့ဧိၤတမ့ၢ်ဘၣ်,မ့ၢ်သပၢၤသ့ၣ်ဒီးသပၢၤဟီၣ်ခိၣ်အိၣ်စ့ၢ်ကီး,ဒီးတနီၤနီၤအိၣ်လၢတၢ်လၤကပီၤအဂီၢ်,ဒီးတနီၤနီၤလၢတၢ်လၤကပီၤတအိၣ်ဘၣ်အဂီၢ်လီၤ.
21မၤသးဒ်န့ၣ်ဒီး,ပှၤမ့ၢ်မၤကဆှီထီၣ်ကွံာ်အသးလၢတၢ်တဖၣ်န့ၣ်ဒီး,ကကဲထီၣ်သပၢၤလၢတၢ်ကမၤလၤကပီၤအီၤ,ဒီးစီဆှံ,ဒီးဂ့ၤလၢဟံၣ်ကစၢ်မၤတၢ်အဂီၢ်,ဒီးကတဲာ်ကတီၤအသးလၢကယဲၢ်တၢ်မၤအဂ့ၤအဂီၢ်လီၤ.
22ဒီးဃ့ၢ်ဟးဆှဲးဖိၣ်သၣ်ခွါအတၢ်သးကွံတဖၣ်,ဒီးလူၤတၢ်တီတၢ်လိၤ,တၢ်စူၢ်တၢ်နာ်,တၢ်အဲၣ်တၢ်ကွံ,တၢ်ဃူတၢ်ဖိး,အိၣ်ဒီးပှၤလၢအကိးထီၣ်ကစၢ်လၢအသးကဆှီတဖၣ်တက့ၢ်.
23မ့မ့ၢ်တၢ်သံကွၢ်ကလီကလီ,ဒီးတဂိာ်တသီၣ်ဘၣ်န့ၣ်,ဟးဆှဲးအီၤတက့ၢ်.အဂ့ၢ်ဒ်အံၤ,နသ့ၣ်ညါလၢအမၤအိၣ်ထီၣ်တၢ်အ့ၣ်လိာ်ဆိးက့လိာ်န့ၣ်လီၤ.
24ဒီးကစၢ်အခ့အပှၤန့ၣ်,တဘၣ်အ့ၣ်လိာ်ဆိးက့လိာ်ဘၣ်.မ့မ့ၢ်အဘၣ်မ့ၢ်ပှၤဝံသးစူၤလၢပှၤခဲလၢာ်,ပှၤသိၣ်လိတၢ်သ့,ပှၤကီၤအသးလီၤ.
25ဒီးဘၣ်သိၣ်က့ၤသီက့ၤပှၤလၢအဂ့ၢ်လိာ်ဘှီလိာ်ဒၣ်အတၢ်တဖၣ်န့ၣ်,လၢအသူၣ်စူၤအသးနွဲၤလီၤ.အဂ့ၢ်ဒ်အံၤ,ဘၣ်တဘၣ်ယွၤကဟ့ၣ်လီၤအီၤလၢတၢ်ပီၢ်ယၢ်လီၤအသး,ပၢၢ်လၢတၢ်သ့ၣ်ညါနီၢ်နီၢ်တၢ်မ့ၢ်တၢ်တီ,
26ဒီးကမၤပူၤဖျဲးထီၣ်ကွံာ်အသးလၢမုၣ်ကီၤလံၢ်အပျံၤသကွီၤလီၤ.အဂ့ၢ်ဒ်အံၤ,ဘၣ်တၢ်ဖီၣ်န့ၢ်အီၤဖဲအဝဲဒၣ်အသး,လၢအကစူၢ်အီၤန့ၣ်လီၤ.