3 John 1
1ယၤပှၤသးပှၢ်အံၤ,ယစံးဘၣ်ပှၤလၢတၢ်အဲၣ်အီၤစီၤကါယူး,လၢယအဲၣ်အီၤလၢတၢ်မ့ၢ်တၢ်တီအပူၤလီၤ.
2ပှၤလၢတၢ်အဲၣ်အီၤတဂၤဧၢ,လၢတၢ်ခဲလၢာ်အဖီခိၣ်န့ၣ်,ယဘါထုကဖၣ်လၢနကဘီၣ်ထီၣ်ညီထီၣ်,ဒီးအိၣ်ဆူၣ်အိၣ်ချ့ဒ်နသးဘီၣ်ထီၣ်ညီထီၣ်အသိးန့ၣ်လီၤ.
3အဂ့ၢ်ဒ်အံၤ,တုၤဒီပုၢ်ဝဲၢ်တဖၣ်ဟဲအုၣ်အသးလၢနတၢ်မ့ၢ်တၢ်တီအဂ့ၢ်အကျိၤ,ဒ်နလဲၤတၢ်လၢတၢ်မ့ၢ်တၢ်တီအပူၤအသိးန့ၣ်ဒီး,ယသးခုဒိၣ်မးလီၤ.
4ယတၢ်သးခုဒိၣ်န့ၢ်ယနၢ်ဟူလၢယဖိတဖၣ်လဲၤတၢ်လၢတၢ်မ့ၢ်တၢ်တီအပူၤန့ၣ်တအိၣ်ဘၣ်နီတမံၤဘၣ်.
5ပှၤလၢတၢ်အဲၣ်အီၤတဂၤဧၢ,တၢ်လၢနမၤလၢပဒီပုၢ်ဝဲၢ်ဒီးပှၤတမှံၤတဖၣ်န့ၣ်,နမၤလၢနကလုၢ်တီခဲလၢာ်လီၤ.
6နတၢ်အဲၣ်တၢ်ကွံအဂ့ၢ်အကျိၤန့ၣ်,အဝဲသ့ၣ်တဖၣ်အုၣ်အသးလၢတၢ်အိၣ်ဖှိၣ်အမဲာ်ညါလီၤ.ဒီးနမ့ၢ်မၤစၢၤအတၢ်လဲၤလၢညါ,ဒ်တၢ်ဂ့ၤဘၣ်ဃးဒီးယွၤအသိးဒီး,နကမၤတၢ်ဂ့ၤတၢ်ဘၣ်လီၤ.
7အဂ့ၢ်ဒ်အံၤ,အဝဲသ့ၣ်လဲၤဝဲလၢတၢ်အမံၤအဃိ,ဒီးတဟံးန့ၢ်ဘၣ်ပှၤကလုာ်တဖၣ်အတၢ်နီတမံၤဘၣ်.
8မၤသးဒ်န့ၣ်ဒီး,ဂ့ၤလၢပတူၢ်လိာ်ပှၤဒ်န့ၣ်အသိးတဖၣ်ဒ်သိးပကကဲပှၤမၤဃုာ်တၢ်ဒီးအီၤလၢတၢ်မ့ၢ်တၢ်တီအပူၤလီၤ.
9ယကွဲးန့ၢ်တ့ၢ်တၢ်အိၣ်ဖှိၣ်န့ၣ်အတၢ်တစဲးလီၤ.မ့မ့ၢ်စီၤဒံအိၤတြ့ၤဖံလၢအအဲၣ်ဒိးကဲလၢအခိၣ်တဂၤန့ၣ်,တတူၢ်လိာ်ဘၣ်ပှၤဘၣ်.
10မ်ဒ်န့ၣ်ဒီးယမ့ၢ်ဟဲဒီး,အဝဲဒၣ်အတၢ်မၤလၢအမၤဝဲ,ဒီးကတိၤလုၣ်ကိပှၤလၢတၢ်ကတိၤအအၢအသီန့ၣ်,ယကဒုးသ့ၣ်နီၣ်ထီၣ်အီၤလီၤ.ဒီးတကျၢၤဒံးဘၣ်အသးလၢတၢ်ထဲန့ၣ်ဘၣ်.အခိၣ်တလိာ်အကစၢ်ဒၣ်ဝဲတတူၢ်လိာ်ဘၣ်ဒီပုၢ်ဝဲၢ်န့ၣ်ဘၣ်.ဒီးပှၤလၢအသါကတူၢ်လိာ်အီၤန့ၣ်,အဝဲဒၣ်တြီ,ဒီးဟီထီၣ်ကွံာ်အီၤလၢတၢ်အိၣ်ဖှိၣ်အပူၤလီၤ.
11ပှၤလၢတၢ်အဲၣ်အီၤတဂၤဧၢ,ကွၢ်လိတၢ်အၢတၢ်သီတဂ့ၤ.မ့မ့ၢ်ကွၢ်လိတၢ်ဂ့ၤန့ၣ်တက့ၢ်.ပှၤလၢအမၤတၢ်ဂ့ၤန့ၣ်ဘၣ်ဃးဒီးယွၤ,ဒီးပှၤလၢအမၤတၢ်အၢန့ၣ်တထံၣ်ဘၣ်ယွၤဘၣ်.
12ပှၤခဲလၢာ်,ဒီးတၢ်မ့ၢ်တၢ်တီအကစၢ်ဒၣ်ဝဲအုၣ်အသးလၢစီၤဒ့ၤမ့ၤတြံၤအဂီၢ်,ဒီးပဝဲဒၣ်အံၤပအုၣ်ပသးစ့ၢ်ကီး,ဒီးသုသ့ၣ်ညါလၢပတၢ်အုၣ်ပသးန့ၣ်မ့ၢ်တၢ်မ့ၢ်တၢ်တီလီၤ.
13ယကွဲးတၢ်အဂ့ၢ်အကျိၤအိၣ်အါမံၤ,ဘၣ်ဆၣ်ဒီးတၢ်တမိၣ်ကွဲးဘၣ်ယသးလၢကသံၣ်ထံဒီးနီၣ်ကွဲးတၢ်ဘၣ်.
14မ့မ့ၢ်ယမုၢ်လၢ်လၢယကထံၣ်နၤချ့ချ့,ဒီးကတိၤလိာ်ပသးလၢထးခိၣ်သကိးထးခိၣ်လီၤ. မ်တၢ်မုာ်တၢ်ခုၣ်အိၣ်ဒီးနၤတက့ၢ်.ပသကိးတဖၣ်ကတိၤဒိၣ်နၤလီၤ.ကတိၤဒိၣ်ပသကိးတဖၣ်လၢအမံၤန့ၣ်တက့ၢ်.