Acts 24
1ဒီးယဲၢ်သီပူၤကွံာ်ဒီး,ပှၤလုၢ်တၢ်အခိၣ်,စီၤအၤနၤနံတဂၤ,အိၣ်ဒီးပှၤသူၣ်က့သးပှၢ်တဖၣ်,ဒီးပှၤသ့ကတိၤတၢ်,စီၤတ့ၢ်တူးလူးတဂၤ,လဲၤထီၣ်ဆူပဒိၣ်ဖးဒိၣ်အအိၣ်,ဒီးဆှိးစီၤပီလူးန့ၣ်လီၤ.
2ဒီးတၢ်ကိးန့ၢ်အီၤ,ဒီးစီၤတ့ၢ်တူးလူးပာ်တၢ်ကမၣ်လၢအလိၤဒီးစံးဝဲဒၣ်,တၢ်ဒိၣ်စီၤဖ့လံးဧၢ,ပဘၣ်တၢ်မုာ်လၢနၤအါမး,ဒီးလၢနအံးက့ၤကွၢ်က့ၤတၢ်အဃိဒီးပှၤတကလုာ်အံၤဘၣ်တၢ်ဘျုးတၢ်ဖှိၣ်သတးဒီး,
3လၢတၢ်ခဲလၢာ်,ဒီးတပူၤလၢ်လၢ်န့ၣ်,ပတူၢ်လိာ်အိၣ်ဒီးတၢ်စံးထီၣ်ပတြၢၤခဲလၢာ်လီၤ.
4ဒီးဒ်သိးယသုတမၤတံာ်တာ်နၤဃဲးဃဲးတဂ့ၤဒီး,ယဃ့ကညးနၤလၢနကဝံသးစူၤဒီးကနၣ်စာ်ပတၢ်ကတိၤစှၤဘီတက့ၢ်.
5အဂ့ၢ်ဒ်အံၤ,ပှၤတဂၤအံၤပထံၣ်န့ၢ်အီၤလၢအမ့ၢ်ပှၤအၢပှၤသီ,ဒီးပှၤအစုတလီၤဃုာ်ဘၣ်,နစၤရ့းဖိတကရၢအခိၣ်,ဒီးပှၤမၤတၢထီၣ်တၢလီၤကယဲၢ်ပှၤယူဒၤဖိအိၣ်လၢအလီၢ်တပူၤလၢ်လၢ်,
6ဒီးဂုာ်မၤဘၣ်အၢတၢ်လုၢ်အဟံၣ်,ဒီးပဖီၣ်န့ၢ်အီၤ,ဒီးပသးအိၣ်လၢပကစံၣ်ညီၣ်အီၤဒ်ပတၢ်သိၣ်တၢ်သီအသိးန့ၣ်လီၤ.
7ဘၣ်ဆၣ်ဒီးပှၤသုးဖိတကထိအခိၣ်,စီၤလူၤစံတဂၤန့ၣ်,ဟဲမၤဆူၣ်မၤစိးဒိၣ်မးဒီးဟံးန့ၢ်အီၤလၢပစုပူၤလီၤ.
8ဒီးမၤလိာ်ပှၤပာ်တၢ်ကမၣ်လၢအလိၤတဖၣ်,ဒ်သိးအကဟဲဆူနအိၣ်လီၤ.ဒီးနသံကွၢ်သံဒိးတၢ်သတးဒီးနကသ့ၣ်ညါတၢ်ကမၣ်လၢပပာ်လၢအလိၤခဲလၢာ်လီၤ.
9ဒီးပှၤယူဒၤဖိအၢၣ်လီၤအီလီၤဒီးစံးဝဲဒၣ်,တၢ်န့ၣ်တဖၣ်မ့ၢ်ဒ်န့ၣ်လီၤ.
10ဒီးပဒိၣ်ဖးဒိၣ်ကျၢၢ်ကျာ်တၢ်ဆူစီၤပီလူးအအိၣ်ဒ်သိးအကကတိၤတၢ်သတးဒီး,အဝဲဒၣ်ကတိၤဆၢဝဲ,မ့ၢ်ယသ့ၣ်ညါလၢနစံၣ်ညီၣ်ပှၤတကလုာ်အံၤအါနံၣ်ဒီး,ယစံးဆၢတၢ်လၢယဂီၢ်အိၣ်ဒီးယသးခုဒိၣ်တက့ၢ်လီၤ.
11အဂ့ၢ်ဒ်အံၤ,လၢယလဲၤထီၣ်ဘူၣ်တၢ်ဘါတၢ်လၢယရူၤၡလ့ၣ်အပူၤဒီးအါန့ၢ်တဆံခံနံၤတအိၣ်ဒံးဘၣ်န့ၣ်,နသ့ၣ်ညါသ့လီၤ.
12ဒီးယတဲးလိာ်ဃိလိာ်ယသးဒီးပှၤတဂၤဂၤလၢတၢ်လုၢ်ဟံၣ်ပူၤမ့ၢ်ဂ့ၤ,ဒီးယမၤတၢထီၣ်တၢလီၤပှၤဂီၢ်မုၢ်လၢဘူၣ်ဘျီၣ်ပူၤမ့ၢ်ဂ့ၤ,လၢဝ့ၢ်ပူၤမ့ၢ်ဂ့ၤ,အဝဲသ့ၣ်တထံၣ်န့ၢ်ဘၣ်ယၤဘၣ်.
13ဒီးတၢ်ကမၣ်လၢအပာ်လၢယလိၤခဲကနံၣ်အံၤ,ထုးပှၤအုၣ်အသးတန့ၢ်ဘၣ်.
14ဘၣ်ဆၣ်ဒီး,ယအၢၣ်လီၤအီလီၤတၢ်အံၤလၢနမဲာ်ညါ,ဒ်ကျဲလၢအဝဲသ့ၣ်ကိးလၢစုတလီၤဃုာ်ဘၣ်အသိးန့ၣ်,ယဘူၣ်ထီၣ်ဘါထီၣ်ပပၢ်သ့ၣ်အကစၢ်,ဒီးယနာ်တၢ်ခဲလၢာ်ဒ်တၢ်သိၣ်တၢ်သီ,ဒီးဝံအတၢ်ကွဲးအသးတဖၣ်အသိးန့ၣ်လီၤ.
15ဒီးယအိၣ်ဒီးတၢ်မုၢ်လၢ်ဘၣ်ဃးဒီးယွၤလၢအဝဲသ့ၣ်အကစၢ်ဒၣ်ဝဲအၢၣ်လီၤအီလီၤ,လၢပှၤသံအတီမ့ၢ်ဂ့ၤ,တတီဘၣ်မ့ၢ်ဂ့ၤ,ကဂဲၤဆၢထၢၣ်က့ၤလီၤ.
16ဒီးလၢတၢ်အံၤ,ယဂဲၤလိာ်ယသးတထံၣ်ဃီဒ်သိးလၢယွၤမ့ၢ်ဂ့ၤ,ပှၤကညီမ့ၢ်ဂ့ၤ,ယသးလၢအသ့ၣ်ညါဒၣ်တၢ်သုတပာ်တၢ်ကမၣ်လၢယလိၤတဂ့ၤလီၤ.
17ဒီးအါနံၣ်အါလါပူၤကွံာ်ဒီး,ယဟဲစိာ်တၢ်ဟ့ၣ်သးကညီၤဆူပှၤတကလုာ်ဒၣ်ယဲအအိၣ်,ဒီးယမၤဘူၣ်တၢ်လီၤ.
18တၢ်မၤအသးအဖၢမုၢ်ဒီး,တအိၣ်ဘၣ်ဒီးပှၤဂီၢ်မုၢ်ဘၣ်,ဒီးတအိၣ်ဘၣ်ဒီးတၢ်တၢထီၣ်တၢလီၤဘၣ်,အဝဲသ့ၣ်ထံၣ်န့ၢ်ယၤလၢယမၤကဆှီယသးလၢတၢ်လုၢ်အဟံၣ်ပူၤန့ၣ်လီၤ.မ့မ့ၢ်ပှၤယူဒၤဖိတနီၤနီၤဟဲလၢအၤစံအပူၤ(မၤတၢထီၣ်တၢလီၤတၢ်)လီၤ.
19ပာ်တၢ်ကမၣ်လၢယလိၤအလီၢ်မ့ၢ်အိၣ်ဒီး,အဝဲသ့ၣ်ဂ့ၤအိၣ်ဖဲအံၤ,ဒ်သိးအကပာ်တၢ်ကမၣ်လၢယလိၤလီၤ.
20မ့တမ့ၢ်ဘၣ်ဒ်န့ၣ်ဒီး,ပှၤတဖၣ်အံၤ,လၢယအိၣ်လၢပှၤသးပှၢ်အတၢ်အိၣ်ဖှိၣ်အမဲာ်ညါဒီး,မ့ၢ်ထံၣ်တၢ်ကမၣ်လၢယလိၤတမံၤမံၤဒီး,မ်အကစၢ်ဒၣ်ဝဲကစံးဒၣ်ဝဲတက့ၢ်.
21တၢ်ကမၣ်မ့ၢ်အိၣ်ဒီး,ကမ့ၢ်ထဲအံၤတဘီ,လၢယအိၣ်ဆၢထၢၣ်လၢအကျါဒီး,ယကိးပသူထီၣ်,လၢပှၤသံကဂဲၤဆၢထၢၣ်က့ၤအဂ့ၢ်န့ၣ်,ယဘၣ်တၢ်စံၣ်ညီၣ်လၢသုမဲာ်ညါ,လၢမုၢ်တနံၤအံၤလီၤ.
22ဒီးစီၤဖ့လံးသ့ၣ်ညါတၢ်ဘၣ်ဃးဒီးကျဲန့ၣ်လီၤတံၢ်လီၤဆဲးတက့ၢ်ဒီး,သုးနံၤသုးသီဒီးစံးဝဲဒၣ်,တုၤပှၤသုးဖိတကထိအခိၣ်စီၤလူၤစံဟဲတုၤဒီး,ယကသ့ၣ်ညါလီၤတံၢ်သုတၢ်လီၤ.
23ဒီးမၤလိာ်ပှၤသုးဖိတကယၤအခိၣ်တဂၤ,ဒ်သိးတၢ်ကပၢၤအီၤ,ဒီးဒ်သိးအကအိၣ်ထူၣ်ဖျဲး,ဒီးဒ်သိးအဘူးအတံၢ်မ့ၢ်ဟ့ၣ်လုၢ်အီၣ်လုၢ်အီအီၤမ့ၢ်ဂ့ၤ,မ့ၢ်ဟဲအိၣ်သကိးအီၤမ့ၢ်ဂ့ၤဒီး,အသုတတြီတၢ်တဂ့ၤလီၤ.
24ဒီးအနံၤအသီတနီၤနီၤပူၤကွံာ်ဒီး,စီၤဖ့လံးဟဲဒီးအမါ,ပှၤယူဒၤအမုၣ်,နီၢ်ဒြူၤစံးလ့ၤ,ဒီးကိးက့ၤစီၤပီလူး,ဒီးဒိကနၣ်အကလုၢ်လၢတၢ်စူၢ်က့ၤနာ်က့ၤခရံာ်အဂ့ၢ်အကျိၤလီၤ.
25ဒီးတုၤအစံၣ်တဲၤတဲလီၤတၢ်လၢတၢ်တီတၢ်လိၤအဂ့ၢ်,ဒီးတၢ်ကီၤသူၣ်ကီၤသးအဂ့ၢ်,ဒီးတၢ်စံၣ်ညီၣ်ခဲကိာ်အဂ့ၢ်ဒီး,စီၤဖ့လံးကနိးကစုာ်ဒီးကတိၤဆၢဝဲ,ခဲကနံၣ်အံၤက့ၤက့ၤတက့ၢ်.ဒီးအကတီၢ်လၢအဂ့ၤအဘၣ်ခဲကိာ်,ယကကိးက့ၤနၤလီၤ.
26ဒီး(ဒ်သိးအကပျၢ်အီၤဒီး)မုၢ်လၢ်ဝဲလၢစီၤပီလူးကဟ့ၣ်စ့,ဒီးကိးက့ၤအီၤဒုးဒုး,ဒီးကတိၤတၢ်ဒီးအီၤလီၤ.
27ဘၣ်ဆၣ်ဒီးခံနံၣ်ပှဲၤထီၣ်ဒီး,စီၤပီၤကံၤဖ့စတူးဟဲလၢစီၤဖ့လံးအလီၢ်,ဒီးစီၤဖ့လံးတၢ်မိၣ်ဘၣ်ဘျုးဘၣ်ဖှိၣ်အသးလၢပှၤယူဒၤဖိအမဲာ်ညါသတးဒီး,လဲၤသဒၣ်စီၤပီလူးလၢအဘၣ်စၢဃာ်အသးလီၤ.