Acts 7
1ဒီးပှၤလုၢ်တၢ်အခိၣ်စံးဝဲဒၣ်,တၢ်န့ၣ်တဖၣ်,မ့ၢ်အဒ်န့ၣ်ဧါ.
2ဒီးအဝဲဒၣ်စံး,ပှၤဒီပုၢ်ဝဲၢ်သ့ၣ်,ဒီးပၢ်သ့ၣ်ဧၢ,ကနၣ်တက့ၢ်.လၢပပၢ်စီၤအၤဘြၤဟၣ်တချုးအိၣ်ဝဲဆိးဝဲလၢဃၤရၣ်ဒီး,တၢ်လၤတၢ်ကပီၤအကစၢ်လီၣ်ဖျါထီၣ်အသးလၢအီၤလၢမ့းစပတၤမံအပူၤ,
3ဒီးစံးဘၣ်အီၤ,ဟးထီၣ်ကွံာ်လၢနထံနကီၢ်,ဒီးလၢနဘူးနတံၢ်အအိၣ်,ဒီးလဲၤဆူထံဆူကီၢ်လၢယကဒုးနဲၣ်နၤတက့ၢ်.
4တုၤနုၤတစုဟးထီၣ်ကွံာ်ဝဲလၢကီၢ်က့ၤစ့း,ဒီးလဲၤအိၣ်ဝဲဆိးဝဲလၢဃၤရၣ်,ဒီးအပၢ်သံဝဲအလီၢ်ခံဒီး,ဟးထီၣ်ဖဲန့ၣ်ဆူကီၢ်လၢသုအိၣ်သုဆိးလၢအပူၤခဲကနံၣ်အံၤလီၤ.
5ဒီးတဟ့ၣ်လီၤဘၣ်အတၢ်န့ၢ်သါလၢအပူၤနီတမံၤဘၣ်.ထဲအခီၣ်ယီၢ်အလီၢ်တပူၤဧိၤ,တဟ့ၣ်ဘၣ်ဝဲဘၣ်.ဒီးလၢစီၤအၤဘြၤဟၣ်တချုးထီၣ်ဖိဒံးဘၣ်န့ၣ်,စံးပာ်ဝဲလၢအကဟ့ၣ်န့ၢ်သါအီၤဒီးအချံအသၣ်လၢအလီၢ်ခံလီၤ.
6ဒီးယွၤစံးဝဲဒ်အံၤ,အချံအသၣ်ကအိၣ်တမှံၤလၢတခီဘီမုၢ်အပူၤ,ဒီးကဘၣ်တၢ်မၢကဲကုၢ်အီၤဒီးတၢ်မၤအၢမၤနးအီၤအနံၣ်လွံၢ်ကယၤလီၤ.
7ဒီးယွၤစံးဝဲဒၣ်,ပှၤတကလုာ်လၢအမၢကဲကုၢ်အီၤန့ၣ်,ယကစံၣ်ညီၣ်လီၤ.ဒီးတၢ်န့ၣ်အလီၢ်ခံဒီးအဝဲသ့ၣ်ကဟးထီၣ်,ဒီးကမၤယတၢ်ဖဲအံၤလီၤ.
8ဒီးဟ့ၣ်လီၤအီၤလၢတၢ်ကူးတရံးအတၢ်အၢၣ်လီၤအီလီၤလီၤ.ဒီးဒ်န့ၣ်အသိး,စီၤအၤဘြၤဟၣ်ထီၣ်ဖိစီၤအံၤစဲး,ဒီးကူးတရံးအီၤလၢမုၢ်ဃိးနံၤတနံၤလီၤ.
9ဒီးစီၤအံၤစဲးထီၣ်ဖိစီၤယၤကိာ်,ဒီးစီၤယၤကိာ်ထီၣ်ဖိပှၤတဆံခံဒူၣ်အပၢ်လီၤ.ဒီးပှၤတဆံခံဒူၣ်အပၢ်န့ၣ်,အသးက့ၣ်ဝဲ,ဒီးဆါကွံာ်စီၤယိၤသးဆူအဲၤကူပတူးအပူၤ,ဒီးယွၤအိၣ်ဒီးအီၤ,
10ဒီးမၤပူၤမၤဖျဲးအီၤလၢအတၢ်နးတၢ်ဖှီၣ်ခဲလၢာ်,ဒီးဟ့ၣ်လီၤအတၢ်ဘျုးတၢ်ဖှိၣ်,ဒီးအတၢ်ကူၣ်ဘၣ်ကူၣ်သ့လၢအဲၤကူပတူးအစီၤပၤဖၤရိၤအမဲာ်ညါ,ဒီးအဝဲဒၣ်ပာ်အီၤလၢအဲၤကူပတူးအခိၣ်,ဒီးအဟံၣ်ဒီဖျၢၣ်ညါအခိၣ်လီၤ.
11ဒီးတၢ်သၣ်ဝံၤလီၤဒိအိၣ်ထီၣ်လၢကီၢ်အဲၤကူပတူးအပူၤ,ဒီးကီၢ်ကနၤဧၣ်အပူၤဒီဒီကီၢ်ဒီဒီကီၢ်,ဒီးဘၣ်နးဘၣ်ဖှီၣ်ဒိၣ်မး,ဒီးပပၢ်သ့ၣ်တထံၣ်န့ၢ်ဘၣ်တၢ်အီၣ်တၢ်အီဘၣ်လီၤ.
12ဒီးစီၤယၤကိာ်နၢ်ဟူလၢဘုဧိၤဟုဧိၤအိၣ်လၢကီၢ်အဲၤကူပတူး,ဒီးမၢပပၢ်သ့ၣ်လဲၤလီၤဆိဝဲလီၤ.
13ဒီးပှဲၤထီၣ်ခံဘျီတဘျီန့ၣ်,စီၤယိၤသးလီၣ်ဖျါထီၣ်က့ၤအသးလၢအဒီပုၢ်ဝဲၢ်,ဒီးစီၤယိၤသးအဘူးအတံၢ်အိၣ်ဖျါထီၣ်လၢစီၤပၤဖၤရိၤလီၤ.
14ဒီးစီၤယိၤသးမၢပှၤလဲၤကိးက့ၤအပၢ်စီၤယၤကိာ်,ဒီးကယဲၢ်ပှၤဒီဘူးဒီတံၢ်ဒီးအီၤ,နွံဆံယဲၢ်ဂၤခဲလၢာ်လီၤ.
15ဒီးစီၤယၤကိာ်လဲၤလီၤဆူအဲၤကူပတူးအပူၤ,ဒီးအကစၢ်ဒၣ်ဝဲသံ,ဒီးပပၢ်သ့ၣ်စ့ၢ်ကီးလီၤ.
16ဒီးဘၣ်တၢ်လဲၤယိးအီၤဆူၡက့ၣ်,ဒီးတၢ်ပာ်အီၤလၢတၢ်သွၣ်ခိၣ်အပူၤ,လၢစီၤအၤဘြၤဟၣ်ပှ့ၤလၢစ့လၢစီၤၡက့ၣ်အပၢ်,စီၤဃမိၢ်အဖိခွါတဖၣ်အစုပူၤလီၤ.
17ဒီးတုၤတၢ်စံးပာ်အကတီၢ်လၢယွၤဆိၣ်တၢ်ဒီးစီၤအၤဘြၤဟၣ်အိၣ်ဘူးထီၣ်ဒီး,ပှၤတဖၣ်န့ၣ်အါထီၣ်ဂီၢ်ထီၣ်,ဒီးဂုၤထီၣ်ပသီထီၣ်လၢအဲၤကူပတူး,
18တုၤလီၤလၢစီၤပၤအဂၤတဂၤဂဲၤဆၢထၢၣ်လၢအတသ့ၣ်ညါဘၣ်စီၤယိၤသးန့ၣ်လီၤ.
19အဝဲတဂၤမၤပပှၤကလုာ်န့ၣ်ဒီးတၢ်ကူၣ်တၢ်ဆး,ဒီးမၤအၢမၤသီပပၢ်သ့ၣ်,ဒီးကွံာ်တ့ၢ်ကွံာ်အဖိအလံၤ,ဒ်သိးအသုတကဲထီၣ်တဂ့ၤလီၤ.
20လၢအကတီၢ်ဖဲန့ၣ်ပှၤအက့ၢ်အဂီၤဂ့ၤလၢယွၤအမဲာ်ညါ,စီၤမိၤရှ့တဂၤအိၣ်ဖျဲၣ်,ဒီးတၢ်လုၢ်အီၣ်အီၤလၢအပၢ်အဟံၣ်ပူၤသၢလါလီၤ.
21ဒီးလၢအဘၣ်ကွံာ်တ့ၢ်ကွံာ်န့ၣ်,ဖၤရိာ်အဖိမုၣ်ထုးထီၣ်အီၤ,ဒီးလုၢ်က့ၤအီၤ,ဒီးပာ်အီၤလၢအဖိခွါဒၣ်ဝဲလီၤ.
22ဒီးစီၤမိၤရှ့မၤလိပှၤအဲၤကူပတူးဖိအတၢ်ကူၣ်သ့ကူၣ်ဘၣ်ခဲလၢာ်,ဒီးအိၣ်ဒီးအစိအကမီၤလၢအတၢ်ကတိၤ,ဒီးလၢအတၢ်မၤတဖၣ်လီၤ.
23ဒီးတုၤအသးပှဲၤထီၣ်အနံၣ်လွံၢ်ဆံဒီး,တၢ်လိၣ်ထီၣ်လၢအသးလၢအကလဲၤအိၣ်သကိးအဒီပုၢ်ဝဲၢ်,ပှၤအံၣ်စရ့လးဖိလီၤ.
24ဒီးထံၣ်မတၤတဂၤဘၣ်တၢ်မၤအီၤတတီတလိၤဘၣ်,ဒီးမၤစၢၤအီၤ,ဒီးမၤဆၢတၢ်အၢလၢပှၤလၢအဘၣ်တၢ်မၤအၢအီၤအဂီၢ်,ဒီးကျီကွံာ်ပှၤအဲၤကူပတူးဖိတဂၤလီၤ.
25ဒီးဆိကမိၣ်ဝဲလၢအဒီပုၢ်ဝဲၢ်သ့ၣ်တဖၣ်န့ၣ်,အနၢ်ကပၢၢ်လၢယွၤကဟ့ၣ်လီၤအတၢ်အုၣ်က့ၤခီၣ်က့ၤ,လၢသါစုပူၤလီၤ.ဘၣ်ဆၣ်ဒီးအဝဲသ့ၣ်အနၢ်တပၢၢ်ဘၣ်ဝဲဘၣ်.
26ဒီးမုၢ်ဆ့ၣ်ထီၣ်တနံၤန့ၣ်,ပှၤထီဒါလိာ်အသးအဖၢမုၢ်ဒီး,အဝဲဒၣ်ဒုးနဲၣ်အသးလၢအီၤ,ဒီးသဆၣ်ထီၣ်အခံဒ်သိးအကဃူလိာ်ဖိးလိာ်ဝဲ,ဒီးစံးဝဲဒၣ်,ပှၤကညီသ့ၣ်ဧၢ,သုမ့ၢ်ဒီပုၢ်ဝဲၢ်လီၤ.ဘၣ်မနုၤလၢသုမၤလိာ်သုသးလၢတၢ်တတီတလိၤဘၣ်လဲၣ်.
27ဒီးပှၤလၢအမၤအဂိၤမီၣ်တတီတလိၤဘၣ်တဂၤန့ၣ်,ဆီၣ်ကွံာ်အီၤဒီးစံးဝဲဒၣ်,မ့ၢ်မတၤပာ်နၤလၢပဒိၣ်ပပှၢ်,ဒီးပှၤစံၣ်ညီၣ်ကွီၢ်လၢပဖီခိၣ်တဂၤလဲၣ်.
28ဒ်နမၤသံပှၤအဲၤကူပတူးဖိမဟါအသိးန့ၣ်မ့ၢ်နကမၤသံယၤစ့ၢ်ကီးဧါ.
29ဒီးစီၤမိၤရှ့ဟးဃ့ၢ်ဝဲလၢတၢ်ကတိၤအံၤအဃိ,ဒီးလဲၤအိၣ်တမှံၤလၢကီၢ်မံးဒယၣ်,ဒီးထီၣ်ဖိအဖိခွါခံဂၤဖဲန့ၣ်လီၤ.
30ဒီးတုၤအနံၣ်လွံၢ်ဆံပှဲၤထီၣ်ဒီး,ယွၤအကလူးတဂၤလီၣ်ဖျါထီၣ်အသးလၢအီၤလၢသ့ၣ်တၤဆှုၣ်သပှီၤ,လၢမ့ၣ်အူလၣ်ကျါ,လၢကစၢၢ်စံၤနါအပှၢ်မုၢ်ကနၢလီၤ.
31ဒီးတုၤစီၤမိၤရှ့ထံၣ်ဝဲန့ၣ်ဒီး,ကမၢကမၣ်ဝဲလၢတၢ်အိၣ်ဖျါထီၣ်န့ၣ်အဃိ,ဒီးသုးဘူးဃီၤအသးဒ်သိးအကကွၢ်ထံကွၢ်ဆးအဖၢမုၢ်ဒီး,ကစၢ်အကလုၢ်လီၤဘၣ်အီၤ,
32ယဲဒၣ်အံၤယမ့ၢ်နပၢ်သ့ၣ်အကစၢ်,စီၤအၤဘြၤဟၣ်အကစၢ်,ဒီးစီၤအံၤစဲးအကစၢ်,ဒီးစီၤယၤကိာ်အကစၢ်လီၤ.ဒီးစီၤမိၤရှ့ကနိးကစုာ်,ဒီးကွၢ်ဝဲတဘူၣ်ဘၣ်လီၤ.
33ဒီးကစၢ်စံးဘၣ်အီၤ,ဘီၣ်လီၤကွံာ်နခီၣ်ဖံးလၢနခီၣ်လိၤတက့ၢ်.အဂ့ၢ်ဒ်အံၤ,တၢ်အလီၢ်လၢနယီၢ်လီၤန့ၣ်,မ့ၢ်ဟီၣ်ခိၣ်စီဆှံလီၤ.
34ယခ့ယပှၤဘၣ်တၢ်မၤအၢမၤသီအီၤလၢအဲၤကူပတူးအပူၤန့ၣ်,ထံၣ်ဒီးယထံၣ်လံ.ဒီးအကအုကစွါန့ၣ်ယနၢ်ဟူလံ,ဒီးယဟဲလီၤဒ်သိးယကမၤပူၤဖျဲးအီၤလီၤ.ဒီးခဲကနံၣ်အံၤဟဲဃီၤ,ယကမၢနလဲၤဆူအဲၤကူပတူးအပူၤလီၤ.
35တၢ်လၢစီၤမိၤရှ့တဂၤန့ၣ်,လၢပှၤညိကွံာ်အီၤဒီးစံးဝဲဒၣ်,မ့ၢ်မတၤပာ်နၤလၢပဒိၣ်ပပှၢ်,ဒီးပှၤစံၣ်ညီၣ်ကွီၢ်တဂၤလဲၣ်န့ၣ်,ယွၤမၢလီၤအီၤဒ်သိးအကကဲပဒိၣ်ဒီးပှၤအုၣ်က့ၤခီၣ်က့ၤတၢ်,လၢကလူးလၢအအိၣ်ဖျါထီၣ်လၢအီၤလၢသ့ၣ်တၤဆှုၣ်သပှီၤအပူၤတဂၤ,အစုပူၤလီၤ.
36ဒီးအဝဲဒၣ်ဆှၢထီၣ်အီၤ,ဒီးမၤတၢ်လီၤလိၢ်လီၤလး,ဒီးတၢ်ပနီၣ်လီၤလးလၢကီၢ်အဲၤကူပတူးအပူၤ,ဒီးလၢပီၣ်လဲၣ်ဂီၤ,ဒီးလၢပှၢ်မုၢ်ကနၢအနံၣ်လွံၢ်ဆံလီၤ.
37အအံၤမ့ၢ်စီၤမိၤရှ့တဂၤလၢအစံးဘၣ်ပှၤအံၣ်စရ့လးဖိ,ကစၢ်ယွၤကဒုးဂဲၤဆၢထၢၣ်န့ၢ်သုဝံတဂၤလၢသုဒီပုၢ်ဝဲၢ်အကျါ,ဒ်ယၤအံၤအသိးလီၤ.အဝဲဒၣ်န့ၣ်,သုဘၣ်ဒိကနၣ်အကလုၢ်လီၤ.
38အအံၤမ့ၢ်ပှၤလၢအအိၣ်ဒီးတၢ်အိၣ်ဖှိၣ်လၢပှၢ်မုၢ်ကနၢ,အိၣ်ဒီးကလူးလၢအကတိၤတၢ်ဒီးအီၤလၢကစၢၢ်စံၤနါ,ဒီးအိၣ်ဒီးပပၢ်သ့ၣ်လၢအဒိးန့ၢ်တၢ်အကလုၢ်မူ,ဒ်သိးအကဟ့ၣ်လီၤက့ၤလၢပှၤပဝဲဒၣ်အံၤလီၤ.
39အဝဲဒၣ်န့ၣ်,ပပၢ်သ့ၣ်တစူၢ်ဘၣ်ဝဲဘၣ်,ဒီးဆီၣ်ကွံာ်အီၤ,ဒီးက့ၤက့ၤဝဲလၢအသးဆူအဲၤကူပတူး,
40ဒီးစံးဘၣ်စီၤအၤဟရိၣ်,တ့န့ၢ်ပှၤလၢကစၢ်တဖၣ်လၢအကလဲၤလၢပမဲာ်ညါတက့ၢ်.အဂ့ၢ်ဒ်အံၤ,တၢ်လၢစီၤမိၤရှ့လၢအဆှၢထီၣ်ပှၤလၢကီၢ်အဲၤကူပတူးအပူၤတဂၤအံၤ,တၢ်မၤအသးလၢအီၤဒ်လဲၣ်ဒ်လဲၣ်န့ၣ်,ပတသ့ၣ်ညါဘၣ်.
41ဒီးလၢမုၢ်နံၤတဖၣ်န့ၣ်,အဝဲသ့ၣ်တ့ဂီၤဖံးဖိတဒု,ဒီးလုၢ်တၢ်လုၢ်လၢတၢ်ဂီၤန့ၣ်,ဒီးမုာ်လၤဝဲလၢတၢ်လၢအမၤလၢအစုဒၣ်ဝဲလီၤ.
42ဒီးယွၤဃၣ်ဒူချၢအသးလၢအီၤ,ဒီးညိကွံာ်အီၤဒ်သိးအကဘါထီၣ်မူခိၣ်အသုးမုၢ်,ဒ်တၢ်ကွဲးအသးလၢဝံသ့ၣ်တဖၣ်အလံာ်ပူၤအသိးလီၤ. အံၣ်စရ့လးအဟံၣ်ဖိသ့ၣ်ဧၢ,အနံၣ်လွံၢ်ဆံညါလၢပှၢ်မုၢ်ကနၢန့ၣ်,သုဟဲစိာ်န့ၢ်ယၤလၢတၢ်ကျီသံကွံာ်,ဒီးတၢ်လုၢ်စ့ၢ်ကီးဧါ.
43ဒီးသုစိာ်ထီၣ်မိၤလးအဒဲ, ဒီးသုကစၢ်ရၣ်ဖၣ်အဆၣ်အဖီလီၤ. အဝဲန့ၣ်မ့ၢ်တၢ်ဂီၤလၢသုမၤ,ဒ်သိးသုကဘူၣ်ထီၣ်ဘါထီၣ်အီၤလီၤ. ဒီးယကလဲၤစိာ်သုဆူဘၤဘူၤလိၣ်အဝၢ်ဘးခီလီၤ.
44ပပၢ်သ့ၣ်အိၣ်ဒီးတၢ်အုၣ်အသးအဒဲလၢပှၢ်မုၢ်ကနၢ,ဒ်ပှၤလၢအကတိၤတၢ်ဒီးစီၤမိၤရှ့တဂၤမၤလိာ်ဝဲ,ဒ်သိးအကမၤအီၤဒ်အက့ၢ်အဂီၤလၢအထံၣ်ဝဲအသိးန့ၣ်လီၤ.
45ဒီးပပၢ်သ့ၣ်ဒိးန့ၢ်ဝဲ,ဒီးဟဲစိာ်အီၤဒီးစီၤယိၤရှူဆူတၢ်န့ၢ်သါပှၤကလုာ်တဖၣ်လၢယွၤညိကွံာ်အီၤလၢပပၢ်သ့ၣ်အမဲာ်ညါ,တုၤလီၤလၢစီၤဒၤဝံးအမုၢ်နံၤန့ၣ်လီၤ.
46အဝဲဒၣ်န့ၣ်ဘၣ်တၢ်ဘျုးတၢ်ဖှိၣ်လၢယွၤ,ဒီးဃ့တၢ်လၢအဂီၢ်ဒၣ်ဝဲ,လၢအကဃုန့ၢ်စီၤယၤကိာ်အကစၢ်အအိၣ်အလီၢ်လီၤ.
47ဘၣ်ဆၣ်ဒီးစီၤၡလိၤမိၤမၤထီၣ်အဟံၣ်လီၤ.
48မ့ၢ်နာ်သက့ဒ်န့ၣ်ဒီး,တၢ်အထီကတၢၢ်တဂၤတအိၣ်တဆိးဘၣ်ဝဲလၢဟံၣ်လၢပှၤမၤလၢအစုဘၣ်.ဒ်ဝံစံးဝဲအသိး,
49မူခိၣ်မ့ၢ်ယလီၢ်ပစိာ်, ဒီးဟီၣ်ခိၣ်မ့ၢ်ယခီၣ်ယီၢ်အလီၢ်လီၤ. သုကမၤဟံၣ်လၢယဂီၢ်မနုၤလဲၣ်,ကစၢ်စံးဝဲဒၣ်, ယအိၣ်ဘှံးအလီၢ်မ့ၢ်မနုၤတမံၤလဲၣ်,
50တၢ်ခဲလၢာ်အံၤ,တမ့ၢ်ဘၣ်ယမၤအီၤလၢယစုဘၣ်ဧါ.
51ပှၤအကိာ်ဆူၣ်,ဒီးအသးဒီးအနၢ်တဘၣ်တၢ်ကူးတရံးဘၣ်သ့ၣ်ဧၢ,သုထီဒါဘၣ်သးစီဆှံတဘိယူၢ်ဃီလီၤ.ဒ်သုပၢ်သ့ၣ်အသိးန့ၣ်,မ့ၢ်သုစ့ၢ်ကီးလီၤ.
52ဝံလၢသုပၢ်သ့ၣ်တမၤအၢမၤသီဘၣ်န့ၣ်,မ့ၢ်ဖဲလဲၣ်တဂၤလဲၣ်.ဒီးမၤသံပှၤတဖၣ်လၢအစံးပာ်ဝဲလၢတၢ်တီတၢ်လိၤတဂၤကဟဲန့ၣ်,ဒီးသုကဲထီၣ်ခဲကနံၣ်အံၤလၢပှၤဟ့ၣ်လီၤကွံာ်အီၤ,ဒီးပှၤမၤသံအီၤန့ၣ်လီၤ.
53သုဝဲဒၣ်အံၤ,သုဒိးန့ၢ်တၢ်အကလုၢ်အကထါလၢကလူးတဖၣ်ကတဲာ်ကတီၤဝဲဘၣ်ဆၣ်ဒီး,သုတတိၢ်န့ၢ်ဘၣ်အီၤဘၣ်.
54ဒီးတုၤအနၢ်ဟူတၢ်တဖၣ်န့ၣ်ဒီး,အသးဘၣ်ဘုးတဲာ်ဒီး,အ့ၣ်စဃံးအမဲလၢအလိၤလီၤ.
55မ့မ့ၢ်အဝဲဒၣ်န့ၣ်လၢထီၣ်ပှဲၤထီၣ်ဒီးသးစီဆှံ,ဒီးကွၢ်ထံတၢ်ဆူမူခိၣ်,ဒီးထံၣ်ဘၣ်ယွၤအလၤကပီၤ,ဒီးယ့ၣ်ရှူးအိၣ်ဆၢထၢၣ်လၢယွၤအစုထွဲလီၤ.
56ဒီးစံးဝဲဒၣ်,ကွၢ်ကွၢ်,ယထံၣ်မူခိၣ်အိးထီၣ်အသး,ဒီးပှၤကညီအဖိခွါန့ၣ်အိၣ်ဆၢထၢၣ်လၢယွၤအစုထွဲလီၤ.
57ဒီးအဝဲသ့ၣ်ကိးပသူထီၣ်လၢအကလုၢ်ဖးဒိၣ်,ဒီးမၤဘၢဃာ်အနၢ်,ဒီးဃ့ၢ်ဃီၤဝဲလၢအသးတဖျၢၣ်ဃီ,ဆူအအိၣ်,
58ဒီးဟီထီၣ်ကွံာ်အီၤဆူဝ့ၢ်အချၢ,ဒီးကွံာ်အီၤလၢလၢၢ်လီၤ.ဒီးပှၤအုၣ်အသးတဖၣ်,ပာ်လီၤအကူအသိးလၢပှၤဖိၣ်သၣ်ခွါ,ကိးဝဲအမံၤလၢစီၤစီလူး,အခီၣ်ထံးလီၤ.
59ဒီးအဝဲသ့ၣ်ကွံာ်စီၤစတ့းဖၣ်လၢလၢၢ်ဖဲအဘါထုကဖၣ်တၢ်ဒီးစံးဝဲဒၣ်,ယ့ၣ်ရှူးကစၢ်ဧၢ,တူၢ်လိာ်ယသးတက့ၢ်.
60ဒီးအဝဲဒၣ်ချံးလီၤအခီၣ်,ဒီးကိးပသူထီၣ်လၢအကလုၢ်ဖးဒိၣ်,ကစၢ်ဧၢ,တၢ်ဒဲးဘးအံၤ,သုတပာ်လၢအဝဲသ့ၣ်အလိၤတဂ့ၤ.စံးဝဲဒ်န့ၣ်ဒီး,မံသပ့ၤဝဲလီၤ.