Acts 9
1ဘၣ်ဆၣ်ဒီးစီၤစီလူးသါထီၣ်ဒံးတၢ်ကတိၤမၤပျံၤတၢ်,ဒီးတၢ်မၤသံတၢ်,လၢကစၢ်အပျဲၢ်အဘီၣ်အလိၤ,ဒီးလဲၤဝဲဆူပှၤလုၢ်တၢ်အခိၣ်အအိၣ်,
2ဒီးဃ့လံာ်လၢအီၤ,လၢကလဲၤဆူဒၤမ့ၤစ့း,ဆူဘူၣ်ဘျီၣ်တဖၣ်,ဒ်သိးအမ့ၢ်ထံၣ်န့ၢ်ပှၤဘၣ်ဃးဒီးကျဲအံၤ,ပိာ်မုၣ်မ့ၢ်ဂ့ၤ,ပိာ်ခွါမ့ၢ်ဂ့ၤဒီး,ကစၢဃာ်အီၤဒီးဟဲက့ၤစိာ်ဆူယရူၤၡလ့ၣ်လီၤ.
3ဒီးလဲၤတၢ်အဖၢမုၢ်,ဒီးဘူးထီၣ်ဒီးဒၤမ့ၤစ့းဒီး,တၢ်ကပီၤလၢမူခိၣ်ကပီၤထီၣ်ဝးတရံးအီၤသလ့ၢ်ကလာ်လီၤ.
4ဒီးလီၤဃံၤဝဲလၢဟီၣ်ခိၣ်အဖီခိၣ်,ဒီးနၢ်ဟူတၢ်အကလုၢ်စံးဘၣ်အီၤ,စီၤစီလူးဧၢ,စီၤစီလူးဧၢ,ဘၣ်မနုၤလၢနမၤအၢယၤလဲၣ်.
5ဒီးစံးဝဲဒၣ်,ကစၢ်ဧၢ,နမ့ၢ်မတၤတဂၤလဲၣ်.ဒီးကစၢ်စံးဝဲဒၣ်,ယမ့ၢ်ယ့ၣ်ရှူးလၢနမၤအၢအီၤလီၤ.(နထူဘၣ်နီၣ်ခိၣ်စူန့ၣ်ကီမးလီၤ.
6ဒီးအဝဲဒၣ်ကနိးကစုာ်,ဒီးကမၢကမၣ်,ဒီးစံးဝဲဒၣ်,ကစၢ်ဧၢ,ယဘၣ်မၤဒ်လဲၣ်.ဒီးကစၢ်စံးဘၣ်အီၤ,)ဂဲၤဆၢထၢၣ်,ဒီးလဲၤနုာ်ဆူဝ့ၢ်ပူၤဒီးနဘၣ်မၤမနုၤမနုၤန့ၣ်,တၢ်ကစံးဘၣ်နၤလီၤ.
7ဒီးပှၤလၢအလဲၤတၢ်ဒီးအီၤတဖၣ်န့ၣ်,နၢ်ဟူတၢ်ကလုၢ်အသီၣ်ဘၣ်ဆၣ်ဒီး,တထံၣ်ဘၣ်ပှၤနီတဂၤဘၣ်,ဒီးဆၢထၢၣ်အိၣ်ဘှီၣ်ကလာ်လၢတၢ်သးကတုၤလီၤ.
8ဒီးစီၤစီလူးဂဲၤဆၢထၢၣ်လၢဟီၣ်ခိၣ်အဖီခိၣ်,ဒီးတုၤအစီၣ်ထီၣ်အမဲာ်ဒီး,တထံၣ်ဘၣ်ပှၤနီတဂၤဘၣ်.ဒီးပှၤဆှၢအီၤလၢအစုဆူဒၤမ့ၤစ့းအပူၤလီၤ.
9ဒီးအိၣ်ဝဲသၢနံၤဒီးတထံၣ်ဘၣ်တၢ်,ဒီးတအီၣ်ဘၣ်ဒီးတအီဘၣ်တၢ်ဘၣ်လီၤ.
10ဒီးအပျဲၢ်အဘီၣ်,ကိးဝဲအမံၤလၢစီၤအနၤနံ,လၢဒၤမ့ၤစ့းအပူၤအိၣ်ဝဲတဂၤလီၤ.ဒီးကစၢ်စံးဘၣ်အီၤလၢတၢ်ထံၣ်တၢ်လၢညါခီအပူၤ,စီၤအနၤနံဧၢ,ဒီးစံးဝဲဒၣ်,ကွၢ်ကွၢ်ယၤလီၤ,ကစၢ်ဧၢ.
11ဒီးကစၢ်စံးဘၣ်အီၤ,ဂဲၤဆၢထၢၣ်ဒီးလဲၤဆူကျဲကိးဝဲအမံၤလၢတၢ်ဘျၢ,ဒီးဃုန့ၢ်ပှၤတၢ်စူးဖိ,အမံၤစီၤစီလူး,လၢစီၤယူဒၤအဟံၣ်ပူၤတက့ၢ်.အဂ့ၢ်ဒ်အံၤ,ကွၢ်ကွၢ်,အဝဲဒၣ်ဘါထုကဖၣ်တၢ်လီၤ.
12ဒီးထံၣ်တၢ်လၢညါခီ,ဒီးထံၣ်ပှၤအမံၤစီၤအနၤနံတဂၤဟဲနုာ်,ဒီးပာ်အစုလၢအလိၤ,ဒ်သိးအကထံၣ်ထီၣ်တၢ်လီၤ.
13ဒီးစီၤအနၤနံကတိၤဆၢဝဲ,ကစၢ်ဧၢ,အဝဲဒၣ်တဂၤအဂ့ၢ်အကျိၤဖဲအမၤအၢမၤနးနပှၤစီဆှံလၢယရူၤၡလ့ၣ်တဖၣ်န့ၣ်,ယနၢ်ဟူလံလၢပှၤအါဂၤလံ.
14အိၣ်စ့ၢ်ကီးဖဲအံၤဒီးအစိအကမီၤလၢပှၤလုၢ်တၢ်အခိၣ်တဖၣ်,ဒ်သိးအကစၢဃာ်ကယဲၢ်ပှၤလၢအကိးထီၣ်နမံၤလီၤ.
15ဒီးကစၢ်စံးဘၣ်အီၤ,လဲၤတက့ၢ်,အဂ့ၢ်ဒ်အံၤ,အဝဲဒၣ်န့ၣ်မ့ၢ်တၢ်ဃုထၢအသပၢၤလၢယဂီၢ်,ဒ်သိးအကစိာ်ယမံၤဆူပှၤကလုာ်တဖၣ်,ဒီးစီၤပၤတဖၣ်,ဒီးပှၤအံၣ်စရ့လးဖိတဖၣ်အမဲာ်ညါလီၤ.
16အဂ့ၢ်ဒ်အံၤ,ကဘၣ်ဒိးတၢ်လၢယမံၤအဃိ,ဆံးအါဆံးအါန့ၣ်,ယကဒုးနဲၣ်နၤအီၤလီၤ.
17ဒီးစီၤအနၤနံဟးထီၣ်ဝဲ,ဒီးလဲၤနုာ်ဆူဟံၣ်ပူၤ,ဒီးပာ်အစုလၢအလိၤ,ဒီးစံးဝဲဒၣ်,ဒီပုၢ်ဝဲၢ်စီၤစီလူးဧၢ,ကစၢ်လၢအအိၣ်ဖျါထီၣ်လၢနမဲာ်ညါလၢနဟဲလၢကျဲပူၤယ့ၣ်ရှူးတဂၤန့ၣ်,မၢယဟဲဆူနအိၣ်,ဒ်သိးနကထံၣ်ထီၣ်က့ၤတၢ်,ဒီးနကပှဲၤထီၣ်ဒီးသးစီဆှံလီၤ.
18ဒီးတၢ်လီၤတဲာ်ကွံာ်လၢအမဲာ်အလိၤတကီၢ်ခါဒ်ညၣ်သဒံၣ်အသိး,ဒီးထံၣ်ထီၣ်က့ၤတၢ်တကီၢ်ခါ,ဒီးဂဲၤဆၢထၢၣ်ဒီးဒိးဘျၢအသးလီၤ.
19ဒီးအီၣ်တၢ်အီတၢ်,ဒီးအဂံၢ်အဘါဆူၣ်ထီၣ်က့ၤလီၤ.
20ဒီးအိၣ်အနံၤအသီတနီၤနီၤ,ဒီးအပျဲၢ်အဘီၣ်လၢဒၤမ့ၤစ့းအပူၤလီၤ.ဒီးစံၣ်တဲၤတဲလီၤတကီၢ်ခါလၢဘူၣ်ဘျီၣ်တဖၣ်အပူၤ,လၢယ့ၣ်ရှူးတဂၤအံၤ,မ့ၢ်ယွၤအဖိခွါလီၤ.
21ဒီးကယဲၢ်ပှၤလၢအနၢ်ဟူဝဲတဖၣ်န့ၣ်,ပာ်အသးကမၢကမၣ်ဒီးစံးဝဲဒၣ်,ပှၤတဂၤအံၤမ့ၢ်ပှၤလၢအမၤဟးဂီၤပှၤလၢအကိးထီၣ်တၢ်အမံၤအံၤလၢယရူၤၡလ့ၣ်အပူၤ,ဒီးဟဲဖဲအံၤဒ်သိးအကစၢဃာ်အီၤ,ဒီးကက့ၤစိာ်အီၤဆူပှၤလုၢ်တၢ်အခိၣ်တဖၣ်အအိၣ်,တမ့ၢ်ဘၣ်ဧါ.
22ဒီးစီၤစီလူးအစိအကမီၤဒိၣ်ထီၣ်ဝဲ,ဒီးကတိၤနၢၤကတိၤဃၣ်ပှၤယူဒၤဖိအိၣ်လၢဒၤမ့ၤစ့းအပူၤ,ဒီးဒုးနဲၣ်ဝဲလၢအဝဲဒၣ်မ့ၢ်ခရံာ်လီၤ.
23ဒီးတုၤအါနံၤအါသီပှဲၤထီၣ်ဒီး,ပှၤယူဒၤဖိတဖၣ်,ဒ်သိးအကမၤသံအီၤဒီး,ကူၣ်ထီၣ်ဖးလီၤလိာ်အသးတကူၢ်သ့ၣ်လီၤ.
24ဒီးအတၢ်ကူၣ်ထီၣ်ဖးလီၤန့ၣ်,စီၤစီလူးသ့ၣ်ညါဝဲလီၤ.ဒီးအဝဲသ့ၣ်ခိးတၢ်လၢပဲတရီအခီၣ်ထံးသ့သ့တနံၤသီသီတနၤဒ်သိးအကမၤသံအီၤလီၤ.
25ဒီးအပျဲၢ်အဘီၣ်ဟံးန့ၢ်အီၤလၢမုၢ်နၤ,ဒီးပာ်နုာ်အီၤလၢကုတဒုအပူၤ,ဒီးစဲၤလီၤအီၤလၢဝ့ၢ်ခိၣ်ဒူလီၤ.
26ဒီးတုၤအတုၤက့ၤလၢယရူၤၡလ့ၣ်ဒီး,သါကဘျုးအသးဒီးအပျဲၢ်အဘီၣ်လီၤ.ဒီးအဝဲသ့ၣ်တနာ်ဘၣ်လၢအမ့ၢ်အပျဲၢ်အဘီၣ်ဘၣ်,ဒီးပျံၤအီၤခဲလၢာ်လီၤ.
27ဘၣ်ဆၣ်ဒီး,စီၤဘၢ်နါဘၤဟံးန့ၢ်အီၤ,ဒီးဆှၢအီၤဆူပှၤတၢ်မၢဖိအအိၣ်,ဒီးစံးဘၣ်တဲဘၣ်အီၤ,လၢအဝဲဒၣ်ထံၣ်ဘၣ်ကစၢ်လၢကျဲအဂ့ၢ်အကျိၤ,ဒီးလၢအကတိၤတၢ်ဒီးအီၤ,ဒီးလၢအစံၣ်တဲၤတဲလီၤတၢ်အိၣ်ဒီးအသးခူတလ့ၢ်လၢဒၤမ့ၤစ့းအပူၤလၢယ့ၣ်ရှူးအမံၤလီၤ.
28ဒီးအိၣ်ဒီးအီၤဒီးဟဲနုာ်ဒီးဟးထီၣ်လၢယရူၤၡလ့ၣ်အပူၤ,
29ဒီးစံၣ်တဲၤတဲလီၤတၢ်လၢအသးခူတလ့ၢ်လၢကစၢ်ယ့ၣ်ရှူးအမံၤ,ဒီးကတိၤတၢ်,ဒီးတဲးလိာ်ဃိလိာ်တၢ်ဒီးပှၤကတိၤဟ့းလ့ၣ်အကျိာ်တဖၣ်,ဒီးအဝဲသ့ၣ်ပာ်လီၤအသးလၢအကမၤသံအီၤလီၤ.
30ဒီးဒီပုၢ်ဝဲၢ်သ့ၣ်တဖၣ်တုၤအသ့ၣ်ညါဝဲဒီး,ဆှၢအီၤဆူကဲၤစါရံၤ,ဒီးမၢအလဲၤဆူတၢ်စူးလီၤ.
31တုၤနုၤတစုတၢ်အိၣ်ဖှိၣ်လၢကီၢ်ယူဒၤ,ဒီးကၤလံၤလါ,ဒီးၡၤမရံဒီဒီကီၢ်,ဒီဒီကီၢ်န့ၣ်,အိၣ်ခုၣ်အိၣ်မုာ်,ဒီးဒိးတၢ်မၤထီၣ်မၤထီ,ဒီးလဲၤတၢ်လၢတၢ်ပျံၤယွၤအပူၤ,ဒီးသးစီဆှံအမၤမုာ်တၢ်အပူၤသတးဒီး,အါထီၣ်ဂီၢ်ထီၣ်ဝဲလီၤ.
32ဒီးတၢ်မၤအသးလၢစီၤပ့းတရူးလဲၤဝ့ၤဝီၤသကုၤဆးဒးအဖၢမုၢ်ဒီး,လဲၤလီၤဆူပှၤစီဆှံလၢအအိၣ်ဝဲဆိးဝဲလၢလူးဒၤအပူၤလီၤ.
33ဒီးဖဲန့ၣ်ထံၣ်န့ၢ်ပှၤလၢအသံတခီပၤ,လၢအအိၣ်တ့ၢ်လၢအလီၢ်မံပူၤဃိးနံၣ်,အမံၤစီၤအဲၤန့းတဂၤလီၤ.
34ဒီးစီၤပ့းတရူးစံးဘၣ်အီၤ,စီၤအဲၤန့းဧၢ,ယ့ၣ်ရှူးခရံာ်မၤဘျါက့ၤနၤလီၤ.ဂဲၤဆၢထၢၣ်,ဒီးဒါနလီၢ်မံတက့ၢ်.ဒီးဂဲၤဆၢထၢၣ်ဝဲတကီၢ်ခါလီၤ.
35ဒီးကယဲၢ်ပှၤလၢအအိၣ်ဝဲဆိးဝဲလၢလူးဒၤဒီးၡၤရိၣ်အပူၤ,ထံၣ်အီၤ,ဒီးဃၣ်ဃီၤအသးဆူကစၢ်အအိၣ်တကူၢ်သ့ၣ်လီၤ.
36ဒီးအပျဲၢ်အဘီၣ်အမံၤနီၢ်တဘံၤသါ,အခီပညီမ့ၢ်ဒီၢ်ကါ,အိၣ်ဝဲလၢယၤဖိၤအပူၤတဂၤလီၤ.ပိာ်မုၣ်န့ၣ်လၢထီၣ်ပှဲၤထီၣ်ဒီးတၢ်မၤဂ့ၤ,ဒီးတၢ်ဟ့ၣ်သးကညီၤလၢအမၤဝဲန့ၣ်လီၤ.
37လၢမုၢ်နံၤတဖၣ်န့ၣ်,တၢ်မၤအသးလၢအဘၣ်တၢ်ဆါဒီးသံဝဲလီၤ.ဒီးပှၤသ့ကွံာ်အီၤ,ဒီးပာ်အီၤလၢဒၢးထီၣ်ထီတတီၤအပူၤလီၤ.
38ဒီးလူးဒၤအိၣ်ဘူးဒီးယၤဖိၤသတးဒီး,အပျဲၢ်အဘီၣ်နၢ်ဟူလၢစီၤပ့းတရူးအိၣ်ဖဲန့ၣ်ဒီး,မၢပှၤခံဂၤလဲၤဃ့ကညးအီၤဒ်သိးအသုတသုးနံၤသုးသီတဂ့ၤဒီး,ကဟဲဆူအအိၣ်လီၤ.
39ဒီးစီၤပ့းတရူးဂဲၤဆၢထၢၣ်,ဒီးဟဲဃုာ်ဒီးအီၤလီၤ.ဟဲတုၤဝဲဒီး,ပှၤဆှၢနုာ်အီၤဆူဒၢးထီၣ်ထီတတီၤအပူၤန့ၣ်လီၤ.ဒီးပှၤမုၣ်ကမဲခဲလၢာ်ဆၢထၢၣ်လၢအဃၢၤ,ဒီးဟီၣ်ဝဲ,ဒီးဒုးနဲၣ်ဆ့ဒီးယၣ်လၢနီၢ်ဒီၢ်ကါမၤဖဲအအိၣ်ဒံးဒီးအီၤအဖၢမုၢ်လီၤ.
40ဒီးစီၤပ့းတရူးဒုးဟးထီၣ်ကွံာ်အီၤခဲလၢာ်ဆူခိဒီး,ချံးလီၤအခီၣ်,ဒီးဘါထုကဖၣ်တၢ်,ဒီးဃၣ်ဃီၤအသးဆူအစိၣ်အအိၣ်,ဒီးစံးဝဲဒၣ်,နီၢ်တဘံၤသါဧၢ,ဂဲၤဆၢထၢၣ်တက့ၢ်.ဒီးစီၣ်ထီၣ်အမဲာ်,ဒီးထံၣ်စီၤပ့းတရူးဒီး,ဂဲၤထၢၣ်ဆ့ၣ်နီၤဝဲလီၤ.
41ဒီးစီၤပ့းတရူးယူာ်ဃီၤအစု,ဒီးဝံၣ်ဆၢထၢၣ်အီၤ,ဒီးကိးက့ၤပှၤစီဆှံ,ဒီးပှၤမုၣ်ကမဲသ့ၣ်တဖၣ်,ဒီးဟ့ၣ်လီၤက့ၤအီၤ,အိၣ်ဒီးအသးသမူလီၤ.
42ဒီးတၢ်မၤအသးန့ၣ်,ပှၤသ့ၣ်ညါလၢယၤဖိၤအပူၤသကုၤဆးဒး,ဒီးပှၤစူၢ်က့ၤနာ်က့ၤကစၢ်န့ၣ်အါဂၤလီၤ.
43ဒီးတၢ်မၤအသးလၢအအိၣ်ဒီးပှၤမၤတၢ်ဖံး,စီၤၡံမိၣ်လၢယၤဖိၤအပူၤ,အါနံၤအါသီလီၤ.