Colossians 2
1အဂ့ၢ်ဒ်အံၤ,ယသးဂဲၤလိာ်လၢသုဂီၢ်,ဒီးပှၤအိၣ်လၢလီၤဒံၤကံအဂီၢ်,ဒီးဖဲဒၣ်ပှၤလၢအတထံၣ်ဘၣ်ယမဲာ်လၢဖံးလၢညၣ်အဂီၢ်,ဆံးဒိၣ်ဆံးဒိၣ်,ယသးအိၣ်လၢသုကသ့ၣ်ညါ,
2ဒ်သိးအသးကမုာ်ထီၣ်ဝဲ,ဒီးကအိၣ်ဒီးအသးစဲဘူးတဖျၢၣ်ဃီလၢတၢ်အဲၣ်တၢ်ကွံအပူၤ,ဒီးအိၣ်ဒီးတၢ်နၢ်ပၢၢ်လၢလၢပှဲၤပှဲၤအတၢ်ထူးတၢ်တီၤခဲလၢာ်,ဒ်သိးအကသ့ၣ်ညါယွၤအတၢ်ခူသူၣ်,ဒ်ပစံးတၢ်အသိး,ခရံာ်,
3လၢကယဲၢ်တၢ်ကူၣ်သ့ဒီးတၢ်သ့ၣ်ညါအတၢ်လုၢ်ဒိၣ်ပှ့ၤဒိၣ်ခဲလၢာ်အိၣ်ပာ်ခူသူၣ်အသးလၢအပူၤန့ၣ်လီၤ.
4ယစံးဘၣ်တဲဘၣ်တၢ်န့ၣ်,ဒ်သိးပှၤသုတလွဲန့ၢ်သုလၢတၢ်ကတိၤလီတၢ်နီတဂၤတဂ့ၤလီၤ.
5အဂ့ၢ်ဒ်အံၤ,ယလီၤဖးဒီးသုလၢတၢ်ဖံးတၢ်ညၣ်,ဘၣ်ဆၣ်ဒီးယအိၣ်ဒီးသုလၢသူၣ်လၢသး,ဒီးယသူၣ်ခုယသးခုလၢယကွၢ်သုအိၣ်ကစီဒီ,ဒီးသုတၢ်စူၢ်ဂၢၢ်နာ်ကျၢၤလၢခရံာ်အပူၤအဃိလီၤ.
6မၤသးဒ်န့ၣ်ဒီးသုဂံၢ်စဲၤလီၤ,ဒီးသုဘၣ်တၢ်မၤထီၣ်မၤထီသုလၢအပူၤ,ဒီးသုအိၣ်ဂၢၢ်ဆိးကျၢၤလၢတၢ်နာ်အပူၤ,ဒ်တၢ်သိၣ်လိသုအသိးသတးဒီး,အါထီၣ်လၢတၢ်စံးထီၣ်ပတြၢၤအဘျုးအဖှိၣ်,
7ဒီးလဲၤတၢ်လၢကစၢ်ယ့ၣ်ရှူးခရံာ်အပူၤ,ဒ်သုဒိးန့ၢ်အီၤအသိးန့ၣ်တက့ၢ်.
8ဒ်သိးပှၤသုတအိၣ်ဝဲတဂၤဂၤလၢအကစိာ်ကွံာ်သုသးလၢတၢ်အဲၣ်ဒိးတၢ်သ့ၣ်ညါ,ဒီးတၢ်လီတၢ်ကလီကလီ,ဒ်ပှၤကညီစံးစိၤတဲစိၤတၢ်,ဒ်ဟီၣ်ခိၣ်အမိၢ်ပှၢ်အသိး,ဒီးတမ့ၢ်ဘၣ်ဒ်ခရံာ်အသိးန့ၣ်တဂ့ၤဒီး,ပလီၢ်သုသးတက့ၢ်.
9အဂ့ၢ်ဒ်အံၤ,ယွၤအတၢ်လၢတၢ်ပှဲၤခဲလၢာ်အိၣ်ဝဲဆိးဝဲနီၢ်ခိနီၢ်ခီလၢအဝဲဒၣ်အပူၤလီၤ.
10ဒီးသုလၢထီၣ်ပှဲၤထီၣ်လၢအပူၤ,လၢအမ့ၢ်တၢ်အဒိၣ်အခိၣ်ဒီးတၢ်အစိအကမီၤခဲလၢာ်အခိၣ်လီၤ.
11ဒီးလၢအဝဲဒၣ်အပူၤသုဒိးတၢ်ကူးတရံးလၢတၢ်ကူးတရံးတမၤဘၣ်အသးလၢပစုဘၣ်,မ့ၢ်လၢတၢ်ဘ့ၣ်လီၤကွံာ်တၢ်ဖံးတၢ်ညၣ်အကစၢ်မိၢ်ပှၢ်လၢတၢ်ကူးတရံးဘၣ်ဃးဒီးခရံာ်လီၤ.
12ဒီးသုဘၣ်ခူၣ်လီၤကွံာ်ဃုာ်ဒီးအီၤလၢတၢ်ဒိးဘျၢန့ၣ်လီၤ.လၢအဝဲန့ၣ်အပူၤသုဘၣ်တၢ်ဂဲၤဆၢထၢၣ်ဃုာ်စ့ၢ်ကီးဒီးအီၤလၢတၢ်နာ်ဘၣ်ဃးဒီးယွၤအတၢ်မၤတၢ်လၢအမၤဂဲၤဆၢထၢၣ်က့ၤအီၤလၢတၢ်သံန့ၣ်လီၤ.
13ဒီးသုဝဲသ့ၣ်လၢအဘၣ်တၢ်သံလၢတၢ်လီၤကမၣ်အပူၤ,ဒီးလၢသုဖံးသုညၣ်တဘၣ်ဘၣ်တၢ်ကူးတရံးဘၣ်အပူၤအံၤ,အဝဲဒၣ်မၤမူထီၣ်ဃုာ်ဒီးအီၤ,ဒီးပျၢ်ကွံာ်သုတၢ်ကမၣ်ခဲလၢာ်လီၤ.
14ဒီးတြူာ်ကွံာ်တၢ်ထီဒါပှၤ,ဒ်ပစံးတၢ်အသိး,တၢ်မၤလိာ်ကွဲးအသးလၢပှၤအစု,လၢအကဲထီၣ်ပဒုၣ်ပဒါ,ဒီးစိာ်ထီၣ်ကွံာ်ဝဲ,ဒီးပျၤထီကွံာ်အီၤလၢထူၣ်စုညါအလိၤလီၤ.
15ဒီးဂုာ်န့ၢ်ဆူၣ်တၢ်အဒိၣ်အခိၣ်,ဒီးတၢ်အစိအကမီၤအတၢ်,ဒီးဒုးနဲၣ်အိၣ်ဖျါအီၤ,ဒီးမၤနၢၤအီၤလၢထူၣ်စုညါအလိၤလီၤ.
16မၤသးဒ်န့ၣ်ဒီးလၢတၢ်အီၣ်မ့ၢ်ဂ့ၤ,တၢ်အီမ့ၢ်ဂ့ၤ,တၢ်မၤဘူၣ်အနံၤမ့ၢ်ဂ့ၤ,လါထီၣ်သီအနံၤမ့ၢ်ဂ့ၤ,အိၣ်ဘှံးအနံၤမ့ၢ်ဂ့ၤအဃိ,မ်ပှၤသုတစံၣ်ညီၣ်သုလၢအဂ့ၢ်အကျိၤနီတဂၤတဂ့ၤ.
17တၢ်န့ၣ်တဖၣ်မ့ၢ်တၢ်ဆူညါတဖၣ်အကဒုလီၤ.မ့မ့ၢ်အမိၢ်ပှၢ်န့ၣ်မ့ၢ်ခရံာ်လီၤ.
18ပှၤလၢအဆီၣ်လီၤဒၣ်အသး,ဒီးဘါကလူးတဖၣ်,ဒီးပာ်ထီၣ်ထီအသးကလီကလီလၢတၢ်ဖံးတၢ်ညၣ်အသးသတးဒီး,ဂဲၤလိာ်ဝဲလၢတၢ်လၢအထံၣ်တဖၣ်န့ၣ်,မ်သုသုတဒုးဟါမၢ်အီၤလၢသုဘျုးနီတဂၤတဂ့ၤ.
19ဒီးအဝဲဒၣ်တဟံးဃာ်ဘၣ်တၢ်အခိၣ်,လၢနီၢ်ခဲလၢာ်ဒိးန့ၢ်တၢ်မၤစၢၤဒီးတၢ်စၢဃာ်လၢအဆၢဒီးအထူၣ်လၢအီၤသတးဒီး,ဒိၣ်ထီၣ်လၢတၢ်ဒိၣ်ဘၣ်ဃးဒီးယွၤန့ၣ်အပူၤလီၤ.
20မၤသးဒ်န့ၣ်ဒီးသုမ့ၢ်သံသဒၣ်ဃုာ်ဒီးခရံာ်လၢဟီၣ်ခိၣ်အမိၢ်ပှၢ်ဒီး,
21ဘၣ်မနုၤလၢ,ဒ်ပှၤလၢအမူဝဲလၢဟီၣ်ခိၣ်အသိးန့ၣ်,သုအၢၣ်လီၤအီလီၤတၢ်မၤလိာ်သုလၢ,
22ဟံးဃာ်တဂ့ၤ,လ့ၣ်ကွၢ်တဂ့ၤ,ထိးတဂ့ၤ,(တၢ်န့ၣ်တဖၣ်ခဲလၢာ်မ့ၢ်လၢအကဟးဂီၤဝဲလၢပမၤအီၤအဃိ),ဒ်ပှၤကညီအတၢ်မၤလိာ်,ဒီးအတၢ်သိၣ်တၢ်သီအသိးန့ၣ်လဲၣ်.
23အဝဲန့ၣ်မ့ၢ်တၢ်အိၣ်ဒီးတၢ်လီၤဂာ်တၢ်ကူၣ်သ့,လၢအဘါတၢ်ဖဲအသးအလိၤ,ဒီးတၢ်ဆီၣ်လီၤအသး,ဒီးတၢ်မၤအၢမၤနးအနီၢ်ခိ,တမ့ၢ်ဘၣ်လၢတၢ်လၤကပီၤဘၣ်,မ့ၢ်တၢ်မၤလၢထီၣ်ပှဲၤထီၣ်တၢ်ဖံးတၢ်ညၣ်အဂီၢ်လီၤ.