Deuteronomy 8
1ကယဲၢ်တၢ်မၤလိာ်လၢယမၤလိာ်နၤလၢမုၢ်မဆါတနံၤအံၤသုဘၣ်တိၢ်န့ၢ်ဒီးမၤဒ်သိးသုကမူ,ဒီးအါထီၣ်,ဒီးလဲၤနုာ်,ဒီးမၤန့ၢ်ထံဧိၤကီၢ်ဧိၤလၢယွၤဆိၣ်တၢ်ဒီးသုပၢ်တဖၣ်လၢအဂ့ၢ်လီၤ.
2ဒီးနဘၣ်သ့ၣ်နီၣ်ထီၣ်က့ၤကျဲဒီဘိညါလၢယွၤနကစၢ်ဒုးလဲၤနၤအနံၣ်လွံၢ်ဆံအံၤလၢပှၢ်မုၢ်ကနၢဒ်သိးအကဒုးဆီၣ်လီၤနသး,ဒ်သိးအကမၤကွၢ်နၤ,နကတိၢ်န့ၢ်အတၢ်မၤလိာ်နတတိၢ်ဘၣ်လဲၣ်န့ၣ်,ဒ်သိးအကသ့ၣ်ညါတၢ်အိၣ်လၢနသးကံၢ်ပူၤလီၤ.
3ဒီးဒုးဆီၣ်လီၤနသး,ဒီးဒုးသၣ်ဝံၤနသး,ဒီးဒုးအီၣ်နၤလၢမၤနၤ,လၢနတသ့ၣ်ညါဘၣ်အီၤဒီးနပၢ်တဖၣ်တသ့ၣ်ညါဘၣ်အီၤ,ဒ်သိးအကဘိးဘၣ်သ့ၣ်ညါနၤလၢပှၤကညီမူဝဲထဲလၢကိၣ်တမ့ၢ်ဘၣ်,မ့ၢ်လၢဖဲဒၣ်တၢ်လၢအထီၣ်ဖျဲးလၢယွၤအထးခိၣ်တမံၤလၢ်လၢ်သတးဒီးပှၤကညီမူဝဲလီၤ.
4နကူနသိးတလီၢ်လံၤဘၣ်လၢနလိၤဘၣ်,ဒီးနခီၣ်တညိးထီၣ်ဘၣ်လၢအနံၣ်လွံၢ်ဆံအတီၢ်ပူၤဘၣ်လီၤ.
5နဘၣ်သ့ၣ်ညါလၢနသးကံၢ်ပူၤလၢ,ဒ်ပှၤသိၣ်ဃီၣ်အဖိခွါအသိးန့ၣ်,ယွၤသိၣ်ဃီၣ်နၤဒ်န့ၣ်သိးလီၤ.
6ဒီးနဘၣ်တိၢ်န့ၢ်ယွၤနကစၢ်အတၢ်မၤလိာ်တဖၣ်,ဒ်သိးနကပိာ်အကျဲတဖၣ်,ဒီးပျံၤအီၤလီၤ.
7အဂ့ၢ်ဒ်အံၤ,ယွၤနကစၢ်ဒုးလဲၤနုာ်နၤလၢထံဧိၤကီၢ်ဧိၤအဂ့ၤအပူၤ,ကီၢ်တဘ့ၣ်အိၣ်ဒီးထံကျိ,ဒီးထံမူထီၣ်ပၢၢ်,ဒီးနိၣ်လၢအထံထီၣ်ပၢၢ်လၢကစၢၢ်ကဆူး,ဒီးကစၢၢ်ကလိ,
8ကီၢ်တဘ့ၣ်အိၣ်ဒီးဘုကၠူၣ်,ဒီးဘုမုယီၤ,ဒီးစပံးမုၢ်,ဒီးချၢၣ်ဒၢ,ဒီးသ့ၣ်သလဲ,ကီၢ်တဘ့ၣ်အိၣ်ဒီးသ့ၣ်စၤယံးအသိ,ဒီးကနဲစီ,
9ကီၢ်တဘ့ၣ်လၢကိၣ်တဘ့ၣ်လၢကိၣ်တကၤဘၣ်ဒီး,နကအီၣ်တၢ်လီၤ.နတဆၢန့ၢ်ဘၣ်တၢ်လၢအတအိၣ်ဘၣ်လၢအပူၤနီတမံၤ,ကီၢ်တဘ့ၣ်လၢအလၢၢ်မ့ၢ်ထး,ဒီးလၢအကစၢၢ်ကလိအပူၤန့ၣ်နကခူၣ်ထီၣ်တိၢ်ဧိၤပှာ်ဧိၤလီၤ.
10ဒီးတုၤနအီၣ်တၢ်ဒီးနဘျဲးအီၣ်တၢ်ဒီး,နဘၣ်စံးထီၣ်ပတြၢၤယွၤနကစၢ်လၢထံဧိၤကီၢ်ဧိၤအဂ့ၤလၢအဟ့ၣ်လီၤနၤအဃိလီၤ.
11ပလီၢ်နသးဒ်သိးနသုတသးပ့ၤနီၣ်ယွၤနကစၢ်,လၢနတတိၢ်န့ၢ်ဘၣ်အတၢ်မၤလိာ်,ဒီးအတၢ်စံၣ်ညီၣ်လၢယမၤလိာ်နၤလၢမုၢ်မဆါတနံၤအံၤတဂ့ၤန့ၣ်တက့ၢ်.
12တုၤနအီၣ်တၢ်ဒီးဘျဲးအီၣ်,ဒီးသူၣ်ဟံၣ်အဂ့ၤ,ဒီးအိၣ်လၢအပူၤ,
13ဒီးနဂီၤဘုၣ်ဂီၤဖံး,ဒီးနသိမဲာ်တဲးလဲးအါထီၣ်,ဒီးနကျိၣ်ဧိၤစ့ဧိၤ,ဒီးနထူဧိၤလွဲဧိၤအါထီၣ်,ဒီးကယဲၢ်တၢ်လၢအအိၣ်ဒီးနၤအါထီၣ်ဒီး,
14နကပာ်ထီၣ်ထီနသးဒီးသးပ့ၤနီၣ်ဘၣ်ဖုးယွၤနကစၢ်လၢအဒုးဟးထီၣ်ကွံာ်နၤလၢကီၢ်အဲၤကူပတူးအပူၤ,လၢပှၤကုၢ်ဖိအဟံၣ်ပူၤ,
15လၢအဒုးလဲၤနၤလၢပှၢ်မုၢ်ကနၢဖးဒိၣ်အိၣ်ဒီးတၢ်ပျံၤအလီၢ်,ဂုၢ်စရာ်,ဒီးပတ့ၤချဲး,ဒီးအလီၢ်ဃ့ဖဲထံတအိၣ်ဘၣ်,လၢအဒုးဟဲထီၣ်ထံလၢနဂီၢ်လၢလၢၢ်မ့ၣ်အူအပူၤ,
16လၢအဒုးအီၣ်နၤလၢပှၢ်မုၢ်ကနၢလၢမၤနၤလၢနပၢ်တဖၣ်တသ့ၣ်ညါဘၣ်အီၤ,ဒ်သိးအကဒုးဆီၣ်လီၤနသး,ဒ်သိးအကမၤကွၢ်နၤ,ဒီးမၤဂ့ၤနၤလၢနကတၢၢ်န့ၣ်လီၤ.
17ဒီးနကစံးဘၣ်ဖုးလၢနသးကံၢ်ပူၤ,ယမၤန့ၢ်ယစုလီၢ်ယခီၣ်ခိၣ်အံၤလၢယစိယကမီၤ,ဒီးယစုအဂံၢ်ဆူၣ်အဘါဆူၣ်န့ၣ်လီၤ.
18မ့မ့ၢ်နဘၣ်သ့ၣ်နီၣ်ထီၣ်ယွၤနကစၢ်လီၤ.အဂ့ၢ်ဒ်အံၤ,မ့ၢ်အဝဲဒၣ်လၢအဟ့ၣ်လီၤနၤလၢတၢ်အစိအကမီၤလၢနကန့ၢ်ဘၣ်နစုလီၢ်နခီၣ်ခိၣ်လၢအီၤ,ဒ်သိးအကဒုးအိၣ်ဂၢၢ်ဆိးကျၢၤအတၢ်အၢၣ်လီၤအီလီၤလၢအဆိၣ်တၢ်ဒီးနပၢ်တဖၣ်,ဒ်လၢမုၢ်မဆါတနံၤအံၤအသိးန့ၣ်လီၤ.
19ဒီးနမ့ၢ်သးပ့ၤနီၣ်ယွၤနကစၢ်သပှၢ်တၢၢ်,ဒီးပိာ်ကစၢ်အဂၤတဖၣ်အခံ,ဒီးမၤအတၢ်,ဒီးဘါအီၤဒီး,ယအုၣ်ယသးလၢသုဂ့ၢ်သုကျိၤလၢမုၢ်မဆါတနံၤအံၤ,လၢတၢ်ကမၤအသးလၢသုကတုၤလၢတၢ်ဟးဂူာ်ဟးဂီၤသပှၢ်ကတၢၢ်လီၤ.
20ဒ်ပှၤကလုာ်တဖၣ်လၢယွၤမၤဟးဂီၤအီၤလၢသုမဲာ်ညါအသိးန့ၣ်,သုကတုၤလၢတၢ်ဟးဂူာ်ဟးဂီၤဒ်န့ၣ်သိးလီၤ.အဂ့ၢ်ဒ်အံၤ,သုတဒိကနၣ်ဘၣ်ယွၤသုကစၢ်အကလုၢ်ဘၣ်လီၤ.