Genesis 46
1ဒီးစီၤအံၣ်စရ့လးဟးထီၣ်ဒီးကယဲၢ်တၢ်အိၣ်ဒီးအီၤ,ဒီးဟဲဆူဘ့ၢ်ၡဘၤ,ဒီးလုၢ်တၢ်လုၢ်တဖၣ်လၢအပၢ်စီၤအံၤစဲးအကစၢ်လီၤ.
2ဒီးယွၤစံးဘၣ်စီၤအံၣ်စရ့လးလၢအထံၣ်တၢ်လၢမုၢ်နၤအကျါ,ဒီးစံးဝဲဒၣ်,စီၤယၤကိာ်ဧၢ,စီၤယၤကိာ်ဧၢ,ဒီးစံးဝဲဒၣ်,ကွၢ်ကွၢ်,ယၤလီၤ.
3ဒီးစံးဝဲဒၣ်,ယဲဒၣ်အံၤယမ့ၢ်ယွၤ,နပၢ်အကစၢ်လီၤ.နလဲၤလီၤဆူအဲၤကူပတူးအပူၤန့ၣ်ပျံၤတၢ်တဂ့ၤ.အဂ့ၢ်ဒ်အံၤ,ယကဒုးကဲထီၣ်နၤလၢပှၤတကလုာ်ဖးဒိၣ်ဖဲန့ၣ်လီၤ.
4ယကလဲၤလီၤဒီးနၤဆူအဲၤကူပတူးအပူၤ,ဒီးယကဟဲက့ၤစိာ်ထီၣ်စ့ၢ်ကီးနၤသပှၢ်တၢၢ်,ဒီးစီၤယိၤသးကပာ်အစုလၢနမဲာ်လိၤလီၤ.
5ဒီးစီၤယၤကိာ်ဂဲၤဆၢထၢၣ်ဝဲလၢဘ့ၢ်ၡဘၤ,ဒီးအံၣ်စရ့လးအဖိခွါတဖၣ်ဒုးဒိးအပၢ်စီၤယၤကိာ်,ဒီးအဖိဒံဖိသၣ်,ဒီးအဖိအမါလၢလ့ၣ်ကဟၣ်,လၢဖၤရိၤမၢအဟဲဒိးအီၤလီၤ.
6ဒီးဟံးန့ၢ်အဆၣ်ဖိကီၢ်ဖိ,ဒီးအတၢ်ဖိတၢ်လံၤလၢအန့ၢ်ဘၣ်ဝဲလၢကီၢ်ကနၤဧၣ်အပူၤ,ဒီးလဲၤလီၤဆူအဲၤကူပတူးအပူၤ,စီၤယၤကိာ်,ဒီးအချံအသၣ်အိၣ်ဒီးအီၤခဲလၢာ်လီၤ.
7အဖိခွါသ့ၣ်,ဒီးအဖိခွါအဖိခွါသ့ၣ်အိၣ်ဒီးအီၤ,ဒီးအဖိမုၣ်သ့ၣ်,ဒီးအဖိခွါအဖိမုၣ်သ့ၣ်,ဒီးအချံအသၣ်ခဲလၢာ်သ့ၣ်တဖၣ်န့ၣ်,စိာ်လီၤဝဲဆူအဲၤကူပတူးအပူၤလီၤ.
8ဒီးအအံၤမ့ၢ်ပှၤအံၣ်စရ့လးဖိလၢအဟဲဆူအဲၤကူပတူးအပူၤ,စီၤယၤကိာ်ဒီးအဖိခွါတဖၣ်အမံၤ.
9စီၤယၤကိာ်အဖိဝဲၢ်ကိစီၤရူၤဘ့ၣ်,ဒီးစီၤရူၤဘ့ၣ်အဖိခွါစီၤဃနိာ်,ဒီးစီၤပးလူ,ဒီးစီၤဃ့းစရိၣ်,ဒီးစီၤကၢ်မံၤလီၤ.
10ဒီးစီၤစူၤမ့းအိၣ်အဖိခွါမ့ၢ်စီၤယၤမူအ့လး,ဒီးစီၤယၤမံၣ်,ဒီးစီၤအိၤဟးဒီးစီၤယၤကံၣ်,ဒီးစီၤစိဃၢ်,ဒီးကနၤဧၣ်မုၣ်အဖိခွါစီၤၡီအူးလီၤ.
11ဒီးစီၤလ့ၤဝံအဖိခွါမ့ၢ်စီၤက့ရၡိၣ်,စီၤကဃး,ဒီးစီၤမရၤရံၤလီၤ.
12ဒီးစီၤယူဒၤအဖိခွါမ့ၢ်စီၤအ့ၢ်,ဒီးစီၤအိၤနၣ်,ဒီးစီၤရှ့လၤ,ဒီးစီၤဖ့ၤရ့း,ဒီးစီၤစ့ရၤလီၤ.မ့မ့ၢ်စီၤအ့ၢ်,ဒီးစီၤအိၤနၣ်သံဝဲလၢကီၢ်ကနၤဧၣ်အပူၤလီၤ.ဒီးစီၤဖ့ၤရ့းအဖိခွါမ့ၢ်စီၤဃ့းစရိၣ်,ဒီးစီၤဃမူလီၤ.
13ဒီးစီၤယံးစၣ်ကၢ်အဖိခွါမ့ၢ်စီၤတိၤလၤ,ဒီးစီၤဖူဝၤ,ဒီးစီၤယိၤဘး,ဒီးစီၤၡံးမရိၣ်လီၤ.
14ဒီးစီၤစဘူလိၣ်အဖိခွါမ့ၢ်စီၤစ့ရ့း,ဒီးစီၤအ့လိၣ်,ဒီးစီၤယၤလအ့လးလီၤ.
15အန့ၣ်တဖၣ်မ့ၢ်နီၢ်လ့ၤအၤအဖိခွါလၢအဆံးစၢ်န့ၢ်ဒီးအဖိမုၣ်နီၢ်ဒံနၤလၢစီၤယၤကိာ်အဂီၢ်,လၢပၤဒနါရၣ်အပူၤလီၤ.အဖိခွါဒီးအဖိမုၣ်,ပှၤအသးခဲလၢာ်န့ၣ်အိၣ်ဝဲသၢဆံသၢဂၤလီၤ.
16ဒီးစီၤကးအဖိခွါမ့ၢ်စီၤစံးဖယိၣ်,ဒီးစီၤဃးကံ,စီၤရှူနံၤ,ဒီးစီၤအ့စဘိၣ်,ဒီးစီၤဧ့ရံၤ,ဒီးစီၤအရိဒံၤ,ဒီးစီၤအၤရအ့လံလီၤ.
17ဒီးစီၤအၤရှ့ၢ်အဖိခွါမ့ၢ်စီၤယံးမနၤ,ဒီးစီၤယံးၡဝၤ,ဒီးစီၤယံးၡဝံၤ,ဒီးစီၤဘရံဧၤ,ဒီးအဒီပုၢ်ဝဲၢ်မုၣ်နီၢ်စ့ရၤဒီးစီၤဘရံဧၤအဖိခွါစီၤဃ့ဘ့ၢ်,ဒီးစီၤမးလကံအ့လၤလီၤ.
18အန့ၣ်တဖၣ်မ့ၢ်နီၢ်စံၤလပၤလၢစီၤလၤဘၣ်ဟ့ၣ်အဖိမုၣ်နီၢ်လ့ၤအၤတဂၤအဖိခွါလီၤ.ဒီးအန့ၣ်တဖၣ်ဆံးစၢ်န့ၢ်ဝဲလၢစီၤယၤကိာ်အဂီၢ်,ပှၤအသးအိၣ်တဆံဃုဂၤလီၤ.
19ဒီးစီၤယၤကိာ်အမါနီၢ်ရၤဃ့လးအဖိခွါစီၤယိၤသး,ဒီးစီၤဘံၣ်ယၤမံၣ်လီၤ.
20ဒီးစီၤမနၤရှ့ၤ,ဒီးစီၤအ့ဖရဲၣ်အိၣ်ဖျဲၣ်ဝဲလၢကီၢ်အဲၤကူပတူးအပူၤလၢစီၤယိၤသးအဂီၢ်လီၤ.ဝ့ၢ်အိၣ်အပှၤလုၢ်တၢ်အဒိၣ်,စီၤပိၤတံၤဖ့ရၤအဖိမုၣ်နီၢ်အၤစနးဆံးစၢ်န့ၢ်အီၤလၢအဂီၢ်လီၤ.
21ဒီးစီၤဘံၣ်ယၤမံၣ်အဖိခွါမ့ၢ်စီၤဘ့လၤ,ဒီးစီၤဘ့က့ၢ်,ဒီးစီၤအၤၡဘ့လး,ဒီးစီၤက့ရၤ,ဒီးစီၤနဧၤမၣ်,စီၤအ့ဃံၤ,ဒီးစီၤရိဃး,စီၤမူးဖံၣ်,ဒီးစီၤဃူဖံၣ်,ဒီးစီၤအၤရးလီၤ.
22အန့ၣ်တဖၣ်မ့ၢ်နီၢ်ရၤဃ့လးအဖိခွါလၢအအိၣ်ဖျဲၣ်လၢစီၤယၤကိာ်အဂီၢ်,ပှၤအသးခဲလၢာ်န့ၣ်မ့ၢ်တဆံလွံၢ်ဂၤလီၤ.
23ဒီးစီၤဒၣ်အဖိခွါမ့ၢ်စီၤဃူၡံၣ်လီၤ.ဒီးစီၤနးသၤလံအဖိခွါမ့ၢ်စီၤယၤစအ့လး,ဒီးစီၤကူနံၤ,ဒီးစီၤယ့စ့ၢ်,ဒီးစီၤၡံးလ့ၣ်လီၤ.
24အန့ၣ်တဖၣ်မ့ၢ်နီၢ်ဘံၤလဟၤ,လၢစီၤလၤဘၣ်ဟ့ၣ်အဖိမုၣ်နီၢ်ရၤဃ့လးတဂၤအဖိခွါလီၤ.
25ဒီးအန့ၣ်ဆံးစၢ်န့ၢ်ဝဲလၢစီၤယၤကိာ်အဂီၢ်,ပှၤအသးခဲလၢာ်န့ၣ်မ့ၢ်နွံဂၤလီၤ.
26ဒီးလၢစီၤယၤကိာ်အဖိခွါအမါသ့ၣ်အဖီခိၣ်ကယဲၢ်ပှၤအသးလၢအဟဲဒီးစီၤယၤကိာ်ဆူအဲၤကူပတူးအပူၤ,လၢအဟဲထီၣ်လၢအယီၢ်ဒ့,ပှၤအသးခဲလၢာ်န့ၣ်မ့ၢ်ဃုဆံဃုဂၤလီၤ.
27ဒီးစီၤယိၤသးအဖိခွါလၢအအိၣ်ဖျဲၣ်န့ၢ်အီၤလၢအဲၤကူပတူးအပူၤန့ၣ်မ့ၢ်ပှၤအသးခံဂၤလီၤ.ကယဲၢ်ပှၤအသးလၢစီၤယၤကိာ်အပှၤဟံၣ်ဖိ,လၢအဟဲဆူအဲၤကူပတူးအပူၤန့ၣ်မ့ၢ်ပှၤနွံဆံလီၤ.
28ဒီးမၢလီၤစီၤယူဒၤလဲၤလၢအမဲာ်ညါဆူစီၤယိၤသးအအိၣ်,ဒ်သိးအကဒုးနဲၣ်ကျဲလၢအမဲာ်ညါဆူကီၢ်ကိရှ့ၣ်,ဒီးဟဲဝဲဆူကီၢ်ကိရှ့ၣ်အပူၤတကူၢ်သ့ၣ်လီၤ.
29ဒီးစီၤယိၤသးကတဲာ်ကတီၤအလ့ၣ်ကဟၣ်,ဒီးလဲၤသဂၢၢ်ထီၣ်အပၢ်စီၤအံၣ်စရ့လးဆူကိရှ့ၣ်,ဒီးအိၣ်ဖျါထီၣ်လၢအမဲာ်ညါ,ဒီးထိၣ်လီၤအသးလၢအကိာ်ဒီးအမဲာ်ထံလီၤလၢအကိာ်တထံၣ်ဃီလီၤ.
30ဒီးစီၤအံၣ်စရ့လးစံးဘၣ်စီၤယိၤသး,မ့ၢ်ယထံၣ်ဘၣ်နမဲာ်အဃိဒီး,မ်ယသံခဲအံၤတက့ၢ်.မ့ၢ်နမူဒံးအဂ့ၢ်လီၤ.
31ဒီးစီၤယိၤသးစံးဘၣ်အဒီပုၢ်ဝဲၢ်,ဒီးအပၢ်အပှၤဟံၣ်ဖိတဖၣ်,ယကလဲၤထီၣ်ဒုးနဲၣ်တၢ်လၢဖၤရိၤ,ဒီးစံးဘၣ်အီၤ,ယဒီပုၢ်ဝဲၢ်,ဒီးယပၢ်အပှၤဟံၣ်ဖိလၢအအိၣ်တ့ၢ်လၢကီၢ်ကနၤဧၣ်အပူၤန့ၣ်,ဟဲလံဆူယအိၣ်လံ.
32ဒီးပှၤတဖၣ်န့ၣ်မ့ၢ်ပှၤကွၢ်သိဒီးမဲာ်တဲးလဲးလီၤ.အဂ့ၢ်ဒ်အံၤ,မ့ၢ်ပှၤဘၣ်ဃးဒီးဆၣ်ဖိကီၢ်ဖိအဒၢ,ဒီးဟဲက့ၤစိာ်ဝဲအသိဒီးအမဲာ်တဲးလဲးတဖၣ်,ဒီးအဂီၤဘုၣ်ဂီၤဖံးတဖၣ်,ဒီးကယဲၢ်တၢ်လၢအအိၣ်ဒီးအီၤခဲလၢာ်လီၤ.
33ဒီးတၢ်ကမၤအသးတုၤဖၤရိးကိးန့ၢ်သု,ဒီးစံးသုမၤတၢ်မနုၤလဲၣ်န့ၣ်ဒီး,
34သုဘၣ်စံး,နကုၢ်နပှၤ,ပဝဲဒၣ်ဒီးပပၢ်တဖၣ်,လၢအဖိၣ်သၣ်ခွါထီၣ်လံၤလံၤတုၤခဲကနံၣ်အံၤ,မ့ၢ်ပှၤဘၣ်ဃးဒီးဆၣ်ဖိကီၢ်ဖိအဒၢန့ၣ်,ဒ်သိးသုကအိၣ်ကဆိးလၢကီၢ်ကိရှ့ၣ်အပူၤလီၤ.အဂ့ၢ်ဒ်အံၤ,ကယဲၢ်ပှၤလၢအကွၢ်သိဒီးမဲာ်တဲးလဲးခဲလၢာ်န့ၣ်,မ့ၢ်တၢ်သးဘၣ်အၢလၢပှၤအဲၤကူပတူးဖိအမဲာ်ညါလီၤ.