Hebrews 2
1မၤသးဒ်န့ၣ်ဒီး,တၢ်လၢပနၢ်ဟူန့ၣ်,ဒ်သိးပသုတလဲၤပူၤကွံာ်အီၤတဂ့ၤဒီး,ပဘၣ်ပလီၢ်ပသးဒိၣ်တက့ၢ်လီၤ.
2အဂ့ၢ်ဒ်အံၤ,တၢ်ကတိၤလၢကလူးတဖၣ်အစုပူၤန့ၣ်,မ့ၢ်အိၣ်ဂၢၢ်အိၣ်ကျၢၤဝဲ,ဒီးကယဲၢ်တၢ်မၤကမၣ်ဒီးတၢ်တစူၢ်ဘၣ်န့ၣ်မ့ၢ်န့ၢ်ဘၣ်အဘူးအလဲတီတီဒီး,
3ပမ့ၢ်ပာ်တၢ်အုၣ်က့ၤခီၣ်က့ၤဒိၣ်ထဲထဲအံၤ,လၢတၢ်နီတမံၤဘၣ်ဒီး,ပကဃ့ၢ်ပူၤဖျဲးဒ်လဲၣ်.အဝဲန့ၣ်ပကစၢ်စံးဘၣ်တဲဘၣ်ဝဲလၢအခီၣ်ထံး,ဒီးပှၤလၢအနၢ်ဟူဝဲတဖၣ်န့ၣ်,မၤဂၢၢ်မၤကျၢၤက့ၤဒီးပှၤလီၤ.
4ယွၤအုၣ်ဃုာ်အသးဒီးအီၤ,လၢတၢ်ပနီၣ်လီၤလး,ဒီးတၢ်လီၤလိၢ်လီၤလး,ဒီးတၢ်အစိအကမီၤအါမံၤ,ဒီးသးစီဆှံအတၢ်ဟ့ၣ်တဖၣ်,ဖဲအသးလီၤ.
5အဂ့ၢ်ဒ်အံၤ,ခဲကိာ်တဃၣ်လၢပကတိၤတၢ်လၢအဂ့ၢ်န့ၣ်,တပာ်ဘၣ်ဝဲလၢကလူးတဖၣ်အဖီလာ်ဘၣ်.
6မ့မ့ၢ်ပှၤတဂၤအုၣ်အသးတပူၤပူၤဒီးစံးဝဲဒၣ်, ပှၤကညီလၢနကသ့ၣ်နီၣ်ထီၣ်အီၤ, ဒီးပှၤကညီဖိခွါလၢနကအံးကွၢ်အီၤန့ၣ်,မ့ၢ်မနုၤလဲၣ်.
7နပာ်အီၤလၢကလူးတဖၣ်အဖီလာ်တစဲး, နဒုးကုာ်ခိၣ်သလုးအီၤလၢတၢ်အကဟုအကညီၢ်,ဒီးတၢ်လၤကပီၤ, ဒီးနပာ်အီၤလၢနစုအတၢ်မၤတဖၣ်အဖီခိၣ်,
8နပာ်တၢ်တမံၤလၢ်လၢ်လၢအခီၣ်အဖီလာ်လီၤ. အဂ့ၢ်ဒ်အံၤ,လၢအပာ်တၢ်တမံၤလၢ်လၢ်လၢအဖီလာ်ဒီး,တဒုးအိၣ်လီၤတဲာ်ဘၣ်တၢ်လၢအတပာ်လၢအဖီလာ်န့ၣ်နီတမံၤဘၣ်.
9မ့မ့ၢ်ခဲကနံၣ်အံၤ,တၢ်ပာ်တၢ်ခဲလၢာ်လၢအဖီလာ်န့ၣ်,ပတထံၣ်ဒံးဘၣ်.ဘၣ်ဆၣ်ဒီးပထံၣ်ယ့ၣ်ရှူး,လၢအဘၣ်တၢ်ပာ်အီၤလၢကလူးတဖၣ်အဖီလာ်တစဲးစဲး,လၢအဒိးတၢ်သံအတၢ်နးတၢ်ဖှီၣ်အဃိန့ၣ်ဒိးကုာ်ခိၣ်သလုးအသးလၢတၢ်အကဟုအကညီၢ်ဒီးတၢ်လၤကပီၤ,ဒ်သိးအကလ့ၣ်ကွၢ်တၢ်သံလၢပှၤကညီခဲလၢာ်အဂီၢ်,လၢယွၤအဘျုးအဖှိၣ်အဃိန့ၣ်လီၤ.
10အဂ့ၢ်ဒ်အံၤ,ပှၤလၢတၢ်ခဲလၢာ်မ့ၢ်လၢအဂီၢ်,ဒီးတၢ်ခဲလၢာ်ကဲထီၣ်လၢအီၤတဂၤန့ၣ်,တုၤအဆှၢနုာ်အဖိခွါအါဂၤဆူတၢ်အလၤကပီၤအပူၤဒီး,ဂ့ၤဝဲလၢအကမၤလၢထီၣ်ပှဲၤထီၣ်အတၢ်အုၣ်က့ၤခီၣ်က့ၤအခိၣ်တဂၤန့ၣ်လၢတၢ်နးတၢ်ဖှီၣ်လီၤ.
11အဂ့ၢ်ဒ်အံၤ,ပှၤလၢအမၤစီဆှံတၢ်,ဒီးပှၤလၢအဒိးစီဆှံအသးတဖၣ်န့ၣ်,မ့ၢ်အဘၣ်ဃးဒီးပှၤတဂၤဃီခဲလၢာ်လီၤ.မၤသးဒ်န့ၣ်ဒီးတၢ်ကိးအီၤလၢဒီပုၢ်ဝဲၢ်န့ၣ်,အမဲာ်တဆှးဘၣ်ဝဲဘၣ်,
12ဒီးစံးဝဲဒၣ်, ယကစံးဘၣ်တဲဘၣ်နမံၤလၢယဒီပုၢ်ဝဲၢ်, လၢတၢ်အိၣ်ဖှိၣ်အသးကံၢ်ပူၤန့ၣ်,ယကသးဝံၣ်ထီၣ်နၤလီၤ.
13ဒီးမၤကဒီးတစု,ယကသန့ၤယသးလၢအီၤလီၤ.ဒီးမၤကဒီးတစု,ကွၢ်ကွၢ်,ယၤဒီးယဖိတဖၣ်လၢယွၤဟ့ၣ်လီၤယၤလီၤ. 2:13 ၡါ.၈း၁၈
14မၤသးဒ်န့ၣ်ဒီး,ဖိတဖၣ်ဘၣ်ဃးဒီးတၢ်ညၣ်ဒီးတၢ်သွံၣ်သတးဒီး,အဝဲဒၣ်အကစၢ်ပှၢ်ဒိးန့ၢ်စ့ၢ်ကီးတၢ်တဖၣ်ဒ်န့ၣ်အသိး,ဒ်သိးလၢတၢ်သံအဃိသတးဒီး,ကမၤဟးဂီၤပှၤအိၣ်ဒီးတၢ်သံအစိအကမီၤ,ဒ်ပစံးတၢ်အသိး,မုၣ်ကီၤလံၢ်,
15ဒီးကမၤထူၣ်ဖျဲးပှၤလၢအကဲကုၢ်တစိၤဒၣ်အီၤလၢအပျံၤတၢ်သံအဃိတဖၣ်လီၤ.
16အဂ့ၢ်ဒ်အံၤ,တမ့ၢ်ဘၣ်အမၤစၢၤကလူးတဖၣ်လ့ၤတက့ၤဘၣ်.မ့ၢ်အမၤစၢၤစီၤအၤဘြၤဟၣ်အချံအသၣ်လီၤ.
17မၤသးဒ်န့ၣ်ဒီးဂ့ၤလၢအဒ်သိးသိးဒီးအဒီပုၢ်ဝဲၢ်လၢတၢ်ခဲလၢာ်အဂ့ၢ်,ဒ်သိးအကကဲထီၣ်ပှၤလုၢ်တၢ်အဒိၣ်လၢအသးကညီၤတၢ်,ဒီးအကလုၢ်တီလၢတၢ်ဘၣ်ဃးဒီးယွၤသတးဒီး,ကမၤပူၤဖျဲးတၢ်လၢပှၤကညီအတၢ်ဒဲးဘးအဂီၢ်လီၤ.
18အဂ့ၢ်ဒ်အံၤ,မ့ၢ်အကစၢ်ဒၣ်ဝဲဒိးဘၣ်တၢ်,လၢအဘၣ်တၢ်လ့ပစီအဃိဒီး,မၤစၢၤပှၤလၢအဘၣ်တၢ်လ့ပစီတဖၣ်သ့ဝဲလီၤ.