Isaiah 20
1တၢ်လၢနံၣ်လၢစီၤတၢ်တၣ်ဟဲဆူအၤစဒိာ်(တုၤအၤရှူၢ်အစီၤပၤစၤရကိၣ်မၢလီၤအီၤ)ဒီးဒုးတၢ်ဒီးအၤစဒိာ်ဒီးမၤန့ၢ်အီၤန့ၣ်လီၤ.
2တၢ်လၢအကတီၢ်န့ၣ်ယွၤကတိၤတၢ်လၢစီၤအၤမိာ်အဖိခွါစီၤယၡါယၤအစုပူၤ,ဒီးစံးဝဲဒၣ်,လဲၤဘ့ၣ်ကွံာ်ထၢၣ်အတၢ်ကံးညာ်လၢနယီၢ်ဒ့လိၤ,ဒီးဘ့ၣ်ကွံာ်နခီၣ်ဖံးလၢနခီၣ်တက့ၢ်.ဒီးမၤဝဲဒ်န့ၣ်,ဒီးဟးအိၣ်ဘ့ၣ်ဆ့,ဒီးအိၣ်ဘ့ၣ်ခီၣ်လီၤ.
3ဒီးယွၤစံးဝဲဒၣ်,ဒ်ယခ့ယပှၤစီၤယၡါယၤဟးအိၣ်ဘ့ၣ်ဆ့ဒီးအိၣ်ဘ့ၣ်ခီၣ်သၢနံၣ်,လၢတၢ်ပနီၣ်ဒီးတၢ်အဒိအတဲာ်လၢအဲၤကူပတူးအဂ့ၢ်,ဒီးကူၤၡးအဂ့ၢ်အသိးန့ၣ်,
4အၤရှူၢ်အစီၤပၤကမိၤပှၤလၢတၢ်ဖီၣ်န့ၢ်အီၤလၢအဲၤကူပတူး,ဒီးပှၤလၢတၢ်မၢကဲကုၢ်အီၤလၢကူၤၡးပှၤအသးစၢ်,ဒီးပှၤအသးပှၢ်,အိၣ်ဘ့ၣ်ဆ့,အိၣ်ဘ့ၣ်ခီၣ်,အခံကီၢ်ဘ့ၣ်ဆ့,အဲၤကူပတူးအတၢ်မဲာ်ဆှးန့ၣ်လီၤ.
5ဒီးပှၤကပျံၤဝဲ,အသးကတုၤဝဲလၢကူၤၡးလၢအသန့ၤအသးလၢအီၤအဃိ,ဒီးလၢအဲၤကူပတူးလၢအပာ်ကဖိအသးလၢအီၤအဃိလီၤ.
6ဒီးတၢ်လၢမုၢ်တနံၤန့ၣ်ပှၤပီၣ်လဲၣ်နံၤဖိကစံး,ကွၢ်ကွၢ်တၢ်လၢပကွၢ်လၢ်အကျဲန့ၣ်,တၢ်လၢပဃ့ၢ်ဆူအအိၣ်လၢတၢ်မၤစၢၤအဂီၢ်လၢပတပူၤဖျဲးဒီးအၤရှူၢ်အစီၤပၤအမဲာ်ညါန့ၣ်မ့ၢ်ဒ်န့ၣ်,ဒီးပကထူၣ်ဖျဲးပကစၢ်ဒၣ်ပဝဲဒ်လဲၣ်.