Isaiah 35
1ပှၢ်မုၢ်ကနၢဒီးဃဲၣ်ခိၣ်ဃဲၣ်လာ်န့ၣ်ကသးခု,ဒီးမံၤခိၣ်သိၣ်လာ်ကသူၣ်ဖှံသးညီ,ဒီးကဖီထီၣ်ဒ်ဖီဝံဒံၣ်အသိးန့ၣ်လီၤ.
2ဖီထီၣ်ဒီးကဖီထီၣ်,ဒီးသူၣ်ဖှံသးညီလီၤ.ဒီးတၢ်သူၣ်ခုသးခု,ဒီးတၢ်ကိးပသူထီၣ်ကအိၣ်ဝဲလီၤ.တၢ်ကဟ့ၣ်လီၤအီၤလၢလဘၤနိၣ်အလၤကပီၤ,ကၢ်မ့ၤလး,ဒီးၡၤရိၣ်အဃံအလၤလီၤ.ပှၤကထံၣ်ဘၣ်ယွၤအလၤကပီၤ,ပကစၢ်အကဟုအကညီၢ်လီၤ.
3ဒုးဆူၣ်ထီၣ်စုလၢအလီၤစၢ်,ဒီးဒုးကျၢၤထီၣ်ခီၣ်လ့ၢ်ခိၣ်လၢအကနိးဝဲန့ၣ်တက့ၢ်.
4စံးဘၣ်ပှၤလၢအပျံၤတၢ်,အိၣ်ဆူၣ်တက့ၢ်.ပျံၤတၢ်တဂ့ၤ,ကွၢ်ကွၢ်,သုကစၢ်လီၤ.တၢ်မၤဆၢတၢ်ဟဲဝဲ,ယွၤကဟ့ၣ်ကၣ်တၢ်လီၤ.အဝဲဒၣ်ဟဲဝဲဒီးကအုၣ်က့ၤခီၣ်က့ၤသုလီၤ.
5တုၤနုၤတစုပှၤမဲာ်ဘျီၣ်အမဲာ်ကအိးထီၣ်,ဒီးပှၤနၢ်တအၢအနၢ်ကကပီၤထီၣ်လီၤ.
6တုၤနုၤတစုပှၤအခီၣ်ဟးဂီၤကစံၣ်ထီၣ်ဒ်တၤဟိအသိး,ဒီးပှၤတအုၣ်အပျ့ၤကသးဝံၣ်တၢ်လီၤ.အဂ့ၢ်ဒ်အံၤ,ထံဖျိးထီၣ်လၢပှၢ်မုၢ်ကနၢ,ဒီးထံကျိတဖၣ်လၢမံၤခိၣ်သိၣ်လာ်န့ၣ်လီၤ.
7ဒီးပံၢ်ကဒဲးကကဲထီၣ်ထံနိၣ်,ဒီးဟီၣ်ခိၣ်ဃ့န့ၣ်ထံထီၣ်ပၢၢ်,ထွံၣ်မံၤအတဝၢပူၤကကဲထီၣ်တပိၢ်ဒီးဆှဲအလီၢ်န့ၣ်လီၤ.
8ဒီးဖဲန့ၣ်ကျဲမုၢ်ဒီးကျဲဖိကအိၣ်,ဒီးတၢ်ကကိးအီၤလၢကျဲစီဆှံ,ဒီးတၢ်တကဆှီဘၣ်တပိာ်ဘၣ်အီၤဘၣ်,ဒီးကအိၣ်ထဲလၢအဝဲသ့ၣ်အဂီၢ်,ဒီးပှၤပိာ်ကျဲ,ဒီးပှၤလၢအတမၤလိဘၣ်တၢ်ဘၣ်န့ၣ်တဟးဖျိးကျဲန့ၣ်ဘၣ်.
9ဒီးခ့ယုၢ်တအိၣ်ဘၣ်ဖဲန့ၣ်ဘၣ်,ဒီးတၢ်ဒူတၢ်ဃိၤတပိာ်ဘၣ်အီၤ,ဒီးတအိၣ်ဘၣ်ဖဲန့ၣ်ဘၣ်.မ့မ့ၢ်ပှၤဒိးပှ့ၤက့ၤအသးကလဲၤတၢ်ဖဲန့ၣ်လီၤ.
10ဒီးပှၤလၢယွၤပှ့ၤက့ၤအီၤန့ၣ်ကဟဲက့ၤဆူစံယိၣ်အိၣ်ဒီးတၢ်သးဝံၣ်,ဒီးတၢ်သူၣ်ခုသးခုအထူအယိာ်လၢအခိၣ်အဖီခိၣ်လီၤ.တၢ်သူၣ်ဖှံသးညီဒီးတၢ်သူၣ်ခုသးခုကချုးန့ၢ်အီၤ,ဒီးတၢ်သူၣ်အုးသးအုးဒီးတၢ်ကအုကစွါကဃ့ၢ်ထီၣ်ကွံာ်ဝဲလီၤ.