Isaiah 42
1ကွၢ်ယခ့ယပှၤတက့ၢ်.ယကဟံးဃာ်အီၤ,ပှၤလၢယဃုထၢအီၤလၢအဘၣ်ယသးလၢအီၤတဂၤန့ၣ်.ယပာ်ယသးလၢအလိၤလီၤ.ကစံၣ်တဲၤတဲလီၤတၢ်စံၣ်ညီၣ်လၢပှၤကလုာ်တဖၣ်လီၤ.
2တကိးပသူထီၣ်ဘၣ်,ဒီးတထုထီၣ်အကလုၢ်ဘၣ်,ဒီးတဒုးနၢ်ဟူဘၣ်အကလုၢ်လၢကျဲပူၤဘၣ်.
3တပိၢ်တဘိလၢအသဘှံးန့ၣ်တမၤတဲာ်ကွံာ်ဘၣ်ဝဲဘၣ်,ဒီးတမၤပံာ်ဘၣ်မ့ၣ်အူဒၢအပှံာ်လၢအကပီၤပံာ်လ့ပံာ်လ့ဘၣ်.ကဒုးဟဲထီၣ်တၢ်စံၣ်ညီၣ်လၢတၢ်မ့ၢ်တၢ်တီလီၤ.
4တကပီၤဘၣ်ပံာ်လ့ပံာ်လ့,ဒီးတသဘှံးဘၣ်တုၤအပာ်တၢ်စံၣ်ညီၣ်လၢဟီၣ်ခိၣ်ချၢလီၤ.ဒီးကီးတဖၣ်န့ၣ်ကကွၢ်လၢ်အတၢ်သိၣ်တၢ်သီအကျဲလီၤ.
5ကစၢ်ယွၤလၢအတ့လီၤမူခိၣ်,ဒီးသလၣ်ထီၣ်အီၤ,လၢအဒါလီၤဟီၣ်ခိၣ်ဒီးတၢ်မဲထီၣ်လၢအပူၤ,လၢအဟ့ၣ်လီၤပှၤဂီၢ်မုၢ်လၢအအိၣ်ဝဲလၢအဖီခိၣ်လၢအသါ,ဒီးဟ့ၣ်ပှၤလၢအဟးလၢအလိၤန့ၣ်လၢအသးတဂၤန့ၣ်စံးဝဲဒ်အံၤ,
6ယဲဒၣ်ယွၤအံၤ,ယကိးန့ၢ်နၤလၢတၢ်မ့ၢ်တၢ်တီ,ဒီးယကဟံးဃာ်နၤလၢနစု,ဒီးယကအံးလီၤကွၢ်လီၤနၤ,ဒီးဟ့ၣ်လီၤနၤလၢတၢ်အၢၣ်လီၤအီလီၤလၢပှၤဂီၢ်မုၢ်အဂီၢ်,လၢတၢ်ကပီၤလၢပှၤကလုာ်တဖၣ်အဂီၢ်,
7ဒ်သိးနကအိးထီၣ်ပှၤမဲာ်ဘျီၣ်အမဲာ်,ဒ်သိးနကဒုးဟးထီၣ်ပှၤဃိာ်ဖိလၢဃိာ်ပူၤ,ဒီးပှၤလၢအအိၣ်ဝဲဆိးဝဲလၢတၢ်ခံးကျါန့ၣ်လၢဃိာ်အဟံၣ်ပူၤလီၤ.
8ယဲဒၣ်အံၤယမ့ၢ်ယွၤလီၤ.အဝဲန့ၣ်မ့ၢ်ယမံၤလီၤ.ဒီးယလၤကပီၤယတဟ့ၣ်လီၤဘၣ်လၢပှၤအဂၤဘၣ်,ဒီးယတၢ်စံးထီၣ်ပတြၢၤယတဟ့ၣ်ဘၣ်လၢတၢ်ဂီၤတၢ်ဖီၣ်ဘၣ်.
9ကွၢ်ကွၢ်,တၢ်အခီၣ်ထံးတဖၣ်န့ၣ်မၤလံအသးလံ,ဒီးတၢ်အသီတဖၣ်န့ၣ်ယဒုးနဲၣ်လီၤ.တချုးအိၣ်ထီၣ်ဒံးဘၣ်ဒီး,ယဒုးနၢ်ဟူသုလၢအီၤလီၤ.
10သးဝံၣ်ယွၤလၢတၢ်သးဝံၣ်အသီ,ဒီးအတၢ်စံးထီၣ်ပတြၢၤလၢဟီၣ်ခိၣ်အကတၢၢ်တဖၣ်န့ၣ်,ပှၤလၢအလဲၤလီၤလၢပီၣ်လဲၣ်ဒီးတၢ်လၢအမၤပှဲၤအီၤ,ကီးတဖၣ်,ဒီးပှၤလၢအအိၣ်လၢအဖီခိၣ်သ့ၣ်ဧၢ.
11ပှၢ်မုၢ်ကနၢဒီးအဝ့ၢ်တဖၣ်ကထုထီၣ်အကလုၢ်,အတဝီတဖၣ်လၢက့ဒၢ်အိၣ်ဝဲဆိးဝဲလၢအပူၤန့ၣ်,ပှၤအိၣ်ဝဲဆိးဝဲလၢစ့လၤကကိးလၢအကလုၢ်ဖးဒိၣ်,ကကိးပသူထီၣ်လၢကစၢၢ်ခိၣ်လီၤ.
12ကပာ်လၤကပီၤယွၤ,ဒီးဒုးနဲၣ်အတၢ်စံးထီၣ်ပတြၢၤလၢကီးတဖၣ်လီၤ.
13ယွၤကလဲၤထီၣ်ဒ်ပှၤအဆူၣ်အသိးန့ၣ်,ကထိၣ်ဂဲၤအသးဆူၣ်ဒ်ပှၤသုးဖိအသိးန့ၣ်,ကကိးထီၣ်လၢအကလုၢ်ဖးဒိၣ်,ကကိးပသူထီၣ်,ကမၤဃၣ်အဒုၣ်အဒါလီၤ.
14ယအိၣ်ဘှီၣ်ကလာ်ကယီၤကီလံ.ယအိၣ်ဃိကလာ်,ဒီးယကီၤယသးလံလီၤ.မ့မ့ၢ်ခဲကနံၣ်အံၤ,ယကကိးလ့ၢ်လ့ၢ်ဒ်ပိာ်မုၣ်လၢအဟုးဆါအသိး,ယကမၤဟးဂီၤတၢ်,ယကယူၢ်လီၤကွံာ်တၢ်တပူၤဃီလီၤ.
15ဒီးယကမၤသယုၢ်ကစၢၢ်တဖၣ်,ဒီးတၢ်စိခိၣ်တဖၣ်,ဒီးဒုးဃ့ထီၣ်ကွံာ်အနီၣ်ဧိၤမံၤဧိၤခဲလၢာ်,ဒီးယကပာ်အထံမိၢ်ပှၢ်လၢခိ,ဒီးယကဒုးလီၤသံးကွံာ်နိၣ်ဧိၤအီဧိၤလီၤ.
16ဒီးယကဒုးလဲၤပှၤမဲာ်ဘျီၣ်လၢကျဲမုၢ်လၢအတသ့ၣ်ညါဘၣ်ဝဲဘၣ်,ဒီးယကဒုးပိာ်အီၤလၢကျဲဖိလၢအတသ့ၣ်ညါတ့ၢ်ဝဲဘၣ်,ဒီးယကပာ်တၢ်ခံးလၢတၢ်ကပီၤလၢအမဲာ်ညါ,ဒီးတၢ်အက့ၣ်တဖၣ်လၢတၢ်အလိၤတဖၣ်န့ၣ်လီၤ.တၢ်တဖၣ်န့ၣ်ယကမၤ,ဒီးယတလဲၤသဒၣ်ဘၣ်အီၤဘၣ်.
17ကဘၣ်တၢ်ဘိးကဒါက့ၤအီၤ,ဒီးတၢ်မဲာ်ဆှးနးမး,ပှၤလၢအသန့ၤအသးလၢတၢ်ဂီၤစိးပျၤအသး,လၢအစံးတၢ်ဂီၤသိအသး,သုမ့ၢ်ပကစၢ်လီၤန့ၣ်လီၤ.
18ပှၤလၢအနၢ်တအၢသ့ၣ်ဧၢ,ကနၣ်တက့ၢ်.ဒီးပှၤလၢအမဲာ်ဘျီၣ်သ့ၣ်ဧၢ,ကွၢ်ထံဒ်သိးသုကထံၣ်တၢ်တက့ၢ်.
19မ့တမ့ၢ်ဘၣ်ယခ့ယပှၤဒီးမ့ၢ်မတၤမဲာ်ဘျီၣ်တဂၤလဲၣ်.ဒီးပှၤနၢ်တအၢဒ်ယကလူးလၢယကမၢလီၤအီၤန့ၣ်မတၤတဂၤလဲၣ်.မ့ၢ်မတၤမဲာ်ဘျီၣ်ဒ်ပှၤအလၢအပှဲၤ,ဒီးမဲာ်ဘျီၣ်ဒ်ယွၤအခ့အပှၤအသိးန့ၣ်တဂၤလဲၣ်.
20နထံၣ်တၢ်အါမံၤဘၣ်ဆၣ်ဒီးတတိၢ်န့ၢ်ဘၣ်.နအိးထီၣ်အသးဘၣ်ဆၣ်ဒီး,တနၢ်ဟူဘၣ်တၢ်ဘၣ်.
21ဘၣ်ယွၤအသးလၢအတၢ်တီတၢ်လိၤအဃိ,လၢအကပာ်ဒိၣ်တၢ်သိၣ်တၢ်သီ,ဒီးပာ်အီၤအိၣ်ဒီးအလၤကပီၤလီၤ.
22ဘၣ်ဆၣ်ဒီးပှၤတကလုာ်အံၤ,မ့ၢ်ပှၤလၢတၢ်ဂုာ်ဆူၣ်အတၢ်,ဒီးဘၣ်ပျံၤသကွီၤလၢတၢ်အိပူၤခဲလၢာ်,ဒီးအိၣ်ခူသူၣ်လၢဃိာ်တဖၣ်အပူၤလီၤ.ကဲထီၣ်တၢ်လၢပှၤဂုာ်ဆူၣ်အီၤဒီးတၢ်မၤပူၤမၤဖျဲးတအိၣ်ဘၣ်,ဒီးတၢ်လၢပှၤမၤန့ၢ်ဆူၣ်အီၤ,ဒီးပှၤလၢအစံး,ဟ့ၣ်က့ၤတၢ်တက့ၢ်န့ၣ်တအိၣ်ဘၣ်.
23မ့ၢ်မတၤလၢအကျါကကနၣ်တၢ်န့ၣ်တဂၤလဲၣ်.မ့ၢ်မတၤကဒိကနၣ်ဒီးနၢ်ဟူတၢ်လၢဆူညါအဆၢအကတီၢ်အဂီၢ်တဂၤလဲၣ်.
24မ့ၢ်မတၤဟ့ၣ်လီၤယၤကိာ်လၢတၢ်မၤန့ၢ်ဆူၣ်,ဒီးအံၣ်စရ့လးလၢပှၤဂုာ်ဆူၣ်တၢ်အစုပူၤန့ၣ်တဂၤလဲၣ်.ယွၤလၢပမၤကမၣ်ဘၣ်အီၤ,တမ့ၢ်ဘၣ်ဧါ.လဲၤဝဲလၢအကျဲပူၤအသးတအိၣ်,ဒီးတကနၣ်ဘၣ်အတၢ်သိၣ်တၢ်သီဘၣ်လီၤ.
25မၤသးဒ်န့ၣ်ဒီးယွၤလူလီၤဘၣ်အီၤလၢအသးထီၣ်,အသးကဲၤထီၣ်,ဒီးတၢ်ဒုးသုးအတၢ်မၤဆူၣ်န့ၣ်လၢအလိၤလီၤ.ဒီးအဝဲန့ၣ်ဆိၣ်ကဲၤအီၤလၢမ့ၣ်အူဝးတရံးဝဲ,ဘၣ်ဆၣ်ဒီးတသ့ၣ်ညါဘၣ်.ဒီးမ့ၣ်အူအီၣ်အီၤဘၣ်ဆၣ်ဒီး,တပာ်ဆိကမိၣ်ဘၣ်အသးဘၣ်လီၤ.