Luke 4
1ဒီးယ့ၣ်ရှူးလၢပှဲၤဝဲဒီးသးစီဆှံ,ဒီးက့ၤက့ၤဝဲလၢထံယၢ်ဒ့ၣ်,ဒီးဘၣ်တၢ်ဆှၢအီၤလၢသးန့ၣ်ဆူပှၢ်မုၢ်ကနၢ,ဒီးဘၣ်တၢ်လ့ပစီလၢမုၣ်ကီၤလံၢ်,အနံၤအသီလွံၢ်ဆံလီၤ.
2ဒီးလၢအနံၤအသီန့ၣ်,တအီၣ်ဘၣ်တၢ်နီတမံၤဘၣ်.ဒီးအဝဲန့ၣ်လၢထီၣ်ပှဲၤထီၣ်ဝံၤဒီး,တၢ်သၣ်ဝံၤအသးလီၤ.
3ဒီးမုၣ်ကီၤလံၢ်စံးဘၣ်အီၤ,နမ့မ့ၢ်ယွၤအဖိခွါဒီး,စံးဘၣ်လၢၢ်တဖျၢၣ်အံၤဒ်သိးအကကဲထီၣ်ကိၣ်တက့ၢ်.
4ဒီးယ့ၣ်ရှူးကတိၤဆၢအီၤဒီးစံးဝဲဒၣ်,တၢ်ကွဲးအသး,တမ့ၢ်ဘၣ်ပှၤကညီမူဝဲထဲလၢကိၣ်န့ၣ်ဧိၤဘၣ်.(မ့ၢ်လၢကယဲၢ်ယွၤအတၢ်ကတိၤတမံၤလၢ်လၢ်လီၤ.)
5ဒီးမုၣ်ကီၤလံၢ်ဆှၢထီၣ်အီၤဆူကစၢၢ်ဖးထီတဖျၢၣ်အလိၤ,ဒီးတစိၢ်ဖိအတီၢ်ပူၤန့ၣ်ဒုးနဲၣ်အီၤလၢကယဲၢ်ဘီဧိၤမုၢ်ဧိၤလၢဟီၣ်ခိၣ်ချၢခဲလၢာ်လီၤ.
6ဒီးမုၣ်ကီၤလံၢ်စံးဘၣ်အီၤ,ကယဲၢ်တၢ်အစိအကမီၤအံၤ,ဒီးအလၤအကပီၤန့ၣ်,ယကဟ့ၣ်နၤလီၤ.အဂ့ၢ်ဒ်အံၤ,တၢ်ဟ့ၣ်လီၤလံလၢယစုပူၤလံ,ဒီးဖဲဒၣ်ယသးပှၤလၢတၢ်မိၣ်ဟ့ၣ်ယသးလၢအီၤဒီး,ယဟ့ၣ်ယဲဒၣ်လီၤ.
7မၤသးဒ်န့ၣ်ဒီးနမ့ၢ်တီၤလီၤဘူၣ်ထီၣ်ဘါထီၣ်ယၤဒီး,ကကဲထီၣ်နတၢ်ခဲလၢာ်လီၤ.
8ဒီးယ့ၣ်ရှူးကတိၤဆၢအီၤဒီးစံးဝဲဒၣ်,တၢ်ကွဲးအသး,ယွၤ,နကစၢ်န့ၣ်,နဘၣ်ဘူၣ်ထီၣ်ဘါထီၣ်အီၤ,ဒီးနဘၣ်မၤထဲအဝဲဒၣ်အတၢ်ဧိၤလီၤ.
9ဒီးလဲၤဆှၢထီၣ်အီၤဆူယရူၤၡလ့ၣ်အပူၤ,ဒီးပာ်ထီၣ်အီၤလၢတၢ်လုၢ်ဟံၣ်အခိၣ်စိၣ်လီၤ.ဒီးစံးဘၣ်အီၤ,နမ့မ့ၢ်ယွၤအဖိခွါဒီး,တ့ၢ်လီၤနသးဖဲအံၤတက့ၢ်.
10အဂ့ၢ်ဒ်အံၤ,တၢ်ကွဲးအသးလၢအကမၤလိာ်အကလူးတဖၣ်လၢနဂ့ၢ်နကျိၤ,
11ဒ်သိးအကအံးက့ၤကွၢ်က့ၤနၤ,ဒီးအဝဲသ့ၣ်ကစိာ်နၤလၢအစုလိၤ,ဒ်သိးနခီၣ်သုတဘၣ်ထံးဒီးလၢၢ်တဂ့ၤလီၤ.
12ဒီးယ့ၣ်ရှူးကတိၤဆၢတၢ်ဒီးစံးဘၣ်အီၤ,တၢ်စံးဝဲဒၣ်,သုတလ့ပစီယွၤနကစၢ်န့ၣ်တဂ့ၤ.
13ဒီးမုၣ်ကီၤလံၢ်လ့ပစီတၢ်ခဲလၢာ်ဝံၤဒီး,ဟးဖးဒီးအီၤတစိၢ်လီၤ.
14ဒီးယ့ၣ်ရှူးက့ၤက့ၤဆူကၤလံၤလါလၢသးန့ၣ်အစိအကမီၤ,ဒီးအကစီၣ်ဟူထီသါလီၤဝးတရံးဝဲဒီကီၢ်ညါန့ၣ်လီၤ.
15ဒီးသိၣ်က့ၤသီက့ၤတၢ်လၢအဘူၣ်ဘျီၣ်ပူၤတဖၣ်,ဒီးပှၤစံးထီၣ်ပတြၢၤအီၤခဲလၢာ်လီၤ.
16ဒီးက့ၤက့ၤဝဲဆူနစၤရ့းဖဲအဒိၣ်ထီၣ်က့ၤဝဲအလီၢ်လီၤ.ဒီးဒ်အလုၢ်အလၢ်အသိးန့ၣ်,ဘၣ်အိၣ်ဘှံးအနံၤဒီး,လဲၤနုာ်ဆူဘူၣ်ဘျီၣ်ပူၤ,ဒီးဂဲၤဆၢထၢၣ်ဝဲဒ်သိးအကဖးလံာ်လီၤ.
17ဒီးတၢ်ဟ့ၣ်အီၤလၢဝံယၡါယၤအလံာ်လီၤ.ဒီးသလၣ်ထီၣ်လံာ်,ဒီးထံၣ်န့ၢ်အလီၢ်ဖဲတၢ်ကွဲးဝဲ,
18ယွၤအသးအိၣ်လၢယလိၤလီၤ. အဂ့ၢ်ဒ်အံၤ,ဖှူယၤဒ်သိးယကစံၣ်တဲၤတဲလီၤတၢ်သးခုအကစီၣ်လၢပှၤဖှီၣ်ဖိယာ်ဖိလီၤ. မၢလီၤယၤ,(ဒ်သိးယကမၤဘျါက့ၤပှၤအသူၣ်ကၢ်အသးလီၤ), ဒ်သိးယကကိးထီၣ်တၢ်ထူၣ်ဖျဲးလၢပှၤဘၣ်တၢ်မၢကဲကုၢ်အဂီၢ်,ဒီးတၢ်ထံၣ်ထီၣ်က့ၤလၢပှၤမဲာ်ဘျီၣ်အဂီၢ်, ဒ်သိးယကပျၢ်ပှၤလၢအဘၣ်တၢ်မၤအၢမၤနးအီၤ,
19ဒ်သိးယကကိးထီၣ်နံၣ်တၢ်ဘၣ်ယွၤအသးန့ၣ်လီၤ.
20ဒီးထူထီၣ်လံာ်,ဒီးဟ့ၣ်လီၤက့ၤလၢတၢ်အခ့အပှၤတဂၤ,ဒီးဆ့ၣ်နီၤက့ၤဝဲလီၤ.ဒီးပှၤအိၣ်လၢဘူၣ်ဘျီၣ်ပူၤတဖၣ်န့ၣ်,ကွၢ်အီၤလၢအမဲာ်ထံထံဆးဆးခဲလၢာ်လီၤ.
21ဒီးစံးဘၣ်အီၤ,တၢ်ကွဲးအသးအံၤလၢထီၣ်ပှဲၤထီၣ်လၢသုနၢ်ပူၤလၢမုၢ်မဆါတနံၤအံၤလီၤ.
22ဒီးပှၤခဲလၢာ်အုၣ်အသးလၢအီၤ,ဒီးမ့ၢ်တၢ်ကတိၤအဂ့ၤအဘၣ်လၢအဟဲထီၣ်လၢအထးခိၣ်အဃိဒီး,ကမၢကမၣ်ဝဲတကူၢ်သ့ၣ်လီၤ.ဒီးစံးဝဲဒၣ်,အဝဲတဂၤအံၤမ့ၢ်စီၤယိၤသးအဖိခွါန့ၣ်တမ့ၢ်ဘၣ်ဧါ.
23ဒီးစံးဘၣ်အီၤ,မ့ၢ်မးသုကစံးဘၣ်ယၤလၢတၢ်ကတိၤဒိအံၤ,ကသံၣ်သရၣ်ဧၢ,မၤဘျါက့ၤဒၣ်နသးတက့ၢ်.ဖဲဒၣ်ပနၢ်ဟူတၢ်မၤအသးလၢကပ့းရနီၣ်အပူၤတဖၣ်န့ၣ်,မၤစ့ၢ်ကီးဖဲအံၤလၢနထံနကီၢ်ဒၣ်နဲတက့ၢ်,
24ဒီးစံးဝဲဒၣ်,ယစံးဘၣ်သုတီတီ,တၢ်လၢဝံဧိၤမီၣ်ဧိၤန့ၣ်,တဘၣ်ဘၣ်တၢ်တူၢ်လိာ်အီၤလၢအထံအကီၢ်ဒၣ်ဝဲ,နီတဂၤဘၣ်.
25ဒီးယစံးဘၣ်သုလၢတၢ်အမ့ၢ်အတီ,လၢဝံအ့ၤလံယၤအနံၤအသီ,ဖဲမူခိၣ်ကးတံာ်ဃာ်အသးသၢနံၣ်ဒီးဃုလါ,ဖဲတၢ်သၣ်ဝံၤဖးဒိၣ်အိၣ်ဒီကီၢ်ညါန့ၣ်ဒီး,
26မုၣ်ကမဲအိၣ်နာ်သက့အါဂၤလၢအံၣ်စရ့လးအပူၤဘၣ်ဆၣ်ဒီး,တၢ်တမၢလီၤစီၤအ့ၤလံယၤဆူအအိၣ်နီတဂၤဘၣ်,မၢလီၤအီၤဆူစၤရဖၤသး,ဘၣ်ဃးဒီးစံဒိၣ်,ဆူပှၤမုၣ်ကမဲတဂၤအအိၣ်လီၤ.
27ဒီးလၢဝံစီၤအလံၤၡါအစိၤန့ၣ်,ပှၤဘၣ်တၢ်ဆါအၢအိၣ်အါဂၤလၢအံၣ်စရ့လးအပူၤဘၣ်ဆၣ်ဒီး,တမၤကဆှီဘၣ်နီတဂၤဘၣ်,မၤကဆှီဝဲထဲပှၤစူၤရံဖိ,စီၤနဧၤမၣ်တဂၤဧိၤလီၤ.
28ဒီးပှၤအိၣ်လၢဘူၣ်ဘျီၣ်ပူၤခဲလၢာ်နၢ်ဟူတၢ်တဖၣ်န့ၣ်,ဒီးအသးဒိၣ်ထီၣ်ပှဲၤဆၢၣ်ကလာ်,
29ဒီးဂဲၤဆၢထၢၣ်ဟီထီၣ်ကွံာ်အီၤလၢဝ့ၢ်ပူၤဆူခိ,ဒီးဒ်သိးအကတ့ၢ်လီၤဆှိခိၣ်အီၤလၢကစၢၢ်လၢအဝ့ၢ်သူၣ်ထီၣ်အသးလၢအဖီခိၣ်အတလူၢ်ထိးဒီး,လဲၤဆှၢအီၤလီၤ.
30ဒီးအဝဲဒၣ်လဲၤခီတူာ်ဝဲလၢအဝဲသ့ၣ်အကျါ,ဒီးဟးထီၣ်ကွံာ်ဝဲလီၤ.
31ဒီးလဲၤလီၤဝဲဆူကပ့းရနီၣ်,လၢကီၢ်ကၤလံၤလါ,ဒီးသိၣ်က့ၤသီက့ၤတၢ်လၢအိၣ်ဘှံးအနံၤလီၤ.
32ဒီးပှၤတဖၣ်ပာ်ထီၣ်အသးကမၢကမၣ်,လၢအတၢ်သိၣ်တၢ်သီအဃိလီၤ.အဂ့ၢ်ဒ်အံၤ,အကလုၢ်အိၣ်ဒီးအစိအကမီၤလီၤ.
33ဒီးလၢဘူၣ်ဘျီၣ်ပူၤန့ၣ်,ပှၤလၢတၢ်နါတကဆှီဘၣ်အိၣ်လၢအလိၤအိၣ်ဝဲတဂၤ,ဒီးကိးပသူထီၣ်လၢအသီၣ်ဖးဒိၣ်,ဒီးစံးဝဲဒၣ်,
34အၣ်လါ,ပှၤနစၤရ့းဖိယ့ၣ်ရှူးဧၢ,တၢ်ဘၣ်ဃးဒီးပှၤဒီးနၤမ့ၢ်မနုၤလဲၣ်.မ့ၢ်နဟဲမၤဟးဂီၤပှၤဧါ.နဲဒၣ်အံၤနမ့ၢ်မတၤမတၤယသ့ၣ်ညါ,နမ့ၢ်ယွၤအပှၤစီဆှံတဂၤန့ၣ်လီၤ.
35ဒီးယ့ၣ်ရှူးဒူအလိၤ,ဒီးစံးဝဲဒၣ်,အိၣ်ဘှီၣ်ကလာ်ဒီးဟးထီၣ်ကွံာ်လၢအလိၤတက့ၢ်.ဒီးတၢ်နါဆီၣ်တပျုာ်ကွံာ်အီၤဆူတၢ်အသးကံၢ်ပူၤ,ဒီးတမၤအၢဘၣ်အီၤဘၣ်ဒီး,ဟးထီၣ်ကွံာ်လၢအလိၤလီၤ.
36ဒီးပှၤခဲလၢာ်ကမၢကမၣ်ဝဲ,ဒီးကတိၤလိာ်အသးဒီးစံးဝဲဒၣ်,တၢ်ကလုၢ်အံၤမ့ၢ်တၢ်ကလုၢ်ဒ်လဲၣ်.အဂ့ၢ်ဒ်အံၤ,မၤလိာ်တၢ်နါလၢအသူးအသ့ၣ်ဒီးအစိအကမီၤ,ဒီးဟးထီၣ်ကွံာ်ဝဲလီၤ.
37ဒီးအဂ့ၢ်အကျိၤဟူထီသါလီၤဒီကီၢ်ညါကိးပူၤဒဲးလီၤ.
38ဒီးဟးထီၣ်ကွံာ်လၢဘူၣ်ဘျီၣ်ပူၤ,ဒီးလဲၤနုာ်ဝဲဆူစီၤၡံမိၣ်အဟံၣ်,ဒီးစီၤၡံမိၣ်အမံၤပှၢ်ပိာ်မုၣ်န့ၣ်ဘၣ်တၢ်ညၣ်ဂိၢ်နးမး,ဒီးပှၤဃ့ကညးတၢ်လၢအဂီၢ်လီၤ.
39ဒီးဆၢထၢၣ်ဝဲလၢအဂီၤထံးဒီးဒူတၢ်ညၣ်ဂိၢ်,ဒီးတၢ်ညၣ်ဂိၢ်ဟးထီၣ်ကွံာ်လၢအလိၤလီၤ.ဒီးဂဲၤဆၢထၢၣ်ဝဲတကီၢ်ခါ,ဒီးမၤအခ့အပှၤအတၢ်မၤလၢအဝဲသ့ၣ်အဂီၢ်လီၤ.
40ဒီးတုၤမုၢ်လီၤနုာ်ဒီး,ဖဲဒၣ်ပှၤအိၣ်ဒီးပှၤဆူးပှၤဆါ,လၢတၢ်ဆူးတၢ်ဆါဒ်အံၤဒ်နုၤတဖၣ်န့ၣ်,ဟဲစိာ်အီၤဆူအအိၣ်လီၤ.ဒီးပာ်အစုလၢအလိၤကိးဂၤဒဲး,ဒီးမၤဘျါက့ၤအီၤလီၤ.
41ဒီးတၢ်နါဟးထီၣ်ကွံာ်လၢပှၤအါဂၤအလိၤ,ဒီးကိးပသူထီၣ်ဒီးစံးဝဲဒၣ်,နဲဒၣ်အံၤနမ့ၢ်ခရံာ်,ယွၤအဖိခွါန့ၣ်လီၤ.ဒီးဒူဝဲအလိၤ,ဒီးတဒုးကတိၤဘၣ်အီၤဘၣ်.အဂ့ၢ်ဒ်အံၤ,အဝဲသ့ၣ်သ့ၣ်ညါလၢအမ့ၢ်ခရံာ်လီၤ.
42ဒီးမုၢ်ဆ့ၣ်ထီၣ်ဒီးဟးထီၣ်ကွံာ်ဝဲဆူပှၢ်မုၢ်ကနၢ,ဒီးပှၤဂီၢ်မုၢ်ဃုအီၤ,ဒီးလဲၤဝဲတုၤလၢအအိၣ်,ဒီးတြီဃာ်အီၤ,ဒ်သိးအသုတဟးထီၣ်လၢအအိၣ်တဂ့ၤန့ၣ်လီၤ.
43ဒီးအဝဲဒၣ်စံးဘၣ်အီၤ,ယဘၣ်စံၣ်တဲၤတဲလီၤယွၤအဘီအမုၢ်အတၢ်သးခုကစီၣ်လၢဝ့ၢ်အဂုၤအဂၤအပူၤစ့ၢ်ကီးလီၤ.အဂ့ၢ်ဒ်အံၤ,မ့ၢ်လၢတၢ်အံၤအဂ့ၢ်ဒီး,တၢ်မၢလီၤယၤလီၤ.
44ဒီးအိၣ်စံၣ်တဲၤတဲလီၤတၢ်လၢကၤလံၤလါအဘူၣ်ဘျီၣ်တဖၣ်အပူၤန့ၣ်လီၤ.