Matthew 14
1ဒီးအကတီၢ်ဖဲန့ၣ်,ကီၢ်အပဒိၣ်ဟ့ၤရိာ်နၢ်ဟူယ့ၣ်ရှူးအကစီၣ်,
2ဒီးစံးဘၣ်အခ့အပှၤ,တၢ်လၢပှၤတဂၤအံၤမ့ၢ်ပှၤဘျၢတၢ်စီၤယိၤဟၣ်လီၤ.မ့ၢ်အဂဲၤဆၢထၢၣ်က့ၤလၢတၢ်သံလီၤ.မၤသးဒ်န့ၣ်ဒီး,တၢ်လီၤလးမၤအသးလၢအီၤလီၤ.
3အဂ့ၢ်ဒ်အံၤ,မ့ၢ်လၢအဒီပုၢ်ဝဲၢ်စီၤဖံးလံးပူးအမါနီၢ်ဟ့ၤရိၤဒံအဃိဒီး,စီၤဟ့ၤရိာ်ဟံးဃာ်တ့ၢ်စီၤယိၤဟၣ်,ဒီးစၢဃာ်အီၤ,ဒီးဒၢနုာ်အီၤလၢဃိာ်ပူၤလီၤ.
4အဂ့ၢ်ဒ်အံၤ,စီၤယိၤဟၣ်စံးဘၣ်အီၤ,တၢ်လၢပိာ်မုၣ်န့ၣ်နဟံးန့ၢ်အီၤတတီဘၣ်.
5ဒီးတၢ်မိၣ်မၤသံအသးလၢအီၤဘၣ်ဆၣ်ဒီးပျံၤပှၤဂီၢ်မုၢ်န့ၣ်လီၤ.အဂ့ၢ်ဒ်အံၤ,ပှၤဂီၢ်မုၢ်ပာ်စီၤယိၤဟၣ်လၢဝံတဂၤလီၤ.
6ဒီးတုၤစီၤဟ့ၤရိာ်အိၣ်ဖျဲၣ်အမုၢ်တနံၤဆၢအလီၢ်ဒီး,နီၢ်ဟ့ၤရိၤဒံအဖိမုၣ်ဂဲၤကလံာ်လၢအမဲာ်ညါ,ဒီးဘၣ်စီၤဟ့ၤရိာ်အသးလီၤ.
7အန့ၣ်ဒီးဆိၣ်လီၤအသးလၢတၢ်ဆိၣ်,လၢအကဟ့ၣ်အီၤဖဲဒၣ်အကဃ့တၢ်တမံၤမံၤန့ၣ်လီၤ.
8ဒီးအဝဲဒၣ်ဘၣ်တၢ်သဆၣ်ထီၣ်အခံလၢအမိၢ်သတးဒီး,စံးဝဲဒၣ်,ဟ့ၣ်လီၤယၤလၢပှၤဘျၢတၢ်စီၤယိၤဟၣ်အခိၣ်လၢသီတ့ၤတဘ့ၣ်အပူၤတက့ၢ်.
9ဒီးစီၤပၤသူၣ်အုးသးအုးဘၣ်ဆၣ်ဒီး,မ့ၢ်အတၢ်ဆိၣ်တဖၣ်,ဒီးပှၤဆ့ၣ်နီၤသန့ၤဃုာ်ဒီးအီၤတဖၣ်အဃိဒီး,မၤလိာ်လၢပှၤကဟ့ၣ်လီၤဝဲလီၤ.
10ဒီးမၢလီၤပှၤလဲၤဒီၣ်တဲာ်ကွံာ်စီၤယိၤဟၣ်အကိာ်လၢဃိာ်ပူၤလီၤ.
11ဒီးပှၤဟဲစိာ်အခိၣ်လၢသီတ့ၤအပူၤ,ဒီးဟ့ၣ်လီၤဖိသၣ်ပိာ်မုၣ်,ဒီးအဝဲဒၣ်ဟဲစိာ်အီၤဆူအမိၢ်အအိၣ်လီၤ.
12ဒီးအပျဲၢ်အဘီၣ်လဲၤဟံးထီၣ်အစိၣ်,ဒီးခူၣ်လီၤကွံာ်အီၤ,ဒီးလဲၤစံးဘၣ်ယ့ၣ်ရှူးလီၤ.
13တုၤယ့ၣ်ရှူးနၢ်ဟူဝဲဒီး,ဟးထီၣ်ဖဲန့ၣ်လၢကဘီပူၤဆူပှၢ်မုၢ်ကနၢအလီၢ်လၢတၢ်တဒၢလီၤ.ဒီးတုၤပှၤဂီၢ်မုၢ်နၢ်ဟူဝဲဒီး,ဟးထီၣ်လၢအခူအဝ့ၢ်,ဒီးပိာ်ထီၣ်အခံလၢအခီၣ်လီၤ.
14ဒီးယ့ၣ်ရှူးဟးထီၣ်,ဒီးထံၣ်ပှၤဂီၢ်မုၢ်ဖးဒိၣ်န့ၣ်,ဒီးအသးအိၣ်အီၤ,ဒီးမၤဘျါက့ၤအပှၤဘၣ်ဆူးဘၣ်ဆါတဖၣ်လီၤ.
15ဒီးတုၤမုၢ်ဟါလီၤဒီး,အပျဲၣ်အဘီၣ်ဟဲဆူအအိၣ်ဒီးစံးဝဲဒၣ်,တၢ်ဖဲအံၤမ့ၢ်ပှၢ်မုၢ်ကနၢအလီၢ်,ဒီးခဲကနံၣ်အံၤမုၢ်ဘၣ်လံ.ဒ်သိးပှၤဂီၢ်မုၢ်ကလဲၤပှ့ၤန့ၢ်တၢ်အီၣ်လၢအဂီၢ်ဒၣ်ဝဲလၢသဝီတဖၣ်အပူၤဒီး,ပျၢ်ကွံာ်အီၤတက့ၢ်.
16ဒီးယ့ၣ်ရှူးစံးဘၣ်အီၤ,လဲၤတၢ်အလီၢ်တအိၣ်ဘၣ်.ဟ့ၣ်အီၣ်အတၢ်သုဝဲတက့ၢ်.
17ဒီးအဝဲသ့ၣ်တဖၣ်စံးဘၣ်အီၤ,ပတၢ်တအိၣ်ဘၣ်ဖဲအံၤဘၣ်,အိၣ်ထဲကိၣ်ယဲၢ်ဖျၢၣ်,ဒီးညၣ်ခံဘ့ၣ်ဧိၤလီၤ.
18ဒီးစံးဝဲဒၣ်,ဟဲစိာ်အီၤဆူယအိၣ်တက့ၢ်.ဒီးမၤလိာ်ပှၤဂီၢ်မုၢ်လၢအကဆ့ၣ်နီၤလၢနီၣ်အဖီခိၣ်န့ၣ်လီၤ.
19ဒီးဟံးန့ၢ်ကိၣ်ယဲၢ်ဖျၢၣ်ဒီးညၣ်ခံဘ့ၣ်န့ၣ်,ဒီးကွၢ်ထီၣ်တၢ်ဆူမူခိၣ်,ဒီးဆိၣ်ဂ့ၤတၢ်,ဒီးစိၢ်ဘျဲးဝဲ,ဒီးဟ့ၣ်လီၤကိၣ်န့ၣ်လၢအပျဲၢ်အဘီၣ်,ဒီးအပျဲၢ်အဘီၣ်ဟ့ၣ်လီၤလၢပှၤဂီၢ်မုၢ်လီၤ.
20ဒီးအီၣ်ဝဲခဲလၢာ်,ဒီးဘျဲးအီၣ်ဝဲလီၤ.ဒီးပှၤထၢဖှိၣ်က့ၤအဘျဲၣ်အစဲၢ်,ပှဲၤကုတဆံခံဒုလီၤ.
21ဒီးလၢပှၤပိာ်မုၣ်ဒီးဖိသၣ်အမဲာ်ညါန့ၣ်ပိာ်ခွါလၢအအီၣ်တၢ်အိၣ်ဝဲယဲၢ်ကထိဃၣ်ဃၣ်လီၤ.
22ဒီးမၢဆူၣ်အပျဲၢ်အဘီၣ်လဲၤနုာ်လၢကဘီပူၤတကီၢ်ခါဒီးခီဂာ်တၢ်ဆူဝၢ်ဘးခီလၢအမဲာ်ညါ,ဖဲအကပျၢ်ကွံာ်ပှၤဂီၢ်မုၢ်တဖၣ်န့ၣ်လီၤ.
23ဒီးတုၤအပျၢ်ကွံာ်ပှၤဂီၢ်မုၢ်တဖၣ်န့ၣ်ဝံၤဒီး,လဲၤထီၣ်ဘါထုကဖၣ်တၢ်လၢကစၢၢ်တဖျၢၣ်အလိၤ,လၢတၢ်တဒၢန့ၣ်လီၤ.ဒီးတုၤမုၢ်ဟါလီၤဒီး,အိၣ်ဝဲဖဲန့ၣ်တဂၤဃီလီၤ.
24ဒီးကဘီန့ၣ်အိၣ်လံလၢပီၣ်လဲၣ်အသးကံၢ်ပူၤလံ.ဒီးဟူးဝးဝဲလၢလပီတဖၣ်လီၤ.အဂ့ၢ်ဒ်အံၤ,ကလံၤတလိၤဘၣ်.
25ဒီးတၢ်ပၢၤတၢ်လၢမုၢ်နၤလွံၢ်တီၤတတီၤန့ၣ်,[ယ့ၣ်ရှူး]လဲၤဆူအအိၣ်,ဒီးဟးဝဲလၢပီၣ်လဲၣ်အဖီခိၣ်လီၤ.
26ဒီးတုၤအပျဲၢ်အဘီၣ်ထံၣ်အဟးဝဲလၢပီၣ်လဲၣ်အဖီခိၣ်,ဒီးအသူၣ်ကိၢ်အသးဂီၤ,ဒီးစံးဝဲဒၣ်,မ့ၢ်ပှၤတဃၣ်လီၤ.ဒီးမ့ၢ်အသူၣ်ပျံၤသးဖုးတၢ်ဒီးကိးပသူထီၣ်ဝဲလီၤ.
27ဒီးတကီၢ်ခါယ့ၣ်ရှူးကတိၤတၢ်ဒီးအီၤ,ဒီးစံးဝဲဒၣ်,ပာ်သုသးခူတလ့ၢ်တက့ၢ်.မ့ၢ်ယၤလီၤ.ပျံၤတၢ်တဂ့ၤ.
28ဒီးစီၤပ့းတရူးစံးဆၢတၢ်,ဒီးစံးဝဲဒၣ်,ကစၢ်ဧၢ,မ့မ့ၢ်နၤဒီး,မၤလိာ်လၢ်ယၤ,ဒ်သိးယကလဲၤဃီၤဆူနအိၣ်လၢထံအဖီခိၣ်တက့ၢ်.
29ဒီးစံးဝဲဒၣ်,ဟဲဃီၤတက့ၢ်.ဒီးစီၤပ့းတရူးယုၢ်လီၤလၢကဘီပူၤ,ဒီးဟးဝဲလၢထံအဖီခိၣ်,ဒ်သိးအကလဲၤဆူယ့ၣ်ရှူးအအိၣ်လီၤ.
30ဘၣ်ဆၣ်ဒီးတုၤအထံၣ်ကလံၤဆူၣ်ဆူၣ်ကလဲာ်ဒီး,သူၣ်ပျံၤသးဖုးဝဲ,ဒီးလီၤဘျၢသီဝဲ,ဒီးကိးပသူထီၣ်ဒီးစံးဝဲဒၣ်,ကစၢ်ဧၢ,အုၣ်က့ၤခီၣ်က့ၤယၤတက့ၢ်.
31ဒီးယ့ၣ်ရှူးယူာ်ဃီၤအစု,ဒီးဟံးက့ၤအီၤတကီၢ်ခါ,ဒီးစံးဝဲဒၣ်,ပှၤနာ်တၢ်စှၤဧၢ,ဘၣ်မနုၤလၢနသးဒ့ဒီလဲၣ်.
32ဒီးတုၤအထီၣ်ဘးဝဲလၢကဘီပူၤဒီး,ကလံၤတုာ်ဝဲလီၤ.
33ဒီးပှၤအိၣ်လၢကဘီပူၤတဖၣ်န့ၣ်,ဟဲဃီၤ,ဒီးဘူၣ်ထီၣ်ဘါထီၣ်အီၤ,ဒီးစံးဝဲဒၣ်,နဲဒၣ်အံၤ,နမ့ၢ်မးယွၤအဖိခွါနီၢ်နီၢ်လီၤ.
34ဒီးတုၤအခီဂာ်ဝဲဝံၤဒီး,ဟဲနုာ်လၢကီၢ်ကံးန့ၤရ့သးအပူၤလီၤ.
35ဒီးတုၤပှၤကီၢ်ဖိဖဲန့ၣ်သ့ၣ်ညါနီၣ်အီၤဒီး,မၢပှၤလဲၤလၢကီၢ်န့ၣ်ဒီကီၢ်ညါ,ဒီးဟဲစိာ်ကယဲၢ်ပှၤလၢအမၤတကဲဘၣ်ဆူအအိိၣ်,
36ဒီးဒ်သိးထဲအကထိးဘၣ်အကူအသိးအနွံဧိၤဒီး,ပှၤဃ့ကညးအီၤလီၤ.ဒီးဖဲဒၣ်ပှၤလၢအထိးဘၣ်ဝဲတဖၣ်န့ၣ်,ဘျါက့ၤဝဲလီၤ.