Matthew 4
1တုၤနုၤတဘျီသးန့ၣ်ဆှၢထီၣ်ယ့ၣ်ရှူးဆူပှၢ်မုၢ်ကနၢဒ်သိးအကဘၣ်တၢ်လ့ပစီလၢမုၣ်ကီၤလံၢ်လီၤ.
2ဒီးဒုၣ်တၢ်အီၣ်တၢ်အီအနံၤလွံၢ်ဆံဒီးအနၤလွံၢ်ဆံ,ဒီးလၢခံက့ၤန့ၣ်တၢ်သၣ်ဝံၤအသးလီၤ.
3ဒီးပှၤလ့ပစီတၢ်တဂၤန့ၣ်ဟဲဆူအအိၣ်,ဒီးစံးဝဲဒၣ်,နမ့မ့ၢ်ယွၤအဖိခွါဒီး,စံးတၢ်ဒ်သိးလၢၢ်တဖၣ်အံၤကကဲထီၣ်ကိၣ်တက့ၢ်.
4ဒီးစံးဆၢတၢ်,ဒီးစံးဝဲဒၣ်,တၢ်ကွဲးအသး,ပှၤကညီကမူထဲဝဲလၢကိၣ်န့ၣ်တမ့ၢ်ဘၣ်.မ့ၢ်လၢကယဲၢ်တၢ်ကတိၤလၢအဟဲထီၣ်လၢယွၤအထးခိၣ်လီၤ.
5တုၤနုၤတစုမုၣ်ကီၤလံၢ်ဆှၢထီၣ်အီၤဆူဝ့ၢ်စီဆှံအပူၤ,ဒီးပာ်အီၤလၢတၢ်လုၢ်ဟံၣ်ခိၣ်စိၣ်လီၤ.
6ဒီးစံးဘၣ်အီၤ,နမ့မ့ၢ်ယွၤအဖိခွါဒီး,တ့ၢ်လီၤနသးတက့ၢ်.အဂ့ၢ်ဒ်အံၤ,တၢ်ကွဲးအသးလၢ အကမၤလိာ်အကလူးတဖၣ်လၢနဂ့ၢ်နကျိၤ, ဒီးအဝဲသ့ၣ်ကစိာ်နၤလၢအစုလိၤ, ဒ်သိးနခီၣ်အသုတဘၣ်ထံးဒီးလၢၢ်တဂ့ၤလီၤ.
7ယ့ၣ်ရှူးစံးဘၣ်အီၤတၢ်ကွဲးကဒီးအသး,သုတလ့ပစီယွၤနကစၢ်တဂ့ၤ.
8မၤကဒီးတစု,မုၣ်ကီၤလံၢ်ဆှၢအီၤဆူကစၢၢ်ထီထီကလဲာ်တဖျၢၣ်အလိၤ,ဒီးဒုးနဲၣ်အီၤလၢကယဲၢ်ဘီဧိၤမုၢ်ဧိၤလၢဟီၣ်ခိၣ်ချၢ,ဒီးအလၤကပီၤန့ၣ်,
9ဒီးစံးဝဲဒၣ်,နမ့ၢ်တီၤလီၤကဒွံကျိာ်ဒီးဘူၣ်ထီၣ်ဘါထီၣ်ယၤဒီး,ယကဟ့ၣ်လီၤနၤလၢကယဲၢ်တၢ်န့ၣ်တဖၣ်ခဲလၢာ်လီၤ.
10တုၤနုၤတစုယ့ၣ်ရှူးစံးဘၣ်အီၤ,မုၣ်ကီၤလံၢ်ဧၢ,ဟးထီၣ်ကွံာ်တက့ၢ်.အဂ့ၢ်ဒ်အံၤ,တၢ်ကွဲးအသး,ယွၤနကစၢ်န့ၣ်နဘၣ်ဘူၣ်ထီၣ်ဘါထီၣ်အီၤ,ဒီးနဘၣ်မၤထဲအဝဲဒၣ်အတၢ်ဧိၤလီၤ.
11တုၤနုၤတစု,မုၣ်ကီၤလံၢ်ဟးထီၣ်ကွံာ်လၢအအိၣ်,ဒီးကွၢ်ကွၢ်,ကလူးတဖၣ်ဟဲမၤအခ့အပှၤအတၢ်မၤလၢအဂီၢ်လီၤ.
12ဒီးတုၤ[ယ့ၣ်ရှူး]နၢ်ဟူလၢစီၤယိၤဟၣ်လီၤဘၣ်လၢဃိာ်ပူၤဒီး,အိၣ်ဝဲဆိးဝဲဆူကၤလံၤလါလီၤ.
13ဒီးလဲၤသဒၣ်နစၤရ့း,ဒီးလဲၤအိၣ်ဝဲဆိးဝဲလၢကပ့းရနီၣ်အပူၤအိၣ်ဝဲလၢပီၣ်လဲၣ်နံၤလၢကီၢ်စဘူလိၣ်ဒီးကီၢ်နးသၤလံအဃၢၤ.
14ဒ်သိးဝံယရှါယၤအကလုၢ်န့ၣ်ကလၢထီၣ်ပှဲၤထီၣ်ဝဲလီၤ.စံးဝဲဒၣ်,
15ကီၢ်စဘူလိၣ်,ဒီးကီၢ်နးသၤလံ, လၢပီၣ်လဲၣ်အကျဲ,လၢထံယၢ်ဒ့ၣ်ဝၢ်ဘးခီန့ၣ်, ကၤလံၤလါဘၣ်ဃးဒီးပှၤကလုာ်တဖၣ်,
16ပှၤဂီၢ်မုၢ်လၢအဆ့ၣ်နီၤလၢတၢ်ခံးကျါန့ၣ်ထံၣ်လံတၢ်ကပီၤဖးဒိၣ်လံ, ဒီးပှၤဆ့ၣ်နီၤလၢတၢ်သံအကီၢ်ဒီးအကဒုပူၤတဖၣ်န့ၣ်, တၢ်ကပီၤဟဲထီၣ်န့ၢ်အီၤလံ.
17လၢန့ၣ်လံၤလံၤယ့ၣ်ရှူးစံၣ်တဲၤတဲလီၤသီတၢ်,ဒီးစံးဝဲဒၣ်,ပီၢ်ယၢ်လီၤက့ၤသုသးတက့ၢ်.အဂ့ၢ်ဒ်အံၤ,မူခိၣ်အဘီအမုၢ်န့ၣ်ဘူးထီၣ်လံဝဲလံ.
18ဒီး[ယ့ၣ်ရှူး]ဟးဝဲလၢပီၣ်လဲၣ်ကၤလံၤလါအနံၤ,ဒီးထံၣ်ပှၤဒီပုၢ်ဝဲၢ်ခံဂၤ,စီၤရှံမိၣ်ကိးဝဲလၢစီၤပ့းတရူး,ဒီးအဒီပုၢ်ဝဲၢ်စီၤအၣ်ဒရ့း,တ့ၢ်လီၤစၤလၢပီၣ်လဲၣ်ပူၤလီၤ.အဂ့ၢ်ဒ်အံၤ,မ့ၢ်ပှၤမၤညၣ်လီၤ.
19ဒီးယ့ၣ်ရှူးစံးဘၣ်အီၤ,ပိာ်ယခံတက့ၢ်.ဒီးယကပာ်သုလၢပှၤမၤညၣ်ပှၤကညီလီၤ.
20ဒီးအဝဲသ့ၣ်ဟးသဒၣ်စၤတဖၣ်န့ၣ်တကီၢ်ခါ,ဒီးပိာ်ထီၣ်အခံလီၤ.
21ဒီးပူၤကွံာ်ဖဲန့ၣ်,ဒီးထံၣ်ပှၤဒီပုၢ်ဝဲၢ်အဂၤခံဂၤ,စီၤစ့းလ့းဒဲအဖိခွါစီၤယၤကိာ်,ဒီးအဒီပုၢ်ဝဲၢ်စီၤယိၤဟၣ်ဆးက့ၤအစၤတဖၣ်လၢကဘီပူၤ,အိၣ်ဒီးအပၢ်စီၤစ့းဘ့းဒဲ,ဒီးကိးန့ၢ်အီၤလီၤ.
22ဒီးအဝဲသ့ၣ်ဟးသဒၣ်ကဘီ,ဒီးအပၢ်တကီၢ်ခါ,ဒီးပိာ်ထီၣ်အခံလီၤ.
23ဒီးယ့ၣ်ရှူးဟးဝ့ၤဝီၤတၢ်လၢကၤလံၤလါဒီကီၢ်ညါ,ဒီးသိၣ်က့ၤသီက့ၤတၢ်လၢဘူၣ်ဘျီၣ်တဖၣ်အပူူၤ,ဒီးစံၣ်တဲၤတဲလီၤဘီဧိၤမုၢ်ဧိၤအတၢ်သးခုကစီၣ်,ဒီးမၤဘျါက့ၤကယဲၢ်တၢ်ဆူးတၢ်ဆါဒီးကယဲၢ်တၢ်အက့အကွဲၣ်လၢပှၤဂီၢ်မုၢ်အကျါကိးမံၤဒဲးလီၤ.
24ဒီးအမံၤဟူထီသါလီၤလၢစူၤရံဒီကီၢ်ညါ,ဒီးပှၤဟဲစိာ်ကယဲၢ်ပှၤလၢအမၤတကဲဘၣ်ခဲလၢာ်,ပှၤဘၣ်ဆူးဘၣ်ဆါ,ဒီးတၢ်ဆိးက့မံနီၤအကလုာ်ကလုာ်,ဒီးပှၤလၢတၢ်နါအိၣ်လၢအလိၤ,ဒီးပှၤလၢအပျူၢ်,ဒီးပှၤသံတခီပၤသ့ၣ်တဖၣ်,ဒီးအဝဲဒၣ်မၤဘျါက့ၤအီၤလီၤ.
25ဒီးပှၤဂီၢ်မုၢ်အါဂၤပိာ်ထီၣ်အခံလၢကၤလံလါ,ဒီးလၢဒ့းကၤလံၣ်,ဒီးလၢယရူၤရှလ့ၣ်,ဒီးလၢယူဒၤ,ဒီးလၢယၢ်ဒ့ၣ်ဝၢ်ဘးခီသ့ၣ်တဖၣ်န့ၣ်လီၤ.