Numbers 25
1ဒီးအံၣ်စရ့လးအိၣ်ဝဲဆိးဝဲလၢၡံးထံၣ်အပူၤ,ဒီးပှၤဂီၢ်မုၢ်မၤကမၣ်မုၣ်ကမၣ်ခွါဒီးမိၤအးအဖိမုၣ်တဖၣ်လီၤ.
2ဒီးအဝဲသ့ၣ်ကိးန့ၢ်ပှၤဂီၢ်မုၢ်ဆူအကစၢ်တဖၣ်အတၢ်လုၢ်,ဒီးပှၤဂီၢ်မုၢ်အီၣ်တၢ်,ဒီးဘါထီၣ်အကစၢ်တဖၣ်လီၤ.
3ဒီးအံၣ်စရ့လးမၤစဲဘူးလိာ်အသးဒီးဘဧၤလးပဧိၢ်လီၤ.ဒီးယွၤအသးထီၣ်ကဲၤထီၣ်ဘၣ်အံၣ်စရ့လးလီၤ.
4ဒီးယွၤစံးဘၣ်စီၤမိၤရှ့,ဟံးန့ၢ်ပှၤဂီၢ်မုၢ်အခိၣ်ခဲလၢာ်ဒီးစၢၣ်သံအီၤလၢယွၤအမဲာ်ညါ,လၢမုၢ်အမဲာ်ညါတက့ၢ်.ဒီးယွၤအသးထီၣ်ဆူၣ်ကဃၣ်ကွံာ်အသးလၢအံၣ်စရ့လးအအိၣ်လီၤ.
5ဒီးစီၤမိၤရှ့စံးဘၣ်အံၣ်စရ့လးအပှၤစံၣ်ညီၣ်ကွီၢ်တဖၣ်,မၤသံတဂၤအပှၤဒၣ်ဝဲ,တဂၤအပှၤဒၣ်ဝဲလၢအစဲဘူးလိာ်အသးဒီးဘဧၤလးပဧိၢ်န့ၣ်တက့ၢ်.
6ဒီးကွၢ်ကွၢ်,ပှၤအံၣ်စရ့လးဖိတဂၤဟဲစိာ်ပှၤမံးဒယၣ်မုၣ်တဂၤဆူအဒီပုၢ်ဝဲၢ်အအိၣ်လၢစီၤမိၤရှ့အမဲာ်ညါ,ဒီးလၢပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်အမဲာ်ညါ,ဖဲအဟီၣ်ဝဲလၢတၢ်အိၣ်ဖှိၣ်အဒဲအကျဲစၢၤအဖၢမုၢ်န့ၣ်လီၤ.
7ဒီးပှၤလုၢ်တၢ်အဒိၣ်စီၤအၤဟရိၣ်အဖိခွါ,စီၤအလၤဧစၢ်အဖိခွါ,စီၤပံၤနဃၣ်ထံၣ်ဘၣ်ဝဲ,ဒီးဂဲၤဆၢထၢၣ်လၢတၢ်အိၣ်ဖိှၣ်အကျါ,ဒီးဟံးန့ၢ်ဘီတဘ့ၣ်လၢအစုပူၤ,
8ဒီးလဲၤပိာ်ပှၤအံၣ်စရ့လးဖိတဂၤအခံဆူအလီၢ်မံပူၤ,ဒီးဆဲးဖျိပှၤခံဂၤ,ပှၤအံၣ်စရ့လးဖိတဂၤ,ဒီးပိာ်မုၣ်တဂၤလၢအဟၢဖၢလီၤ.ဒီးတၢ်သံသတြိာ်အိၣ်ကတီၢ်ဝဲလၢပှၤအံၣ်စရ့လးဖိအကျါလီၤ.
9ဟဒီးပှၤလၢအသံလၢတၢ်သံသတြိာ်န့ၣ်မ့ၢ်ပှၤခံကလးလွံၢ်ကထိလီၤ.
10ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်,
11ပှၤလုၢ်တၢ်အဒိၣ်စီၤအၤဟရိၣ်အဖိခွါ,စီၤအလၤဧစၢ်အဖိခွါစီၤပံၤနဃၣ်တဂၤန့ၣ်မ့ၢ်အသးဆူၣ်လၢယဂီၢ်လၢအဝဲသ့ၣ်အကျါဒီး,ဒုးဃၣ်ကွံာ်ယသးထီၣ်လၢပှၤအံၣ်စရ့လးဖိအအိၣ်သတးဒီး,ယတမၤလၢာ်ဘၣ်ပှၤအံၣ်စရ့လးဖိလၢယသးက့ၣ်ဘၣ်လီၤ.
12မၤသးဒ်န့ၣ်ဒီးစံး,ကွၢ်ကွၢ်,ယဟ့ၣ်လီၤအီၤလၢယတၢ်အၢၣ်လီၤအီလီၤဘၣ်ဃးဒီးတၢ်မၤဃူမၤဖိးလီၤ.
13ဒီးကန့ၢ်ဘၣ်ဝဲ,ဒီးအချံအသၣ်လၢအလီၢ်ခံန့ၣ်,တၢ်အၢၣ်လီၤအီလီၤဘၣ်ဃးဒီးပှၤလုၢ်တၢ်အဒိၣ်လီၤစိၤလီၤထီလီၤ.အဂ့ၢ်ဒ်အံၤ,အသးဆူၣ်လၢယွၤအဂီၢ်,ဒီးမၤတၢ်ပူၤဖျဲးလၢပှၤအံၣ်စရ့လးဖိအဂီၢ်လီၤ.
14ဒီးပှၤအံၣ်စရ့လးဖိလၢအဘၣ်တၢ်မၤသံအီၤ,လၢအဘၣ်တၢ်မၤသံဃုာ်အီၤဒီးပှၤမံးဒယၣ်မုၣ်တဂၤန့ၣ်အမံၤမ့ၢ်စီၤစံၣ်ရံၤလၢပှၤစူၤမ့ၤအိၣ်အကျါပှၤအပၢ်အဟံၣ်အပဒိၣ်စီၤစၤလူအဖိခွါလီၤ.
15ဒီးပှၤမံးဒယၣ်မုၣ်လၢအဘၣ်တၢ်မၤသံအီၤတဂၤန့ၣ်အမံၤမ့ၢ်နီၢ်ကးစဘံၤ,စီၤစူၢ်အဖိမုၣ်လီၤ.အဝဲဒၣ်မ့ၢ်ပှၤဂီၢ်မုၢ်အခိၣ်,ပှၤအပၢ်အဟံၣ်အခိၣ်လၢမံးဒယၣ်အပူၤလီၤ.
16ဒီးယွၤကတိၤတၢ်ဒီးစီၤမိၤရှ့ဒီးစံးဘၣ်အီၤ,
17မၤကိၢ်မၤဂီၤပှၤမံးဒယၣ်ဖိ,ဒီးကျီကွံာ်အီၤတက့ၢ်.
18အဂ့ၢ်ဒ်အံၤ,အဝဲသ့ၣ်တဖၣ်မၤကိၢ်မၤဂီၤသုလၢအမၤအၢတၢ်လၢအကလံာ်သုလၢတၢ်ဘၣ်ဃးဒီးပဧိၢ်,ဒီးတၢ်ဘၣ်ဃးဒီးမံးဒယၣ်မုၣ်အပဒိၣ်အဖိမုၣ်နီၢ်ကးစဘံၤ,အဒီပုၢ်ဝဲၢ်မုၣ်,လၢအဘၣ်တၢ်မၤသံအီၤလၢတၢ်သံသတြိာ်အမုၢ်နံၤလၢပဧိၢ်အဃိလီၤ.