Numbers 26
1ဒီးလၢတၢ်သံသတြိာ်အလီၢ်ခံန့ၣ်တၢ်မၤအသးလၢယွၤကတိၤတၢ်ဒီးစီၤမိၤရှ့,ဒီးပှၤလုၢ်တၢ်အဒိၣ်စီၤအၤဟရိၣ်အဖိခွါစီၤအလၤဧစၢ်,ဒီးစံးဝဲဒၣ်,
2ဂံၢ်ပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်လၢအသးပှၢ်အနံၣ်ခံဆံဒီးအါန့ၢ်အန့ၣ်,ဒ်အပၢ်အဟံၣ်အသိးန့ၣ်,ကယဲၢ်ပှၤလဲၤဒုးသုးတၢ်သ့လၢအံၣ်စရ့လးအပူၤန့ၣ်တက့ၢ်.
3ဒီးစီၤမိၤရှ့,ဒီးပှၤလုၢ်တၢ်အဒိၣ်စီၤအလၤဧစၢ်ကတိၤတၢ်ဒီးအီၤလၢမိၤအးအပျီပူၤလၢယၢ်ဒ့ၣ်အနံၤ,သဃီၤဒီးယရံၤဃိ,ဒီးစံးဝဲဒၣ်
4ဂံၢ်ပှၤလၢအသးပှၢ်အနံၣ်ခံဆံဒီးဆူအဖီခိၣ်,ဒ်ယွၤမၤလိာ်စီၤမိၤရှ့,ဒီးပှၤအံၣ်စရ့လးဖိလၢအဟးထီၣ်ကွံာ်လၢကီၢ်အဲၤကူပတူးအပူၤအသိးန့ၣ်တက့ၢ်.
5စီၤရူၤဘ့ၣ်,အံၣ်စရ့လးအဖိခွါဝဲၢ်ကိအံၤ,စီၤရူၤဘ့ၣ်အဖိခွါမ့ၢ်စီၤဃနိာ်,ပှၤဃနိာ်ဖိတဒူၣ်,လၢစီၤပးလူန့ၣ်ပှၤပးလူဖိတဒူၣ်,
6လၢစီၤဃ့းစရိၣ်န့ၣ်ပှၤဃ့းစရိၣ်ဖိတဒူၣ်,လၢစီၤကၢ်မံၤန့ၣ်ပှၤကၢ်မံၤဖိတဒူၣ်လီၤ.
7အန့ၣ်မ့ၢ်ပှၤရူၤဘ့ၣ်ဖိအဒူၣ်တဖၣ်,ဒီးပှၤလၢအဘၣ်တၢ်ဂံၢ်အီၤလၢအကျါန့ၣ်မ့ၢ်ပှၤလွံၢ်ကလးဒီးသၢကထိဒီးနွံကယၤဒီးသၢဆံလီၤ.
8ဒီးစီၤပးလူအဖိခွါမ့ၢ်စီၤအလံအာ်,
9ဒီးစီၤအလံအာ်အဖိခွါန့ၣ်မ့ၢ်စီၤနမူၤအ့လး,ဒီးစီၤဒၤသၣ်,ဒီးစီၤအဘံရၣ်လီၤ.အဝဲန့ၣ်မ့ၢ်စီၤဒၤသၣ်,ဒီးစီၤအဘံရၣ်လၢအမံၤဟူထီၣ်လၢတၢ်အိၣ်ဖှိၣ်အကျါ,လၢအဂ့ၢ်လိာ်ထီဒါစီၤမိၤရှ့ဒီးစီၤအၤဟရိၣ်,လၢစီၤကိၤရးအတၢ်အိၣ်ဖှိၣ်အကျါ,အဆၢအကတီၢ်ဖဲအဂ့ၢ်လိာ်ထီဒါယွၤလီၤ.
10ဒီးတုၤတၢ်အိၣ်ဖှိၣ်တဖုန့ၣ်သံ,ဖဲမ့ၣ်အူအီၣ်ကွံာ်ပှၤခံကယၤဒီးယဲၢ်ဆံဒီး,ဟီၣ်ခိၣ်အဲးထီၣ်အထးခိၣ်,ဒီးယူၢ်လီၤကွံာ်အီၤဒီးစီၤကိၤရး,ဒီးကဲထီၣ်ဝဲလၢတၢ်အပနီၣ်လီၤ.
11ဘၣ်ဆၣ်ဒီးစီၤကိးရးအဖိတသံဘၣ်ဝဲဘၣ်.
12စီၤစူၤမ့းအိၣ်အဖိခွါဒ်အဒူၣ်တဖၣ်အသိးန့ၣ်,လၢစီၤနမူၤအ့လးန့ၣ်ပှၤနမူၤအ့လးဖိတဒူၣ်,လၢစီၤယၤမံၣ်န့ၣ်ပှၤယၤမံၣ်ဖိတဒူၣ်,လၢစီၤယၤကံၣ်န့ၣ်ပှၤယၤကံၣ်ဖိတဒူၣ်,
13လၢစီၤစ့ရၤန့ၣ်ပှၤစ့ရၤဖိတဒူၣ်,လၢစီၤၡၤအူလးန့ၣ်ပှၤၡၤအူလးဖိတဒူၣ်လီၤ.
14အန့ၣ်မ့ၢ်ပှၤစူၤမ့းအိၣ်ဖိအဒူၣ်တဖၣ်,ပှၤခံကလးဒီးခံကထိဒီးခံကယၤလီၤ.
15စီၤကးအဖိခွါဒ်အဒူၣ်တဖၣ်အသိးန့ၣ်လၢစီၤစဖိၣ်န့ၣ်ပှၤစဖိၣ်ဖိတဒူၣ်,လၢစီၤဃးကံၤန့ၣ်ပှၤဃးကံၤဖိတဒူၣ်,လၢစီၤရှူနံၤန့ၣ်ပှၤရှူနံၤဖိတဒူၣ်
16လၢစီၤအီးစနံၤန့ၣ်ပှၤအီးစနံၤဖိတဒူၣ်,လၢစီၤဧ့ရံၤန့ၣ်ပှၤဧ့ရံၤဖိတဒူၣ်,
17လၢစီၤအရိးန့ၣ်ပှၤအရိးဖိတဒူၣ်,လၢစီၤအၤအ့ၤလံန့ၣ်ပှၤအၤအ့ၤလံဖိတဒူၣ်လီၤ.
18အန့ၣ်မ့ၢ်စီၤကးအဖိခွါအဒူၣ်တဖၣ်,ဒ်ပှၤလၢအဘၣ်တၢ်ဂံၢ်အီၤအသိးန့ၣ်,ပှၤလွံၢ်ကလးဒီးယဲၢ်ကယၤလီၤ.
19စီၤယူဒၤအဖိခွါန့ၣ်မ့ၢ်စီၤအ့ၢ်,ဒီးစီၤအိၤနၣ်န့ၣ်လီၤ.ဒီးစီၤအ့ၢ်ဒီးစီၤအိၤနၣ်န့ၣ်သံဝဲလၢကီၢ်ကနၤဧၣ်အပူၤလီၤ.
20ဒီးစီၤယူဒၤအဖိခွါတဖၣ်ဒ်အဒူၣ်တဖၣ်အသိးန့ၣ်မ့ၢ်,လၢစီၤရှ့လၤန့ၣ်ပှၤရှ့လၤဖိတဒူၣ်,လၢစီၤဖ့ၤရ့းန့ၣ်ပှၤဖ့ၤရ့းဖိတဒူၣ်,လၢစီၤစ့ရၤန့ၣ်ပှၤစ့ရၤဖိတဒူၣ်,
21ဒီးစီၤဖ့ၤရ့းအဖိခွါတဖၣ်မ့ၢ်လၢစီၤဃ့စရိၣ်န့ၣ်ပှၤဃ့စရိၣ်ဖိတဒူၣ်,လၢစီၤဃမူန့ၣ်ပှၤဃမူဖိတဒူၣ်လီၤ.
22အန့ၣ်မ့ၢ်စီၤယူဒၤအဒူၣ်တဖၣ်,ဒ်ပှၤလၢအဘၣ်တၢ်ဂံၢ်အီၤအသိးန့ၣ်,ပှၤနွံကလးဒီးဃုကထိဒီးယဲၢ်ကယၤလီၤ.
23စီၤယံးစၣ်ကၢ်အဖိခွါဒ်အဒူၣ်တဖၣ်အသိးန့ၣ်,လၢစီၤတိၤလၤန့ၣ်ပှၤတိၤလၤဖိတဒူၣ်,လၢစီၤဖူၤဝၤန့ၣ်ပှၤဖူၤဝၤဖိတဒူၣ်,
24လၢစီၤယၤရှူာ်န့ၣ်ပှၤယၤရှူာ်ဖိတဒူၣ်,လၢစီၤၡံးမရိၣ်န့ၣ်ပှၤၡံးမရိၣ်ဖိတဒူၣ်လီၤ.
25အန့ၣ်မ့ၢ်စီၤယံးစၣ်ကၢ်အဒူၣ်တဖၣ်,ဒ်ပှၤလၢအဘၣ်တၢ်ဂံၢ်အီၤအသိးန့ၣ်ပှၤဃုကလးဒီးလွံၢ်ကထိဒီးသၢကယၤလီၤ.
26စီၤစဘူလိၣ်အဖိခွါဒ်အဒူၣ်တဖၣ်အသိးန့ၣ်,လၢစီၤစ့ရ့းန့ၣ်ပှၤစ့ရ့းဖိတဒူၣ်,လၢစီၤအ့လိၣ်န့ၣ်ပှၤအ့လိၣ်ဖိတဒူၣ်,လၢစီၤယၤလအ့လးန့ၣ်ပှၤယၤလအ့လးဖိတဒူၣ်လီၤ.
27အန့ၣ်မ့ၢ်ပှၤစဘူလိၣ်အဒူၣ်တဖၣ်,ဒ်ပှၤလၢအဘၣ်တၢ်ဂံၢ်အီၤအသိးန့ၣ်ပှၤဃုကလးဒီးယဲၢ်ကယၤလီၤ.
28စီၤယိၤသးအဖိခွါတဖၣ်ဒ်အဒူၣ်တဖၣ်အသိးန့ၣ်မ့ၢ်စီၤမနၤရှ့ၤ,ဒီးစီၤအ့ၤဖရဲၣ်လီၤ.
29စီၤမနၤရှ့ၤအဖိခွါတဖၣ်န့ၣ်,လၢစီၤမၤကံၢ်န့ၣ်ပှၤမၤကံၢ်ဖိတဒူၣ်,ဒီးစီၤမၤကံၢ်န့ၣ်ထီၣ်ဖိစီၤကံးလဧး,လၢစီၤကံးလဧးန့ၣ်ပှၤကံးလဧးဖိတဒူၣ်,
30အအံၤမ့ၢ်စီၤကံးလဧးအဖိခွါ,လၢစီၤအံစ့ၢ်န့ၣ်ပှၤအံစ့ၢ်ဖိတဒူၣ်,လၢစီၤဃ့လ့းန့ၣ်ပှၤဃ့လ့းဖိတဒူၣ်,
31ဒီးလၢစီၤအးစရံၤအ့လးန့ၣ်ပှၤအးစရံၤအ့လးဖိတဒူၣ်,ဒီးလၢစီၤၡက့ၣ်န့ၣ်ပှၤၡက့ၣ်ဖိတဒူၣ်,
32ဒီးလၢစီၤၡမံဒၤန့ၣ်ပှၤၡမံဒၤဖိတဒူၣ်,ဒီးလၢစီၤဃ့ဖ့ၢ်န့ၣ်ပှၤဃ့ဖ့ၢ်ဖိတဒူၣ်လီၤ.
33ဒီးစီၤဃ့ဖ့ၢ်အဖိခွါစီၤစလၤဖဃးန့ၣ်အဖိခွါတအိၣ်ဘၣ်.မ့မ့ၢ်အဖိမုၣ်အိၣ်ဒီးစီၤစလၤဖဃးအဖိမုၣ်အမံၤန့ၣ်မ့ၢ်နီၢ်မၤလၤ,ဒီးနီၢ်နိဧၤ,နီၢ်ဃၤကလၤ,နီၢ်မံးလကၤ,ဒီးနီၢ်တံးရစၢ်လီၤ.
34အန့ၣ်မ့ၢ်စီၤမနၤရှ့ၤအဒူၣ်တဖၣ်,ဒီးပှၤလၢအဘၣ်တၢ်ဂံၢ်အီၤလၢအကျါန့ၣ်မ့ၢ်ပှၤယဲၢ်ကလးဒီးခံကထိဒီးနွံကယၤလီၤ.
35အအံၤမ့ၢ်စီၤအ့ဖရဲၣ်အဖိခွါ,ဒ်အဒူၣ်တဖၣ်အသိးန့ၣ်,လၢစီၤရှူၤသ့လၤန့ၣ်ပှၤရှူၤသ့လၤဖိတဒူၣ်,လၢစီၤဘ့က့ၢ်န့ၣ်ပှၤဘ့က့ၢ်ဖိတဒူၣ်,လၢစီၤတၤဃၣ်န့ၣ်ပှၤတၤဃၣ်ဖိတဒူၣ်လီၤ.
36အအံၤမ့ၢ်စီၤရှူၤသ့လၤအဖိခွါ,လၢစီၤဧ့ရၣ်န့ၣ်ပှၤဧ့ရၣ်ဖိတဒူၣ်လီၤ.
37အန့ၣ်မ့ၢ်စီၤအ့ဖရဲၣ်အဖိခွါအဒူၣ်တဖၣ်,ဒ်ပှၤလၢအဘၣ်တၢ်ဂံၢ်အီၤလၢအကျါအသိးန့ၣ်,ပှၤသၢကလးဒီးခံကထိဒီးယဲၢ်ကယၤလီၤ.ပှၤတဖၣ်န့ၣ်မ့ၢ်စီၤယိၤသးအဖိခွါဒ်အဒူၣ်တဖၣ်အသိးန့ၣ်လီၤ.
38စီၤဘံၣ်ယၤမံၣ်အဖိခွါတဖၣ်ဒ်အဒူၣ်တဖၣ်အသိးန့ၣ်,လၢစီၤဘ့လၤန့ၣ်ပှၤဘ့လၤဖိတဒူၣ်,လၢစီၤအၤၡဘ့လးန့ၣ်ပှၤအၤၡဘ့လးဖိတဒူၣ်,လၢစီၤအဃံရၣ်န့ၣ်ပှၤအဃံရၣ်ဖိတဒူၣ်,
39လၢစီၤရှူဖၣ်န့ၣ်ပှၤရှူဖၣ်ဖိတဒူၣ်,လၢစီၤဃူဖၣ်န့ၣ်ပှၤဃူဖၣ်ဖိတဒူၣ်လီၤ.
40ဒီးစီၤဘ့လၤအဖိခွါန့ၣ်မ့ၢ်စီၤအၤရး,ဒီးစီၤနၤဧမၣ်လီၤ.လၢစီၤအၤရးန့ၣ်ပှၤအၤရးဖိတဒူၣ်,လၢစီၤနၤဧမၣ်န့ၣ်ပှၤနၤဧမၣ်ဖိတဒူၣ်လီၤ.
41အန့ၣ်မ့ၢ်စီၤဘံၣ်ယၤမံၣ်အဖိခွါတဖၣ်,ဒ်အဒူၣ်တဖၣ်အသိးန့ၣ်,ဒီးပှၤလၢအဘၣ်တၢ်ဂံၢ်အီၤလၢအကျါန့ၣ်မ့ၢ်ပှၤလွံၢ်ကလးဒီးယဲၢ်ကထိဒီးဃုကယၤလီၤ.
42အအံၤမ့ၢ်စီၤဒၣ်အဖိခွါဒ်အဒူၣ်တဖၣ်အသိးန့ၣ်,လၢစီၤရှူဃၣ်န့ၣ်ပှၤရှူဃၣ်ဖိတဒူၣ်လီၤ.အန့ၣ်မ့ၢ်စီၤဒၣ်အဒူၣ်,ဒ်အဒူၣ်တဖၣ်အသိးန့ၣ်လီၤ.
43ပှၤရှူဃၣ်ဖိအဒူၣ်တဖၣ်ခဲလၢာ်,ဒ်ပှၤလၢအဘၣ်တၢ်ဂံၢ်အီၤအသိးန့ၣ်,မ့ၢ်ပှၤဃုကလးဒီးလွံၢ်ကထိဒီးလွံၢ်ကယၤလီၤ.
44စီၤအၤရှ့ၢ်အဖိခွါတဖၣ်ဒ်အဒူၣ်တဖၣ်အသိးန့ၣ်,လၢစီၤယံးမနၤန့ၣ်ပှၤယံးမနၤဖိတဒူၣ်,လၢစီၤယံးၡဝံၤန့ၣ်ပှၤယံးၡဝံၤဖိတဒူၣ်,လၢစီၤဘရံဧၤန့ၣ်ပှၤဘရံဧၤဖိတဒူၣ်လီၤ.
45လၢစီၤဘရံဧၤအဖိခွါန့ၣ်,လၢစီၤဃ့ဘ့ၢ်န့ၣ်ပှၤဃ့ဘ့ၢ်ဖိတဒူၣ်,လၢစီၤမးလကံၤအ့လးန့ၣ်ပှၤမးလကံၤအ့လးဖိတဒူၣ်လီၤ.
46ဒီးစီၤအၤရှ့ၢ်အဖိမုၣ်အမံၤမ့ၢ်နီၢ်စၤရါလီၤ.
47အန့ၣ်မ့ၢ်စီၤအၤရှ့ၢ်အဖိခွါအဒူၣ်တဖၣ်,ဒ်ပှၤလၢအဘၣ်တၢ်ဂံၢ်အီၤအသိးန့ၣ်,မ့ၢ်ပှၤယဲၢ်ကလးဒီးသၢကထိဒီးလွံၢ်ကယၤလီၤ.
48စီၤနးသၤလံအဖိခွါဒ်အဒူၣ်တဖၣ်အသိးန့ၣ်,လၢစီၤယၤစအ့လးန့ၣ်ပှၤယၤစအ့လးဖိတဒူၣ်,လၢစီၤကူနံၤန့ၣ်ပှၤကူနံၤဖိတဒူၣ်,
49လၢစီၤယ့စ့ၢ်န့ၣ်ပှၤယ့စ့ၢ်ဖိတဒူၣ်,လၢစီၤၡံးလ့ၣ်န့ၣ်ပှၤၡံးလ့ၣ်ဖိတဒူၣ်လီၤ.
50အန့ၣ်မ့ၢ်စီၤနးသၤလံအဒူၣ်တဖၣ်,ဒ်အဒူၣ်တဖၣ်အသိးန့ၣ်,ဒီးပှၤလၢအဘၣ်တၢ်ဂံၢ်အီၤမ့ၢ်ပှၤလွံၢ်ကလးဒီးယဲၢ်ကထိဒီးလွံၢ်ကယၤလီၤ.
51ပှၤလၢအဘၣ်တၢ်ဂံၢ်အီၤလၢပှၤအံၣ်စရ့လးဖိအကျါန့ၣ်မ့ၢ်ပှၤဃုကလီၤဒီးတကထိဒီးနွံကယၤဒီးသၢဆံလီၤ.
52ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်,
53ကီၢ်တဘ့ၣ်န့ၣ်ကဘၣ်တၢ်နီၤဖးအီၤလၢပှၤတဖၣ်န့ၣ်အတၢ်န့ၢ်သါအဂီၢ်,ဒ်အမံၤအတၢ်ဂံၢ်အသိးန့ၣ်လီၤ.
54လၢပှၤအါဂၤန့ၣ်နဘၣ်ဟ့ၣ်တၢ်န့ၢ်သါလၢအအါတက့ၢ်,ဒီးလၢပှၤစှၤဂၤန့ၣ်နဘၣ်ဟ့ၣ်တၢ်န့ၢ်သါလၢအဆံးတက့ၢ်လီၤ.ဒ်ပှၤဘၣ်တၢ်ဂံၢ်အီၤတဖၣ်အတၢ်ဂံၢ်အသိးန့ၣ်,ပှၤကဘၣ်တၢ်ဟ့ၣ်အီၤလၢအတၢ်န့ၢ်သါစုာ်စုာ်ဒ်န့ၣ်သိးလီၤ.
55ဘၣ်ဆၣ်ဒီးကီၢ်န့ၣ်ကဘၣ်တၢ်နီၤဖးလီၤအီၤလၢဖးတၢ်လီၤ.ဒ်အပၢ်အဒူၣ်တဖၣ်အမံၤအသိးန့ၣ်ဘၣ်န့ၢ်သါတၢ်လီၤ.
56ဒ်တၢ်ဖးတၢ်အသိးနၣ်အတၢ်န့ၢ်သါကဘၣ်တၢ်နီၤဖးလၢအါဂၤအဆၢ,ဒီးလၢစှၤဂၤအဆၢလီၤ.
57ဒီးအအံၤမ့ၢ်ပှၤလၢအဘၣ်တၢ်ဂံၢ်အီၤလၢပှၤလ့ၤဝံဖိအကျါ,ဒ်အဒူၣ်တဖၣ်အသိးန့ၣ်,လၢစီၤက့ရၡိၣ်န့ၣ်ပှၤက့ရၡိၣ်ဖိတဒူၣ်,လၢစီၤကဃးန့ၣ်ပှၤကဃးဖိတဒူၣ်,လၢစီၤမရၤရံၤန့ၣ်ပှၤမရၤရံၤဖိတဒူၣ်လီၤ.
58အအံၤမ့ၢ်ပှၤလ့ၤဝံဖိအဒူၣ်တဖၣ်,ပှၤလံးဘနၤဖိတဒူၣ်,ပှၤဃ့ဘြိၣ်ဖိတဒူၣ်,ပှၤမးဃလံဖိတဒူၣ်,ပှၤမူၡံၤဖိတဒူၣ်,ပှၤကိးရးဖိတဒူၣ်လီၤ.
59ဒီးစီၤကဃးန့ၣ်ထီၣ်ဖိစီၤဧၤမရၣ်လီၤ.ဒီးစီၤဧၤမရၣ်အမါအမံၤမ့ၢ်နီၢ်ယိကဘ့ၣ်,စီၤလ့ၤဝံအဖိမုၣ်လၢတၢ်ဆံးစၢ်န့ၢ်စီၤလ့ၤဝံအဂီၢ်လၢအဲၤကူပတူးအပူၤလီၤ.ဒီးလၢစီၤဧၤမရၣ်အဂီၢ်န့ၣ်ဆံးစၢ်န့ၢ်ဝဲလၢစီၤအၤဟရိၣ်,ဒီးစီၤမိၤရှ့,ဒီးအဒီပုၢ်ဝဲၢ်မုၣ်နီၢ်မံးရယၣ်လီၤ.
60ဒီးလၢစီၤအၤဟရိၣ်အီၢ်န့ၣ်အိၣ်ဖျဲၣ်ဝဲလၢစီၤနၤဒး,ဒီးစီၤအဘံဟူၤ,ဒီးစီၤအလၤဧစၢ်,ဒီးစီၤအံသမၢ်လီၤ.
61ဒီးစီၤနၤဒး,ဒီးစီၤအဘံဟူၤတုၤအလုၢ်မ့ၣ်အူလီၤဆီဒၣ်တၢ်လၢယွၤအမဲာ်ညါဒီး,သံဝဲလီၤ.
62ဒီးပှၤလၢအဘၣ်တၢ်ဂံၢ်အီၤလၢအကျါန့ၣ်မ့ၢ်ပှၤခံကလးသၢကထိလီၤ.ပှၤခဲလၢာ်န့ၣ်မ့ၢ်ပှၤပိာ်ခွါလၢအသးပှၢ်တလါဒီးအါန့ၢ်အန့ၣ်လီၤ.အဂ့ၢ်ဒ်အံၤ,တဘၣ်တၢ်ဂံၢ်အီၤလၢပှၤအံၣ်စရ့လးဖိအကျါဘၣ်.အဂ့ၢ်ဒ်အံၤ,တၢ်တဟ့ၣ်လီၤဘၣ်အီၤလၢတၢ်န့ၢ်သါလၢပှၤအံၣ်စရ့လးဖိအကျါနီတမံၤဘၣ်.
63ပှၤတဖၣ်န့ၣ်မ့ၢ်ပှၤလၢအဘၣ်တၢ်ဂံၢ်အီၤလၢစီၤမိၤရှ့,ဒီးပှၤလုၢ်တၢ်အဒိၣ်စီၤအလၤဧစၢ်,လၢအဂံၢ်ပှၤအံၣ်စရ့လးဖိလၢမိၤအးအတၢ်ပျီပူၤလၢထံကျိယၢ်ဒ့ၣ်အနံၤသဃီၤဒီးယရံၤဃိလီၤ.
64ဘၣ်ဆၣ်ဒီးလၢပှၤလၢစီၤမိၤရှ့,ဒီးပှၤလုၢ်တၢ်အဒိၣ်စီၤအၤဟရိၣ်ဂံၢ်ဝဲအကျါန့ၣ်ပှၤလၢအဂံၢ်ဝဲလၢပှၤအံၣ်စရ့လးဖိအကျါဖဲပှၢ်မုၢ်ကနၢစံၤနါန့ၣ်တအိၣ်ဘၣ်နီတဂၤဘၣ်.
65အဂ့ၢ်ဒ်အံၤ,ယွၤစံးတ့ၢ်တၢ်လၢအဂ့ၢ်န့ၣ်,ကသံသပှၢ်တၢၢ်လၢပှၢ်မုၢ်ကနၢလီၤ.ဒီးတအိၣ်လီၤတဲာ်ဘၣ်နီတဂၤဘၣ်.အိၣ်လီၤတဲာ်ထဲစီၤယဖူန့ၤအဖိခွါစီၤကၤလ့း,ဒီးစီၤနိၣ်အဖိခွါစီၤယိၤရှူလီၤ.