Romans 3
1မၤသးဒ်န့ၣ်ဒီးပှၤယူဒၤဖိအတၢ်အါဒၣ်တၢ်တက့ၢ်န့ၣ်,မ့ၢ်တၢ်မနုၤတမံၤလဲၣ်.ဒီးတၢ်ကူးတရံးန့ၣ်အဘျုးမနုၤလဲၣ်.
2အိၣ်အါဝဲလၢတၢ်ကိးမံၤဒဲးလီၤ.မ့မ့ၢ်အဒိၣ်ကတၢၢ်တမံၤန့ၣ်,မ့ၢ်လၢတၢ်အးလီၤယွၤအကလုၢ်အကထါလၢအီၤလီၤ.
3အဂ့ၢ်ဒ်အံၤ,ပှၤတနီၤနီၤအကလုၢ်တတီဘၣ်နာ်သက့ဒီး,တၢ်ကမၤအသးဒ်လဲၣ်.ပှၤတဖၣ်န့ၣ်အကလုၢ်တတီဘၣ်န့ၣ်ကမၤဟးဂီၤကွံာ်ယွၤအကလုၢ်တီစ့ၢ်ကီးဧါ.
4မ်အသုတမၤအသးဒ်န့ၣ်တဂ့ၤ.ပှၤကညီကိးဂၤဒဲးမ့ၢ်တၢ်ကဘျံးကဘျၣ်ခဲလၢာ်နာ်သက့ဒီး,မ်ယွၤမ့ၢ်တၢ်မ့ၢ်တၢ်တီတက့ၢ်.ဒ်တၢ်ကွဲးအသးအသိးန့ၣ်, ဒ်သိးနကဘၣ်တၢ်ပာ်တီနၤလၢနတၢ်ကတိၤ, ဒီးနကမၤနၢၤတၢ်လၢနဘၣ်တၢ်စံၣ်ညီၣ်အပူၤလီၤ.
5ဘၣ်ဆၣ်ဒီးပတၢ်တတီတလိၤဘၣ်န့ၣ်မ့ၢ်လီၣ်ဖျါထီၣ်ယွၤအတၢ်တီတၢ်လိၤဒီး,ပကစံးဒ်လဲၣ်.ယွၤလၢအမၤနးမၤဖှီၣ်တၢ်န့ၣ်,မ့ၢ်အမၤဝဲတတီတလိၤဘၣ်ဧါ.
6(ယကတိၤတၢ်ဒ်ပှၤကညီအသိး,)မ်အသုတမၤအသးဒ်န့ၣ်တဂ့ၤ.တၢ်မ့ၢ်မၤအသးဒ်န့ၣ်ဒီး,ယွၤကစံၣ်ညီၣ်ဟီၣ်ခိၣ်ဒ်လဲၣ်.
7အဂ့ၢ်ဒ်အံၤ,လၢယတၢ်ကဘျံးကဘျၣ်အဃိ,ယွၤအတၢ်မ့ၢ်တၢ်တီမ့ၢ်အါထီၣ်လၢယွၤအလၤအကပီၤအဂီၢ်ဒီး,ဘၣ်မနုၤလၢတၢ်စံၣ်ညီၣ်ဒံးယၤစ့ၢ်ကီးဒ်ပှၤမၤတၢ်ဒဲးဘးလဲၣ်.
8ဒီးဒ်ပဘၣ်တၢ်ဒုၣ်ဒွဲၣ်,ဒီးပှၤတနီၤနီၤစံးဃဲၤလၢပစံးတၢ်အသိး,ဘၣ်မနုၤလၢပတမၤဘၣ်တၢ်အၢဒ်သိးတၢ်ဂ့ၤကဟဲန့ၣ်လဲၣ်.အဝဲသ့ၣ်ဘၣ်တၢ်စံၣ်ညီၣ်ဃၣ်န့ၣ်မ့ၢ်အတီအလိၤလီၤ.
9မၤသးဒ်န့ၣ်ဒီးမ့ၢ်ဒ်လဲၣ်.မ့ၢ်ပဂ့ၤဒၣ်တၢ်တက့ၢ်ဧါ.တမ့ၢ်ဘၣ်လ့ၤတက့ၤဘၣ်.အဂ့ၢ်ဒ်အံၤ,ပှၤယူဒၤဖိမ့ၢ်ဂ့ၤ,ပှၤဟ့းလ့ၣ်ဖိမ့ၢ်ဂ့ၤ,ပဒုးနဲၣ်ပာ်လံလၢအအိၣ်လၢတၢ်ဒဲးဘးအပူၤခဲလၢာ်လံ.
10ဒ်တၢ်ကွဲးအသးအသိးန့ၣ်,ပှၤအတီအလိၤတအိၣ်ဘၣ်နီတဂၤဘၣ်.
11ပှၤလၢအသးဖးတအိၣ်,ပှၤလၢအဃုယွၤတအိၣ်,
12ပှၤဟးဖျိးကျဲခဲလၢာ်,ကဲထီၣ်ပှၤတဂိာ်တသီၣ်ဘၣ်တၢ်,ပှၤမၤတၢ်ဂ့ၤတအိၣ်,ထဲတဂၤဧိၤတအိၣ်ဘၣ်.
13အကိာ်ပူၤမ့ၢ်တၢ်သွၣ်ခိၣ်အိၣ်အိးထီၣ်အသး,လီတၢ်လၢအပျ့ၤ,ဂုၢ်အၢအစုၣ်အိၣ်လၢအပျုၤဖီလာ်,
14အကိာ်ပူၤပှဲၤဒီးတၢ်ဆိၣ်အၢ,ဒီးတၢ်အခၣ်လီၤ.
15အခီၣ်လဲၤဝဲချ့ချ့ဒ်သိးအကဂၢ်လီၤတၢ်သွံၣ်,
16တၢ်ဟးဂူာ်ဟးဂီၤ,ဒီးတၢ်နးတၢ်ဖှီၣ်အိၣ်လၢအကျဲ,
17ဒီးတၢ်ဃူတၢ်ဖိးအကျဲန့ၣ်,တသ့ၣ်ညါဘၣ်ဝဲဘၣ်.
18တၢ်ပျံၤယွၤတအိၣ်ဘၣ်လၢအမဲာ်ညါဘၣ်.
19ဒီးပသ့ၣ်ညါလၢဖဲဒၣ်တၢ်သိၣ်တၢ်သီစံးဝဲန့ၣ်,မ့ၢ်အစံးဘၣ်ပှၤအိၣ်လၢတၢ်သိၣ်တၢ်သီအပူၤ,ဒ်သိးကယဲၢ်ပှၤအထးခိၣ်ကဘၣ်တၢ်မၤနိးဃာ်အီၤ,ဒီးပှၤဟီၣ်ခိၣ်ဖိခဲလၢာ်ကဘၣ်တၢ်စံၣ်ညီၣ်ဃၣ်အီၤလၢယွၤအမဲာ်ညါလီၤ.
20မၤသးဒ်န့ၣ်ဒီး,တၢ်ညၣ်တဘၣ်တၢ်ပာ်တီပာ်လိၤအီၤလၢယွၤအမဲာ်ညါ,လၢတၢ်သိၣ်တၢ်သီအတၢ်မၤအဃိ,နီတဂၤဘၣ်.အဂ့ၢ်ဒ်အံၤ,တၢ်သ့ၣ်ညါတၢ်ဒဲးဘးဟဲဝဲလၢတၢ်သိၣ်တၢ်သီလီၤ.
21မ့မ့ၢ်ခဲကနံၣ်အံၤ,ယွၤအတၢ်တီတၢ်လိၤလၢအတဟဲဘၣ်လၢတၢ်သိၣ်တၢ်သီဘၣ်န့ၣ်,အိၣ်ဖျါဝဲလၢတၢ်သိၣ်တၢ်သီ,ဒီးဝံသ့ၣ်တဖၣ်အုၣ်အသးအဂ့ၢ်,
22ဒ်ပစံးတၢ်အသိး,ယွၤအတၢ်တီတၢ်လိၤလၢတၢ်နာ်ယ့ၣ်ရှူးခရံာ်န့ၣ်,ဟဲဆူပှၤခဲလၢာ်,ဒီးဘၣ်လၢပှၤနာ်တၢ်တဖၣ်ခဲလၢာ်အလိၤလီၤ.အဂ့ၢ်ဒ်အံၤ,တၢ်တလီၤဆီဘၣ်.
23အဂ့ၢ်ဒ်အံၤ,ပှၤခဲလၢာ်မၤတၢ်ဒဲးဘးဒီးတချုးန့ၢ်ဘၣ်ယွၤအလၤအကပီၤဘၣ်.
24ဒီးပဘၣ်တၢ်ပာ်တီပာ်လိၤပှၤကလီကလီလၢယွၤအဘျုးအဖှိၣ်လၢယ့ၣ်ရှူးခရံာ်အတၢ်ပှ့ၤက့ၤပှၤအဃိလီၤ.
25ယွၤပာ်ဖျါထီၣ်အီၤလၢတၢ်လုၢ်,လၢတၢ်နာ်အသွံၣ်အဃိ,ဒ်သိးအကဒုးနဲၣ်အတၢ်တီတၢ်လိၤလၢတၢ်လဲၤကပာ်တၢ်ဒဲးဘးလၢပှၤမၤတ့ၢ်ဝဲဖဲယွၤဝံသးစူၤတၢ်အတီၢ်ပူၤ,
26[ယစံး]ဒ်သိးအကဒုးနဲၣ်အတၢ်တီတၢ်လိၤအကတီၢ်ဖဲအံၤ,ဒ်သိးအကတီဝဲလိၤဝဲဒီးပာ်တီပာ်လိၤပှၤလၢအနာ်ယ့ၣ်ရှူးန့ၣ်လီၤ.
27မၤသးဒ်န့ၣ်ဒီး,ပပာ်ပသးကဖၢလၢအလီၢ်အိၣ်ဖဲလဲၣ်.ဘၣ်ဟီထီၣ်ကွံာ်လံ.လၢမနုၤအတၢ်သိၣ်တၢ်သီတမံၤလဲၣ်.လၢတၢ်မၤအတၢ်သိၣ်တၢ်သီဧါ.တမ့ၢ်ဘၣ်,မ့ၢ်လၢတၢ်နာ်အတၢ်သိၣ်တၢ်သီလီၤ.
28အဂ့ၢ်ဒ်အံၤ,ပစံးလၢပှၤကညီဘၣ်တၢ်ပာ်တီပာ်လိၤလၢတၢ်နာ်ဒီးတမ့ၢ်ဘၣ်လၢတၢ်သိၣ်တၢ်သီအတၢ်မၤဘၣ်.
29ယွၤမ့ၢ်ထဲပှၤယူဒၤဖိအကစၢ်န့ၣ်ဧါ.တမ့ၢ်ဘၣ်ပှၤကလုာ်တဖၣ်အကစၢ်စ့ၢ်ကီးဘၣ်ဧါ.မ့ၢ်လံ,မ့ၢ်ပှၤကလုာ်တဖၣ်အကစၢ်စ့ၢ်ကီးလီၤ.
30အဂ့ၢ်ဒ်အံၤ,ပှၤလၢအကပာ်တီပာ်လိၤပှၤဒိးတၢ်ကူးတရံးလၢတၢ်နာ်,ဒီးပှၤတဒိးဘၣ်တၢ်ကူးတရံးလၢတၢ်နာ်န့ၣ်,မ့ၢ်ယွၤတဂၤဃီလီၤ.
31မၤသးဒ်န့ၣ်ဒီးမ့ၢ်ပမၤဟးဂီၤတၢ်သိၣ်တၢ်သီလၢတၢ်နာ်န့ၣ်ဧါ.မ်အသုတမၤအသးဒ်န့ၣ်တဂ့ၤ.မ့ၢ်ပမၤဂၢၢ်မၤကျၢၤတၢ်သိၣ်တၢ်သီလီၤ.