1 Chronicles · Chapter 5

[ edit] The ſonys forſoþe of Ruben, þe firſt goten of Yrael; he forſoþe was his firſt goten, bot for he hadde defoulid þe bed of his fadir, þe riȝtis of his firſt getynge ben ȝeuen to þe ſonys of Joſeph, þe ſone of Yrael; and he is not holden in to þe firſt goten. Forſoþe Judas, þat was þe ſtrengiſt amonge his breþeren, of his ſtok princis ben buriounned; þe riȝtis of þe firſt getyng forſoþe ben acountyde to Joſeph. Þan þe ſonys of Ruben, þe firſte goten of Yrael; Enoch, and Fallu, Eſrom, and Charmy.

Þe ſonys of Joel; Samaia, þe ſone of hym; Gog, þe ſone of hym; Semei, þe ſone of hym; Mycha, þe ſone of hym; Rema, þe ſone of hym; Baal, þe ſone of hym; Bera, þe ſone of hym; whome caytijf ladde Teglat Falaſar, kyng of Aſſiries; and he was a prince in þe lynage of Ruben. Þe breþeren forſoþe of hym, and al þe kynrede, whan þei weren noumbred by þeir meines, hadden princis Jeihel, and Zacharie. Forſoþe Baala, þe ſone of Achaz, ſone of Sama, ſone of Johel, he dwellide in Aroer vnto Nebo and Beelmeon; aȝeynſt þe eeſt forſoþe cooſt he dwellide, vnto þe entre of Heremy, and þe flode of Eufraten. Myche forſoþe noumbre of beſtis he weldide in þe lond of Galaad.

In þe days forſoþe of Saul þei fouȝten aȝeynus Agarienis, and ſlewen hem; and dwelliden for hem in þeir tabernaclis, in al þe cooſt þat beholdiþ to þe eſte of Galaad. Þe ſonys forſoþe of Gad forn aȝeynſt hem dwelliden in þe lond of Baſan vnto Selcha; Joel in þe heued, and Sapham þe ſecounde; Janay forſoþe and Sapha in Baſan. And þe breþeren of hem aftir þe houſes of þeir kynredis, Mychael, and Moſollam, and Sebe, and Jore, and Joachan, and Zie, and Heber, ſeuen. Þes þe ſones of Abiel, ſone of Vri, ſone of Jaro, ſone of Galaad, ſone of Michael, ſone of Jeſeſi, ſone of Jeddo, ſone of Bus. Þe breþeren forſoþe of þe ſone of Abdiel, ſone of Gummy, prince of þe hous in þeir meynes.

And þei dwelliden in Galaad, and in Baaſan, and in þe lityl tounes of it, in alle þe ſuburbis of Arnon, vnto þe termys. Alle þes ben noumbred in þe days of Joaþan, kyng of Juda, and in þe days of Jeroboam, kyng of Yrael. Þe ſonys of Ruben, and of Gad, and of þe half lynage of Manaſſe, men fiȝters berynge ſheeldis and ſwerdis, and bendynge bowe, and tauȝt to batailis, foure and fourety þouſandis ſeuen hundreþ and ſixty, goynge forþe to fiȝt, fouȝten aȝeynus Agariens.

Eþureis forſoþe, and Naphi, and Nadab, ȝeuen to hem help; and Agariens ben taken in to þe hondis of hem, and alle þat weren wiþ hem; for þe Lord þei inwardly clepiden, whil þei fouȝten, and he herde hem, forþi þat þei hadden leeued in hym. And þei token alle þingis þat þey hadden weldid, of chamels fyfty þouſand, and of ſcheep two hundreþ and fyfty þouſand, and of aſſis two þouſand, and lyues of men an hundreþ þouſand; and many woundid fellen; forſoþe þe batayl of þe Lord it was. Þei dwelliden for hem vnto þe tranſmygracioun.

Þe ſonis forſoþe of þe half lynage of Manaſſe weldeden þe lond, fro þe cooſtis of Baſan vnto Baal Hermon, and Sanyr, and þe hyl of Hermon; a grete forſoþe noumbre þer was. And þes weren þe pryncis of þe hous of þe kynrede of hem; Efer, and Jeſi, and Heliel, and Eſriel, and Jeremye, and Odoye, and Jedehel, men moſt ſtrong and myȝty, and duykis nemned in þeir meynes. Forſoþe þei forſoken þe God of þeir fadirs, and dyden fornycacioun aftir goddis of þe puplis of þe lond, þe whiche þe Lord toke aweye beforn hem.

And þe Lord God of Yrael rered þe ſpirit of Phul, þe kyng of Aſſiries, and þe ſpirit of Teglat Falaſar, kyng of Aſſur; and tranſlatyde Ruben, and Gad, and þe half lynage of Manaſſe, and he brouȝte hem in to Ale, and Abor, and Aram, and þe flode of Goſam, vnto þis day.