1 Chronicles · Chapter 18

[ edit] Done it is forſoþe aftir þes þingis, þat Dauid ſchuld ſmijten Philiſteis, and meeken hem, and taken Geþ and þe douȝtirs of it fro þe hond of Philiſteis, and ſmijten Moab; and Moabitis ſchulden ben maad þe ſeruauntis of Dauid, offringe to hym ȝiftis. Þat tyme alſo Dauid ſmote Adadeſer, kyng of Soba, of þe regyoun of Emaþ, whanne he wente for to largen his empyre vnto þe flode of Eufraten. Þanne Dauid toke a þouſand foure whelid cartis of hym, and ſeuen þouſand of hors men, and twenty þouſand of fote men; and he kutte þe knee ſenewis of alle þe hors of þe chaaris, out taken an hundriþ foure whelid cartis, þe whiche he reſeruede to hym ſilf.

Forſoþe and Cyre Damaſcen came ouer, þat he ȝeue helpe to Adadeſer, kyng of Soba, bot and of þis Dauid ſmote twenty þouſand of men; and he putte knyȝtis in Damaſc, þat Cyrie alſo ſchuld ſeruen to hym, and offre ȝiftis. And þe Lord herde hym in alle þingis to þe whiche he wente. Alſo Dauid toke þe golden arewe caſes, þat þe ſeruauntes of Adadezer hadden, and brouȝte hem in to Jeruſalem; alſo and fro Thebaþ and Cum, cytees of Adadezer, myche of braſſe, of þe whiche Salomon made þe braſen ſe, and pylers, and braſen veſſels.

Þe whiche þing whanne Thou, kyng of Emaþ, hadde herd, þat is, Dauiþ to han ſmyten al þe hooſt of Adadeſer, kyng of Soba, he ſente Aduram, his ſone, to kyng Dauid, þat he aſke of hym peſe, and þanckide to hym, for þi þat he hadde ouercommen and ſmyten Adadezer; forſoþe kyng Adadezer was aduerſarie to Thou. Bot and alle þe golden veſſelis, and ſylueren, and braſen kyng Dauid ſacride to þe Lord; and þe ſyluer, and þe gold, þat þe kyng hadde taken fro alle gentiles, as wele of Ydume and Moab, and þe ſonys of Amon, as of þe Philiſteis and Amalech. Forſoþe Abiſai, þe ſone of Saruye, ſmote Edom in þe valey of ſalt placis, ten and eyȝt þouſand.

And he ſett in Edom a ſtreyngþe, þat Ydume ſchulde ſeruen to Dauid. And þe Lord ſauede Dauid in alle þingis, to þe whiche he wente. Þann Dauid regned vpon al Yrael, and dide dome and riȝtwiſneſſe to al his puple. Bot Joab, þe ſone of Saruye, was vpon þe hooſt; and Joſephaþ, þe ſone of Ailuþ, chaunceler; Sadoch forſoþe, þe ſone of Achitob, and Achymalech, þe ſone of Abiþer, preſtis; and Suſa, ſcribe; Bananyas alſo, þe ſone of Joiade, vpon þe legiouns Cereþi and Phereþi; forſoþe þe ſonys of Dauid firſt at þe kyngis hond.