1 Chronicles · Chapter 22

[ edit] And Dauid ſeide, Þis is þe hous of God, and þis þe auter in to brent ſacrifice in Irael. And he comaundide þat alle þe comlyngis of þe lond of Yrael ſchulden be gaderd; and he ordeynede of hem maſouns to ſtoonis to ben hewen and poliſchit, þat þe hous of þe Lord be bild up; and myche yren to þe naylis of þe ȝatis, and to endentyngis and ioynyngis Dauid made redy, and weiȝt vnnoumbreable of braſſe; alſo cedre trees myȝten not ben eymed, þe whiche Cydoynes and Tyres brouȝten to Dauid.

And Dauid ſeid, Salomon, my ſone, is a lityl child and delicate; þe hous forſoþe, þat I wyll to ben bildid to þe Lord, ſiche owiþ to ben, þat in alle regyouns it ben nemmyd; I ſchal greþe þan to hym neceſſaryes. And for þis cauſe beforn his deaþ he made redy alle þe diſpenſis. And he clepide Salomon, his ſone, and he comaundide to hym, þat he ſchulde bilden an hous to þe Lord God of Yrael.

And Dauid ſeide to Salomon, My ſone, of my wille it was, þat I ſchuld bilden an hous to þe name of þe Lord my God; bot þe word of þe Lord is done to me, ſeyinge, Myche blode þou haſt ſched, and many bateils þou haſt fouȝten; þou ſchalt not mown bild up an hous to my name, ſo myche blode ſchad out before me; þe ſone þat ſchal ben born to þee, ſchal ben a man moſt quyete, I ſchal maken forſoþe hym to reſten fro alle his enmyes by enuyroun, and for þis cauſe peſible he ſchal be clepid, and peſe and reſt I ſchal ȝeue in Yrael alle þe days of hym.

He ſchal bilden up an hous to my name; and he ſchal ben to me in to a ſone, and I ſchal ben to hym in to a fadir, and I ſchal faſtne þe ſee of his regne vpon Yrael vnto wiþ oute eende. Now þann, my ſone, þe Lord be wiþ þee, and do welſumly, and bilde up an hous to þe Lord þi God, as he haþ ſpoken of þee. Alſo þe Lord ȝeue to þee prudence and wytt, þat þou mowe gouerne Yrael, and keep þe lawe of þe Lord þi God. Þanne forſoþe þou ſchalt mown profyten, ȝif þou kepiſt þe heſtis and domes, þe whiche þe Lord comaundyde to Moyſes, þat he ſchulde techen Yrael; take coumfort and do manly, ne drede þou, ne take fer. Loo!

I in my lytyl porneſſe haue mad redy before þe expenſes of þe hous of þe Lord; of gold an hundreþ þouſand talentis, and of talentis of ſyluer a þouſand þouſandis; of braſſe forſoþe and of yren þere is no weiȝt, forſoþe þe noumbre is ouer paſſed by mychilneſſe; trees and ſtoonis I haue maad redye before to alle þe expenſes. Þou haſt alſo many craftiſe men, maſouns, and leyers, and craftiſemen of trees, and of alle craftis, moſt wijs to don werk, in gold, and ſyluer, braſſe, and yren, of þe whiche is no noumbre; rijs þan, and make, and þe Lord ſchal be wiþ þee.

And Dauid comaundide to alle þe princis of Yrael, þat þei ſchulden helpen Salomon, his ſone, ſeyinge, Ȝe ſeen, þat þe Lord oure God is wiþ us, and haþ ȝeuen to us reſt by enuyroun, and haþ ȝeuen alle þe enmyes in oure hond, þat þe lond be ſuget before þe Lord, and beforn his puple. Ȝeueþ þerefore ȝoure hertis and ȝoure ſoules, þat ȝe ſechen þe Lord ȝoure God; and rijſiþ to gidre, and bildiþ up a ſeyntuarye to þe Lord ȝoure God, þat þe arke of þe peſe couenaunt of þe Lord be brouȝt in, and þe ſacrid veſſels to þe Lord in to þe hous, þat is byld to þe name of þe Lord.