Isaiah · Chapter 39

[ edit] In þat tyme ſente Marodoch Baladan, þe ſone of Baladan, þe king of Babiloyne, lettris and ȝiftes to Ezechie; forſoþe he hadde herd, þat he hade be ſyc, and was coouered. Forſoþe Ezechie gladede vp on þo þingus, and he ſhewede to þem þe ſelle of ſpices, and of ſiluer, and of gold, and of ſwote þingus, and of þe beſte oynement, and al þe cofres of his neceſſarie þingus, and alle þingus þat ben founde in his treſories; þer was not a wrd, þat Ezechie ſhewede not to þem in his hous, and in al his power. Forſoþe Iſaie, þe profete, wente in to Ezechie, þe king, and ſeide to hym, What ſeiden þeſe men, and whennes camen þei to þee?

And Ezechie ſeide, Fro a ferr lond þei camen to me, fro Babyloyne. And he ſeyde, What ſeȝen þei in þin hous? And Ezechie ſeide, Alle þingus þat in myn hous ben, þei ſeȝen; þer was not a þing, þat I ſhewede not to þem in my treſories. And Iſaie ſeide to Eſechie, Here þe wrd of þe Lord of oſtes. Lo! daȝes ſhul come, and alle þingus ſhul be don awei, þat ben in þin hous, and þat þi fadris han treſored vn to þis dai, in to Babiloyne; þer ſhal not be laft any þing, ſeiþ þe Lord. And of þi ſonus, þat ſhul gon out of þee, þe whiche þou ſhalt gete, þei ſhul take awei; and þei ſhul be geldingus in þe paleis of þe king of Babiloyne. And Ezechie ſeide to Iſaie, Good is þe wrd of þe Lord, þat he ſpac.

And he ſeide, Be þer do onli pes and treuþe in my daȝes.