Nahum · Chapter 1

[ edit] The charge of Nynyue; þe boke of viſioun of Naum Helcheſey. Þe Lord a louer, and þe Lord vengeynge; þe Lord vengynge, and hauynge woodneſſe; þe Lord vengynge in to his enmyes, and he wraþinge to his enmyes. Þe Lord pacient, and grete in ſtrengþe, and he clenſynge ſhal not make innocent. Þe Lord in tempeſt, and in whirlwynd þe wayes of hym, and cloudis duſt of his feet; blamynge þe ſee, and dryinge it, and bryngynge alle flodis to deſert. Baſan is maad ſeek, and Carmele, and þe flour of Liban langwiſhide. Mounteyns ben moued to gidre of hym, and litil hillis ben deſolate. And þe erþe tremblide to gydre fro þe face of hym, and þe roundneſſe of erþe, and alle þe dwellyng þeryn.

Bifore þe face of his indignacioun who ſhal ſtonde? and who ſhal aȝein ſtonde in þe wraþ of his woodneſſe? His indignacioun is ſhed out as fijre, and ſtoonus ben diſſolued, or broken, of hym. Þe Lord good, and coumfortynge in þe day of tribulacioun, and he knowynge men hoopynge in hym. And in grete floode paſſynge by, he ſhal make eende of his place; and dercneſſis ſhuln purſue his enmyes. What þinken ȝe aȝeinus þe Lord? He ſhal make eend; double tribulacioun ſhal not ryſe to gydre. For as þornys biclippen hem to gydre, ſo þe feeſt of hem drynkynge to gydre ſhal be eendid, as ſtoble ful of dryneſſe.

Forſoþe of þee ſhal go out þe þynkynge malice aȝeinus þe Lord, in ſoule, or mynde, tretynge treſpaſſyng. Þeſe þingus ſaiþ þe Lord, Ȝif þei ſhuln be perfit, and ſo mo, and þus þei ſhuln be clippid, and it ſhal paſſe by. Y tourmentide þee, and Y ſhal namore tourmente þee. And now Y ſhal to gydre breke þe ȝerd of hym of þi bac, and Y ſhal breke þi boondis. And þe Lord ſhal comaunde on þee, it ſhal namore be ſown of þi name. Of þe hous of þi god Y ſhal ſlea; a ſculptil, or grauen ymage, and wellid to gydre, Y ſhal putte þi ſepulcre, for þou art vnwirſhipid. Loo! on hillis þe feet of euangelizinge and tellynge pees.

Juda, halewe þou þi feeſt days, and ȝeelde þi vowis, for he ſhal namore putte to, þat he paſſe by in þee; al Belial periſhide.