איגרת פטרוס הראשונה 1
1פֶּטְרוֹס שְׁלִיחַ יֵשׁוּעַ הַמָּשִׁיחַ אֶל־הַבְּחִירִים הַפְּזוּרִים הַגָּרִים בְּפָנְטוֹס גָּלַטְיָא קַפּוֹדְקִיָּא אַסְיָא וּבִיתוּנְיָא׃
2אֲשֶׁר נִבְחֲרוּ מִקֶּדֶם מִטַּעַם אֱלֹהִים הָאָב לְקַדְּשָׁם בְּרוּחוֹ וּלְהָכִין לִבָּם לִשְׁמֹעַ לְיֵשׁוּעַ הַמָּשִׁיחַ וַיֵּז דָּמוֹ עֲלֵיהֶם חַסְדְּכֶם וּשְׁלוֹמְכֶם יִשְׂגֶּא׃
3בָּרוּךְ הוּא הָאֱלֹהִים אֲבִי אֲדֹנֵינוּ יֵשׁוּעַ הַמָּשִׁיחַ אֲשֶׁר כְּגֹדֶל חַסְדּוֹ הוֹלִיד אֹתָנוּ שֵׁנִית לְתִקְוַת חַיִּים בִּתְקוּמַת יֵשׁוּעַ הַמָּשִׁיחַ מִן־הַמֵּתִים׃
4לְנַחֲלָה אֲשֶׁר לֹא תִשָּׁחֵת וְלֹא תְחֻלַּל וְלֹא תִבּוֹל הַצְּפוּנָה לָכֶם בַּשָּׁמָיִם׃
5כִּי שְׁמוּרִים אַתֶּם בְּכֹחַ אֵל עַל־יְדֵי אֱמוּנַתְכֶם לַתְּשׁוּעָה אֲשֶׁר תִּגָּלֶה לְקֵץ הַיָּמִים׃
6אֲשֶׁר בָּהּ תָּגִילוּ עַד־מְאֹד אַף כִּי־עַתָּה תִתְאַבְּלוּ לַמִּצְעָר לְרַגְלֵי מַסּוֹת שֹׁנוֹת אֲשֶׁר בֹּאָן נָחוּץ׃
7לְצָרֵף אֱמוּנַתְכֶם אֲשֶׁר רָחוֹק מְחִירָהּ מִזָּהָב מְזֻקָּק בָּאֵשׁ אֲשֶׁר אַחֲרִיתוֹ עֲדֵי־אֹבֵד וֶאֱמוּנַתְכֶם תִּהְיֶה לִתְהִלָּה לְכָבוֹד וּלְתִפְאֶרֶת בְּהִתְגַּלּוֹת יֵשׁוּעַ הַמָּשִׁיחַ׃
8אֲשֶׁר אֹתוֹ אֲהַבְתֶּם אַף כִּי לֹא חֲזִיתֶם פָּנָיו וַתַּאֲמִינוּ־בוֹ אַף כִּי עַד־עַתָּה לֹא רְאִיתֶם אֹתוֹ בְּעֵינֵיכֶם וּבוֹ תָשִׂישׂוּ בְשָׂשׂוֹן עָצוּם מִסַּפֵּר וְכָלִיל בַּהֲדָרוֹ׃
9כַּאֲשֶׁר תִּמְצְאוּ אֶת־פְּרִי אֱמוּנַתְכֶם וְאֶת־תְּשׁוּעַת נַפְשְׁכֶם׃
10אֵת הַתְּשׁוּעָה אֲשֶׁר עָלֶיהָ חָקְרוּ וְדָרְשׁוּ הַנְּבִיאִים אֲשֶׁר נִבְּאוּ עַל־הַחֶסֶד הַצָּפוּן לָכֶם׃
11וַיַּחְתְּרוּ לָדַעַת מָתַי וְאֵיךְ יָבוֹא הַמּוֹעֵד אֲשֶׁר הוֹדִיעָם רוּחַ הַמָּשִׁיחַ אֲשֶׁר שָׁכַן בְּקִרְבָּם כַּאֲשֶׁר הִגִּיד לָהֶם מֵרֹאשׁ חֵבְלֵי הַמָּשִׁיחַ וְהַכָּבוֹד אֲשֶׁר בַּעֲקֵבָם׃
12וְנִגְלָה לָהֶם כִּי לֹא לְנַפְשָׁם כִּי אִם־לְנַפְשְׁכֶם חָזוּ הַדְּבָרִים הָהֵם אֲשֶׁר הֻגַּד לָכֶם הַיּוֹם מִפִּי הַמְבַשְּׂרִים בְּרוּחַ הַקֹּדֶשׁ הַשָּׁלוּחַ מִשָּׁמַיִם דְּבָרִים אֲשֶׁר מַלְאֲכֵי־יָהּ נִכְסָפִים לְהַבֶּט־בָּם׃
13עַל־כֵּן חִגְרוּ מָתְנֵיכֶם וְיַאֲמֵץ לִבְּכֶם הִתְעוֹרְרוּ וְיַחְלוּ בְכָל־מְאֹדְכֶם לַחֶסֶד אֲשֶׁר יְסוֹבֵב אֶתְכֶם בְּהִתְגַּלּוֹת יֵשׁוּעַ הַמָּשִׁיחַ׃
14וּכְבָנִים מַקְשִׁיבִים אַל־תְּשַׁוּוּ נַפְשְׁכֶם לְנֶפֶשׁ תַּאֲוָה אֲשֶׁר הָיְתָה לָכֶם לְפָנִים מִבְּלִי־דָעַת׃
15כִּי אִם־קְדשִׁים תִּהְיוּ בְכָל־דַּרְכֵיכֶם כַּאֲשֶׁר הַקֹּרֵא אֶתְכֶם קָדוֹשׁ הוּא׃
16כִּי כֵן כָּתוּב וִהְיִיתֶם קְדשִׁים כִּי קָדוֹשׁ אָנִי׃
17וְאִם הַשֹּׁפֵט אִישׁ אִישׁ לְפִי מַעֲלָלָיו אֲשֶׁר לֹא יִשָּׂא פָנִים אִם־אֹתוֹ תִקְרְאוּ אֲבִיכֶם הִתְהַלְּכוּ לְפָנָיו בְּיִרְאָה כָּל־יְמֵי מְגוּרֵיכֶם׃
18הֵן יְדַעְתֶּם כִּי לֹא־בְכֶסֶף וּבְזָהָב אֲשֶׁר יִכְלוּ בְאַחֲרִיתָם נִפְדֵּיתֶם מֵאָרְחוֹת שָׁוְא אֲשֶׁר נִחֲלוּ לָכֶם אֲבוֹתֵיכֶם׃
19כִּי אִם־בְּדַם יָקָר בְּדַם הַמָּשִׁיחַ שֶׂה תָמִים וּמוּם אֵין־בּוֹ׃
20וְהוּא הוּכַן מִקֶּדֶם טֶרֶם הִוָּסֵד אָרֶץ וְנִגְלָה בְאַחֲרִית הַיָּמִים לְמַעַנְכֶם׃
21אֲשֶׁר עַל־יָדוֹ מַאֲמִינִים אַתֶּם בֵּאלֹהִים אֲשֶׁר הֲקִימוֹ מִן־הַמֵּתִים וַיִתֶּן־לוֹ כָבוֹד לְבַעֲבוּר תִּמָּצֵא אֱמוּנַתְכֶם וְתִקְוַתְכֶם בֵּאלֹהִים׃
22וְאַחֲרֵי אֲשֶׁר זִכִּיתֶם אֶת־נַפְשֹׁתֵיכֶם לִשְׁמֹעַ אֶל־הָאֱמֶת עַל־יְדֵי הָרוּחַ וּלְאַהֲבָה אִישׁ אֶת־אָחִיו בְּלֹא שִׂפְתֵי מִרְמָה הִתְאַמְּצוּ וַאֲהַבְתֶּם אֶת־אֲחֵיכֶם בְּתָם־לֵב׃
23כַּאֲנָשִׁים אֲשֶׁר נוֹלְדוּ שֵׁנִית וְלֹא מִזֶּרַע אַכְזָב כִּי אִם־מִמָּקוֹר נֶאֱמָן בִּדְבַר אֱלֹהִים אֲשֶׁר הוּא חַי וְנִצָּב לְעוֹלָם׃
24כִּי כָּל־הַבָּשָׂר חָצִיר וְכָל־כְּבוֹד־אִישׁ כְּצִיץ חָצִיר יָבֵשׁ חָצִיר נָבֵל צִיץ׃
25וּדְבַר יְהוָֹה יָקוּם לְעוֹלָם וְהוּא הַדָּבָר אֲשֶׁר בִּשְּׂרוּ לָכֶם הַמְבַשְּׂרִים׃