2 Corinthians 5
1အဂ့ၢ်ဒ်အံၤ,ပသ့ၣ်ညါလၢပဟံၣ်ဘၣ်ဃးဒီးဟီၣ်ခိၣ်,ပဒဲအံၤ,မ့ၢ်လီၤပှီၢ်ကွံာ်ဒီး,ပအိၣ်ဒီးပဟံၣ်လၢအဘၣ်ဃးဒီးယွၤ,လၢတၢ်တမၤဘၣ်လၢပစုဘၣ်,အိၣ်ဝဲလီၤထူလီၤယိာ်လၢမူခိၣ်လီၤ.
2အဂ့ၢ်ဒ်အံၤ,ပကအုကစွါလၢအဝဲအံၤအပူၤ,ဒီးပဆၢကူဆၢသိးတီၣ်သပှၢ်ပှၢ်ပဟံၣ်လၢမူခိၣ်လီၤ.
3ပမ့ၢ်ကူထီၣ်သိးထီၣ်စ့ၢ်ကီးဒီး,တၢ်တထံၣ်န့ၢ်ဘၣ်ပအိၣ်ဘ့ၣ်ဆ့ဘၣ်.
4အဂ့ၢ်ဒ်အံၤ,ပှၤအိၣ်လၢဒဲပူၤပဝဲဒၣ်အံၤ,ဘၣ်ဝံတၢ်ဃၢဒီး,ပကအုကစွါတၢ်လီၤ.ဘၣ်ပသးလၢပဘ့ၣ်လီၤကွံာ်တၢ်ကူတၢ်သိးတမ့ၢ်ဘၣ်.မ့မ့ၢ်ဘၣ်ပသးလၢပကကူသိးတၢ်,ဒ်သိးတၢ်သံသ့အံၤကလီၤဘျၢဝဲလၢတၢ်မူလီၤ.
5ဒီးပှၤလၢအကတဲာ်ကတီၤပှၤလၢတၢ်န့ၣ်ဒၣ်လဲာ်အဂီၢ်,မ့ၢ်ယွၤလၢအဟ့ၣ်လီၤစ့ၢ်ကီးပှၤလၢသးအတၢ်ဟ့ၣ်ကီၤန့ၣ်လီၤ.
6မၤသးဒ်န့ၣ်ဒီး,ပသးခူတလ့ၢ်တထံၣ်ဃီ,ဒီးပသ့ၣ်ညါလၢဖဲပအိၣ်လၢပဟံၣ်လၢနီၢ်ခိအံၤဒီး,ပအိၣ်ယံၤဒီးကစၢ်လီၤ.
7အဂ့ၢ်ဒ်အံၤ,ပလဲၤတၢ်လၢတၢ်နာ်,တမ့ၢ်ဘၣ်လၢထံၣ်ဘၣ်တၢ်ဘၣ်.
8ဒီးပအိၣ်ဒီးပသးခူတလ့ၢ်,ဒီးဘၣ်ပသးလၢပအိၣ်ယံၤဒီးပနီၢ်ခိဒီးအိၣ်ဒီးကစၢ်လီၤ.
9မၤသးဒ်န့ၣ်ဒီးပအိၣ်ဒီးကစၢ်မ့ၢ်ဂ့ၤ,ပအိၣ်ယံၤမ့ၢ်ဂ့ၤ,ဒ်သိးကဘၣ်အသးလၢပှၤဒီး,ပမၤတၢ်သပှၢ်ပှၢ်လီၤ.
10အဂ့ၢ်ဒ်အံၤ,ပဘၣ်အိၣ်ဖျါလၢခရံာ်စံၣ်ညီၣ်တၢ်အလီၢ်ပစိာ်အမဲာ်ညါခဲလၢာ်,ဒ်သိးပကဒိးတၢ်ဂ့ၤမ့ၢ်ဂ့ၤ,တၢ်အၢမ့ၢ်ဂ့ၤ,ဒ်ပမၤတၢ်လၢနီၢ်ခိအသိးန့ၣ်လီၤ.
11မၤသးဒ်န့ၣ်ဒီးပသ့ၣ်ညါတၢ်ပျံၤဘၣ်ဃးဒီးကစၢ်သတးဒီး,ပသဆၣ်ထီၣ်ပှၤကညီအခံ,မ့မ့ၢ်ပအိၣ်ဖျါလံလၢယွၤအမဲာ်ညါလံ.ဒီးယမုၢ်လၢ်လၢပအိၣ်ဖျါလံလၢသုသးလၢအသ့ၣ်ညါဒၣ်တၢ်အမဲာ်ညါစ့ၢ်ကီးလံ.
12အဂ့ၢ်ဒ်အံၤ,ပစံးထီၣ်ပတြၢၤကဒီးပသးလၢသုမဲာ်ညါတမ့ၢ်ဘၣ်,မ့ၢ်ပဟ့ၣ်သုလီၢ်လၢသုကပာ်သုသးကဖၢလၢလၢပဃိ,ဒ်သိးသုကတြီဆၢပှၤလၢအပာ်အသးကဖၢလၢ,ထဲတၢ်အိၣ်ဖျါအဃိ,ဒီးတမ့ၢ်ဘၣ်လၢသးအဃိဘၣ်,အဂီၢ်လီၤ.
13အဂ့ၢ်ဒ်အံၤ,ပမ့ၢ်ပျုၢ်ဒီး,မ့ၢ်လၢယွၤအဂီၢ်,ပသးမ့ၢ်ဆးဒီး,မ့ၢ်လၢသုဂီၢ်လီၤ.
14အဂ့ၢ်ဒ်အံၤ,ခရံာ်အတၢ်အဲၣ်တၢ်ကွံထိၣ်ဂဲၤပှၤ,လၢပဆိကမိၣ်တၢ်ဒ်အံၤ,ပှၤတဂၤမ့ၢ်သံလၢပှၤခဲလၢာ်အဂီၢ်ဒီး,မ့ၢ်မးပှၤခဲလၢာ်သံတ့ၢ်လံလီၤ.
15ဒီးပှၤတဂၤသံဝဲလၢပှၤခဲလၢာ်အဂီၢ်,ဒ်သိးပှၤလၢအမူဝဲတဖၣ်,သုတမူလၢၤလၢအဂီၢ်ဒၣ်ဝဲတဂ့ၤ,မ့ၢ်လၢပှၤလၢအဒိးသံအသးလၢအဃိ,ဒီးဂဲၤဆၢထၢၣ်က့ၤဝဲတဂၤအဂီၢ်လီၤ.
16မၤသးဒ်န့ၣ်ဒီးတုၤအံၤဆူညါပတသ့ၣ်ညါဘၣ်ပှၤကညီဒ်တၢ်ဖံးတၢ်ညၣ်အသိး,နီတဂၤဘၣ်.ပမ့ၢ်သ့ၣ်ညါတ့ၢ်ခရံာ်ဒၣ်လဲာ်ဒ်တၢ်ဖံးတၢ်ညၣ်အသိးဘၣ်ဆၣ်ဒီး,ခဲကနံၣ်အံၤပတသ့ၣ်ညါလၢၤဘၣ်အီၤဘၣ်.
17မၤသးဒ်န့ၣ်ဒီးပှၤတဂၤမ့ၢ်အိၣ်လၢခရံာ်အပူၤဒီး,မ့ၢ်အမ့ၢ်တၢ်တ့အသီလီၤ.တၢ်လီၢ်လံၤတဖၣ်ပူၤကွံာ်ဝဲ,ကွၢ်ကွၢ်တၢ်ခဲလၢာ်ကဲလၢအသီလံ.
18ဒီးတၢ်ခဲလၢာ်ဟဲလၢယွၤလၢအမၤဘၣ်လိာ်က့ၤပှၤဒီးအကစၢ်ဒၣ်ဝဲလၢခရံာ်အဃိ,ဒီးဟ့ၣ်လီၤပှၤလၢတၢ်မၤဘၣ်လိာ်က့ၤန့ၣ်အတၢ်မၤ,
19ဒ်ပစံးတၢ်အသိး,ယွၤအိၣ်လၢခရံာ်အပူၤဒီး,မၤဘၣ်လိာ်က့ၤဟီၣ်ခိၣ်ဒီးအကစၢ်ဒၣ်ဝဲ,ဒီးတပာ်ဘၣ်တၢ်ကမၣ်လၢအလိၤဘၣ်,ဒီးဟ့ၣ်လီၤတၢ်မၤဘၣ်လိာ်က့ၤအကလုၢ်အကထါလၢပှၤလီၤ.
20မၤသးဒ်န့ၣ်ဒီးပဝဲဒၣ်အံၤ,ပမ့ၢ်အကလူးလၢခရံာ်အဂီၢ်,ဒီးတၢ်မၤအသးဒ်ယွၤဃ့ကညးတၢ်လၢပစုပူၤအသိးဒီး,ပဃ့ကညးတၢ်လၢခရံာ်အဂီၢ်,အိၣ်ဘၣ်လိာ်က့ၤသုသးဒီးယွၤတက့ၢ်.
21အဂ့ၢ်ဒ်အံၤ,ပှၤလၢအတသ့ၣ်ညါဘၣ်တၢ်ဒဲးဘးန့ၣ်,တၢ်ပာ်က့ၤအီၤလၢတၢ်ဒဲးဘးလၢပဂီၢ်,ဒ်သိးပကကဲလၢယွၤအတၢ်တီတၢ်လိၤလၢအပူၤလီၤ.