Nehemiah 1
1စီၤဃကါလယၤအဖိခွါ,စီၤနဃ့မယၤအတၢ်ကတိၤဒီးလၢအနံၣ်ပှဲၤထီၣ်ခံဆံနံၣ်တနံၣ်,လါကံးစလ့ၤအပူၤန့ၣ်ယအိၣ်လၢနူၢ်ရှူၡၣ်အပူၤ,
2ဒီးတၢ်မၤအသးလၢယဒီပုၢ်ဝဲၢ်တဂၤ,စီၤဃနၤနံဟဲဝဲဒၣ်ဒီးပှၤကညီလၢယူဒၤဖိအကျါတဖၣ်,ဒီးယသံကွၢ်အီၤလၢပှၤယူဒၤဖိလၢအပူၤဖျဲးတ့ၢ်,လၢအအိၣ်လီၤတဲာ်လၢပှၤတၢ်မၢကဲကုၢ်အီၤအကျါအဂ့ၢ်အကျိၤ,ဒီးလၢယရူၤၡလ့ၣ်အဂ့ၢ်အကျိၤလီၤ.
3ဒီးစံးဘၣ်ယၤ,ပှၤအိၣ်လီၤတဲာ်လၢအအိၣ်လီၤတဲာ်လၢပှၤတၢ်မၢကဲကုၢ်အီၤအကျါန့ၣ်အိၣ်ဝဲလၢကီၢ်ပူၤဖဲန့ၣ်,ဒီးဘၣ်တၢ်အၢဖးဒိၣ်,ဒီးတၢ်ဒုၣ်ဒွဲၣ်,ဒီးယရူၤၡလ့ၣ်အခိၣ်ဒူလီၤပှီၢ်လံ.ဒီးအတြဲၤတဖၣ်ဆူးထီၣ်ကွံာ်လံအသးလၢမ့ၣ်အူလံ.
4ဒီးတုၤယနၢ်ဟူတၢ်ကတိၤန့ၣ်ဒီး,တၢ်မၤအသးလၢယဆ့ၣ်နီၤ,ဒီးယဟီၣ်,ဒီးယသူၣ်အုးယသးအုးတၢ်အနံၤတဖၣ်,ဒီးယဒုၣ်တၢ်အီၣ်,ဒီးယဘါထုကဖၣ်တၢ်လၢမူခိၣ်အကစၢ်အမဲာ်ညါလီၤ.
5ဒီးယစံး,ယဃ့ကညးနၤ,မူခိၣ်အကစၢ်,ကစၢ်ဖးဒိၣ်,ဒီးတၢ်ပျံၤအလီၢ်လၢအတိၢ်န့ၢ်တၢ်အၢၣ်လီၤအီလီၤ,ဒီးတၢ်ဘျုးတၢ်ဖှိၣ်လၢပှၤလၢအအဲၣ်အီၤ,ဒီးတိၢ်န့ၢ်အတၢ်မၤလိာ်တဖၣ်တဂၤဧၢ,
6မ်နဒိးနနၢ်,ဒီးအိးထီၣ်နမဲာ်ဒ်သိးနကဒိကနၣ်နခ့နပှၤအတၢ်ထုကဖၣ်လၢယဘါထုကဖၣ်လၢနမဲာ်ညါ,လၢမုၢ်ဆါဆဲးလၢမုၢ်နၤလၢနခ့နပှၤအံၣ်စရ့လးဖိအဂီၢ်,လၢယတဲလီၤကျဲၤလီၤပှၤအံၣ်စရ့လးဖိအတၢ်ကမၣ်လၢအမၤကမၣ်ဘၣ်နၤအဖၢမုၢ်တက့ၢ်.မ့ၢ်မးယၤ,ဒီးယပၢ်အပှၤဟံၣ်ဖိမၤကမၣ်လံတၢ်လံ.
7ပမၤဘၣ်နၤလၢပှၤဟးဂီၤဖိအတၢ်မၤ,ဒီးတၢ်မၤလိာ်,ဒီးတၢ်သိၣ်တၢ်သီ,ဒီးတၢ်စံၣ်ညီၣ်လၢနမၤလိာ်နခ့နပှၤစီၤမိၤရှ့န့ၣ်ပတမၤဘၣ်ပဝဲဘၣ်.
8ယဃ့ကညးနၤ,သ့ၣ်နီၣ်ထီၣ်က့ၤတၢ်ကတိၤလၢနမၤလိာ်နခ့နပှၤစီၤမိၤရှ့,ဒီးနစံး,သုမ့ၢ်မၤကမၣ်တၢ်ဒီး,ယကမၤလီၤပြံလီၤပြါသုလၢပှၤကလုာ်တဖၣ်အကျါ,
9ဒီးသုမ့ၢ်ဃၣ်သုသးဆူယအိၣ်,ဒီးတိၢ်န့ၢ်ယတၢ်မၤလိာ်,ဒီးမၤအီၤဒီး,ပှၤဘၣ်တၢ်ဟီထီၣ်ကွံာ်အီၤဆူမူခိၣ်အကတၢၢ်န့ၣ်မ့ၢ်အိၣ်ဝဲဘၣ်ဆၣ်ဒီး,ယကထၢဖှိၣ်အီၤဖဲန့ၣ်,ဒီးစိာ်ထီၣ်အီၤဆူတၢ်အလီၢ်ဖဲယဃုထၢပာ်ယမံၤလီၤ.
10ဒီးအဝဲသ့ၣ်တဖၣ်န့ၣ်မ့ၢ်နခ့နပှၤ,ဒီးနပှၤဂီၢ်မုၢ်လၢနပှ့ၤက့ၤအီၤလၢနစိဒိၣ်နကမီၤထီ,ဒီးလၢနစုဆူၣ်လီၤ.
11ကစၢ်ဧၢ,ယဃ့ကညးနၤ,မ်နနၢ်တူၢ်လိာ်နခ့နပှၤအတၢ်ထုကဖၣ်,ဒီးနခ့နပှၤတဖၣ်အတၢ်ထုကဖၣ်လၢအဆၢပျံၤနမံၤတက့ၢ်.ဒီးဒုးဘီၣ်ထီၣ်ညီထီၣ်နခ့နပှၤလၢမုၢ်မဆါတနံၤအံၤ,ယဃ့ကညးနၤ,ဒီးဟ့ၣ်လီၤအီၤလၢတၢ်ဘျုးတၢ်ဖှိၣ်လၢပှၤကညီတဂၤအံၤအမဲာ်ညါတက့ၢ်.ဒီးယမ့ၢ်ပှၤစိာ်လီခီအီတၢ်လၢစီၤပၤအဂီၢ်လီၤ.