Proverbs 2
1ယဖိခွါဧၢ,နမ့ၢ်ဒိးန့ၢ်ယတၢ်ကတိၤ,ဒီးပာ်ဖှိၣ်ယတၢ်မၤလိာ်ဒီးနၤ,
2ဒ်သိးနကဒိးနနၢ်လၢတၢ်ကူၣ်သ့,ဒီးဃၣ်နသးဆူတၢ်သူၣ်ဆးသးဆး,
3မ့ၢ်မးနမ့ၢ်ကိးတၢ်ဆူတၢ်ကူၣ်တၢ်ဆး,ဒီးထုထီၣ်နကလုၢ်ဆူတၢ်သူၣ်ဆးသးဆးဒီး,
4နမ့ၢ်ဃုအီၤဒ်ကျိၣ်ဧိၤစ့ဧိၤအသိး,ဒီးချုအီၤဒ်တၢ်လုၢ်ဒိၣ်ပှ့ၤဒိၣ်အိၣ်ခူသူၣ်အသိးန့ၣ်ဒီး,
5နနၢ်ကပၢၢ်တၢ်ပျံၤယွၤ,ဒီးနကထံၣ်န့ၢ်တၢ်သ့ၣ်ညါယွၤလီၤ.
6အဂ့ၢ်ဒ်အံၤ,ယွၤဟ့ၣ်လီၤတၢ်ကူၣ်သ့လီၤ.တၢ်သ့ၣ်ညါ,ဒီးတၢ်သူၣ်ဆးသးဆးထီၣ်ဖျဲးလၢအထးခိၣ်လီၤ.
7ပာ်ဖှိၣ်ဝဲလၢတၢ်ကူၣ်သ့အမူာ်အနီၢ်လၢပှၤတီပှၤလိၤအဂီၢ်,မ့ၢ်ဝဲကတီၤတဘ့ၣ်လၢပှၤလၢအလဲၤတၢ်လၢလၢပှဲၤပှဲၤအဂီၢ်လီၤ.
8ပၢၤဝဲလၢတၢ်စံၣ်ညီၣ်အကျဲဧိၤကပူၤဧိၤ,ဒီးကွၢ်အပှၤစီဆှံအကျဲလီၤ.
9တုၤနုၤတစုနနၢ်ကပၢၢ်တၢ်တီတၢ်လိၤ,ဒီးတၢ်စံၣ်ညီၣ်,ဒီးတၢ်အသးစၢၢ်ဆၢ,ကယဲၢ်ကျဲဧိၤကပူၤဧိၤလၢအဂ့ၤအဘၣ်လီၤ.
10အဂ့ၢ်ဒ်အံၤ,တၢ်ကူၣ်သ့ကဟဲနုာ်လၢနသးကံၢ်ပူၤ,ဒီးတၢ်သ့ၣ်ညါကဘၣ်နသး,
11ဒီးတၢ်ဒုးပလီၢ်နသးကအံးက့ၤကွၢ်က့ၤနၤ,ဒီးတၢ်သူၣ်ဆးသးဆးကပၢၤနၤ,
12ဒ်သိးအကမၤပူၤဖျဲးနၤလၢတၢ်အၢအကျဲ,ဒီးပှၤလၢအကတိၤတၢ်အက့ၣ်အကူ,
13ပှၤလၢအလဲၤသဒၣ်တၢ်လိၤအကျဲဒ်သိးအကပိာ်တၢ်ခံးအကျဲ,
14ပှၤလၢအသူၣ်ခုသးခုလၢအမၤတၢ်အၢ,လၢအသူၣ်ဖှံသးညီလၢတၢ်ဒၢက့ၣ်ဒၢကူအပူၤ,
15ပှၤလၢအကျဲအကပူၤ,ဒၢက့ၣ်ဒၢကူ,ဒီးအကျဲမ့ၢ်အအၢအသီလီၤ.
16ကမၤပူၤမၤဖျဲးနၤလၢပိာ်မုၣ်ဟးဂီၤ,ဒီးပှၤတမှံၤပိာ်မုၣ်လၢအလွဲတၢ်လၢအတၢ်ကတိၤ,
17ပှၤလၢအလဲၤသဒၣ်အမုၣ်ကနီၤထီၣ်အတံၤအသကိး,ဒီးသးပ့ၤနီၣ်အကစၢ်အတၢ်အၢၣ်လီၤအီလီၤလီၤ.
18အဂ့ၢ်ဒ်အံၤ,အဟံၣ်လီၤဒးဝဲဆူတၢ်သံ,ဒီးအကျဲဧိၤကပူၤဧိၤဆူပှၤသံအအိၣ်လီၤ.
19ပှၤလၢအလဲၤဆူအအိၣ်တဟဲက့ၤကဒါက့ၤဘၣ်နီတဂၤဘၣ်.တထီၣ်ဘးဘၣ်တၢ်မူအကျဲဘၣ်.
20မၤသးဒ်န့ၣ်ဒီးလဲၤတၢ်လၢပှၤဂ့ၤအကျဲပူၤ,ဒီးဟံးဃာ်ပှၤတီပှၤလိၤအကျဲန့ၣ်တက့ၢ်.
21အဂ့ၢ်ဒ်အံၤ,ပှၤအတီအလိၤကအိၣ်ကဆိးလၢထံဧိၤကီၢ်ဧိၤအပူၤ,ဒီးပှၤလၢပှၤပှဲၤကအိၣ်ဒၣ်တၢ်လၢအပူၤလီၤ.
22မ့မ့ၢ်ပှၤတတီတလိၤဘၣ်န့ၣ်ကဘၣ်တၢ်ဒီၣ်တဲာ်ကွံာ်လၢကီၢ်ပူၤ,ဒီးပှၤမၤကမၣ်တၢ်ဖိန့ၣ်ကဘၣ်တၢ်ထဲးကွံာ်အီၤလၢအပူၤလီၤ.