1 Chronicles · Chapter 15

[ edit] And he maad houſes to hym in þe cyte of Dauid, and he bilde up þe place of þe ark of God, and he ſtrauȝt out to it a tabernacle. Þanne Dauid ſeide, Vnleeful it is, þat of eny man be born þe arke of God bot of Leuytis, whome þe Lord haþ choſen to bern it, and to mynyſtre to hym vnto wiþ outen eend.

And he gadered al Yrael in to Jeruſalem, þat þe arke of God were born in to hys place, þe whiche he hadde redy before made to it; alſo and þe ſonys of Aaron and Leuytes; of þe ſonys of Caaþ Vriel was prince, and þe breþeren of hym two hundriþ and twenty; of þe ſonys of Merery, Azaia prince, and þe breþeren of hym two hundriþ and þritty; of þe ſonys of Jerſan, Joel prince, and þe breþeren of hym an hundriþ and þritty; of þe ſonis of Eliſaphan, Semeias prince, and þe breþeren of hym two hundriþ; of þe ſonys of Ebron, Helyel prince, and þe breþeren of hym eyȝtye; of þe ſonys of Oſiel, Amynadab prince, and þe breþeren of hym an hundriþ and twelue.

And Dauid clepide Sadoch and Abiaþar preſtis, and Leuytis Vriel, Azaia, Johel, Semeyam, Eliel, and Amynadab. And he ſeide to hem, Ȝe þat ben princes of Leuytis meynees, be ȝe halowed wiþ ȝour breþeren, and bryngiþ þe arke of þe Lord God of Yrael to þe place, þe whiche is maad redy to it; leſt, as at þe bigynnynge, for ȝe weren not preſent, þe Lord ſmote us, ſo and nowe it be done, us doynge eny þinge vnleeful. Þanne þe preſtis ben halowed, and þe Leuytis, þat þei beren þe ark of þe Lord God of Yrael. And þe ſonys of Leuy token þe arke of God, as Moyſes hadde comaundide aftir þe word of God, wiþ þeir ſchulderis in berynge ſtaues.

And Dauid ſeide to þe pryncis of Leuytis, þat þei ſchulden ordeynen of þeir breþeren ſyngers in orgnes of muſikis, þat is, in ſawtrees, and ſyngynge inſtrumentis, and cymbalis; þat þe ſown of gladneſſe ſowne aȝeyn in heiȝtis.

And þei ordeynden Leuytes, Heeman, þe ſone of Joel, and of his breþeren, Aſaph, þe ſone of Barachie; of þe ſonis forſoþe of Merery, þe breþeren of hem, Eþan, þe ſone of Chaſaie, and wiþ hem þeir breþeren; in þe ſecounde ordre, Zacharie, and Ben, and Jaſiel, and Semmyramoþ, and Jahiel, and Anyſey, and Heliab, and Banayam, and Elifalu, and Macenyam, and Obededon, and Johiel, porters; forſoþe þe chauntours Eman, Aſaph, and Eþan, in braſen cymbalis ſyngynge; Zacharie forſoþe, and Oſiel, and Semyramoþ, and Jayhel, and Ham, and Eliab, and Maazias, and Banaias, in orgnys ſungyn priue þingis; forſoþe Maþatias, and Eliphalu, and Macenyas, and Ebededom, and Jehiel, and Ozaſyn, in harpis for þe eyȝteþe ſungyn cynychyon, þat is, to þe God ouercomer victorie and preyſynge; Chononyas forſoþe, prynce of þe Leuytis, was beforne to þe prophecie, and to þe melodye to be ſungyn before, he was forſoþe fulwijs; and Barachias, and Helchana, porters of þe arke; bot Sebenyas, and Joſaphaþ, and Maþanael, and Amazai, and Zacharias, and Banayas, and Eliezer, preſtis, ſowneden wiþ trumpis beforne þe arke of þe Lord; and Ebededom, and Achymaas, weren porters of þe arke.

Þanne Dauid, and alle þe more þoruȝ birþe of Yrael, and þe mayſtirs of þouſandis, wenten to þe arke of peſe couenaunt of þe Lord, to ben born fro þe hous of Obededom wiþ ioye. And whanne God hadde holpen þe Leuytes þat beeren þe ark of þe peſe couenaunt of þe Lord, þen weren offrid ſeuen boolis and ſeuen weþers. Forſoþe Dauid was cloþed wiþ a bijs ſtole, and alle þe Leuytis þat beeren þe arke, and þe ſyngers, and Chononyas, þe prince of þe prophecie amonge þe ſyngers; Dauid forſoþe alſo was cloþed wiþ a ſurplees. And al Yrael brouȝten þe arke of þe peſe couenaunt of þe Lord in ioye, and in ſowne of trumpe, and in trumpis, and cymbalis, and ſawtrees, and harpis, to gider ſyngynge.

And whanne þe arke of þe peſe couenaunt of þe Lord was commen vnto þe cytee of Dauiþ, Mychol, þe douȝtir of Saul, beholdynge þoruȝ þe wyndowe, ſawȝ kyng Dauiþ lepynge and pleyinge; and ſche diſpiſede him in her herte.