1 Chronicles · Chapter 16

[ edit] Thanne þei brouȝten in þe arke of of God, and ſetten it in þe mydil of þe tabernacle, þat Dauiþ hadde ſtrauȝte oute to it; and þei offreden brent ſacrifices and peſible before þe Lord. And whanne Dauid offrynge hadde fulfillide brent ſacrifices and peſible, he bleſſede þe puple in name of þe Lord; and he deuydide to alle þoruȝ oute echone fro man vnto womman a kake of brede, and a partye of rooſtyd fleſche of a bugle, and tried floure fryed in oyle.

And he ſette beforn þe arke of þe Lord, of þe Leuytis, þat ſchulden mynyſtren, and recorden of þe werkis of hym, and glorifien and preyſen þe Lord God of Yrael; Aſaph prince, and his ſecound Zacharie, forſoþe Jaihel, and Semyramoþ, and Jeihel, and Maþatiam, and Eliab, and Banaya, and Obededom, and Jeiel, vpon orgnys of ſawtree, and ſyngynge inſtrumentis; Aſaph forſoþe ſchuld ſyngyn in cymbalis; Bananyam forſoþe and Aſiel, preſtis, ſungen in trumpe beſily beforne þe arke of þe peſe couenaunt of þe Lord. In þat day Dauiþ maad prince, to knowlachen to þe Lord, Aſaph, and his briþeren. Knowlechiþ to þe Lord, and inwardly clepiþ his name; knowen make ȝe in puplis þe fyndyngis of hym.

Syngiþ to hym, and doþ pſalmes to hym, and telliþ alle his merueyls. Preyſeþ his holy name; ioye þe hert of men ſechynge þe Lord. Secheþ þe Lord in his vertue; ſechiþ his face euermore. Recordiþ of his merueyles þat he dide; of þe ſyngnes of hym, and of þe domes of his mouþ; Ȝe ſeed of Yrael, his ſeruaunt; ȝe ſones of Jacob, his choſen. He þe Lord oure God; in al erþe þe domes of hym. Recordiþ vnto euermore of his couenaunt; of þe word þat he comaundide in to a þouſand generaciouns. Þe whiche he couenauntide wiþ Abraham; and of þe ooþ of hym to Yſaac. And to Jacob he ſette it in to heſte; and to Yrael in to euere couenaunt.

Seyinge, To þee I ſchal ȝeuen þe lond of Chanaan; þe lytyl cord of ȝoure eritage. Whanne þei weren fewe in noumbre; lytyl, and tylyeris of it. And þei paſſeden fro folk vnto folk; and fro regne to anoþer puple. He ſuffrede not eny man to challengen hem; bot he blamede for hem kyngis. Wyle ȝe not touchen my criſtis; and in my prophetis wyle ȝe not don malice. Syngiþ to þe Lord, al þe erþ; telliþ fro day in to day þe ȝeuer of his helþ. Telliþ in gentylis his glorie; and in alle puplis his merueylis. For þe Lord grete, and preyſable ful myche; and horrible vpon alle goddis. Alle forſoþe goddis mawmettis of puplis; þe Lord forſoþe heuens maad.

Knowlechynge and grete doynge beforn hym; ſtreyngþe and ioye in his place. Bryngiþ to þe Lord, ȝe meynes of puples; bryngiþ to þe Lord glorie and empyre. Ȝeuiþ glorie to þe name of hym, rereþ ſacrifice, and commiþ in his ſiȝt; and honouriþ þe Lord in holy fairneſſe. Be meued fro þe ſiȝt of hym al erþ; he forſoþe foundide þe world vnmeuable. Joyen heuens, and þe erþ glade; and ſey þei in naciouns, Þe Lord ſchal regnen. Doone þe ſe, and þe plente of it; ioyen þe feeldis, and alle þingis þat in hem ben. Þann ſchal preyſen þe trees of þe wijlde wood before þe Lord; for he came to demen þe erþe. Knowlechiþ to þe Lord, for good he is; for wiþ oute ende þe mercy of hym.

And ſeiþ, Saue us, God oure Saueoure, and gader vs, and delyuer fro gentilis; þat we knowlechen to þin holy name, and ioyen in þi dytees. Bleſſid þe Lord God of Yrael fro wiþ out ende vnto wiþ out ende; and ſey alle puple, Amen, and an hympne to God. And ſo he laft þere, beforn þe arke of þe peſe couenaunt of þe Lord, Aſaph and his breþeren, þat þey ſchulden mynyſtren in þe ſiȝt of þe arke beſily bi alle days and þer whilis. Forſoþe Obededom and his breþeren, eyȝt and ſexty, and Obededom, þe ſone of Yditym, and Oſa, he ordeynede porters.

Sadoch forſoþe preſt, and þe breþeren of hym, preſtis before þe tabernacle of þe Lord, in þe heiȝt þat was in Gabaon, þat þei offren brent ſacrifices to þe Lord vpon þe auter of brent ſacrifice biſily, erly and at euen, aftir alle þingis þat ben writen in þe lawe of þe Lord, þat he comaundide to Yrael. And aftir hym Eman, and Iditym, and þe toþer choſen, echon bi his name, to knowlachen to þe Lord; for wiþ oute ende þe mercy of hym. Heman alſo, and Iditym, ſynginge in trumpe, and ſmytynge cymbalis, and alle orgnys of muſikis, to ſyngyn to God; þe ſonis forſoþe of Yditym he made to ben porters. And al þe puple is turned aȝein in to his hous, and Dauid, þat alſo he ſchuld bleſſen to his hous.