1 Chronicles · Chapter 28

[ edit] Dauiþ þanne clepide to gider alle þe princis of Iſrael, duykis of lynagis, and prouoſtis of companyes, þe whiche mynyſtreden to þe kyng, alſo leders of þouſandis, and leders of hundriþes, and þat before weren to þe ſubſtaunce and to þe poſſeſſiouns of þe kyng, and her ſonis, wiþ þe geldyngis, and þe myȝty, and alle þe moſt ſtrong in þe hooſt of Jeruſalem. And whanne þe kyng hadde ryſen, and ſtonden, he ſeiþ, Heriþ me, my breþeren and my puple. I þouȝte for to maken an hous, in þe whiche ſchulde reſten þe arke of þe peſe couenaunt of þe Lord, and þe ſtole of þe feet of oure God; and to beelden alle þingis I haue made redy.

God forſoþe ſeide to me, Þou ſchalt not bilden an hous to my name, for þi þat þou be a man fiȝter, and blood þou haſt ſchad. Bot þe Lord God of Yrael haþ choſen me of al þe hous of my fadir, þat I wer kyng vpon Yrael in to euer more; of Juda forſoþe he chees princis, bot of þe hous of Juda þe hous of my fadir, and of þe ſonis of my fadir it pleſide to hym, þat me he ſchulde cheſen kyng vpon al Iſrael. Bot many ſonys þe Lord ȝaue to me; and of my ſonis he chees Salomon, my ſone, þat he ſchulde ſytten in þe trone of þe rewme of þe Lord on Iſrael.

And he ſeide to me, Salomon, þi ſone, ſchal bilde myn hous, and myn auters; hym forſoþe I haue choſen to me in to ſone, and I ſchal be to hym in to fadir; and I ſchal faſtne his rewme in to wiþ outen eend, ȝif he be ſtedfaſt to do my domys and myn heſtis, as and to day. Nowe þanne beforn al þe companye of Yrael, heerynge my God, kepiþ and ſechiþ alle þe maundementis of þe Lord oure God, þat ȝe welden a good lond, and leuen it to ȝoure ſonis aftir ȝou in to euermore.

Þou forſoþe, Salomon, my ſone, knowe þou þe God of þi fadir, and ſerue þou to hym in perfijt herte, and wiþ wilful inwit; alle forſoþe hertis þe Lord ſerchiþ, and alle þouȝtis of myndis he vndirſtondiþ; ȝif þou ſechiſt hym, þou ſchalt fynden; ȝif forſoþe þou forſakiſt hym, he ſchal þrowen þee aweye into wiþ outen eend. Nowe þanne, for þe Lord chees þee, þat þou ſchuldiſt bilden þe hous of þe ſeyntuarie, take coumfort, and perfourme.

Forſoþe Dauiþ ȝaue to Salomon, his ſone, þe diſcryuynge of þe ȝate hous, and of þe temple, and of celers, and of þe ſoupynge place, and of þe bed placis in pryue houſis beſide þe auter, and of þe hous of Goddis pleſaunce; and alſo of alle þe porches, þe whiche he hadde caſt, and of þe pryue chaumbris by enuyroun, in to þe treſoures of þe hous of þe Lord, and in to þe treſours of þe hous of hooly þingis, and of þe preſtis and Leuytis dyuyſiouns, in to alle þe werkis of þe hous of þe Lord, and alle þe veſſels of þe ſeruyſe of þe temple of þe Lord.

Of gold in weiȝt þoruȝ alle þe veſſelis of þe ſeruyſe, alſo of ſyluer, for þe dyuerſte of veſſels, and of werkis; bot and to þe golden chaundelers, and to þe lanternes of hem, gold, for þe meſure of eche chaundeler and of lanternes; and alſo in þe ſilueren chaundelers, and in þe lanternes of hem, for þe dyuerſte of meſure weiȝt of ſyluer he toke.

Alſo gold he ȝaue in to þe boordis of propoſicioun, for þe dyuerſte of meſure, and alſo ſiluer in to oþere ſylueren boordis; alſo to þe fleſchokis, and violes, and encenſeris of moſt pure gold; and to golden litil lyouns, for þe qualite of meſure, weiȝte he delid in to litil lyoun and litil lyoun; and lijc maner in to þe ſilueren lyouns dyuerſe weiȝte of ſyluer he ſeuerede. To þe auter forſoþe, in þe whiche was brend encenſe, moſt pure gold he ȝaue, þat of it were maad þe licneſſe of þe cart of cherubyn, ſtretchynge out þe weengis, and couerynge þe arke of þe peſe couenaunt of þe Lord.

Alle þingis, he ſeiþ, camen writen by þe hond of þe Lord to me, þat I ſchuld vndurſtonde alle þe werkis of þe ſaumpler. And Dauiþ ſeide to Salomon, his ſone, Do manly, and take coumfort, and make; ne dreed þou, and take þou no ferd; þe Lord forſoþe my God ſchal be wiþ þee, and he ſchal not leue þee, ne forſake þee, to þe tyme þat þou perfourme al þe werk of þe ſeruyſe of þe hous of þe Lord. Loo! þe dyuyſiouns of preſtis and of Leuytis, in to al þe werk of þe ſeruyſe of þe hous of þe Lord, ſchul ſtonden neeȝ to þee; and boþe þe princis and þe puple ben redy, and han knowen to don alle þin heſtis.