1 Chronicles · Chapter 29

[ edit] Kyng Dauid ſpac to al þe chirche, God haþ choſen Salomon, my ſone, ȝit child and tendre; forſoþe a grete werk is, ne to man is greiþed a dwellynge bot to God. I forſoþe wiþ alle my ſtreyngþes haue maad redy þe expenſis of þe hous of my God; gold to þe golden veſſels, and ſyluer to þe ſilueren, braſſe in to þe braſen, yryn in to þe yryn, trees in to þe treenen, onychyne ſtones, and as cleer whijt, and alle precious ſtone of dyuerſe coloures, and dyuerſe marbil, moſt plenteuouſly.

And vpon þes þingis gold and ſyluer I ȝeue into þe temple of my God, þe whiche I offred in to þe hous of my God of myn owne treſor, out take þes þingis þe whiche I made redy in to þe hooly hous, þre þouſand talentis of gold, of þe gold of Oofer, and ſeuen þouſand of talentis of ſyluer moſt fyne, to þe wallis of þe temple, to ben gildid; and wher euer nede is gold, of gold, and wher euer nede is ſyluer, of ſyluer, þe werkis ben maad by þe hondis of craftiſe men; and ȝif eny man wilfully offreþ, fulfylle he his hond to day, and offre he þat he wille to þe Lord.

And ſo byheeten þe princis of þe meynes, and noble men of þe lynagis of Iſrael, alſo þe leders of þouſandis, and þe maiſters of hundreþis, and þe princis of þe poſſeſſiouns of þe kyng; and þei ȝeuen in to þe werkis of þe hous of þe Lord, fyue þouſand talentis of gold, and tenn þouſand ſchillyngis; of ſyluer tenn þouſand talentis, and of braſſe eyȝtene þouſand talentis, alſo of yren an hundriþ þouſand of talentis. And anentis whom ſo euer þe ſtonys ben founden, þei ȝeuen in to þe treſour of þe hous of þe Lord, by þe hond of Johiel Jerſonyte. And þe puple gladide, whanne vowis wilfully þei ſchulden behoten, for wiþ al þe herte þei offreden hem to þe Lord.

Bot and Dauid þe kyng gladide wiþ grete ioye, and bleſſide to þe Lord beforn al þe multitude, and ſeiþ, Bleſſed ert þou, Lord God of Yrael, oure fadir, fro wiþ oute eend and in to wiþ oute eend; þin is, Lord, grete doynge, and power, and glorie, and victorie, and to þee preiſynge; alle þingis forſoþe þat ben in heuen and in erþ ben þine; þin, Lord, kyngdam, and þou ert vpon alle princis; þin ritcheſſes, and þin is glorie; þou lordſchipiſt of alle þingis; in þin hond vertue, and myȝt, and in þin hond mykilneſſe and empyre of alle þingis. Nowe þanne, oure God, we knowlechen to þee, and we preyſen þi noble name. Who I, and who my puple, þat we mowen to þee alle þes þingis behoten?

Þin ben alle þingis, and þe whiche of þin hond we han taken, we han ȝeuen to þee. Pilgrymes forſoþe we ben beforn þee, and comlyngis, as alle oure fadirs; oure days as ſchadowe vpon þe erþ, and þer is no tariynge. Lord oure God, al þis plente þat we han maad redy, þat an hous ſchulde ben bild up to þi holy name, of þin hond is; and þin ben alle þingis. My God, I wote, þat þou proueſt hertis, and þat ſymplenes of herte þou loueſt; wherfore and I, in ſympleneſſe of myn herte, glaad haue offred alle þes þingis; and þi peple, þat here is founden, I ſawȝ wiþ grete ioye to þee offren ȝiftis.

Lord God of Abraham, and of Yſaac, and Yrael, oure fadirs, in to wiþ oute eend keepe þis wille of þe herte of hem; and euermore in to þe worſchipynge of þee þis mynde abijde ſtylle. And to Salomon, my ſone, ȝeue a perfijt herte, þat he keepe þin heſtis, and witneſſyngis, and þi cerymonyes; and þat he do alle þingis, and bijld an hous, whos expenſes I haue maad redy. Dauid forſoþe comaundide to al þe chirche, Bleſſe ȝe to þe Lord oure God. And al þe chirche bleſſed to þe Lord God of þeir fadirs, and þei boweden hem ſeluen, and honoureden God, and þanne aftirwarde þe kyng.

And þei ſlowen ſacrifiſes to þe Lord, and offreden brent ſacrifices þe day folowynge; boolis a þouſand, and weþers a þouſand, and lombes a þouſand, wiþ þeir ſacrifices of licours, and al þe rijt, moſt plenteuouſly, in to al Yrael. And þei eeten and dronken before þe Lord in þat day, in greet gladneſſe. And þei anoyntide þe ſecounde, Salomon, þe ſone of Dauid; þei anoynteden forſoþe to þe Lord in to a prince, and Sadoch in to a biſchop. And Salomon ſatt vpon þe ſee of þe Lord in to kyng, for Dauid, his fadir; and to alle men it pleſide, and al Irael obeſchide to hym. Bot and alle þe princes, and myȝty, and alle ſonys of kyng Dauid, ȝeuen hond, and weren ſuget to kyng Salomon.

Þan þe Lord magnyfied Salomon vpon al Irael, and ȝaue to hym glorie of þe kingdom, what maner no kyng of Yrael hadden beforn hym. Þanne Dauid, þe ſone of Yſay, regned vpon al Irael; and þe days þe whiche he regned vpon Yrael weren fourty ȝeer; in Ebron he regned ſeuen ȝeer, and in Jeruſalem þre and þirty. He is deed in a good elde, full of days, and rytcheſſes, and glorie; and Salomon, his ſone, regnede for hym. Forſoþe þe raþer dedis of kyng Dauid, and þe laſt, ben writen in þe boke of Samuel, ſeer, and in þe boke of Naþan, þe prophete, and in þe volyme of Gad, ſeere; and of al his rewme, and ſtreyngþe, and tymes, þat paſſiden vndur hym, or in Yrael, or in alle rewmes of londis.

Here eendiþ þe firſt book of Paralipomenon, and now bigynneþ þe proloog of þe ſecounde book.