1 Corinthians 1
1ပှၤလၢတၢ်ကိးအီၤဒ်သိးအကကဲထီၣ်ယ့ၣ်ရှူးခရံာ်အပှၤတၢ်မၢဖိဖဲယွၤအသး,ယၤစီၤပီလူးဒီးပဒီပုၢ်ဝဲၢ်စီၤစိၤစသ့ၣ်,
2စံးဘၣ်ယွၤအတၢ်အိၣ်ဖှိၣ်လၢအအိၣ်လၢကရံၣ်သူး,ပှၤဘၣ်တၢ်ပာ်စီဆှံအီၤလၢယ့ၣ်ရှူးခရံာ်အပူၤ,ဒီးတၢ်ကိးအီၤဒ်သိးအကကဲထီၣ်ပှၤစီဆှံ,ဒီးကယဲၢ်ပှၤအိၣ်တပူၤလၢ်လၢ်လၢအကိးထီၣ်ပကစၢ်ယ့ၣ်ရှူးခရံာ်အမံၤ,အဝဲသ့ၣ်အကစၢ်ဒီးပကစၢ်,
3မ်တၢ်ဘျုးတၢ်ဖှိၣ်ဒီးတၢ်ဃူတၢ်ဖိးလၢပပၢ်ယွၤဒီးပကစၢ်ယ့ၣ်ရှူးခရံာ်န့ၣ်,ဘၣ်သုတက့ၢ်.
4ယစံးထီၣ်ပတြၢၤယကစၢ်လၢသုဃိတထံၣ်ဃီ,လၢယွၤအဘျုးအဖှိၣ်လၢတၢ်ဟ့ၣ်လီၤသုလၢယ့ၣ်ရှူးခရံာ်အပူၤအဃိ,
5အဂ့ၢ်ဒ်အံၤ,သုထူးထီၣ်တီၤထီၣ်လၢအပူၤလၢတၢ်ခဲလၢာ်,တၢ်ကတိၤခဲလၢာ်,ဒီးတၢ်သ့ၣ်ညါခဲလၢာ်,
6ဒ်တၢ်အုၣ်အသးလၢခရံာ်ကဲတၢ်ဂၢၢ်တၢ်ကျၢၤလၢသုကျါအသိးန့ၣ်လီၤ.
7ဒ်န့ၣ်အသိး,သုကွၢ်လၢ်ပကစၢ်ယ့ၣ်ရှူးခရံာ်အတၢ်အိၣ်ဖျါအကျဲဒီးသုတအိၣ်ဘၣ်လၢတၢ်အလီၢ်ခံလၢတၢ်ဘျုးတၢ်ဖှိၣ်နီတမံၤဘၣ်.
8ဒီးအဝဲဒၣ်ကဒုးအိၣ်ဂၢၢ်ဆိးကျၢၤသုစ့ၢ်ကီးတုၤအကတၢၢ်,တုၤသုတၢ်ကမၣ်တအိၣ်ဘၣ်ဖဲပကစၢ်ယ့ၣ်ရှူးခရံာ်အမုၢ်တနံၤန့ၣ်န့ၣ်လီၤ.
9ယွၤလၢအကိးန့ၢ်သုဆူတၢ်ရ့လိာ်သုသးဒီးအဖိခွါပကစၢ်ယ့ၣ်ရှူးခရံာ်န့ၣ်,မ့ၢ်အကလုၢ်တီလီၤ.
10ဒီးပုၢ်သ့ၣ်ဝဲၢ်သ့ၣ်ဧၢ,ဒ်သိးသုကကတိၤတၢ်တမံၤဃီခဲလၢာ်,ဒီးတၢ်လီၤမုၢ်လီၤဖးသုတအိၣ်လၢသုကျါတဂ့ၤ,ဒီးသုကအိၣ်ဒီးသုကူၣ်ထီၣ်ဖးလီၤတၢ်တမံၤဃီ,ဒီးသုကဆိကမိၣ်တမံၤဃီဒီး,ပဃ့ကညးသုလၢပကစၢ်ယ့ၣ်ရှူးခရံာ်အမံၤလီၤ.
11အဂ့ၢ်ဒ်အံၤ,ယဒီပုၢ်ဝဲၢ်သ့ၣ်ဧၢ,ပှၤလၢအဘၣ်ဃးဒီးနီၢ်ကျိးအ့ၤတဖၣ်,စံးဘၣ်တဲဘၣ်ယၤလၢတၢ်အ့ၣ်လိာ်ဆိးက့လိာ်အိၣ်လၢသုကျါလီၤ.
12ဒီးယစံးတၢ်အံၤ,သုစံးသုဝဲတဂၤဒီးတဂၤ,ယဲဒၣ်အံၤ,ယမ့ၢ်ပှၤဘၣ်ဃးဒီးစီၤပီလူး,ဒီးယဲဒၣ်အံၤ,ယမ့ၢ်ပှၤဘၣ်ဃးဒီးစီၤအပီးလိၤဒီးယဲဒၣ်အံၤ,ယမ့ၢ်ပှၤဘၣ်ဃးဒီးစီၤက့ၤဖး,ဒီးယဲဒၣ်အံၤ,ယမ့ၢ်ပှၤဘၣ်ဃးဒီးခရံာ်လီၤ.
13တၢ်လၢခရံာ်န့ၣ်လီၤဖးအသးဧါ,မ့ၢ်စီၤပီလူးဒိးသံအသးလၢထူၣ်စုညါအလိၤလၢသုဂီၢ်ဧါ.မ့ၢ်သုဒိးဘျၢသုသးဆူစီၤပီလူးအမံၤအပူၤဧါ.
14ယစံးထီၣ်ပတြၢၤယွၤအဘျုးအဖှိၣ်လၢယတဘျၢဘၣ်သုနီတဂၤဘၣ်,ယဘျၢထဲစီၤကြံစပူၤ,ဒီးစီၤကါယူးဧိၤ,
15ဒ်သိးပှၤသုတစံးလၢယဘျၢတၢ်လၢယမံၤဒၣ်ယဲအပူၤ,နီတဂၤတဂ့ၤန့ၣ်လီၤ.
16ဒီးယဘျၢစ့ၢ်ကီးစီၤစတ့းဖနၣ်အဟံၣ်ဖိလီၤ.လၢအဝဲန့ၣ်အမဲာ်ညါ,ယတသ့ၣ်ညါဘၣ်လၢယဘျၢပှၤဂုၤပှၤဂၤဘၣ်.
17အဂ့ၢ်ဒ်အံၤ,ဒ်သိးယကဘျၢတၢ်ဒီး,ခရံာ်တမၢဘၣ်ယၤဘၣ်.မ့ၢ်ဒ်သိးယကစံၣ်တဲၤတဲလီၤတၢ်သးခုကစီၣ်လီၤ.လၢတၢ်ကူၣ်သ့အတၢ်ကတိၤတမ့ၢ်ဘၣ်,ဒ်သိးခရံာ်အထူၣ်စုညါအသုတကဲလၢတၢ်ကလီကလီတဂ့ၤလီၤ.
18အဂ့ၢ်ဒ်အံၤ,ထူၣ်စုညါအတၢ်ကတိၤမ့ၢ်တၢ်ကလီကလီ,လၢပှၤလၢအဘၣ်တၢ်ဟးဂူာ်ဟးဂီၤအမဲာ်ညါ,ဘၣ်ဆၣ်ဒီးလၢပှၤလၢတၢ်အုၣ်က့ၤခီၣ်က့ၤ,ပဝဲဒၣ်အမဲာ်ညါ,မ့ၢ်ယွၤအစိအကမီၤလီၤ.
19အဂ့ၢ်ဒ်အံၤ,တၢ်ကွဲးအသး, ပှၤကူၣ်တၢ်သ့န့ၣ်,ယကမၤဟးဂီၤအတၢ်ကူၣ်သ့ဒီး ပှၤလၢအသူၣ်ဆးသးဆးန့ၣ်,ယကဒုးကဲထီၣ်အသူၣ်ဆးအသးဆးလၢတၢ်ကလီကလီလီၤ.
20ပှၤကူၣ်တၢ်သ့အိၣ်ဖဲလဲၣ်,ပှၤကွဲးလံာ်အိၣ်ဖဲလဲၣ်,ပှၤအအံၤတဃၣ်ဖိလၢအတီတၢ်ကတိၤသ့န့ၣ်,အိၣ်ဖဲလဲၣ်.ဟီၣ်ခိၣ်အတၢ်ကူၣ်သ့န့ၣ်,ယွၤမၤထီၣ်ဝဲလၢတၢ်တဂိာ်တသီၣ်ဘၣ်,တမ့ၢ်ဘၣ်ဧါ.
21အဂ့ၢ်ဒ်အံၤ,တုၤမ့ၢ်လၢယွၤအတၢ်ကူၣ်သ့အပူၤဒီး,ပှၤဟီၣ်ခိၣ်ဖိတသ့ၣ်ညါထီၣ်ဘၣ်ယွၤလၢအတၢ်ကူၣ်သ့ဘၣ်သတးဒီး,ဘၣ်ယွၤအသးလၢအကအုၣ်က့ၤခီၣ်က့ၤပှၤလၢအနာ်ဝဲတဖၣ်,လၢတၢ်စံၣ်တဲၤတဲလီၤအတၢ်ကလီကလီအဃိလီၤ.
22အဂ့ၢ်ဒ်အံၤ,ပှၤယူဒၤဖိဃ့တၢ်လီၤလး,ဒီးပှၤဟ့းလ့ၣ်ဖိဃုတၢ်ကူၣ်သ့,
23မ့မ့ၢ်ပဝဲဒၣ်အံၤ,ပစံၣ်တဲၤတဲလီၤခရံာ်ဒိးသံအသးလၢထူၣ်စုညါအလိၤ,လၢပှၤယူဒၤဖိအမဲာ်ညါ,တၢ်လီၤဃံၤအလီၢ်,ဒီးပှၤဟ့းလ့ၣ်ဖိအမဲာ်ညါ,တၢ်ကလီကလီလီၤ.
24ဘၣ်ဆၣ်ဒီးလၢပှၤဘၣ်တၢ်ကိးန့ၢ်အီၤ,ပှၤယူဒၤဖိမ့ၢ်ဂ့ၤ,ပှၤဟ့းလ့ၣ်ဖိမ့ၢ်ဂ့ၤအမဲာ်ညါ,ခရံာ်,(ဒ်ပစံးတၢ်အသိး)ယွၤအစိအကမီၤဒီးယွၤအတၢ်ကူၣ်သ့န့ၣ်လီၤ.
25အဂ့ၢ်ဒ်အံၤ,ယွၤအတၢ်ကလီကလီမ့ၢ်တၢ်ကူၣ်သ့န့ၢ်ပှၤကညီတက့ၢ်,ဒီးယွၤအတၢ်ဂံၢ်စၢ်ဘါစၢ်မ့ၢ်တၢ်ဂံၢ်ဆူၣ်ဘါဆူၣ်န့ၢ်ပှၤကညီတက့ၢ်လီၤ.
26အဂ့ၢ်ဒ်အံၤ,ဒီပုၢ်ဝဲၢ်သ့ၣ်ဧၢ,လၢတၢ်ကိးန့ၢ်သုန့ၣ်သုထံၣ်လၢပှၤကူၣ်တၢ်သ့,ဒ်တၢ်ဖံးတၢ်ညၣ်အသိးန့ၣ်တအါဘၣ်,ပှၤအိၣ်ဒီးအစိအကမီၤတအါဘၣ်,ပဒိၣ်အစၢၤအသွဲၣ်တအါဘၣ်.
27မ့ၢ်ယွၤဃုထၢတၢ်ကလီကလီလၢဟီၣ်ခိၣ်ချၢဒ်သိးအကမၤမဲာ်ဆှးပှၤကူၣ်တၢ်သ့,ဒီးယွၤဃုထၢတၢ်ဂံၢ်စၢ်ဘါစၢ်လၢဟီၣ်ခိၣ်ချၢဒ်သိးအကမၤမဲာ်ဆှးပှၤဂံၢ်ဆူၣ်ဘါဆူၣ်လီၤ.
28ဒီးယွၤဃုထၢတၢ်လၢအလၤအကပီၤတအိၣ်ဘၣ်လၢဟီၣ်ခိၣ်ချၢ,ဒီးတၢ်လၢပှၤတပးကဲဘၣ်အီၤ,ဒီးတၢ်လၢအတမ့ၢ်ဘၣ်တၢ်ဘၣ်တဖၣ်,ဒ်သိးအကမၤဟးဂီၤကွံာ်တၢ်လၢအမ့ၢ်တၢ်တဖၣ်,
29ဒ်သိးပှၤကညီသုတပာ်အသးကဖၢလၢယွၤအမဲာ်ညါနီတဂၤတဂ့ၤလီၤ.
30လၢအဝဲဒၣ်အဃိ,သုအိၣ်သုဆိးလၢခရံာ်အပူၤ,လၢအကဲထီၣ်လၢယွၤန့ၣ်လၢတၢ်ကူၣ်သ့,ဒီးတၢ်တီတၢ်လိၤ,ဒီးတၢ်စီဆှံ,ဒီးတၢ်ပှ့ၤက့ၤတၢ်လၢပဂီၢ်,
31ဒ်သိးတၢ်ကမၤအသးဒ်တၢ်ကွဲးအသးအသိးန့ၣ်,ပှၤလၢအပာ်အသးကဖၢလၢန့ၣ်,မ်အပာ်အသးကဖၢလၢလၢကစၢ်အပူၤတက့ၢ်.