Galatians 2
1အန့ၣ်အလီၢ်ခံတဆံလွံၢ်နံၣ်ပူၤကွံာ်ဒီး,ယလဲၤထီၣ်ကဒီးဆူယရူၤၡလ့ၣ်,အိၣ်ဒီးစီၤဘၢ်နါဘၤ,ဒီးယဟံးန့ၢ်စီၤတံတူးစ့ၢ်ကီးလီၤ.
2ဒီးယလဲၤထီၣ်လၢတၢ်လီၣ်ဖျါအဃိ,ဒီးတၢ်သးခုအကစီၣ်လၢယစံၣ်တဲၤတဲလီၤလၢပှၤကလုာ်တဖၣ်န့ၣ်,ယပာ်ဖျါထီၣ်လၢအမဲာ်ညါ,မ့မ့ၢ်လၢပှၤအိၣ်ဒီးအလၤကပီၤတဖၣ်အမဲာ်ညါကစုဒု,မ့တမ့ၢ်ဘၣ်ဒ်န့ၣ်ဒီး,ယဃ့ၢ်တ့ၢ်ဒီးယကဃ့ၢ်ဒံး,ကမ့ၢ်ဘၣ်ဖုးတၢ်ကလီကလီလီၤ.
3ဘၣ်ဆၣ်ဒီးတၢ်တမၢဘၣ်ပှၤဟ့းလ့ၣ်ဖိစီၤတံတူးအိၣ်ဒီးယၤ,ဒိးတၢ်ကူးတရံးဘၣ်.
4ဒီးအဝဲန့ၣ်မ့ၢ်လၢဒီပုၢ်ဝဲၢ်အဘျၣ်လၢအဟဲနုာ်ခူသူၣ်တဖၣ်အဃိ,အဝဲသ့ၣ်ဟဲနုာ်ကွၢ်ဟုၣ်ပတၢ်ထူၣ်ဖျဲးလၢအအိၣ်ဒီးပှၤလၢယ့ၣ်ရှူးခရံာ်အပူၤဒ်သိးအကမၢပကဲကုၢ်လီၤ.
5ဘၣ်ဆၣ်ဒီးလၢပကစူၢ်အကလုၢ်န့ၣ်ပတအၢၣ်လီၤအီလီၤဘၣ်အီၤထဲတနၣ်ရံၣ်ဧိၤဘၣ်.ဒ်သိးတၢ်သးခုအကစီၣ်အတၢ်မ့ၢ်တၢ်တီကအိၣ်ကဆိးဒီးသုလီၤ.
6မ့မ့ၢ်လၢပှၤလၢအလီၤဂာ်လၢအမ့ၢ်တၢ်တဖၣ်(မ့ၢ်တၢ်ဒ်လဲၣ်ဒ်လဲၣ်,တလီၤဆီဘၣ်ဒီးယၤဘၣ်,ယွၤတကွၢ်ဒိၣ်ဆံးအါစှၤဘၣ်ပှၤနီတဂၤဘၣ်),ပှၤလၢအလီၤဂာ်လၢအမ့ၢ်တၢ်တဖၣ်န့ၣ်,တမၤအါထီၣ်ယတၢ်နီတမံၤဘၣ်.
7အခိၣ်တလိာ်တုၤအထံၣ်လၢတၢ်ဟ့ၣ်လီၤယၤလၢတၢ်သးခုအကစီၣ်ဘၣ်ဃးဒီးတၢ်တကူးတရံးဘၣ်,ဒ်တၢ်ဘၣ်ဃးဒီးတၢ်ကူးတရံး,လၢစီၤပ့းတရူးအသိး,
8(အဂ့ၢ်ဒ်အံၤ,ပှၤလၢအမၤတၢ်လၢစီၤပ့းတရူးအပူၤလၢတၢ်မၢဖိအလီၢ်ဘၣ်ဃးဒီးတၢ်ကူးတရံးအဂီၢ်တဂၤ,မၤစ့ၢ်ကီးတၢ်လၢယပူၤလၢပှၤကလုာ်တဖၣ်အဂီၢ်လီၤ.)
9ဒီးတုၤအသ့ၣ်ညါတၢ်အဘျုးအဖှိၣ်လၢတၢ်ဟ့ၣ်လီၤယၤသတးဒီး,စီၤယၤကိာ်ဒီးစီၤက့ၤဖးဒီးစီၤယိၤဟၣ်သ့ၣ်တဖၣ်လၢအလီၤဂာ်ထူၣ်တဖၣ်န့ၣ်,ဟ့ၣ်လီၤယၤဒီးစီၤဘၢ်နါဘၤလၢအစုထွဲဘၣ်ဃးဒီးတၢ်ရ့လိာ်,ဒ်သိးပကလဲၤပဝဲဆူပှၤကလုာ်တဖၣ်အအိၣ်,ဒီးအဝဲသ့ၣ်ဆူပှၤဒိးတၢ်ကူးတရံးအအိၣ်လီၤ.
10ဘၣ်အသးထဲလၢပကသ့ၣ်နီၣ်ထီၣ်က့ၤပှၤဖှီၣ်ဖိယာ်ဖိတမံၤဧိၤလီၤ.ဒီးတၢ်န့ၣ်တမံၤဒၣ်လဲာ်မ့ၢ်တၢ်လၢယဂုာ်မၤတ့ၢ်သပှၢ်ပှၢ်လီၤ.
11ဘၣ်ဆၣ်ဒီးတုၤစီၤပ့းတရူးဟဲဆူအၣ်တံၤအီာ်ဒီး,ယဂ့ၢ်လိာ်ဘှီလိာ်အီၤလၢအမဲာ်သၣ်ပူၤလီၤ.အဂ့ၢ်ဒ်အံၤ,ပာ်တၢ်ကမၣ်လၢအလိၤအလီၢ်အိၣ်လီၤ.
12အဂ့ၢ်ဒ်အံၤ,တချုးပှၤတနီၤနီၤဟဲလၢစီၤယၤကိာ်အအိၣ်ဒီး,အဝဲဒၣ်အီၣ်ဃုာ်တၢ်ဒီးပှၤကလုာ်တဖၣ်လီၤ.မ့မ့ၢ်တုၤအဝဲသ့ၣ်ဟဲတုၤဒီး,ပျံၤပှၤဒိးတၢ်ကူးတရံးဒီးဂုၤက့ၤအသး,ဒီးမၤလီၤဖးအသးလီၤ.
13ဒီးပှၤယူဒၤဖိအဂၤတဖၣ်လီဃုာ်တၢ်စ့ၢ်ကီးဒီးအီၤတုၤစီၤဘၢ်နါဘၤဒၣ်လဲာ်လဲၤဃုာ်ဒီးအီၤလၢအလီတၢ်အပူၤလီၤ.
14မ့မ့ၢ်တုၤယထံၣ်လၢပှၤတဖၣ်တလဲၤစၢၢ်ဆၢဘၣ်ဒီးတၢ်သးခုအကစီၣ်အတၢ်မ့ၢ်တၢ်တီဘၣ်ဒီး,ယစံးဘၣ်စီၤပ့းတရူးလၢပှၤခဲလၢာ်အမဲာ်ညါ,ပှၤယူဒၤဖိတဂၤနဲဒၣ်အံၤ,နမ့ၢ်တိၢ်န့ၢ်ပှၤကလုာ်တဖၣ်အလုၢ်အလၢ်,ဒီးတတိၢ်န့ၢ်ဘၣ်ပှၤယူဒၤဖိအလုၢ်အလၢ်ဘၣ်ဒီး,ဘၣ်မနုၤလၢနမၢဆူၣ်ပှၤကလုာ်တဖၣ်မၤဒ်ပှၤယူဒၤဖိအသိးလဲၣ်.
15ပှၤလၢအတမ့ၢ်ဘၣ်ပှၤတၢ်ဒဲးဘးဖိဘၣ်ဃးဒီးပှၤကလုာ်တဖၣ်,ပှၤယူဒၤဖိပဝဲဒၣ်အံၤ,
16ပသ့ၣ်ညါလၢပှၤကညီတဘၣ်တၢ်ပာ်တီပာ်လိၤလၢတၢ်မၤဘၣ်ဃးဒီးတၢ်သိၣ်တၢ်သီဘၣ်.မ့ၢ်လၢတၢ်နာ်ဘၣ်ဃးဒီးယ့ၣ်ရှူးခရံာ်လီၤ.ဒီးပဝဲဒၣ်အံၤ,ပစူၢ်က့ၤနာ်က့ၤယ့ၣ်ရှူးခရံာ်ဒ်သိးပကဘၣ်တၢ်ပာ်တီပာ်လိၤပှၤလၢတၢ်နာ်ဘၣ်ဃးဒီးခရံာ်,ဒီးတမ့ၢ်ဘၣ်လၢတၢ်မၤဘၣ်ဃးဒီးတၢ်သိၣ်တၢ်သီဘၣ်လီၤ.အဂ့ၢ်ဒ်အံၤ,တၢ်ညၣ်တဘၣ်တၢ်ပာ်တီပာ်လိၤလၢတၢ်မၤဘၣ်ဃးဒီးတၢ်သိၣ်တၢ်သီနီတဂၤဘၣ်.
17ဘၣ်ဆၣ်ဒီးပဃုတၢ်ပာ်တီပာ်လိၤပှၤလၢခရံာ်အပူၤအဖၢမုၢ်ဒီး,တၢ်မ့ၢ်ထံၣ်န့ၢ်ပှၤလၢပှၤတၢ်ဒဲးဘးဖိဒီး,ခရံာ်မ့ၢ်တၢ်ဒဲးဘးအခ့အပှၤန့ၣ်ဧါ,မ်အသုတမၤအသးဒ်န့ၣ်တဂ့ၤ.
18အဂ့ၢ်ဒ်အံၤ,တၢ်လၢယမၤလီၤပှီၢ်အီၤတဖၣ်န့ၣ်,ယမ့ၢ်မၤထီၣ်က့ၤကဒီးအီၤဒီး,ယမၤဖျါထီၣ်ယသးလၢပှၤမၤကမၣ်တၢ်ဖိလီၤ.
19အဂ့ၢ်ဒ်အံၤ,မ့ၢ်တၢ်သိၣ်တၢ်သီသတးဒီး,ယသံသဒၣ်ကွံာ်တၢ်သိၣ်တၢ်သီဒ်သိးယကမူထီၣ်လၢယွၤအဂီၢ်လီၤ.
20ယဒိးသံဃုာ်လံယသးလၢထူၣ်စုညါအလိၤဒီးခရံာ်န့ၣ်လံ,ဘၣ်ဆၣ်ဒီးယမူလီၤ.ဘၣ်ဆၣ်တမ့ၢ်လၢၤဘၣ်ယၤဘၣ်,မ့ၢ်ခရံာ်မူလၢယပူၤလီၤ.ဒီးတၢ်လၢယမူလၢတၢ်ဖံးတၢ်ညၣ်အပူၤခဲကနံၣ်အံၤ,မ့ၢ်ယမူလၢတၢ်နာ်ဘၣ်ဃးဒီးယွၤအဖိခွါတဂၤ,လၢအအဲၣ်ယၤဒီးဟ့ၣ်လီၤကွံာ်အသးလၢယဂီၢ်လီၤ.
21ယတမၤဘၣ်ယွၤအဘျုးအဖှိၣ်လၢတၢ်ကလီကလီဘၣ်.အဂ့ၢ်ဒ်အံၤ,ပှၤမ့ၢ်ဘၣ်တၢ်ပာ်တီပာ်လိၤအီၤလၢတၢ်သိၣ်တၢ်သီဒီး,ခရံာ်ဒိးသံအသးကလီကလီလီၤ.