Joshua 16
1ဒီးစီၤယိၤသးအဖိအဂီၢ်န့ၣ်လီၤဘၣ်လၢယၢ်ဒ့ၣ်လၢယရံၤဃိအဃၢၤလၢထံယရံၤဃိ,လၢမုၢ်ထီၣ်တခီ,ပၢၢ်လၢပှၢ်မုၢ်ကနၢလၢအလဲၤထီၣ်ဝဲလၢယရံၤဃိဆူကစၢၢ်ဘ့ၤသ့လးဒီဖျၢၣ်ညါ,
2ဒီးလဲၤထီၣ်လၢဘ့ၤသ့းလးပၢၢ်လၢလူးစး,ဒီးလဲၤတၢ်ဆူအၢ်ကံအဃၢၤပၢၢ်လၢဧးတၤရိး,
3ဒီးလဲၤလီၤလၢမုၢ်နုာ်တခီဆူယးဖလံတံၤပၢၢ်လၢဘ့ၤသဃိရိၣ်လၢလာ်ခီ,ဒီးက့စ့ၢ်,ဒီးဟးထီၣ်ဝဲန့ၣ်ဖဲပီၣ်လဲၣ်နံၤလီၤ.
4ဒီးစီၤယိၤသးအဖိခွါစီၤမနၤရှ့ၤ,ဒီးစီၤအ့ဖရဲၣ်ဟံးန့ၢ်ဝဲအတၢ်န့ၢ်သါလီၤ.
5ဒီးအအံၤမ့ၢ်စီၤအ့ဖရဲၣ်အဖိအကီၢ်ဃၢၤ,ဒ်အဟံၣ်တဖၣ်အသိးန့ၣ်အတၢ်န့ၢ်သါအဃၢၤလၢမုၢ်ထီၣ်တခီန့ၣ်မ့ၢ်ဧးတၤရိးအးဒၤပၢၢ်လၢဘ့ၤသဃိရိၣ်လၢထးခီ,
6ဒီးကီၢ်အဃၢၤန့ၣ်ဟးထီၣ်ဆူပီၣ်လဲၣ်နံၤ,ဆူမံးကမသၤလၢကလံၤစိးတခီ,ဒီးကီၢ်အဃၢၤန့ၣ်ဃၣ်အသးဆူမုၢ်ထီၣ်တခီ,ဆူတၤနးၡံလိၤ,ဒီးလဲၤပူၤကွံာ်အီၤလၢမုၢ်ထီၣ်တခီဆူယၤနိဃၤ,
7ဒီးလဲၤလီၤလၢယၤနိဃၤဆူဧးတၤရိး,ဒီးဆူနၤရး,ဒီးဘၣ်လၢယရံၤဃိ,ဒီးဟးထီၣ်ကွံာ်လၢယၢ်ဒ့ၣ်န့ၣ်လီၤ.
8ကီၢ်အဃၢၤန့ၣ်ဟးထီၣ်ကွံာ်လၢတးပူၤလၢမုၢ်နုာ်တခီဆူထံကျိကါနၤ,ဒီးဟးထီၣ်ကွံာ်ဝဲဖဲန့ၣ်ဖဲပီၣ်လဲၣ်နံၤလီၤ.အဝဲန့ၣ်မ့ၢ်ပှၤအ့ဖရဲၣ်ဖိတဒူၣ်အတၢ်န့ၢ်သါ,ဒ်အဟံၣ်တဖၣ်အသိးန့ၣ်လီၤ.
9ဒီးဝ့ၢ်လၢအလီၤဖးလၢအ့ဖရဲၣ်ဖိအဂီၢ်န့ၣ်အိၣ်ဝဲလၢပှၤမနၤရှ့ၤဖိအတၢ်န့ၢ်သါအပူၤန့ၣ်,ဝ့ၢ်ခဲလၢာ်န့ၣ်အိၣ်ဒီးအတဝီတဖၣ်လီၤ.
10ဒီးတဟီထီၣ်ကွံာ်ဘၣ်ပှၤကနၤဧၣ်ဖိလၢအအိၣ်ဝဲလၢက့စ့ၢ်အပူၤဘၣ်,ဒီးပှၤကနၤဧၣ်ဖိအိၣ်ဝဲဆိးဝဲလၢပှၤအ့ဖရဲၣ်ဖိအကျါတုၤမုၢ်မဆါတနံၤအံၤလီၤ.ဒီးမၤအတၢ်,ဒီးဟ့ၣ်သွဲလီၤ.