Joshua 18
1ဒီးပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်အိၣ်ဖှိၣ်ရိဖှိၣ်ဖဲၡံလိၤ,ဒီးသူၣ်တၢ်အိၣ်ဖှိၣ်အဒဲဖဲန့ၣ်,ဒီးပှၤကီၢ်ဖိန့ၣ်ဘၣ်တၢ်မၤနၢၤမၤဃၣ်လၢအမဲာ်ညါလီၤ.
2ဒီးပှၤလၢအတန့ၢ်ဒံးဘၣ်တၢ်န့ၢ်သါန့ၣ်ပှၤနွံဒူၣ်အိၣ်လီၤတဲာ်ဝဲလၢပှၤအံၣ်စရ့လးဖိအကျါလီၤ.
3ဒီးစီၤယိၤရှူစံးဘၣ်ပှၤအံၣ်စရ့လးဖိန့ၣ်,သုကပာ်စၢ်သုဂံၢ်သုဘါလၢသုတမၤန့ၢ်ထံဧိၤကီၢ်ဧိၤလၢယွၤသုပၢ်အကစၢ်ဟ့ၣ်လီၤသုန့ၣ်ဆံးယံာ်လဲၣ်.
4ဟ့ၣ်ယၤလၢသုကျါလၢပှၤတဒူၣ်သၢဂၤ,ပှၤတဒူၣ်သၢဂၤတက့ၢ်,ဒီးယကမၢလီၤအီၤ,ဒီးကဂဲၤဆၢထၢၣ်ဒီးလဲၤတၢ်လၢကီၢ်ဒီဘ့ၣ်ညါအပူၤ,ဒီးကွဲးတၢ်လၢအဂ့ၢ်အကျိၤဒ်အတၢ်န့ၢ်သါအသိး,ဒီးကဟဲက့ၤကဒါက့ၤဆူယအိၣ်လီၤ.
5ဒီးကနီၤဖးအီၤလၢနွံပူလီၤ.ယူဒၤဘၣ်အိၣ်လၢအဃၢၤလၢကလံၤထံးတခီ,ဒီးစီၤယိၤသးအပှၤဟံၣ်ဖိဘၣ်အိၣ်လၢအဃၢၤလၢကလံၤစိးတခီလီၤ.
6ဒီးသုဘၣ်ကွဲးတၢ်လၢကီၢ်အဂ့ၢ်အကျိၤလၢနွံပူ,ဒီးဟဲစိာ်ဖဲအံၤဆူယအိၣ်,ဒီးယကဖးတၢ်ဖဲအံၤ,လၢသုဂီၢ်လၢယွၤပကစၢ်အမဲာ်ညါလီၤ.
7မ့မ့ၢ်ပှၤလ့ၤဝံဖိအဂီၢ်တအိၣ်ဘၣ်လၢသုကျါဘၣ်.အဂ့ၢ်ဒ်အံၤ,ပှၤလုၢ်တၢ်အဒိၣ်အလီၢ်န့ၣ်မ့ၢ်အတၢ်န့ၢ်သါလီၤ.ဒီးကး,ဒီးရူၤဘ့ၣ်,ဒီးမနၤရှ့ၤတခီဒူၣ်န့ၣ်န့ၢ်ဘၣ်လံအတၢ်န့ၢ်သါလၢယၢ်ဒ့ၣ်ဝၢ်ဘးခီလၢမုၢ်ထီၣ်တခီ,လၢယွၤအခ့အပှၤစီၤမိၤရှ့ဟ့ၣ်လီၤအီၤလီၤ.
8ဒီးပှၤတဖၣ်န့ၣ်ဂဲၤဆၢထၢၣ်,ဒီးလဲၤတၢ်(ဒီးစီၤယိၤရှူမၤလိာ်တ့ၢ်ပှၤလၢအလဲၤတၢ်တဖၣ်,လၢအကကွဲးဟီၣ်ခိၣ်အဂ့ၢ်အကျိၤ,ဒီးစံးဝဲဒၣ်,လဲၤဟးဝ့ၤဝီၤလၢထံဧိၤကီၢ်ဧိၤအပူၤ,ဒီးကွဲးတၢ်လၢအဂ့ၢ်အကျိၤ,ဒီးဟဲက့ၤကဒါက့ၤဆူယအိၣ်တက့ၢ်.ဒီးယကဖးတၢ်ဖဲအံၤလၢသုဂီၢ်လၢယွၤအမဲာ်ညါလၢၡံလိၤအပူၤလီၤ.)
9ဒီးပှၤတဖၣ်န့ၣ်လဲၤတၢ်,ဒီးခီဂာ်ထံဧိၤကီၢ်ဧိၤ,ဒီးကွဲးဝဲဒ်အဝ့ၢ်တဖၣ်အိၣ်ဝဲအသိးလၢနွံပူလၢလံာ်ပူၤ,ဒီးဟဲက့ၤကဒါက့ၤဆူစီၤယိၤရှူအအိၣ်လၢပှၤသူၣ်ဒဲအလီၢ်လၢၡံလိၤအပူၤလီၤ.
10ဒီးစီၤယိၤရှူဖးတၢ်လၢအဂီၢ်လၢၡံလိၤအပူၤလၢယွၤအမဲာ်ညါလီၤ.ဒီးစီၤယိၤရှူနီၤဖးထံဧိၤကီၢ်ဧိၤလၢပှၤအံၣ်စရ့လးဖိအဂီၢ်,ဒ်တၢ်နီၤဖးအသိးန့ၣ်လီၤ.
11ပှၤဘံၣ်ယၤမံၣ်ဖိတဒူၣ်အတၢ်ဖးလၢအဂီၢ်န့ၣ်ဟဲထီၣ်ဒ်အဟံၣ်တဖၣ်အသိးန့ၣ်,ဒီးအတၢ်ဖးလၢအဂီၢ်အကီၢ်ဃၢၤဟဲထီၣ်လၢယူဒၤဖိဒီးယိၤသးဖိအဘၢၣ်စၢၤလီၤ.
12ဒီးအကီၢ်ဃၢၤလၢကလံၤစိးတခီအိၣ်ဝဲလၢယၢ်ဒ့ၣ်,ဒီးကီၢ်အဃၢၤန့ၣ်လဲၤထီၣ်ဆူယရံၤဃိအဃၢၤလၢကလံၤစိးတခီ,ဒီးလဲၤထီၣ်ဘးကစၢၢ်ကလိလၢမုၢ်နုာ်တခီ,ဒီးဟးထီၣ်ကွံာ်ဝဲန့ၣ်ဖဲပှၢ်မုၢ်ကနၢဘ့ၤသအၤဝ့ၣ်,
13ဒီးကီၢ်အဃၢၤန့ၣ်ခီဂာ်တၢ်ဖဲန့ၣ်ဆူလူးစးအဃၢၤလၢကလံၤထံးတခီ,(အဝဲန့ၣ်မ့ၢ်ဘ့ၤသ့လး)ဒီးကီၢ်အဃၢၤန့ၣ်လဲၤလီၤဆူဧးတၤရိးအးဒၢ်လၢကစၢၢ်တဖျၢၣ်အိၣ်လၢဘ့ၤသဃိရိၣ်လၢလာ်ခီတဝ့ၢ်လၢကလံၤထံးတခီလီၤ.
14ဒီးတၢ်ထိၣ်ကီၢ်အဃၢၤ,ဒီးလဲၤတရံးပီၣ်လဲၣ်အနၢၣ်လၢကလံၤထံးတခီ,လၢကစၢၢ်တဖျၢၣ်လၢအအိၣ်လၢဘ့ၤသဃိရိၣ်အမဲာ်ညါလၢကလံၤထံးတခီ,ဒီးဟးထီၣ်ကွံာ်ဝဲန့ၣ်ဖဲကံးရယးဘဧၤလး,(အဝဲန့ၣ်မ့ၢ်ကံးရယးယဧၤရံၣ်)ပှၤယူဒၤဖိအဝ့ၢ်တဝ့ၢ်လီၤ.အဝဲန့ၣ်မ့ၢ်လၢမုၢ်နုာ်တခီလီၤ.
15ဒီးကလံၤထံးတခီန့ၣ်အိၣ်ဝဲလၢကံးရယးယဧၤရံၣ်အကတၢၢ်,ဒီးကီၢ်အဃၢၤန့ၣ်ဟးထီၣ်ကွံာ်ဆူမုၢ်နုာ်တခီ,ဒီးလဲၤတၢ်ဆူန့ဖတိၤအထံထီၣ်ပၢၢ်တဖၣ်အအိၣ်,
16ဒီးကီၢ်အဃၢၤန့ၣ်ဟဲလီၤလၢကစၢၢ်တဖျၢၣ်အကတၢၢ်လၢအအိၣ်လၢစီၤဟံၣ်နိၣ်အဖိခွါအကစၢၢ်ကဆူးအမဲာ်ညါ,လၢအအိၣ်လၢပှၤနီၢ်ဒိၣ်ဖိအကစၢၢ်ကဆူးအပူၤလၢကလံၤစိးတခီ,ဒီးလဲၤလီၤဆူကစၢၢ်ကဆူးဟံၣ်နိၣ်,လၢယဘူၣ်အဃၢၤလၢကလံၤထံးတခီ,ဒီးလဲၤလီၤဆူဧ့ၣ်ရိၤက့လးလီၤ.
17ဒီးတၢ်ထိၣ်လၢကလံၤစိးတခီ,ဒီးလဲၤထီၣ်ဝဲဆူဧ့ၣ်ရှ့မ့ၣ်,ဒီးလဲၤထီၣ်ဆူကလံလိးလၢအအိၣ်သဃီၤဒီးတၢ်လဲၤထီၣ်ဆူအဒူမ့ၣ်,ဒီးလဲၤလီၤလၢစီၤရူၤဘ့ၣ်အဖိခွါစတိဟၣ်အလၢၢ်တဖျၢၣ်အအိၣ်,
18ဒီးလဲၤတၢ်လၢအဃၢၤလၢအအိၣ်သဃီၤဒီးဧၤရဘၤလၢကလံၤစိးတခီ,ဒီးလဲၤလီၤဆူဧၤရဘၤလီၤ.
19ဒီးကီၢ်အဃၢၤန့ၣ်လဲၤတၢ်ဆူဘ့ၤသဃါကလၤအဃၢၤလၢကလံၤစိးတခီ,ဒီးဟးထီၣ်ကွံာ်ဝဲဖဲန့ၣ်ဖဲပီၣ်လဲၣ်အံသၣ်အသနၢၣ်လၢကလံၤစိးတပူၤလၢယၢ်ဒ့ၣ်ကလံၤထံးတခီလီၤ.အဝဲန့ၣ်မ့ၢ်ကီၢ်အဃၢၤလၢကလံၤထံးတခီလီၤ.
20ဒီးယၢ်ဒ့ၣ်မ့ၢ်ကီၢ်အဃၢၤလၢမုၢ်ထီၣ်တခီလီၤ.အဝ့ၢ်န့ၣ်မ့ၢ်ပှၤဘံၣ်ယၤမံၣ်ဖိအတၢ်န့ၢ်သါ,ဒ်အကီၢ်အဃၢၤတဖၣ်အိၣ်ဝးတရံးဝဲအသိး,ဒ်အဟံၣ်တဖၣ်အသိးန့ၣ်လီၤ.
21ဒီးပှၤဘံၣ်ယၤမံၣ်ဖိတဒူၣ်အဝ့ၢ်တဖၣ်,ဒ်ဒူၣ်တဖၣ်အသိးန့ၣ်,မ့ၢ်ယရံၤဃိ,ဒီးဘ့ၤသဃါကလၤ,ဒီးကစံးအကစၢၢ်ကဆူး,
22ဒီးဘ့ၤသဧါရဘၤ,ဒီးစမၤရဲၣ်,ဒီးဘ့ၤသ့လး,
23ဒီးဧၤဝံၣ်,ဒီးပါရၤ,ဒီးဧိၤဖြၤ
24ဒီးကဖၢ်ဧမိနဲ,ဒီးဧိးဖနံၤ,ဒီးက့ဘၤလီၤ.ဝ့ၢ်တဆံခံဝ့ၢ်အိၣ်ဒီးအတဝီတဖၣ်လီၤ.
25ကံးဘိၣ်,ဒီးရၤမါ,ဒီးတအ့ရိး,
26ဒီးမံးစပၤ,ဒီးကဖံရၤ,ဒီးမိစၤ,
27ဒီးရ့က့ၣ်,ဒီးယံရဖၤအ့လး,ဒီးတၤရါလး,
28ဒီးစ့လၤ,ဒီးအ့လ့ာ်,ဒီးယဘူၣ်,(အဝဲန့ၣ်မ့ၢ်ယရူၤၡလ့ၣ်),ကံဘဧး,ဒီးကံးရယးန့ၣ်လီၤ.ဝ့ၢ်တဆံလွံၢ်ဝ့ၢ်အိၣ်ဒီးအတဝီတဖၣ်လီၤ.အဝဲန့ၣ်မ့ၢ်ပှၤဘံၣ်ယၤမံၣ်ဖိအတၢ်န့ၢ်သါ,ဒ်အဟံၣ်တဖၣ်အသိးန့ၣ်လီၤ.