Deuteronomy 6
1ဒီးအအံၤမ့ၢ်တၢ်မၤလိာ်,ဒီးတၢ်သိၣ်တၢ်သီ,ဒီးတၢ်စံၣ်ညီၣ်လၢယွၤသုကစၢ်မၤလိာ်လၢယကသိၣ်လိသု,ဒ်သိးသုကတိၢ်န့ၢ်အီၤလၢကီၢ်ပူၤဖဲသုလဲၤမၤန့ၢ်အီၤ,
2ဒ်သိးနကပျံၤယွၤနကစၢ်လၢနကတိၢ်န့ၢ်ကယဲၢ်အတၢ်သိၣ်တၢ်သီ,ဒီးအတၢ်မၤလိာ်လၢယမၤလိာ်နၤ,နဲဒၣ်,ဒီးနဖိခွါ,ဒီးနဖိခွါအဖိခွါ,တစိၤဒၣ်နၤ,ဒီးလၢမုၢ်နံၤတဖၣ်ကထီထီၣ်အဂ့ၢ်လီၤ.
3ဒိကနၣ်,အံၣ်စရ့လးဧၢ,ဒီးတိၢ်န့ၢ်ဒ်သိးသုကမၤအီၤ,ဒ်သိးတၢ်ကဂ့ၤထီၣ်လၢနဂီၢ်,ဒီးဒ်သိးသုကအါထီၣ်ဒိၣ်ဒိၣ်ကလဲာ်,ဒ်ယွၤနပၢ်တဖၣ်အကစၢ်စံးပာ်နၤအသိးလၢကီၢ်ပူၤလၢအယွၤဝဲဒီးတၢ်နုၢ်ထံ,ဒီးကနဲစီလီၤ.
4ကနၣ်တက့ၢ်,အံၣ်စရ့လးဧၢ,ယွၤပကစၢ်န့ၣ်မ့ၢ်ယွၤတဂၤဃီလီၤ.
5ဒီးနဘၣ်အဲၣ်ယွၤနကစၢ်လၢနသူၣ်ကံၢ်သးလဲ,ဒီးနသးဒီဖျၢၣ်ညါဒီးနဂံၢ်နဘါခဲလၢာ်လီၤ.
6ဒီးတၢ်ကတိၤတဖၣ်န့ၣ်လၢယမၤလိာ်နၤလၢမုၢ်မဆါတနံၤအံၤဘၣ်အိၣ်လၢနသးကံၢ်ပူၤန့ၣ်လီၤ.
7ဒီးနဘၣ်သိၣ်က့ၤသီက့ၤနဖိနလံၤလၢအီၤ,ဒီးတုၤနဆ့ၣ်နီၤလၢနဟံၣ်ပူၤ,ဒီးတုၤနပိာ်ကျဲ,ဒီးတုၤနမံလီၤ,ဒီးတုၤနဂဲၤဆၢထၢၣ်ဒီး,နဘၣ်ကတိၤတၢ်လၢအဂ့ၢ်အကျိၤလီၤ.
8နဘၣ်ကံၢ်နစုဒီးအီၤလၢတၢ်ပနီၣ်အဂီၢ်,ဒီးကဟဲထီၣ်တၢ်အဘိလၢနမဲာ်အဘၢၣ်စၢၤလီၤ.
9ဒီးနဘၣ်ကွဲးအီၤလၢနဟံၣ်ထူၣ်အလိၤ,ဒီးလၢနတြဲၤအလိၤလီၤ.
10ဒီးတၢ်ကမၤအသးဖဲယွၤနကစၢ်ကဒုးလဲၤနုာ်နၤဆူကီၢ်ပူၤလၢအဆိၣ်တၢ်ဒီးနပၢ်တဖၣ်,ဒီးစီၤအၤဘြၤဟၣ်,ဒီးစီၤအံၤစဲး,ဒီးစီၤယၤကိာ်လၢအကဟ့ၣ်လီၤနၤ,ဝ့ၢ်တဖၣ်ဒိၣ်ဝဲ,ဒီးဂ့ၤဝဲ,လၢနတတ့ဘၣ်.
11ဒီးဟံၣ်တဖၣ်ပှဲၤဒီးတၢ်ဂ့ၤလၢနတမၤပှဲၤဘၣ်.ဒီးထံပူၤခူၣ်လီၤအသးလၢနတခူၣ်လီၤဘၣ်,ဒီးစပံးအလီၢ်,ဒီးသ့ၣ်စၤယံးလၢနတသူၣ်ဘၣ်,တုၤနအီၣ်ဒီးဘျဲးအီၣ်ဒီး,
12တုၤနုၤတစုပလီၢ်နသးဒ်သိးနသုတသးပ့ၤနီၣ်ယွၤလၢအဒုးဟးထီၣ်ကွံာ်နၤလၢကီၢ်အဲၤကူပတူးအပူၤ,လၢပှၤကုၢ်ဖိအဟံၣ်ပူၤတဂ့ၤန့ၣ်တက့ၢ်.
13နဘၣ်ပျံၤယွၤနကစၢ်,ဒီးမၤအတၢ်,ဒီးဆိၣ်တၢ်လၢအမံၤလီၤ.
14သုတလဲၤပိာ်ကစၢ်အဂၤတဖၣ်အခံ,ပှၤဂီၢ်မုၢ်လၢအအိၣ်ဝးတရံးသုအကစၢ်တဖၣ်န့ၣ်တဂ့ၤ.
15(အဂ့ၢ်ဒ်အံၤ,ယွၤနကစၢ်န့ၣ်မ့ၢ်ကစၢ်လၢအသးက့ၣ်တၢ်တဂၤလၢသုကျါ,)ယွၤနကစၢ်အသးထီၣ်ကကဲၤထီၣ်ဘၣ်ဖုးနၤ,ဒီးကမၤဟးဂီၤဘၣ်ဖုးနၤလၢဟီၣ်ခိၣ်ချၢလီၤ.
16သုတလ့ပစီယွၤသုကစၢ်,ဒ်သုလ့ပစီအီၤလၢမးစၤအပူၤအသိးန့ၣ်တဂ့ၤ.
17သုဘၣ်တိၢ်န့ၢ်သပှၢ်တၢၢ်ယွၤသုကစၢ်အတၢ်မၤလိာ်,ဒီးအတၢ်အုၣ်အသး,ဒီးအတၢ်သိၣ်တၢ်သီလၢအမၤလိာ်တ့ၢ်နၤလီၤ.
18ဒီးနဘၣ်မၤတၢ်လၢအတီ,ဒီးအဂ့ၤလၢယွၤအမဲာ်ညါ,ဒ်သိးတၢ်ကဂ့ၤထီၣ်လၢနဂီၢ်ဒီးဒ်သိးနကလဲၤနုာ်,ဒီးမၤန့ၢ်ကီၢ်အဂ့ၤလၢယွၤဆိၣ်တၢ်ဒီးနပၢ်တဖၣ်,
19လၢအကဟီထီၣ်ကွံာ်နဒုၣ်နဒါခဲလၢာ်လၢနမဲာ်ညါ,ဒ်ယွၤကတိၤတၢ်အသိးန့ၣ်လီၤ.
20တုၤနဖိခွါကသံကွၢ်နၤခဲကိာ်,ဒီးစံး,တၢ်အုၣ်အသး,ဒီးတၢ်မၤလိာ်,ဒီးတၢ်စံၣ်ညီၣ်လၢယွၤမၤလိာ်သုန့ၣ်မ့ၢ်ဒ်လဲၣ်န့ၣ်ဒီး,
21နဘၣ်စံးဆၢနဖိခွါ,ပမ့ၢ်တ့ၢ်ဖၤရိၤအကုၢ်အပှၤတဖၣ်လၢအဲၤကူပတူးအပူၤ,ဒီးယွၤဒုးဟးထီၣ်ကွံာ်ပှၤလၢအဲၤကူပတူးဒီးအစုဆူၣ်လီၤ.
22ဒီးယွၤဟ့ၣ်လီၤတၢ်အပနီၣ်လီၤလးဒီးတၢ်လီၤလိၢ်လီၤလးလၢအဒိၣ်အအါန့ၣ်လၢအဲၤကူပတူးအဖီခိၣ်လၢဖၤရိၤအလိၤ,ဒီးလၢအပှၤဟံၣ်ဖိအလိၤန့ၣ်လၢပမဲာ်ညါလီၤ.
23ဒီးဒုးဟးထီၣ်ကွံာ်ပှၤဖဲန့ၣ်ဒ်သိးအကဒုးလဲၤနုာ်ပှၤ,ဒ်သိးအကဟ့ၣ်လီၤပှၤလၢထံဧိၤကီၢ်ဧိၤလၢအဆိၣ်တၢ်ဒီးပပၢ်တဖၣ်လၢအဂ့ၢ်အကျိၤလီၤ.
24ဒီးယွၤမၤလိာ်ပှၤဒ်သိးပကတိၢ်န့ၢ်တၢ်မၤလိာ်တဖၣ်အံၤခဲလၢာ်,ဒ်သိးပကပျံၤယွၤပကစၢ်လၢပတၢ်ဂ့ၤအဂီၢ်,ဒ်သိးအကဒုးမူဒံးပှၤတဘိယူၢ်ဃီ,ဒ်လၢမုၢ်မဆါတနံၤအံၤအသိးန့ၣ်လီၤ.
25ဒီးပမ့ၢ်ပလီၢ်ပသးဒ်သိးပကတိၢ်န့ၢ်ကယဲၢ်တၢ်မၤလိာ်ခဲလၢာ်လၢယွၤအမဲာ်ညါ,ဒ်အမၤလိာ်ပှၤအသိးဒီး,ကကဲထီၣ်တၢ်တီတၢ်လိၤလၢပဂီၢ်လီၤ.