Deuteronomy 20
1တုၤနလဲၤထီၣ်ဒုးသုးဒီးနဒုၣ်နဒါ,ဒီးနထံၣ်ဘၣ်ကသ့ၣ်,ဒီးလ့ၣ်ကဟၣ်,ပှၤဂီၢ်မုၢ်အါန့ၢ်နၤတက့ၢ်ဒီး,ပျံၤအီၤတဂ့ၤ.အဂ့ၢ်ဒ်အံၤ,ယွၤနကစၢ်အိၣ်ဒီးနၤ,လၢအဒုးဟးထီၣ်ကွံာ်နၤလၢကီၢ်အဲၤကူပတူးအပူၤလီၤ.
2ဒီးတုၤနလဲၤဘူးဒီးတၢ်ဒုးသုးဒီး,တၢ်ကမၤအသးလၢပှၤလုၢ်တၢ်အဒိၣ်ဘၣ်သုးဘူးအသးဒီးကတိၤတၢ်ဒီးပှၤဂီၢ်မုၢ်လီၤ.
3ဒီးဘၣ်စံးဘၣ်အီၤ,အံၣ်စရ့လးဧၢ,ကနၣ်တက့ၢ်.လၢမုၢ်မဆါတနံၤအံၤသုလဲၤဒုးသုးဒီးသုဒုၣ်သုဒါလီၤ.မ်သုသးအဂံၢ်အဘါသုတစၢ်လီၤတဂ့ၤ,ပျံၤတၢ်တဂ့ၤ,ကနိးတဂ့ၤ,ဘၣ်ယိၣ်တၢ်လၢအဃိတဂ့ၤ,
4အဂ့ၢ်ဒ်အံၤ,ယွၤသုကစၢ်မ့ၢ်ပှၤလၢအလဲၤတၢ်ဒီးသု,ဒ်သိးအကဒုးတၢ်ဒီးသုဒုၣ်သုဒါလၢသုဂီၢ်ဒ်သိးအကအုၣ်က့ၤခီၣ်က့ၤသုလီၤ.
5ဒီးပှၤကွဲးလံာ်တဖၣ်ဘၣ်ကတိၤတၢ်ဒီးပှၤဂီၢ်မုၢ်ဒီးစံး,ပှၤလၢအသူၣ်အဟံၣ်သီ,ဒီးတပာ်စီဆှံဒံးဘၣ်န့ၣ်မ့ၢ်မတၤတဂၤလဲၣ်,မ်အလဲၤတၢ်,ဒီးက့ၤက့ၤဆူအဟံၣ်တက့ၢ်.ကသံဘၣ်ဖုးလၢတၢ်ဒုးသုးအပူၤ,ဒီးပှၤဂၤကပာ်စီဆှံအီၤလီၤ.
6ဒီးပှၤလၢအသူၣ်အစပံးမုၢ်အလီၢ်,ဒီးတအီၣ်ဒံးဘၣ်အတၤသၣ်န့ၣ်မ့ၢ်မတၤတဂၤလဲၣ်,မ်အလဲၤတၢ်,ဒီးက့ၤက့ၤဆူအဟံၣ်တက့ၢ်.ကသံဘၣ်ဖုးလၢတၢ်ဒုးသုးအပူၤ,ဒီးပှၤဂၤကအီၣ်အတၤသၣ်န့ၣ်လီၤ.
7ဒီးပှၤလၢအအဲၣ်တီအမါ,ဒီးအတဟံးန့ၢ်ဘၣ်အီၤဘၣ်န့ၣ်မ့ၢ်မတၤတဂၤလဲၣ်,မ်အလဲၤတၢ်,ဒီးက့ၤက့ၤဆူအဟံၣ်တက့ၢ်.ကသံဘၣ်ဖုးလၢတၢ်ဒုးသုးအပူၤ,ဒီးပှၤဂၤကဟံးန့ၢ်အီၤလီၤ.
8ဒီးပှၤကွဲးလံာ်တဖၣ်န့ၣ်ဘၣ်ကတိၤဒံးဒီးပှၤဂီၢ်မုၢ်ဒီးစံး,မ့ၢ်မတၤပျံၤတၢ်,ဒီးအသးလီၤဘှါတဂၤလဲၣ်.မ်အလဲၤတၢ်,ဒီးက့ၤက့ၤဆူအဟံၣ်တက့ၢ်.အဒီပုၢ်ဝဲၢ်အသးကလီၤဘှါဘၣ်ဖုးဒ်အဝဲဒၣ်အသးအသိးန့ၣ်လီၤ.
9ဒီးပှၤကွဲးလံာ်တဖၣ်န့ၣ်ကတိၤတၢ်ဒီးပှၤဂီၢ်မုၢ်လၢာ်ဝံၤဒီး,တၢ်ကမၤအသးလၢအဘၣ်ပာ်သုးမုၢ်အပဒိၣ်တဖၣ်လၢပှၤဂီၢ်မုၢ်အခိၣ်လီၤ.
10တုၤနလဲၤဘူးဒီးဝ့ၢ်တဖျၢၣ်လၢနကဒုးတၢ်ဒီးအီၤဒီး,နဘၣ်ကိးထီၣ်တၢ်ဃူတၢ်ဖိးဒီးအီၤလီၤ.
11ဒီးတၢ်ကမၤအသးလၢအမ့ၢ်စံးဆၢနၤလၢတၢ်အဃူအဖိး,ဒီးအိးထီၣ်လၢနဂီၢ်ဒီး,တၢ်ကမၤအသးလၢပှၤဂီၢ်မုၢ်လၢတၢ်ထံၣ်န့ၢ်အီၤလၢအပူၤခဲလၢာ်န့ၣ်ကကဲထီၣ်ပှၤဟ့ၣ်သွဲလၢနၤ,ဒီးဘၣ်မၤနတၢ်လီၤ.
12ဒီးမ့ၢ်တမၤဃူမၤဖိးဘၣ်ဒီးနၤ,ဒီးမ့ၢ်ဒုးသုးဒီးနၤဒီးနကကဝီၤဃာ်အီၤလီၤ.
13ဒီးတုၤယွၤဟ့ၣ်လီၤအီၤလၢနစုပူၤဒီး,နဘၣ်ကျီသံကွံာ်ပှၤပိာ်ခွါလၢနးအကနၣ်ကိးဂၤဒဲးလီၤ.
14မ့မ့ၢ်ပိာ်မုၣ်ပိာ်မၢၤ,ဒီးဖိဒံဖိသၣ်,ဒီးဆၣ်ဖိကီၢ်ဖိအဒၢ,ဒီးကယဲၢ်တၢ်အိၣ်လၢဝ့ၢ်ပူၤ,အတၢ်ဖိတၢ်တၢ်လံၤခဲလၢာ်န့ၣ်နကဟံးန့ၢ်ဘၣ်လၢနဂီၢ်ဒၣ်နဲ,ဒီးနကအီၣ်ဘၣ်နဒုၣ်နဒါအတၢ်ဖိတၢ်လံၤလၢယွၤနကစၢ်ဟ့ၣ်လီၤနၤလီၤ.
15ဒီးဒ်န့ၣ်အသိးနဘၣ်မၤကယဲၢ်ဝ့ၢ်လၢအအိၣ်ဖးယံၤဒီးနၤ,လၢအတမ့ၢ်ဘၣ်ပှၤကလုာ်တဖၣ်အံၤအဝ့ၢ်ဘၣ်လီၤ.
16မ့မ့ၢ်ဝ့ၢ်လၢပှၤကလုာ်တဖၣ်လၢယွၤနကစၢ်ဟ့ၣ်လီၤနၤလၢတၢ်န့ၢ်သါအဂီၢ်န့ၣ်နတဒုးမူဘၣ်တၢ်လၢအသါဝဲနီတမံၤဘၣ်.
17နဘၣ်မၤဟးဂီၤအီၤစီဖ့ကလ့ၤ,ပှၤဃ့ၤသးဖိ,ဒီးပှၤအမိၢ်ဖိ,ဒီးပှၤကနၤဧၣ်ဖိ,ဒီးပရးစၤဖိ,ပှၤဃံၤဝံဖိ,ဒီးပှၤယဘူၣ်ဖိ,ဒ်ယွၤနကစၢ်မၤလိာ်နၤအသိးန့ၣ်,
18ဒ်သိးအသုတသိၣ်လိသုလၢသုကမၤထွဲအတၢ်သးဘၣ်အၢခဲလၢာ်အခံလၢအမၤအကစၢ်,ဒ်သိးသုသုတမၤကမၣ်ဘၣ်ယွၤသုကစၢ်တဂ့ၤလီၤ.
19တုၤနဒုးတၢ်ဒီးဝ့ၢ်တဖျၢၣ်ဒ်သိးနကမၤန့ၢ်အီၤ,ဒီးကဝီၤဃာ်အီၤအါနံၤအါသီဒီး,ကူာ်ဟးဂီၤအသ့ၣ်လၢကွါတဂ့ၤ.အဂ့ၢ်ဒ်အံၤ,နတအီၣ်ဘၣ်အသူၣ်အသၣ်,ဒီးနတဘၣ်ကူာ်လီၤကွံာ်အီၤဘၣ်,(အဂ့ၢ်ဒ်အံၤ,သ့ၣ်လၢပျီပူၤမ့ၢ်ပှၤကညီလၢနကမၤတံာ်အီၤန့ၣ်ဧါ)
20နကမၤဟးဂီၤ,ဒီးကူာ်လီၤကွံာ်ထဲသ့ၣ်လၢနသ့ၣ်ညါလၢအတမ့ၢ်ဘၣ်သ့ၣ်တၢ်အီၣ်ဘၣ်.ဒီးနကမၤနီၣ်မၤတံာ်တၢ်လၢဝ့ၢ်အဃၢၤ,လၢအဒုးတၢ်ဒီးနၤတုၤအဘၣ်တၢ်မၤနၢၤအီၤလီၤ.