Ezekiel 15
1ဒီးယွၤအကလုၢ်ဘၣ်ယၤ,ဒီးစံးဝဲဒၣ်,
2ပှၤကညီဖိခွါဧၢ,စပံးမုၢ်အသ့ၣ်စပံးမုၢ်အဒ့တဒ့လၢသ့ၣ်ဧိၤဝၣ်ဧိၤလၢပှၢ်လၢ်ကျါအကျါန့ၣ်ဂ့ၤန့ၢ်သ့ၣ်အဂၤလၢမနုလဲၣ်.
3ပှၤတဟံးန့ၢ်အသ့ၣ်ဒ်သိးအကတ့တၢ်တမံၤလၢအီၤစ့ၢ်ကီးဧါ.ပှၤကဟံးန့ၢ်ပနဲာ်စဲတဘိလၢအပူၤဒ်သိးအကဘျးထီၣ်တၢ်တမံၤမံၤလၢအဖီခိၣ်စ့ၢ်ကီးဧါ.
4ကွၢ်ကွၢ်,ပှၤဖၢလီၤအီၤလၢမ့ၣ်အူကျါလၢသ့ၣ်မုၣ်အဂီၢ်,ဒီးမ့ၣ်အူအီၣ်ကွံာ်အစိးနါခံခီ,ဒီးအသးကံၢ်ပူၤဆူးထီၣ်ကွံာ်အသးလီၤ.အန့ၣ်ဒီးဂ့ၤဝဲဘၣ်ဝဲလၢတ့တၢ်တမံၤမံၤအဂီၢ်စ့ၢ်ကီးဧါ.
5ကွၢ်ကွၢ်,လၢအအိၣ်ဒီဘိန့ၣ်တဂ့ၤဘၣ်ဒီးတၢ်တ့တၢ်နီတမံၤဘၣ်.တုၤမ့ၣ်အူအီၣ်ကွံာ်အီၤ,ဒီးဆူးထီၣ်ကွံာ်အသးဝံၤဒီး,ကဂ့ၤဝဲလၢတ့တၢ်တမံၤမံၤအဂီၢ်ဒ်လဲၣ်.
6မၤသးဒ်န့ၣ်ဒီးကစၢ်ယွၤစံးဒ်အံၤ,ဒ်စပံးမုၢ်အသ့ၣ်လၢသ့ၣ်ဧိၤဝၣ်ဧိၤလၢပှၢ်လၢ်ကျါလၢယဟ့ၣ်လီၤအီၤလၢမ့ၣ်အူလၢသ့ၣ်မုၣ်အဂီၢ်အသိးန့ၣ်,ယကဟ့ၣ်လီၤကွံာ်ပှၤယရူၤၡလ့ၣ်ဖိဒ်န့ၣ်သိးလီၤ.
7ယကပာ်ယမဲာ်ထီဒါအီၤ,ဒီးအဝဲသ့ၣ်ကဟးထီၣ်ကွံာ်လၢမ့ၣ်အူအပူၤ,ဘၣ်ဆၣ်ဒီးမ့ၣ်အူကအီၣ်ကွံာ်အီၤလီၤ.ဒီးတုၤယပာ်ယမဲာ်ထီဒါအီၤဒီး,သုကသ့ၣ်ညါလၢယမ့ၢ်ယွၤလီၤ.
8ဒီးယကမၤသယုၢ်ထံဧိၤကီၢ်ဧိၤန့ၣ်လၢအမၤကမၣ်တၢ်နးမးအဃိလီၤ,ကစၢ်ယွၤစံးဝဲဒၣ်.