Ezekiel 18
1ဒီးယွၤအကလုၢ်ဘၣ်ယၤ,ဒီးစံးဝဲဒၣ်,
2ပၢ်တဖၣ်အီၣ်စပံးသၣ်ဆံၣ်,ဒီးဖိသၣ်တဖၣ်အမဲဆှံလီၤန့ၣ်သုလၢအကတိၤဒိတၢ်န့ၣ်လၢကီၢ်အံၣ်စရ့လးအဂ့ၢ်,မ့ၢ်သုစံးဒ်လဲၣ်.
3ယမူယဲ,ကစၢ်ယွၤစံးဝဲဒၣ်,သုကတိၤဒိတၢ်အံၤလၢအံၣ်စရ့လးအပူၤအလီၢ်တအိၣ်လၢၤဘၣ်.
4ကွၢ်ကွၢ်,ပှၤအသးခဲလၢစမ့ၢ်ယတၢ်လီၤ.ဒ်ပၢ်အသးအသိးန့ၣ်ဖိခွါန့ၣ်မ့ၢ်ယတၢ်ဒ်န့ၣ်သိးလီၤ.ပှၤအသးလၢအမၤတၢ်ဒဲးဘးန့ၣ်ကသံဝဲဒၣ်လီၤ.
5မ့မ့ၢ်ပှၤမ့ၢ်တီမ့ၢ်လိၤ,ဒီးမၤတၢ်စံၣ်ညီၣ်ဒီးတၢ်တီတၢ်လိၤန့ၣ်,
6ဒီးမ့ၢ်တအီၣ်ဘၣ်တၢ်လၢကစၢၢ်လိၤ,ဒီးမ့ၢ်တကျ့ထီၣ်ဘၣ်အမဲာ်ဆူအံၣ်စရ့လးအပှၤဟံၣ်ဖိအတၢ်ဂီၤဘၣ်,ဒီးမ့ၢ်တမၤဘၣ်အၢပှၤလၢအဃၢၤအမါဘၣ်,ဒီးမ့ၢ်တသုးဘူးဘၣ်အသးဆူပိာ်မုၣ်လၢအဆှုၣ်အသးအအိၣ်,
7ဒီးမ့ၢ်တမၤအၢဘၣ်ပှၤနီတဂၤဘၣ်,ဒီးမ့ၢ်ဟ့ၣ်က့ၤပှၤလၢအကမၢ်အိၣ်လၢအတၢ်ဟ့ၣ်ကီၤ,ဒီးမ့ၢ်တမၤန့ၢ်ဆူၣ်ပှၤဂၤအတၢ်,မ့ၢ်ဟ့ၣ်အတၢ်အီၣ်လၢပှၤတၢ်သၣ်ဝံၤအသး,ဒီးမ့ၢ်လုးဘၢပှၤအိၣ်ဘ့ၣ်ဆ့လၢယၣ်တဘ့ၣ်,
8ဒီးမ့ၢ်တဟ့ၣ်တၢ်လၢစ့အအ့ၣ်အဂီၢ်,ဒီးမ့ၢ်တဟံးန့ၢ်စ့အအ့ၣ်ဘၣ်,မ့ၢ်ထုးက့ၤအစုလၢတၢ်အၢ,ဒီးမ့ၢ်စံၣ်ညီၣ်တၢ်တီလၢပှၤကညီဒီးပှၤကညီအဘၢၣ်စၢၤ,
9ဒီးမ့ၢ်လဲၤတၢ်လၢယတၢ်သိၣ်တၢ်သီအပူၤ,ဒီးမ့ၢ်တိၢ်န့ၢ်ယတၢ်စံၣ်ညီန့ၣ်ဒ်သိးအကမၤတၢ်အမ့ၢ်အတီဒီး,အဝဲဒၣ်မ့ၢ်အတီအလိၤ,မူဒီးကမူဝဲလီၤ,ကစၢ်ယွၤစံးဝဲဒၣ်.
10မ့မ့ၢ်အဝဲဒၣ်မ့ၢ်ထီၣ်ဖိအဖိခွါတဂၤလၢအမ့ၢ်ပှၤတမျိၤတမျာ်,ပှၤလူလီၤတၢ်သွံၣ်,ဒီးမ့ၢ်မၤတၢ်ဒ်န့ၣ်အသိးတမံၤမံၤ,
11ဒီးမ့ၢ်တတိၢ်န့ၢ်ဘၣ်တၢ်ခဲလၢာ်န့ၣ်ဘၣ်,ဒီးမ့ၢ်အီၣ်တၢ်လၢကစၢၢ်အလိၤ,ဒီးမ့ၢ်မၤဘၣ်အၢပှၤလၢအဃၢၤအမါ,
12မ့ၢ်မၤအၢပှၤဖှီၣ်ဖိယာ်ဖိ,ဒီးပှၤဘၣ်နးဘၣ်ဖှီၣ်,မ့ၢ်မၤန့ၢ်ဆူၣ်ပှၤဂၤအတၢ်,ဒီးမ့ၢ်တဟ့ၣ်က့ၤဘၣ်တၢ်ဟ့ၣ်ကီၤဘၣ်,ဒီးမ့ၢ်ကျ့ထီၣ်အမဲာ်ဆူတၢ်ဂီၤ,ဒီးမ့ၢ်မၤတၢ်သးဘၣ်အၢ,
13ဒီးမ့ၢ်ဟ့ၣ်တၢ်လၢစ့လၢအကန့ၢ်အအ့ၣ်အဂီၢ်,ဒီးမ့ၢ်ဟံးန့ၢ်စ့အအ့ၣ်န့ၣ်ဒီး,ကမူဝဲစ့ၢ်ကီးဧါ.တမူဘၣ်ဝဲဘၣ်,မၤလံတၢ်သးဘၣ်အၢခဲလၢာ်လံ.သံဒီးကသံဝဲလီၤ.အသွံၣ်ကအိၣ်ဝဲလၢအလိၤဒၣ်ဝဲလီၤ.
14ဘၣ်ဆၣ်ဒီးကွၢ်ကွၢ်,မ့ၢ်ထီၣ်ဖိအဖိခွါတဂၤလၢအထံၣ်ဘၣ်အပၢ်အတၢ်ဒဲးဘးခဲလၢာ်လၢအမၤဝဲ,မ့ၢ်ထံၣ်ဘၣ်ဝဲ,ဒီးတမၤဘၣ်ဒ်န့ၣ်ဘၣ်,
15မ့ၢ်တအီၣ်ဘၣ်တၢ်လၢကစၢၢ်အလိၤ,ဒီးမ့ၢ်တကျ့ထီၣ်ဘၣ်အမဲာ်ဆူအံၣ်စရ့လးအပှၤဟံၣ်ဖိအတၢ်ဂီၤဘၣ်,ဒီးမ့ၢ်တမၤဘၣ်အၢဘၣ်ပှၤလၢအဃၢၤအမါဘၣ်,
16ဒီးမ့ၢ်တမၤအၢဘၣ်ပှၤနီတဂၤဘၣ်,ဒီးမ့ၢ်တဟံးကီၤဘၣ်,ဒီးမ့ၢ်တမၤန့ၢ်ဆူၣ်ပှၤဂၤအတၢ်,ဒီးမ့ၢ်ဟ့ၣ်အတၢ်အီၣ်လၢပှၤတၢ်သၣ်ဝံၤအသး,ဒီးမ့ၢ်လုးဘၢပှၤအိၣ်ဘ့ၣ်ဆ့လၢယၣ်,
17ဒီးမ့ၢ်တပာ်အစုလၢပှၤဖှီၣ်ဖိယာ်ဖိအလိၤ,ဒီးမ့ၢ်တဟံးန့ၢ်စ့အအ့ၣ်ဒီးတၢ်အါထီၣ်ဘၣ်,ဒီးမ့ၢ်မၤယတၢ်စံၣ်ညီၣ်,ဒီးလဲၤတၢ်လၢယတၢ်သိၣ်တၢ်သီအပူၤန့ၣ်ဒီး,အဝဲဒၣ်တဘၣ်သံဘၣ်လၢအပၢ်အတၢ်ဒဲးဘးအဃိဘၣ်,မူဒီးကမူဝဲလီၤ.
18တၢ်လၢအပၢ်တဂၤန့ၣ်မ့ၢ်အမၤအၢတၢ်လၢအသးကိၤ,ဒီးမၤန့ၢ်ဆူၣ်အဒီပုၢ်ဝဲၢ်အတၢ်,ဒီးမၤတၢ်လၢအတဂ့ၤဘၣ်လၢအပှၤဂီၢ်မုၢ်အကျါဒီး,ကွၢ်ကွၢ်,အဝဲဒၣ်ကသံလၢအတၢ်ဒဲးဘးအပူၤလီၤ.
19ဘၣ်ဆၣ်ဒီးသုစံး,ဖိခွါတဘၣ်ဘၣ်ပၢ်အတၢ်ဒဲးဘးန့ၣ်မ့ၢ်အဘၣ်မနုၤလဲၣ်.တုၤဖိခွါမၤတၢ်စံၣ်ညီၣ်ဒီးတၢ်တီတၢ်လိၤ,တိၢ်န့ၢ်ဝဲလၢယတၢ်သိၣ်တၢ်သီခဲလၢာ်,ဒီးမၤအီၤဒီး,မူဒီးကမူဝဲလီၤ.
20ပှၤအသးလၢအမၤတၢ်ဒဲးဘးန့ၣ်အဝဲဒၣ်ကသံလီၤ.ဖိခွါတဘၣ်ဘၣ်အပၢ်အတၢ်ဒဲးဘးဘၣ်,ဒီးအပၢ်တဘၣ်ဘၣ်အဖိခွါအတၢ်ဒဲးဘးဘၣ်,ပှၤတီပှၤလိၤအတၢ်တီတၢ်လိၤန့ၣ်ကအိၣ်ဝဲလၢအလိၤ,ဒီးပှၤတတီတလိၤအတၢ်တတီတလိၤန့ၣ်ကအိၣ်ဝဲလၢအလိၤလီၤ.
21ဒီးပှၤတတီတလိၤမ့ၢ်ဃၣ်ကွံာ်အသးလၢအတၢ်ဒဲးဘးခဲလၢာ်လၢအမၤဝဲ,ဒီးမ့ၢ်တိၢ်န့ၢ်ယတၢ်သိၣ်တၢ်သီခဲလၢာ်,ဒီးမၤတၢ်စံၣ်ညီၣ်,ဒီးတၢ်တီတၢ်လိၤဒီး,မူဒီးကမူဝဲလီၤ,တသံဝဲဘၣ်,
22တၢ်တသ့ၣ်နီၣ်ထီၣ်က့ၤထီဒါအီၤလၢအတၢ်ကမၣ်လၢအမၤဝဲနီတမံၤဘၣ်,ကမူဝဲလၢအတၢ်တီတၢ်လိၤလၢအမၤဝဲအပူၤလီၤ.
23ပှၤတတီတလိၤသံဝဲန့ၣ်ဘၣ်ယသးတစဲးဧိၤဒၣ်လဲာ်န့ၣ်ဧါ.ကစၢ်ယွၤစံးဝဲဒၣ်,ဃၣ်ကွံာ်အသးလၢအကျဲဒီးမူဝဲန့ၣ်ဘၣ်ယသးတမ့ၢ်ဘၣ်ဧါ.
24ဒီးတုၤပှၤတီပှၤလိၤဃၣ်ကွံာ်အသးလၢအတၢ်တီတၢ်လိၤ,ဒီးမၤတၢ်ဒဲးဘးဒီးမၤဝဲဒ်ကယဲၢ်တၢ်သးဘၣ်အၢလၢပှၤတတီတလိၤမၤဝဲအသိးန့ၣ်ဒီး,ကမူဝဲစ့ၢ်ကီးဧါ.တၢ်တသ့ၣ်နီၣ်ထီၣ်က့ၤဘၣ်အတၢ်တီတၢ်လိၤလၢအမၤဝဲနီတမံၤဘၣ်.လၢအတၢ်ကမၣ်လၢအမၤဝဲအပူၤ,ဒီးလၢအတၢ်ဒဲးဘးလၢအမၤဝဲအပူၤန့ၣ်ကသံဝဲလၢအပူၤလီၤ.
25ဘၣ်ဆၣ်ဒီးသုစံး,ယွၤအကျဲန့ၣ်တတီတဘၣ်ဘၣ်.အံၣ်စရ့လးအပှၤဟံၣ်ဖိသ့ၣ်ဧၢ,ကနၣ်တက့ၢ်,ယကျဲတတီတဘၣ်ဘၣ်ဧါ.သုကျဲတဖၣ်တတီတဘၣ်ဘၣ်န့ၣ်တမ့ၢ်ဘၣ်ဧါ.
26တုၤပှၤတီပှၤလိၤဃၣ်ကွံာ်အသးလၢအတၢ်တီတၢ်လိၤ,ဒီးမၤတၢ်ဒဲးဘး,ဒီးသံဝဲလၢအပူၤဒီး,လၢအတၢ်ဒဲးဘးလၢအမၤဝဲအဃိန့ၣ်သံဝဲလီၤ.
27ဒီးတုၤပှၤတတီတလိၤဘၣ်ဃၣ်ကွံာ်အသးလၢအတၢ်တတီတလိၤဘၣ်လၢအမၤဝဲ,ဒီးမၤတၢ်စံၣ်ညီၣ်,ဒီးတၢ်တီတၢ်လိၤဒီး,အသးကမူဝဲလီၤ.
28မ့ၢ်အကွၢ်ဆိကမိၣ်,ဒီးဃၣ်ကွံာ်အသးလၢအတၢ်ကမၣ်လၢအမၤဝဲန့ၣ်ဒီး,မူဒီးကမူဝဲလီၤ.တသံဘၣ်ဝဲဘၣ်.
29ဘၣ်ဆၣ်ဒီးအံၣ်စရ့လးအပှၤဟံၣ်ဖိစံးဝဲဒၣ်,ယွၤအကျဲတတီတဘၣ်ဘၣ်.အံၣ်စရ့လးအပှၤဟံၣ်ဖိသ့ၣ်ဧၢ,သုကျဲတဘၣ်တတီဘၣ်န့ၣ်တမ့ၢ်ဘၣ်ဧါ.
30မၤသးဒ်န့ၣ်ဒီးအံၣ်စရ့လးအပှၤဟံၣ်ဖိသ့ၣ်ဧၢ,ယကစံၣ်ညီၣ်သု,တဂၤဒ်အကျဲဒၣ်ဝဲအသိးန့ၣ်စုာ်စုာ်လီၤ.ကစၢ်ယွၤစံးဝဲဒၣ်,ဃၣ်သုသး,ဃၣ်သုသးလၢသုတၢ်ကမၣ်ခဲလၢာ်န့ၣ်တက့ၢ်,ဒီးတၢ်ဒဲးဘးတမၤဟးဂီၤဘၣ်သုဘၣ်.
31ကွံာ်တ့ၢ်ကွံာ်သုတၢ်ကမၣ်လၢသုမၤကမၣ်,ဒီးမၤအိၣ်ထီၣ်သုသူၣ်သီသးသီတက့ၢ်.အဂ့ၢ်ဒ်အံၤ,အံၣ်စရ့လးအပှၤဟံၣ်ဖိသ့ၣ်ဧၢ,သုကသံမ့ၢ်အဘၣ်မနုၤလဲၣ်.
32အဂ့ၢ်ဒ်အံၤ,ပှၤသံဝဲန့ၣ်တဘၣ်ဘၣ်ယသးဘၣ်,ကစၢ်ယွၤစံးဝဲဒၣ်,မၤသးဒ်န့ၣ်ဒီးဃၣ်ကွံာ်သုသး,ဒီးမူတက့ၢ်.