Ezekiel 27
1ယွၤအကလုၢ်ဘၣ်ယၤ,ဒီးစံးဝဲဒၣ်,
2ပှၤကညီဖိခွါဧၢ,မၤထါဟီၣ်တၢ်လၢစိၢ်အဃိ,
3ဒီးစံးလၢစိၢ်,ဝ့ၢ်လၢအအိၣ်အဆိးလၢတၢ်လဲၤနုာ်ပီၣ်လဲၣ်ပူၤ,ပှၤကလုာ်တဖၣ်အပှၤကၤတၢ်ဖိလၢကီၢ်လၢပီၣ်လဲၣ်နံၤအါဘ့ၣ်အဂီၢ်တဝ့ၢ်ဧၢ,ကစၢ်ယွၤစံးဒ်အံၤ,စိၢ်ဧၢ,နစံး,ယဃံယလၤလၢထီၣ်ပှဲၤထီၣ်လီၤ.
4နကီၢ်အဃၢၤအိၣ်ဝဲလၢပီၣ်လဲၣ်ပူၤ,နပှၤမၤတၢ်ဖိမၤလၢထီၣ်ပှဲၤထီၣ်နဃံနလၤလီၤ.
5ပှၤမၤနသ့ၣ်ဘ့ၣ်ဘၣ်ခဲလၢာ်လၢစနံၢ်အသ့ၣ်ဆှိ,ဟံးန့ၢ်သ့ၣ်ဆှိအ့ရ့းလၢလဘၤနိၣ်ဒ်သိးအကမၤယၢ်ထူၣ်လၢနဂီၢ်လီၤ.
6ပှၤမၤနငၢတဖၣ်လၢဘၤၡၣ်အသ့ထိးအီၣ်လီၤ.ပှၤမၤနဆ့ၣ်နီၤအလီၢ်ထီလၢသ့ၣ်ဆှိတအၤရှူၢ်ဟဲလၢကံးတံၣ်အပီၣ်လဲၣ်နံၤဒီးကံၣ်ဃ့ဝဲဒီးကဆီမဲလီၤ.
7ဖှီဝါကဆှၣ်,ဒီးတၢ်ကံၣ်ဃ့ဟဲလၢအဲၤကူပတူးန့ၣ်မ့ၢ်တၢ်လၢသလၣ်ထီၣ်လၢနယၢ်လၣ်အဂီၢ်လီၤ.တၢ်လါ,ဒီးတၢ်လုးတကုာ်ဟဲလၢအလံၤၡါအပီၣ်လဲၣ်နံၤန့ၣ်မ့ၢ်တၢ်ကျၢၢ်ဘၢနၤလီၤ.
8ပှၤအိၣ်ဝဲဆိးဝဲလၢစံဒိၣ်,ဒီးအၢ်ဝးမ့ၢ်နကဘီဖိလီၤ.နပှၤကူၣ်တၢ်သ့လၢအအိၣ်ဝဲလၢနပူၤန့ၣ်မ့ၢ်နပှၤရိာ်သန့ဖိ,စိၢ်ဧၢ,
9ကံးဘလးအပှၤသူၣ်က့သးပှၢ်ဒီးပှၤမၤတၢ်သ့လၢအပူၤန့ၣ်မ့ၢ်နပှၤမၤတံာ်ဘံးတၢ်ဖိလီၤ.ပီၣ်လဲၣ်အကဘီခဲလၢာ်,ဒီးအကဘီဖိအိၣ်ဝဲလၢနပူၤ,ဒ်သိးအကမၤန့ၢ်နပနံာ်တၢ်ကၤလီၤ.
10ပှၤပၤရၣ်ဖိ,ဒီးပှၤလူၤဒံဖိ,ဒီးပှၤပူၤတၢ်ဖိအိၣ်ဝဲလၢနသုးမုၢ်အကျါလီၤ.ဘျးထီၣ်ကတီၤ,ဒီးခိၣ်ကုာ်သုး,လၢနပူၤလီၤ.မၤလၤကပီၤနၤလီၤ.
11ပှၤအၢ်ဝးဖိဒီးနသုးမုၢ်ခဲလၢာ်အိၣ်ဝဲလၢနခိၣ်ဒူအဖီခိၣ်ဝးတရံးဝဲ,ဒီးပှၤသုးဖိဆူၣ်အိၣ်ဝဲလၢနတၢးထီအပူၤလီၤ.ဘျးထီၣ်အကတီၤလၢနခိၣ်ဒူအလိၤဝးတရံးဝဲလီၤ.မၤလၢထီၣ်ပှဲၤထီၣ်နဃံနလၤလီၤ.
12တၢ်ၡံၣ်မ့ၢ်နပှၤကၤတၢ်ဖိလၢတၢ်ဖိတၢ်လံၤကိးကလုာ်ဒဲးအိၣ်ဝဲအါအါကလဲာ်အဃိလီၤ.ဒီးဆါကွံာ်စ့,ဒီးထး,ဒီးပှာ်,ဒီးပှာ်သူန့ၣ်လၢနဖၠါပူၤလီၤ.
13ယၤဝၣ်,ဒီးတူၤဘလး,ဒီးမ့ၤၡးန့ၣ်မ့ၢ်နပှၤကၤတၢ်ဖိလီၤ.ဆါကွံာ်ဝဲပှၤကညီ,ဒီးသပၢၤတိၢ်လၢနဖၠါပူၤလီၤ.
14တိကးရမၤအပှၤဟံၣ်ဖိဆါကွံာ်ကသ့ၣ်,ဒီးကသ့ၣ်လၢပှၤဒိးဝဲ,ဒီးကသ့ၣ်လၤလၢနဖၠါပူၤလီၤ.
15ပှၤဒဒၣ်ဖိမ့ၢ်နပှၤကၤတၢ်ဖိလီၤ.ကီၢ်အါဘ့ၣ်လၢပီၣ်လဲၣ်နံၤကၤတၢ်ဒီးနၤတဖၣ်လီၤ.ဟ့ၣ်ကၣ်နၤလၢကဆီမဲ,ဒီးသ့ၣ်သီလမူာ်လီၤ.
16စူၤရံမ့ၢ်နပှၤကၤတၢ်ဖိလၢနတ့တၢ်အါမံၤအဃိလီၤ.ဆါကွံာ်တၢ်မျၢ်ဂီၤ,ဒီးတၢ်လုးတကုာ်,ဒီးတၢ်ဆးကံၣ်ဃ့,ဒီးဖှီဝါကဆှၣ်,ဒီးလၢၢ်နၢၤ,ဒီးတၢ်မျၢ်ဂီၤဆှုၣ်လၢနဖၠါပူၤလီၤ.
17ယူဒၤဒီးအံၣ်စရ့လးအပှၤကီၢ်ဖိမ့ၢ်နပှၤကၤတၢ်ဖိလီၤ.ဆါကွံာ်မံနံးအဘုကၠူၣ်,ဒီးကိၣ်ဆၢ,ဒီးကနဲစီ,ဒီးတၢ်သီ,ဒီးသ့ၣ်စရံအထုးလၢနဖၠါပူၤလီၤ.
18ဒၤမ့ၤစ့းမ့ၢ်နပှၤကၤတၢ်ဖိလၢနတ့တၢ်အါမံၤအဃိ,လၢနတၢ်ဖိတၢ်လံၤကိးကလုာ်ဒဲးအိၣ်အါအါကလဲာ်အဃိလီၤ.ဆါကွံာ်ဃ့လ့ဘိၣ်အစပံးထံ,ဒီးသိအဆူၣ်ဝါလီၤ.
19ဝဒၣ်ဒီးယၤဝၣ်ဟဲစိာ်လုၣ်ဧိၤနဲဧိၤဆူနဖၠါပူၤလီၤ.ထးတ့အသး,ကဒါရါအဖံး,ဒီးလီၢ်ဟ့ၣ်အိၣ်ဝဲလၢနဖၠါပူၤလီၤ.
20ဒဒၣ်မ့ၢ်နပှၤကၤတၢ်ဖိလီၤ.ဟဲစိာ်ယၣ်ဧိၤသွံဧိၤလၢလ့ၣ်ကဟၣ်အဂီၢ်လီၤ.
21ဧ့ရ့း,ဒီးက့ဒၢ်အပဒိၣ်ဖးဒိၣ်ခဲလၢာ်န့ၣ်မ့ၢ်နပှၤကၤတၢ်ဖိလၢနစုအဃၢၤလီၤ.ကၤဝဲဒီးသိဖိ,ဒီးသိဖါ,ဒီးမဲာ်တဲးလဲးလၢနၤလီၤ.
22ၡဘၤဒီးရၤဧမၤန့ၣ်မ့ၢ်နပှၤကၤတၢ်ဖိလီၤ.ဒီးဆါဝဲလၢတၢ်နၢမူအကလုာ်ကလုာ်,တၢ်မျၢ်အကလုာ်ကလုာ်,ဒီးထူဧိၤလွဲဧိၤလၢနဖၠါပူၤလီၤ.
23ဃၤရၣ်,ဒီးကးနၤ,ဒီးဧ့ဒ့ၣ်,ဒီးၡဘၤ,ဒီးအၤရှူၢ်,ဒီးကံလမးအပှၤကၤတၢ်ဖိမ့ၢ်နပှၤကၤတၢ်ဖိလီၤ.
24အဝဲသ့ၣ်တဖၣ်ဆါဝဲလၢတၢ်ကူတၢ်သိးအလၢအပှဲၤ,ဒီးယၣ်တၢ်လါ,ဒီးတၢ်ဆးကံၣ်ဃ့,ဒီးတလါသ့ၣ်ဆှိအ့ရ့းပှဲၤဒီးတၢ်ကူတၢ်သိးအဂ့ၤအဝါ,ဒီးစၢဃာ်အသးဒီးပျံၤလၢနဖၠါပူၤလီၤ.
25တၢ်ၡံၣ်အကဘီန့ၣ်မ့ၢ်တၢ်လၢအစိာ်နပနံာ်တၢ်ကၤ,ဒီးနလၢထီၣ်ပှဲၤထီၣ်,ဒီးအိၣ်ဝဲဒီးတၢ်အလၤကပီၤဒိၣ်မးလၢပီၣ်လဲၣ်ပူၤလီၤ.
26နပှၤကၢၢ်ကဘီဖိစိာ်နၤဆူထံဖးဒိၣ်အပူၤ,ကလံၤမုၢ်ထီၣ်မၤကၢ်ကွံာ်နၤလၢပီၣ်လဲၣ်အသးကံၢ်ပူၤန့ၣ်လီၤ.
27နတၢ်ထူးတၢ်တီၤ,ဒီးနဖၠါဧိၤဖီဧိၤ,ဒီးနပှၤကဘီဖိ,ဒီးနပှၤရိာ်သန့ဖိ,ဒီးနပှၤတံာ်ဘံးဖိ,ဒီးပှၤကၤတၢ်လၢနပနံာ်တၢ်ကၤ,ဒီးနပှၤသုးဖိခဲလၢာ်အိၣ်ဝဲလၢနပူၤ,ဒီးနတၢ်အိၣ်ဖှိၣ်လၢနပူၤခဲလၢာ်န့ၣ်ကလီၤတဲာ်လၢပီၣ်လဲၣ်ပူၤလၢနတုၤလၢတၢ်ဟးဂီၤအမုၢ်တနံၤအပူၤလီၤ.
28တၢ်အလီၢ်အိၣ်လၢခိဝးတရံးနၤတဖၣ်ကကဆှဲးကဆှိးလၢနပှၤရိာ်သန့ဖိအကိးပသူထီၣ်အသီၣ်အဃိလီၤ.
29ဒီးကယဲၢ်ပှၤလၢအကၢၢ်တငၢခဲလၢာ်,ပှၤကဘီဖိ,ပီၣ်လဲၣ်အပှၤရိာ်သန့ဖိခဲလၢာ်ကယုၢ်လီၤလၢအကဘီပူၤလီၤ.ကဆၢထၢၣ်လၢခိ,
30ဒီးကဒုးဟူထီၣ်အကလုၢ်လၢနဃိ,ဒီးကဟီၣ်နးနးကလဲာ်,ဒီးကဖှံထီၣ်ဟီၣ်ခိၣ်အကမူၣ်လၢအခိၣ်အဖီခိၣ်,ဒီးကကလိာ်အသးလၢဖၣ်ဆါအပူၤလီၤ.
31ဒီးကလူၤအခိၣ်စီဖ့ကလ့ၤလၢနဃိ,ဒီးကံၢ်တူာ်အသးလၢထၢၣ်အတၢ်ကံးညာ်,ဒီးကဟီၣ်လၢနဃိလၢအသးဆါ,ဒီးဟီၣ်နးနးကလဲာ်လီၤ.
32ဒီးဟီၣ်တၢ်ယၢၤတၢ်အဖၢမုၢ်ဒီး,ကမၤထါဟီၣ်တၢ်,ဒီးကဟီၣ်လၢနဃိ,ဒီးစံး,ဝ့ၢ်မၤသးဒ်စိၢ်အသိး,တၢ်ဟးဂီၤဝဲလၢပီၣ်လဲၣ်အသးကံၢ်ပူၤန့ၣ်မ့ၢ်မနုၤလဲၣ်.
33တုၤနပနံာ်တၢ်ကၤဟးထီၣ်လၢပီၣ်လဲၣ်ပူၤန့ၣ်ဒီး,နဒုးမံသူၣ်မံသးပှၤအါကလုာ်,နဒုးထူးထီၣ်တီၤထီၣ်ဟီၣ်ခိၣ်အစီၤပၤတဖၣ်လၢနတၢ်ထူးအါနတၢ်တီၤဒိၣ်,ဒီးနပနံာ်တၢ်ကၤလီၤ.
34တုၤနဟးဂီၤကွံာ်လၢပီၣ်လဲၣ်ပူၤလၢထံယိာ်အပူၤန့ၣ်ဒီး,ပနံာ်တၢ်ကၤ,ဒီးနပှၤအိၣ်ဖှိၣ်လၢနပူၤခဲလၢာ်န့ၣ်ကတုၤလၢတၢ်ဟးဂီၤဝဲလီၤ.
35ပှၤကီၢ်လၢပီၣ်လဲၣ်နံၤဖိအသးကတုၤလၢနဃိခဲလၢာ်,ဒီးအစီၤပၤပျံၤတၢ်,ဒီးအညၣ်ထီၣ်ဆူၣ်,ဒီးအမဲာ်လီၤသပှၢ်လီၤ.
36ပှၤကၤတၢ်ဖိလၢပှၤကလုာ်တဖၣ်အကျါကဒုၣ်ဒွဲၣ်နၤ,နအိၣ်သယုၢ်,ဒီးနတအိၣ်လၢၤဘၣ်လီၤထူလီၤယိာ်ဘၣ်လီၤ.