Jeremiah 14
1ယွၤအကလုၢ်လၢအဘၣ်စီၤယံးရမံယၤလၢတၢ်ယီၤဃ့အဂ့ၢ်အကျိၤလီၤ.
2ယူဒၤသူၣ်အုးသးအုးဒီးအပဲတရီလီၤဘှါဝဲ,ဆုးလီၤအခိၣ်ပၢၢ်လၢဟီၣ်ခိၣ်,ဒီးယရူၤၡလ့ၣ်အကိးပသူထီၣ်န့ၣ်လဲၤထီၣ်ဝဲလီၤ.
3ဒီးပှၤအဒိၣ်တဖၣ်မၢလီၤပှၤအဆံးတဖၣ်ဆူထံအလီၢ်လီၤ.ဟဲဝဲဆူထံပူၤဒီးထံတအိၣ်ဘၣ်.ဟဲက့ၤကဒါက့ၤအိၣ်ဒီးအထံစဲၤအိၣ်ကလီလီၤ.အမဲာ်ဆှး,ဒီးပာ်မဲာ်ဆှးအသး,ဒီးကျၢၢ်ဘၢအခိၣ်လီၤ.
4အဂ့ၢ်ဒ်အံၤ,ဟီၣ်ခိၣ်သ့ၣ်ဖးလၢတၢ်တဟဲစူၤဘၣ်လၢကီၢ်ပူၤအဃိလီၤ.ပှၤမၤဟီၣ်ခိၣ်ဖိအမဲာ်ဆှး,ဒီးကျၢၢ်ဘၢအခိၣ်လီၤ.
5တၤဟိမိၢ်ဒၣ်လဲာ်ဖှံလီၤအဖိလၢပှၢ်လၢ်ကျါ,ဒီးလဲၤသဒၣ်အီၤလၢနီၣ်ဧိၤမံၤဧိၤတအိၣ်ဘၣ်အဃိလီၤ.
6ဒီးကသ့ၣ်ယီၤအမံၤဆၢထၢၣ်ဝဲလၢတၢ်စိခိၣ်,ဒီးသါထီၣ်ကလံၤဒ်ထွံၣ်ဟီၣ်ခိၣ်အသိးန့ၣ်,အမဲာ်လၢာ်ကွံာ်လၢနီၣ်ဧိၤမံၤဧိၤတအိၣ်ဘၣ်အဃိလီၤ.
7ယွၤဧၢ,ပတၢ်အၢတဖၣ်အုၣ်အသးထီဒါပှၤလီၤ.မၤလၢနမံၤဒၣ်နဲအဃိတက့ၢ်.အဂ့ၢ်ဒ်အံၤ,ပသးဟးဂီၤလံအါဘျီလံ.ပမၤကမၣ်ဘၣ်နၤလံ.
8အံၣ်စရ့လးအတၢ်မုၢ်လၢ်,ပှၤအုၣ်က့ၤခီၣ်က့ၤအီၤလၢအဘၣ်ကိၢ်ဘၣ်ဂီၤအကတီၢ်တဂၤဧၢ,နကဲထီၣ်တၢ်ဒ်ပှၤတခီဘီမုၢ်ဖိလၢကီၢ်အပူၤ,ဒီးဒ်ပှၤပိာ်ကျဲတဂၤလၢအသလၣ်ထီၣ်အဒဲလၢမုၢ်တနၤအဂီၢ်အသိးန့ၣ်မ့ၢ်အဘၣ်မနုၤလဲၣ်.
9နမၤသးဒ်ပှၤလၢအသးကတုၤ,ဒ်ပှၤအဆူၣ်လၢအအုၣ်က့ၤခီၣ်က့ၤတၢ်တသ့ဘၣ်အသိးန့ၣ်မ့ၢ်အဘၣ်မနုၤလဲၣ်.ဘၣ်ဆၣ်ဒီးယွၤဧၢ,နအိၣ်လၢပကျါ,ဒီးတၢ်ကိးပှၤလၢနမံၤလီၤ.လဲၤသဒၣ်ပှၤတဂ့ၤ.
10ယွၤစံးလၢပှၤဂီၢ်မုၢ်အံၤဒ်အံၤ,အဲၣ်ဒိးဝဲဒ်န့ၣ်လၢအကဟးဖျိးတၢ်,တတြီဘၣ်အခီၣ်ဘၣ်.မၤသးဒ်န့ၣ်ဒီးယွၤတတူၢ်လိာ်ဘၣ်အီၤဘၣ်.ခဲကနံၣ်အံၤကသ့ၣ်နီၣ်ထီၣ်အတၢ်အၢ,ဒီးအိၣ်သကိးအတၢ်ဒဲးဘးလီၤ.
11တုၤနုၤတစုယွၤစံးဘၣ်ယၤ,ဘါထုကဖၣ်လၢပှၤဂီၢ်မုၢ်အံၤအတၢ်ဂ့ၤအဂီၢ်တဂ့ၤ.
12တုၤအဒုၣ်တၢ်အီၣ်တၢ်အီဒီး,ယတကနၣ်ဘၣ်အဃ့ကညးတၢ်ဘၣ်.တုၤအလုၢ်တၢ်လုၢ်မ့ၣ်အူ,ဒီးတၢ်မၤဘူၣ်ကိၣ်ဒီး,ယတတူၢ်လိာ်ဘၣ်အီၤဘၣ်.ယကမၤလၢာ်ကွံာ်အီၤလၢနး,ဒီးလၢတၢ်သၣ်ဝံၤလီၤဒိ,ဒီးလၢတၢ်သံသတြိာ်လီၤ.
13ဒီးယစံး,အၣ်လါ,ကစၢ်ယွၤဧၢ,ကွၢ်ကွၢ်,ဝံတဖၣ်စံးဘၣ်အီၤ,သုတထံၣ်ဘၣ်နး,ဒီးသုတဘၣ်ဘၣ်တၢ်သၣ်ဝံၤလီၤဒိဘၣ်.မ့မ့ၢ်ယွၤကဟ့ၣ်သုလၢတၢ်ဃူတၢ်ဖိးနီၢ်နီၢ်လၢအလီၢ်အံၤလီၤ.
14ဒီးယွၤစံးဘၣ်ယၤ,ဝံတဖၣ်န့ၣ်ကတိၤတၢ်လၢဝံအကျိာ်ကဘျံးကဘျၣ်လၢယမံၤ,ယတမၢဘၣ်အီၤဘၣ်,ဒီးယတမၤလိာ်ဘၣ်အီၤဘၣ်,ဒီးယတကတိၤဘၣ်ဒီးအီၤဘၣ်.ကတိၤတၢ်လၢဝံအကျိာ်လၢတၢ်ထံၣ်တၢ်လီတၢ်,ဒီးလၢတၢ်ဖးတၢ်,ဒီးလၢတၢ်ကလီကလီ,ဒီးတၢ်ဘၣ်ဃးဒီးလီတၢ်လၢအသးဒၣ်ဝဲအပူၤလီၤ.
15မၤသးဒ်န့ၣ်ဒီး,ယွၤစံးလၢဝံလၢအကတိၤတၢ်လၢဝံအကျိာ်လၢယမံၤ,ဒီးယတမၢဘၣ်အီၤ,လၢအစံးဝဲ,နးဒီးတၢ်သၣ်ဝံၤလီၤဒိတအိၣ်ဘၣ်လၢကီၢ်အံၤအပူၤဘၣ်တဖၣ်န့ၣ်အဂ့ၢ်အကျိၤဒ်အံၤ,ဝံတဖၣ်န့ၣ်ကလၢာ်ဝဲလၢနး,ဒီးလၢတၢ်ဝံၤလီၤဒိလီၤ.
16ဒီးပှၤဂီၢ်မုၢ်လၢအဝဲသ့ၣ်ကတိၤတၢ်လၢဝံအကျိာ်ဒီးအီၤန့ၣ်ကဘၣ်တၢ်ကွံာ်တ့ၢ်ကွံာ်အီၤဆူယရူၤၡလ့ၣ်အကျဲပူၤလၢတၢ်သၣ်ဝံၤလီၤဒိဒီးနးအဃိလီၤ.ဒီးအဝဲသ့ၣ်,ဒီးအမါ,ဒီးအဖိခွါ,ဒီးအဖိမုၣ်သ့ၣ်တဖၣ်န့ၣ်ပှၤခူၣ်လီၤကွံာ်အီၤတအိၣ်ဝဲဘၣ်.အဂ့ၢ်ဒ်အံၤ,ယကလူလီၤအတၢ်အၢလၢအလိၤလီၤ.
17ဒီးနဘၣ်ကတိၤတၢ်ကတိၤအံၤဒီးအီၤ,မ်မဲာ်ထံယွၤလီၤလၢယမဲာ်လၢမုၢ်ဆါဆဲးလၢမုၢ်နၤတက့ၢ်.ဒီးမ်အသုတတုာ်တဂ့ၤ.အဂ့ၢ်ဒ်အံၤ,ယပှၤဂီၢ်မုၢ်အဖိမုၣ်လိၣ်ဘိဘၣ်တၢ်ဆဲးအီၤလၢတၢ်ဆဲးဖးဒိၣ်,ဒီးတၢ်ကျီအီၤနးမးလီၤ.
18ယမ့ၢ်လဲၤတၢ်ဆူခိဒီး,ကွၢ်ကွၢ်,ပှၤလၢအဘၣ်တၢ်မၤသံအီၤလၢနး,ဒီးယမ့ၢ်လဲၤနုာ်လၢဝ့ၢ်ပူၤဒီး,ကွၢ်ကွၢ်,ပှၤလၢအဃဲၤဝဲလၢတၢ်သၣ်ဝံၤလီၤဒိလီၤ.မ့မ့ၢ်ဝံဒီးပှၤလုၢ်တၢ်အဒိၣ်န့ၣ်ဟးဝဲဆူကီၢ်တဘ့ၣ်လၢအတသ့ၣ်ညါဘၣ်ဝဲဘၣ်.
19နညိကွံာ်ယူဒၤလၢာ်လ့ၤတက့ၤဧါ.နသးဘၣ်အၢစံယိၣ်ဧါ.နတီၢ်ပှၤ,ဒီးတၢ်မၤဘျါက့ၤတအိၣ်ဘၣ်လၢပဂီၢ်န့ၣ်မ့ၢ်အဘၣ်မနုၤလဲၣ်.ပကွၢ်လၢ်တၢ်ဃူတၢ်ဖိးအကျဲ,ဒီးတၢ်ဂ့ၤတအိၣ်ဘၣ်.ပကကွၢ်လၢ်တၢ်မၤဘျါက့ၤအကတီၢ်,ဒီးကွၢ်ကွၢ်,တၢ်မၤကိၢ်မၤဂီၤလီၤ.
20ယွၤဧၢ,ပသ့ၣ်ညါပတၢ်အၢ,ဒီးပပၢ်အတၢ်အၢလီၤ.အဂ့ၢ်ဒ်အံၤ,ပမၤကမၣ်နၤလံ.
21လၢနမံၤအဃိန့ၣ်ညိကွံာ်ပှၤတဂ့ၤ,မၤဟးဂီၤနလီၢ်ပစိာ်အလၤကပီၤတဂ့ၤ.သ့ၣ်နီၣ်ထီၣ်က့ၤတက့ၢ်.မၤဟးဂီၤနတၢ်အၢၣ်လီၤအီလီၤဒီးပှၤတဂ့ၤ.
22လၢပှၤကလုာ်တဖၣ်အတၢ်ကလီကလီအကျါန့ၣ်ဟ့ၣ်လီၤတၢ်ဟဲစူၤသ့တမံၤမံၤဧါ.ဒီးမူကပိာ်လိၤဟ့ၣ်တၢ်လီၤသဖှံၣ်ဘၣ်ကသ့ဧါ,ယွၤပကစၢ်ဧၢ,နဲဒၣ်အံၤနမ့ၢ်အဝဲဒၣ်တမ့ၢ်ဘၣ်ဧါ.ဒီးပကသန့ၤပသးလၢနၤလီၤ.အဂ့ၢ်ဒ်အံၤ,နတ့လီၤတၢ်ခဲလၢာ်န့ၣ်လီၤ.