Jeremiah 10
1ဒိကနၣ်တၢ်ကတိၤလၢယွၤကတိၤတၢ်ဒီးသု,အံၣ်စရ့လးအပှၤဟံၣ်ဖိသ့ၣ်ဧၢ,ယွၤစံးဒ်အံၤ,
2မၤလိပှၤကလုာ်တဖၣ်အကျဲတဂ့ၤ.ဒီးမူခိၣ်အတၢ်လီၤလးန့ၣ်ပှၤကလုာ်တဖၣ်ပျံၤအီၤနာ်သက့ဒီး,ပျံၤသုဝဲတဂ့ၤ.
3အဂ့ၢ်ဒ်အံၤ,ပှၤဂီၢ်မုၢ်အလုၢ်အလၢ်န့ၣ်မ့ၢ်တၢ်ကလီကလီလီၤ.အဂ့ၢ်ဒ်အံၤ,ကူာ်လီၤဝဲလၢသ့ၣ်တထူၣ်လၢပှၢ်ကျါ,ပှၤမၤတၢ်သ့ဖိအစုစိးဝဲလၢကွါလီၤ.
4ဒီးကယၢကယဲဝဲလၢကျိၣ်ဧိၤစ့ဧိၤ,ဒီးထူဧိၤလွဲဧိၤ,မၤဃာ်ဝဲလၢပနဲာ်ထးဒီးခံၣ်ခူၣ်,ဒ်သိးအသုးတဟူးဝးတဂ့ၤ.
5အိၣ်ထူၣ်ကလာ်ဒ်သ့ၣ်စူၣ်ပလိၣ်အသိးဘၣ်ဆၣ်ဒီး,ကတိၤတၢ်တသ့ဘၣ်,ပှၤဘၣ်စိာ်အီၤလီၤ.အဂ့ၢ်ဒ်အံၤ,လဲၤတၢ်တသ့ဘၣ်.ပျံၤအီၤတဂ့ၤ.အဂ့ၢ်ဒ်အံၤ,မၤအၢတၢ်တသ့ဘၣ်,ဒီးမၤဂ့ၤတၢ်န့ၣ်တသ့စ့ၢ်ကီးဘၣ်.
6မ့ၢ်မးတၢ်လီၤဂာ်လၢနၤတအိၣ်ဘၣ်,ယွၤဧၢ,နမ့ၢ်တၢ်အဒိၣ်,ဒီးနမံၤဒိၣ်ဝဲလၢတၢ်အစိကမီၤအဃိလီၤ.
7ပှၤလၢအတပျံၤဘၣ်နၤ,ပှၤကလုာ်တဖၣ်အစီၤပၤဧၢ,မ့ၢ်မတၤတဂၤလဲၣ်.အဂ့ၢ်ဒ်အံၤ,တၢ်ပျံၤကြၢးဒီးနၤလီၤ.အဂ့ၢ်ဒ်အံၤ,လၢပှၤကူၣ်တၢ်သ့ခဲလၢာ်လၢပှၤကလုာ်တဖၣ်အကျါ,ဒီးလၢအဘီအမုၢ်ခဲလၢာ်အပူၤန့ၣ်တၢ်လီၤဂာ်ဒီးနၤတအိၣ်ဘၣ်.
8မ့မ့ၢ်အဝဲသ့ၣ်တဖၣ်န့ၣ်မ့ၢ်ပှၤဒ်ဆၣ်ဖိကီၢ်ဖိအသိး,ဒီးပှၤဟးဂီၤဖိတပူၤဃီလီၤ.သ့ၣ်အထူၣ်ဒၣ်လဲာ်န့ၣ်မ့ၢ်တၢ်သိၣ်က့ၤသီက့ၤအတၢ်ကလီကလီလီၤ.
9စ့ပိာ်ဘ့ၣ်ဘၣ်အသးန့ၣ်ပှၤဟဲစိာ်ဝဲလၢတၢ်ၡံၣ်,ဒီးထူလၢအူဖစးန့ၣ်,ပှၤမၤတၢ်ဖိ,ဒီးပှၤသိတၢ်ဖိအစုမၤတၢ်လီၤ.တၢ်လါဒီးတၢ်လုးတကုာ်မ့ၢ်အကူအသိးလီၤ.တၢ်ခဲလၢာ်န့ၣ်မ့ၢ်ပှၤမၤတၢ်သ့အတၢ်မၤလီၤ.
10မ့မ့ၢ်ယွၤမ့ၢ်ကစၢ်အမ့ၢ်အတီလီၤ.အဝဲဒၣ်မ့ၢ်ကစၢ်လၢအမူဝဲ,ဒီးစီၤပၤအထူအယိာ်လီၤ.ဟီၣ်ခိၣ်ကဟူးဝးလၢအသးထီၣ်အဃိ,ဒီးပှၤကလုာ်တဖၣ်အိၣ်ဝဲလၢအသးကဲၤထီၣ်အမဲာ်ညါတကဲဘၣ်.
11သုဘၣ်စံးဘၣ်အီၤဒ်အံၤ,ကစၢ်တဖၣ်လၢအတတ့လီၤမူခိၣ်ဒီးဟီၣ်ခိၣ်န့ၣ်ကဟါမၢ်လၢဟီၣ်ခိၣ်ချၢ,ဒီးလၢမူခိၣ်အံၤအဖီလာ်လီၤ.
12တ့လီၤဝဲဟီၣ်ခိၣ်လၢအစိကမီၤ,မၤကျၢၤလၢာ်ခိၣ်လၢအတၢ်ကူၣ်သ့,ဒီးသလၣ်ထီၣ်မူခိၣ်လၢအတၢ်ကူၣ်တၢ်ဆးလီၤ.
13တုၤအကလုၢ်သီၣ်ဒီး,ထံဂီၢ်မုၢ်အိၣ်ဝဲလၢမူကပိာ်လိၤ,ဒီးဒုးဟဲထီၣ်တၢ်ဘှ့ၣ်လၢဟီၣ်ခိၣ်အကတၢၢ်န့ၣ်လီၤ.တ့လီဝၢ်ဒံးအိၣ်ဒီးတၢ်စူၤ,ဒီးဟဲစိာ်ကလံၤလၢအတၢ်ပာ်ဖှိၣ်အလီၢ်လီၤ.
14တသ့ၣ်ညါဘၣ်တၢ်ဘၣ်ဒီး,ပှၤကညီခဲလၢာ်လီၤဂာ်ဒီးဆၣ်ဖိကီၢ်ဖိလီၤ.ကယဲၢ်ပှၤသိတၢ်ဖိအတၢ်ဂီၤန့ၣ်ဒုးမဲာ်ဆှးအမဲာ်လီၤ.အဂ့ၢ်ဒ်အံၤ,အတၢ်ဂီၤသိအသးမ့ၢ်တၢ်ကဘျံးကဘျၣ်,ဒီးအသါတအိၣ်ဘၣ်လၢအပူၤဘၣ်.
15မ့ၢ်တၢ်ကလီကလီ,တၢ်ဒုၣ်ဒွဲၣ်အလီၢ်လီၤ.တုၤတၢ်အိၣ်သကိးအီၤဒီး,ကဟးဂီၤဝဲလီၤ.
16စီၤယၤကိာ်အဂီၢ်န့ၣ်တလီၤဂာ်ဘၣ်အီၤဘၣ်.မ့ၢ်ပှၤတ့လီၤတၢ်ခဲလၢာ်,ဒီးအံၣ်စရ့လးမ့ၢ်အတၢ်န့ၢ်သါအပှၤတဒူၣ်လီၤ.တၢ်သုးမုၢ်ဂီၢ်မုၢ်အယွၤန့ၣ်မ့ၢ်အမံၤလီၤ.
17ထၢထီၣ်နတၢ်ဖိတၢ်လံၤလၢကီၢ်ပူၤတက့ၢ်.ပှၤအိၣ်ဝဲဆိးဝဲလၢတိာ်ပူၤတဂၤဧၢ.
18အဂ့ၢ်ဒ်အံၤ,ယွၤစံးဒ်အံၤ,ကွၢ်ကွၢ်,ယကဘျုးကွံာ်ပှၤကီၢ်ဖိတဖၣ်လၢတကတီၢ်အံၤ,ဒီးယကမၤကိၢ်မၤဂီၤအီၤတုၤအသ့ၣ်ညါလၢအသးလီၤ.
19မ့ၢ်ယဘၣ်တၢ်ဆိးက့ဒီး,ယဘၣ်အဖှီၣ်လီၤ.ယပူၤလီၢ်နးမးလီၤ.ဘၣ်ဆၣ်ဒီးယစံး,မ့ၢ်မးအဝဲအံၤမ့ၢ်ယတၢ်နးတၢ်ဖှီၣ်,ဒီးယဘၣ်ဝံသးစူၤလီၤ.
20ယဒဲဟးဂီၤလံ,ဒီးယပျံၤခဲလၢာ်,ထီၣ်တဲာ်ကွံာ်အသးလံ,ယဖိခဲလၢာ်ဟးထီၣ်ကွံာ်လံလၢယအိၣ်,ဒီးတအိၣ်လၢၤဘၣ်.ပှၤစၢၢ်ထီၣ်ယဒဲ,ဒီးဘျးထီၣ်ယယၣ်သဒၢတၢ်န့ၣ်တအိၣ်လၢၤဘၣ်.
21အဂ့ၢ်ဒ်အံၤ,ပှၤကွၢ်သိခဲလၢာ်န့ၣ်ကဲထီၣ်တၢ်လီၤဂာ်ဆၣ်ဖိကီၢ်ဖိ,ဒီးတဃုဘၣ်ယွၤဘၣ်,မၤသးဒ်န့ၣ်ဒီးတဘီၣ်ထီၣ်ညီထီၣ်ဘၣ်,ဒီးအသိတဖုလီၤပြံလီၤပြါခဲလၢာ်လီၤ.
22တၢ်အကစီၣ်သီၣ်ထီၣ်,ကွၢ်ကွၢ်,ဟဲဝဲ,ဒီးတၢ်တၢထီၣ်တၢလီၤဖးဒိၣ်လၢကီၢ်လၢကလံၤစိးဒ်သိးအကမၤသယုၢ်ယူဒၤအဝ့ၢ်တဖၣ်,ဒီးဒုးကဲအီၤလၢထွံၣ်ဟီၣ်ခိၣ်အအိၣ်အဆိးအလီၢ်လီၤ.
23ယွၤဧၢ,ယသ့ၣ်ညါလၢပှၤကညီတပၢဘၣ်အကျဲဘၣ်,ဒီးပှၤလၢအလဲၤတၢ်န့ၣ်စံၣ်ညီၣ်အထွဲတၢ်တသ့ဘၣ်ဝဲဘၣ်.
24ယွၤဧၢ,သိၣ်ဃီၣ်ယၤထဲလၢတၢ်စံၣ်ညီၣ်တက့ၢ်.မၤလၢနသးထီၣ်တဂ့ၤ,နကဒုးကဲထီၣ်ဘၣ်ဖုးယၤလၢတၢ်နီတမံၤဘၣ်လီၤ.
25လူလီၤနသးထီၣ်လၢပှၤကလုာ်တဖၣ်လၢအတသ့ၣ်ညါဘၣ်နၤဘၣ်,ဒီးလၢပှၤအဒူၣ်တဖၣ်လၢအတကိးထီၣ်ဘၣ်နမံၤတက့ၢ်.အဂ့ၢ်ဒ်အံၤ,အီၣ်ကွံာ်စီၤယၤကိာ်,ဒီးယူၢ်လီၤကွံာ်အီၤ,ဒီးမၤလၢာ်ကွံာ်အီၤ,ဒီးမၤသယုၢ်အအိၣ်အဆိးအလီၢ်လီၤ.