Jeremiah 18
1ယွၤအကလုၢ်ဘၣ်စီၤယံးရမံယၤဒီးစံးဝဲဒၣ်,
2ဂဲၤဆၢထၢၣ်,ဒီးလဲၤလီၤဆူပှၤတ့သပၢၤအဟံၣ်,ဒီးယကဒုးနၢ်ဟူနၤလၢယကလုၢ်ဖဲန့ၣ်လီၤ.
3ဒီးယလဲၤလီၤဆူပှၤတ့သပၢၤအဟံၣ်,ဒီးကွၢ်ကွၢ်,မၤသပၢၤလၢသ့ၣ်ဘၣ်အဖီခိၣ်လီၤ.
4ဒီးသပၢၤလၢအတ့ဝဲလၢကပံာ်န့ၣ်ဟးဂီၤဝဲလၢပှၤတ့သပၢၤအစုပူၤ,ဒီးမၤကဒီးသပၢၤတဖျၢၣ်ဒ်အဘၣ်ပှၤတ့သပၢၤအသးလၢအကမၤဝဲအသိးန့ၣ်လီၤ.
5ဒီးယွၤအကလုၢ်ဘၣ်ယၤဒီးစံးဝဲဒၣ်,
6အံၣ်စရ့လးအပှၤဟံၣ်ဖိသ့ၣ်ဧၢ,ယမၤသုဒ်ပှၤတ့သပၢၤတဂၤအံၤအသိးန့ၣ်တသ့ဘၣ်ဧါ,ယွၤစံးဝဲဒၣ်,ကွၢ်ကွၢ်,ဒ်ကပံာ်အိၣ်ဝဲလၢပှၤတ့သပၢၤအစုပူၤအသိးန့ၣ်သုအိၣ်ဝဲလၢယစုပူၤဒ်န့ၣ်သိး,အံၣ်စရ့လးအပှၤဟံၣ်ဖိသ့ၣ်ဧၢ.
7ယမ့ၢ်ကတိၤတၢ်တဘျီလၢပှၤတကလုၢ်အဂ့ၢ်,လၢတၢ်အဘီမုၢ်အဂ့ၢ်,ဒ်သိးတၢ်ကထဲၤထီၣ်ကွံာ်,ဒီးမၤလီၤပှီၢ်,ဒီးမၤဟးဂီၤန့ၣ်ဒီး,
8ပှၤတကလုာ်လၢယကတိၤတၢ်လၢအဂ့ၢ်န့ၣ်မ့ၢ်ဟဲက့ၤလၢအတၢ်အၢဒီး,ယကပီၢ်ယၢ်လီၤက့ၤယသးလၢတၢ်အၢလၢယတိာ်မၤအီၤလီၤ.
9ဒီးယမ့ၢ်ကတိၤတၢ်တဘျီလၢပှၤတကလုာ်အဂ့ၢ်,တၢ်အဘီမုၢ်အဂ့ၢ်လၢယကမၢထီၣ်အီၤ,ဒီးသူၣ်လီၤအီၤန့ၣ်ဒီး,
10မ့ၢ်မၤတၢ်အၢလၢယမဲာ်ညါ,ဒီးတဒိကနၣ်ဘၣ်ယကလုၢ်ဘၣ်ဒီး,ယကပီၢ်ယၢ်လီၤက့ၤယသးလၢတၢ်ဂ့ၤလၢယစံးယကမၤအီၤန့ၣ်လီၤ.
11ဒီးခဲကနံၣ်အံၤကတိၤတၢ်ဒီးယူၤဒၤအပှၤကညီ,ဒီးပှၤယရူၤၡလ့ၣ်ဖိ,ဒီးစံး,ယွၤစံးဒ်အံၤ,ကွၢ်ကွၢ်,ယတိာ်တၢ်အၢထီဒါသု,ဒီးကူၣ်တၢ်ကူၣ်ထီဒါသုလီၤ.ဟဲက့ၤကဒါက့ၤတဂၤလၢအကျဲအၢစုာ်စုာ်,ဒီးမၤဂ့ၤထီၣ်က့ၤသုကျဲဒီးသုတၢ်မၤတဖၣ်တက့ၢ်.
12ဒီးစံးဝဲဒၣ်,မုၢ်လၢ်တၢ်အလီၢ်တအိၣ်ဘၣ်.ပကပိာ်ပကူၣ်ထီၣ်ဒၣ်ပဝဲအခံ,ဒီးပကမၤထွဲတဂၤအသးအၢအနၢ်က့ၣ်အခံစုာ်စုာ်လီၤ.
13မၤသးဒ်န့ၣ်ဒီးယွၤစံးဒ်အံၤ,သံကွၢ်တၢ်လၢပှၤကလုာ်တဖၣ်အကျါ,မ့ၢ်မတၤနၢ်ဟူတၢ်ဒ်န့ၣ်သိးတဂၤလဲၣ်.အံၣ်စရ့လးအပှၤမုၣ်လိၣ်ဘိမၤတၢ်အၢအဒိၣ်အယိာ်တမံၤလီၤ.
14လဘၤနိၣ်အမူခိၣ်ဖီကလီၤတူာ်ကွံာ်လၢတၢ်ပျီပူၤအလၢၢ်ခိၣ်န့ၣ်ဧါ.ထံခုၣ်လၢအယွၤလီၤလၢအယံၤန့ၣ်,ကလီၤသံးစ့ၢ်ကီးဧါ.
15ဘၣ်ဆၣ်ဒီးယပှၤဂီၢ်မုၢ်သးပ့ၤနီၣ်လံယၤ,ဆိၣ်ကဲၤတၢ်နၢမူလၢတၢ်ကလီကလီအဂီၢ်,ဒီးအခီၣ်ဘၣ်တိၢ်လၢအကျဲလီၢ်လံၤအပူၤ,ဒ်သိးကလဲၤလၢကျဲဖိ,ကျဲလၢတၢ်တမၤထီၣ်ဘၣ်ဝဲဘၣ်.
16ဒ်သိးအကပာ်အကီၢ်လၢတၢ်အိၣ်သယုၢ်အလီၢ်,တၢ်ဒုၣ်ဒွဲၣ်အလီၢ်လီၤထူလီၤယိာ်လီၤ.ကယဲၢ်ပှၤလၢအလဲၤပူၤဝဲတဂၤလၢ်လၢ်န့ၣ်ကပာ်အသးကမၢကမၣ်,ဒီးဂံၤဂုၤအခိၣ်လီၤ.
17ယကမၤပြံမၤပြါအီၤလၢအဒုၣ်အဒါအမဲာ်ညါဒ်ကလံၤလၢမုၢ်ထီၣ်အသိးန့ၣ်လီၤ.လၢအတၢ်နးတၢ်ဖှီၣ်အမုၢ်တနံၤန့ၣ်ယကဒုးနဲၣ်အီၤလၢယချၢဃံ,ဒီးတမ့ၢ်ဘၣ်ယမဲာ်ဘၣ်လီၤ.
18ဒီးပှၤစံးဝဲဒၣ်,ဟဲ,ကူၣ်သကိးတၢ်ထီဒါစီၤယံးရမံယၤတက့ၢ်.အဂ့ၢ်ဒ်အံၤ,တၢ်သိၣ်တၢ်သီတဟါမၢ်ဘၣ်လၢပှၤလုၢ်တၢ်အဒိၣ်ဘၣ်,ဒီးတၢ်ကူၣ်န့ၣ်လၢပှၤကူၣ်တၢ်သ့ဘၣ်,ဒီးတၢ်အကလုၢ်န့ၣ်လၢဝံန့ၣ်ဘၣ်,ဟဲ,တီၢ်သကိးအီၤလၢပပျ့ၤတက့ၢ်.ဒီးပးကဲအတၢ်ကတိၤနီတမံၤတဂ့ၤ.
19ကနၣ်ယကလုၢ်တက့ၢ်,ယွၤဧၢ,ဒီးကနၣ်ပှၤလၢအဂ့ၢ်လိာ်ဘှီလိာ်ဒီးယၤတဖၣ်အတၢ်ကတိၤတက့ၢ်.
20တၢ်ကမၤဆၢတၢ်အၢလၢတၢ်ဂ့ၤအဂီၢ်စ့ၢ်ကီးဧါ.အဂ့ၢ်ဒ်အံၤ,ပှၤခူၣ်လီၤတၢ်ပူၤလၢယသးသမူအဂီၢ်လီၤ.ယဆၢထၢၣ်လၢနမဲာ်ညါဒ်သိးယကကတိၤတၢ်ဂ့ၤလၢအဂီၢ်,ဒ်သိးယကဘိးဃၣ်ကွံာ်နသးကဲၤထီၣ်လၢအအိၣ်န့ၣ်သ့ၣ်နီၣ်ထီၣ်က့ၤတက့ၢ်.
21မၤသးဒ်န့ၣ်ဒီးဟ့ၣ်အဖိအလံၤဆူတၢ်သၣ်ဝံၤလီၤဒိ,ဒီးဟ့ၣ်လီၤကွံာ်အီၤလၢနးအကနၣ်တက့ၢ်.ဒီးမ်အမါကဲထီၣ်ပှၤတူာ်ဖိ,ဒီးပှၤမုၣ်ကမဲတက့ၢ်.ဒီးမ်အပှၤဖိၣ်သၣ်ခွါဘၣ်တၢ်မၤသံအီၤလၢနးလၢဒုးသုးအပူၤတက့ၢ်.
22တုၤနဒုးဟဲပှၤတဖုလၢအဖီခိၣ်သတူၢ်ကလာ်ဒီး,မ်တၢ်အသီၣ်ဟူထီၣ်လၢအဟံၣ်ပူၤတက့ၢ်.အဂ့ၢ်ဒ်အံၤ,ခူၣ်လီၤတၢ်ပူၤဒ်သိးအကမၤန့ၢ်ယၤ,ဒီးပာ်ခူသူၣ်ပျံၤသကွီၤလၢယခီၣ်အဂီၢ်လီၤ.
23ဒီးနဲဒၣ်အံၤယွၤဧၢ,နသ့ၣ်ညါအတၢ်ကူၣ်ထီၣ်ထီဒါယၤဒ်သိးအမၤသံယၤခဲလၢာ်လီၤ.ပျၢ်အတၢ်ဒဲးဘးတဂ့ၤ.ဒီးတြူာ်ကွံာ်အတၢ်ကမၣ်လၢနမဲာ်ညါတဂ့ၤ.မ်အဘၣ်တၢ်မၤကဒံကဒါအီၤလၢနမဲာ်ညါတက့ၢ်.လၢနသးထီၣ်အကတီၢ်န့ၣ်မၤအီၤတက့ၢ်.