Hebrews 12
1မၤသးဒ်န့ၣ်ဒီး,ပှၤအုၣ်အသးဂီၢ်မုၢ်ပှဲၤန့ၣ်အိၣ်ဝးတရံးပှၤသတးဒီး,မ်ပဝဲဒၣ်စ့ၢ်ကီးပာ်လီၤကွံာ်ကယဲၢ်တၢ်အဃၢတမံၤလၢ်လၢ်,ဒီးတၢ်ဒဲးဘးလၢပမၤအီၤညီ,ဒီးတၢ်ဃ့ၢ်သတြီၤအိၣ်လၢပမဲာ်ညါန့ၣ်,မ်ပဃ့ၢ်လၢတၢ်သးစူၤတက့ၢ်.
2ဒီးပှၤလၢအဒုးကဲထီၣ်ဒီးမၤလၢထီၣ်ပှဲၤထီၣ်ပတၢ်နာ်,ယ့ၣ်ရှူးတဂၤန့ၣ်,မ်ပကွၢ်ဃီၤတၢ်ဆူအအိၣ်တက့ၢ်.အဝဲဒၣ်ဒိးထူၣ်စုညါ,ဒီးပာ်တၢ်မဲာ်ဆှးလၢတၢ်နီတမံၤဘၣ်,လၢတၢ်သးခုအိၣ်ပာ်လီၤအသးလၢအမဲာ်ညါအဃိ,ဒီးဆ့ၣ်နီၤဝဲလၢယွၤအလီၢ်ပစိာ်အစုထွဲတခီလီၤ.
3အဂ့ၢ်ဒ်အံၤ,ကွၢ်ဆိကမိၣ်ပှၤလၢအဝံသးစူၤပှၤမၤတၢ်ဒဲးဘးအတၢ်မၤတံာ်တာ်ထီဒါအီၤထဲန့ၣ်,ဒ်သိးတၢ်ဘှံးသုသးသုတအိၣ်,ဒီးသုသုတလီၤဘှံးလီၤတီၤတဂ့ၤန့ၣ်တက့ၢ်.
4သုတဂုာ်မၤနၢၤတၢ်ဒဲးဘးဒီးတြီတၢ်တုၤလၢတၢ်သွံၣ်ဒံးဘၣ်.
5ဒီးသုသးပ့ၤနီၣ်လံတၢ်သဆၣ်ထီၣ်သုခံ,လၢအကတိၤတၢ်ဒီးသုဒ်ဖိခွါတဖၣ်အသိးလံ. ယဖိခွါဧၢ.သုတပာ်ကလီကလီကစၢ်အသိၣ်တၢ်သီတၢ်တဂ့ၤ. ဒီးတုၤအသိၣ်ဃီၣ်နၤဒီး,မ်နသုတလီၤဘှံးလီၤတီၤတဂ့ၤ.
6အဂ့ၢ်ဒ်အံၤ,ကစၢ်သိၣ်က့ၤသီက့ၤပှၤလၢအအဲၣ်,ဒီးဖျ့ကယဲၢ်အဖိခွါလၢအတူၢ်လိာ်,ကိးအဂၤဒဲးလီၤ.
7သုမ့ၢ်ဒိးတၢ်သိၣ်တၢ်သီဒီး,ယွၤမၤသုဒ်ဖိခွါတဖၣ်အသိးန့ၣ်လီၤ.အဂ့ၢ်ဒ်အံၤ,ဖိခွါလၢအပၢ်တသိၣ်က့ၤသီက့ၤဘၣ်န့ၣ်,မ့ၢ်မတၤတဂၤလဲၣ်.
8မ့မ့ၢ်သုမ့ၢ်တဒိးဘၣ်တၢ်သိၣ်က့ၤသီက့ၤသု,လၢအဘၣ်ပှၤကိးအဂၤဒဲးန့ၣ်ဒီးသုတမ့ၢ်ဘၣ်ဖိခွါဘၣ်,သုမ့ၢ်ပှၤဒၢဘၢဖိလီၤ.
9လၢန့ၣ်အမဲာ်ညါ,ပအိၣ်ဒီးပဖံးပညၣ်အပၢ်လၢအသိၣ်က့ၤသီက့ၤပှၤဒီး,ပယူးပယီၣ်အီၤလီၤ.ဒီးပပာ်ပသးလၢသးတဖၣ်အပၢ်အဖီလာ်ဒီးမူပဝဲန့ၣ်,ဂ့ၤဒၣ်တၢ်ဖးဒိၣ်,တမ့ၢ်ဘၣ်ဧါ.
10အဂ့ၢ်ဒ်အံၤ,အဝဲသ့ၣ်တဖၣ်န့ၣ်,သိၣ်က့ၤသီက့ၤပှၤစှၤနံၤစှၤသီဖဲဒၣ်အသးလီၤ.မ့မ့ၢ်အဝဲဒၣ်န့ၣ်,လၢတၢ်ဘျုးတၢ်ဖှိၣ်အဂီၢ်,ဒ်သိးပကန့ၢ်ဘၣ်ဃုာ်အတၢ်စီဆှံလီၤ.
11ဒီးကယဲၢ်သိၣ်ဃီၣ်တၢ်လၢအဘၣ်ပှၤအဖၢမုၢ်န့ၣ်,တလီၤဂာ်ဘၣ်တၢ်သးခုနီတမံၤဘၣ်,မ့မ့ၢ်တၢ်သးအုးလီၤ.ဘၣ်ဆၣ်ဒီးလၢခံက့ၤန့ၣ်ပှၤလၢအဒိးအသးညီနုၢ်တဖၣ်န့ၣ်,သၣ်ထီၣ်ဝဲလၢတၢ်တီတၢ်လိၤအတၤသၣ်လၢအဘၣ်ဃးဒီးတၢ်မုာ်တၢ်ဖိးလီၤ.
12မၤသးဒ်န့ၣ်ဒီး,ပှၤအစုလၢအလီၤဘျ့,ဒီးအခီၣ်လ့ၢ်ခိၣ်လၢအဂံၢ်အဘါတအိၣ်ဘၣ်န့ၣ်,မၤဆူၣ်ထီၣ်တက့ၢ်.
13မၤလိၤကျဲဧိၤကပူၤဧိၤလၢသုခီၣ်အဂီၢ်,ဒ်သိးပှၤလၢအခီၣ်ဟးဂီၤအသုတဘၣ်ဃၣ်ကွံာ်အသးတဂ့ၤ,မ့မ့ၢ်ကဘျါက့ၤန့ၣ်တက့ၢ်.
14လူၤတၢ်မုာ်တၢ်ဖိးဒီးပှၤခဲလၢာ်,ဒီးတၢ်စီဆှံတက့ၢ်.တၢ်စီဆှံတအိၣ်ဘၣ်ဒီး,ပှၤတထံၣ်ဘၣ်ယွၤနီတဂၤဘၣ်.
15ကွၢ်ထံကွၢ်ဆး,ဒ်သိးပှၤသုတလီၤတိၢ်လၢယွၤအဘျုးအဖှိၣ်နီတဂၤတဂ့ၤ,ဒ်သိးဂံၢ်အခၣ်တဘိသုတမဲထီၣ်မၤတံာ်တာ်သု,ဒီးပှၤအါဂၤဘၣ်တၢ်မၤဘၣ်အၢလၢအဃိတဂ့ၤ,
16ဒ်သိးပှၤမၤကမၣ်ပိာ်မုၣ်ပိာ်မၢၤမ့ၢ်ဂ့ၤ,ပှၤလၢအမၤတရီတပါတၢ်ဒ်စီၤဧ့ၡီၤလၢအဆါကွံာ်အတၢ်ဝဲၢ်ကိအလီၢ်လၢတၢ်အီၣ်ဘျဲးအီၣ်တဘျီအဂီၢ်အသိးမ့ၢ်ဂ့ၤ,အသုတအိၣ်တဂ့ၤ.
17အဂ့ၢ်ဒ်အံၤ,လၢခံက့ၤဒီး,တုၤအမိၣ်န့ၢ်ဘၣ်သါက့ၤတၢ်ဆိၣ်ဂ့ၤဒီး,ဘၣ်တၢ်ညိကွံာ်အီၤန့ၣ်သုသ့ၣ်ညါလီၤ.အဂ့ၢ်ဒ်အံၤ,ဃုတၢ်ပီၢ်ယၢ်လီၤက့ၤအသးအလီၢ်,အိၣ်ဒီးတၢ်မဲာ်ထံမဲာ်နိဘၣ်ဆၣ်ဒီး,တထံၣ်န့ၢ်ဘၣ်ဝဲဘၣ်.
18အဂ့ၢ်ဒ်အံၤ,ဆူကစၢၢ်လၢတၢ်ထိးဘၣ်အီၤသ့,ဒီးတၢ်ကဲၤလၢမ့ၣ်အူ,ဒီးဆူတၢ်အၢၣ်သူ,ဒီးတၢ်ခံး,ဒီးကလံၤသဝံး,
19ဒီးကွဲၤအသီၣ်,ဒီးတၢ်ကတိၤအသီၣ်လၢပှၤလၢအနၢ်ဟူဝဲတဖၣ်ဃ့ကညးဒ်သိးတၢ်သုတကတိၤလၢၤဒီးအီၤတဂ့ၤန့ၣ်,သုဟဲဃီၤတမ့ၢ်ဘၣ်.
20အဂ့ၢ်ဒ်အံၤ,ပှၤဒိးဘၣ်တၢ်မၤလိာ်အဝဲန့ၣ်တကဲဘၣ်,ဒီးဆၣ်ဖိကီၢ်ဖိအမံၤမ့ၢ်ထိးဘၣ်ကစၢၢ်အလိၤဒီး,ကဘၣ်တၢ်ကွံာ်အီၤလၢလၢၢ်လီၤ.
21ဒီးတၢ်အိၣ်ဖျါမ့ၢ်တၢ်ပျံၤအလီၢ်တုၤစီၤမိၤရှ့စံးဝဲဒၣ်,ယပျံၤတၢ်,ဒီးယကနိးကစုာ်မးလီၤ.
22မ့မ့ၢ်သုဟဲဃီၤဆူကစၢၢ်စံယိၣ်,ဒီးဆူယွၤလၢအမူဝဲတဂၤအခူအဝ့ၢ်,ယရူၤၡလ့ၣ်လၢအဘၣ်ဃးဒီးမူခိၣ်,ဒီးဆူကလူးလၢပှၤဂံၢ်အီၤတလၢာ်ဘၣ်အအိၣ်,
23ဆူပှၤဂီၢ်မုၢ်ခဲလၢာ်ဒီးတၢ်အိၣ်ဖှိၣ်ဘၣ်ဃးဒီးဝဲၢ်ကိလၢအမံၤအိၣ်ကွဲးအသးလၢမူခိၣ်တဖၣ်အအိၣ်,ဒီးဆူယွၤလၢအစံၣ်ညီၣ်ပှၤခဲလၢာ်အအိၣ်,ဒီးဆူပှၤအတီအလိၤအသးလၢအလၢဝဲပှဲၤဝဲတဖၣ်အအိၣ်,
24ဒီးဆူတၢ်အၢၣ်လီၤအီလီၤအသီတမံၤအပှၤခံခီအဘၢၣ်စၢၤတဂၤယ့ၣ်ရှူးအအိၣ်,ဒီးဆူတၢ်ဖှံတၢ်သွံၣ်လၢအကတိၤတၢ်ဂ့ၤန့ၢ်စီၤဟ့းဘ့းလးအတၢ်ကတိၤတက့ၢ်အအိၣ်လီၤ.
25ပလီၢ်သုသးဒ်သိးသုသုတဂ့ၢ်လိာ်ဘှီလိာ်ပှၤလၢအကတိၤတၢ်န့ၣ်တဂ့ၤ.အဂ့ၢ်ဒ်အံၤ,ပှၤဂ့ၢ်လိာ်ဘှီလိာ်ပှၤလၢအကတိၤတၢ်လၢဟီၣ်ခိၣ်ချၢမ့ၢ်တပူၤဖျဲးဘၣ်ဒီး,ပမ့ၢ်ဃၣ်ကွံာ်ပသးလၢပှၤလၢအကတိၤတၢ်လၢမူခိၣ်တဂၤန့ၣ်ဒီး,ပပူၤဖျဲးတသ့ဘၣ်နးထီၣ်ဒိၣ်ဒိၣ်ကလဲာ်လီၤ.
26အဝဲဒၣ်အကလုၢ်သီၣ်လၢအကတီၢ်ဖဲန့ၣ်,မၤဟူးဝးဟီၣ်ခိၣ်လီၤ.ဘၣ်ဆၣ်ဒီးခဲကနံၣ်အံၤ,ကတိၤပာ်ဒီးစံးဝဲဒၣ်,ယမၤဟူးဒံးတဘျီထဲဟီၣ်ခိၣ်တမ့ၢ်ဘၣ်,မ့ၢ်မူခိၣ်စ့ၢ်ကီးလီၤ.
27တၢ်အိၣ်ဒံးတဘျီဒံးန့ၣ်,ဒုးနဲၣ်တၢ်မၤသုးကွံာ်တၢ်လၢအဟူးဝးတဖၣ်,ဒ်တၢ်လၢအဘၣ်တ့အသးအသိးန့ၣ်,ဒ်သိးတၢ်လၢအတဟူးတဝးဘၣ်တဖၣ်န့ၣ်ကအိၣ်ဒၣ်တၢ်လီၤ.
28မၤသးဒ်န့ၣ်ဒီး,ပန့ၢ်တၢ်အဘီအမုၢ်လၢအတဟူးတဝးဘၣ်သတးဒီး,မ်ပအိၣ်ဒီးတၢ်ဘျုးတၢ်ဖှိၣ်,ဒ်သိးပကမၤယွၤအတၢ်ဖဲအဘၣ်အသး,အိၣ်ဒီးတၢ်ယူးတၢ်ယီၣ်,ဒီးတၢ်ပျံၤယွၤန့ၣ်တက့ၢ်.
29အဂ့ၢ်ဒ်အံၤ,ပကစၢ်န့ၣ်မ့ၢ်မ့ၣ်အူလၢအအီၣ်ကွံာ်တၢ်လီၤ.