Jesaja 20
1INt iaer als Tharthan ghecomen is in Azoten doen hem ghesonden hadde Sargon die coninc vanden Assiriers, ende hi ghestreden hadde teghen Azoten ende die inghenomen hadde.
2In dien tijt heeft die Heere ghesproken in die hant van Isaias Amos sone segghende. Gaet ende ontbint den sack van uwen lendenen, ende v schoenen neemt wech van uwen voeten. Ende hy heeft alsoo ghedaen, ghaende naect ende onghescoeydt.
3Ende die Heere heeft gheseyt. Ghelijc mijn knecht Isaias ghewandelt heeft naect ende onghescoeydt, soo salder een teeken ende een wonderwerck wesen van drij iaren ouer Egipten, ende ouer dat Morianen lant,
4alsoo sal die coninck van Assirien voorts drijuen die gheuanghenisse van Egipten, ende die oueruoeringhe van der Morianen lant, den ionghen ende den ouden, den naecten ende den ongescoeydden, met ontdecten billen tot versmaetheyt van Egipten.
5Ende sij sullen vreesen ende beschaemt wesen van dat Morianen lant, hen hope, ende van Egipten hen glorie.
6Ende die bewoonder van dit eylant sal segghen in dien dach. Siet dit was onse hope tot die welcke wij gheuloden hebben ter helpen, dat sij ons verlossen souden van daensicht des conincs van Assirien, ende hoe sullent wij moghen ontulieden.