1 Chronicles 15
1ဒီးစီၤဒၤဝံးမၤဟံၣ်တဖၣ်လၢအဂီၢ်လၢစီၤဒၤဝံးအဝ့ၢ်ပူၤ,ဒီးကတဲာ်ကတီၤတၢ်အလီၢ်လၢယွၤအတလါအဂီၢ်,ဒီးသူၣ်ဒဲတဖျၢၣ်လၢအဂီၢ်လီၤ.
2တုၤနုၤတစုစီၤဒၤဝံးစံးဝဲဒၣ်,ပှၤဂ့ၤစိာ်ယွၤအတလါထဲပှၤလ့ၤဝံဖိဧိၤလီၤ.အဂ့ၢ်ဒ်အံၤ,ယွၤဃုထၢအီၤဒ်သိးအကစိာ်ယွၤအတလါ,ဒီးမၤအခ့အပှၤအတၢ်မၤလီၤထူလီၤယိာ်လီၤ.
3ဒီးစီၤဒၤဝံးဒုးအိၣ်ဖှိၣ်ရိဖှိၣ်အံၣ်စရ့လးခဲလၢာ်ဆူယရူၤၡလ့ၣ်အပူၤ,ဒ်သိးအကဟဲစိာ်ယွၤအတလါဆူတၢ်အလီၢ်လၢအကတဲာ်ကတီၤဝဲလၢအဂီၢ်လီၤ.
4စီၤဒၤဝံးဒုးအိၣ်ဖှိၣ်ရိဖှိၣ်ပှၤအၤဟရိၣ်ဖိ,ဒီးပှၤလ့ၤဝံဖိ,
5လၢစီၤကဃးအဖိခွါအကျါန့ၣ်တၢ်အခိၣ်စီၤအူရံၤအ့လး,ဒီးအဒီပုၢ်ဝဲၢ်,ပှၤတကယၤခံဆံ,
6လၢစီၤမရၤရံၤအဖိခွါအကျါတၢ်အခိၣ်စီၤဧစံယၤ,ဒီးအဒီပုၢ်ဝဲၢ်,ပှၤခံကယၤခံဆံ,
7လၢစီၤက့ရၡိၣ်အဖိခွါအကျါ,တၢ်အခိၣ်စီၤယိၤအ့လး,ဒီးအဒီပုၢ်ဝဲၢ်တကယၤသၢဆံ,
8လၢစီၤအလံစၤဖၣ်အဖိခွါအကျါ,တၢ်အခိၣ်စီၤၡမါယၤ,ဒီးအဒီပုၢ်ဝဲၢ်ခံကယၤ,
9လၢစီၤဃ့ဘြိၣ်အဖိခွါအကျါ,တၢ်အခိၣ်စီၤအလၤအ့လး,ဒီးအဒီပုၢ်ဝဲၢ်ပှၤဃိးဆံ,
10လၢစီၤဧူးစံၤအ့လးအဖိခွါအကျါ,တၢ်အခိၣ်စီၤဧးမံၤနဒး,ဒီးအဒီပုၢ်ဝဲၢ်ပှၤတကယၤတဆံခံဂၤလီၤ.
11ဒီးစီၤဒၤဝံးကိးန့ၢ်ပှၤလုၢ်တၢ်အဒိၣ်တဖၣ်,စီၤစၤဒိး,ဒီးစီၤအ့ဘယၤသၢ်,ဒီးပှၤလ့ၤဝံဖိတဖၣ်,စီၤအူရံၤအ့လး,ဒီးစီၤဧစံယၤ,ဒီးစီၤယိၤအ့လး,ဒီးစီၤၡဖါယၤ,ဒီးစီၤအလံၤအ့လး,ဒီးစီၤဧးမံၤနဒးသ့ၣ်တဖၣ်,
12ဒီးစံးဘၣ်အီၤ,သုမ့ၢ်ပှၤလ့ၤဝံဖိအပၢ်တဖၣ်အခိၣ်လီၤ.မၤစီဆှံသုသးသုဝဲဒၣ်,ဒီးသုဒီပုၢ်ဝဲၢ်ဒ်သိးသုကဟဲစိာ်ယွၤ,အံၣ်စရ့လးအကစၢ်အတလါဆူတၢ်အလီၢ်လၢယကတဲာ်ကတီၤလၢအဂီၢ်န့ၣ်တက့ၢ်.
13အဂ့ၢ်ဒ်အံၤ,မ့ၢ်သုတမၤဘၣ်လၢအခီၣ်ထံးဘၣ်ဒီး,ယွၤဘၢၣ်ဖျိတၢ်လၢပလိၤလၢပတဃုဘၣ်အီၤဒ်တၢ်စံၣ်ညီၣ်အသိးအဃိန့ၣ်လီၤ.
14ဒီးပှၤလုၢ်တၢ်အဒိၣ်,ဒီးပှၤလ့ၤဝံဖိမၤစီဆှံအသးဒ်သိးအကဟဲစိာ်ယွၤအံၣ်စရ့လးအကစၢ်အတလါန့ၣ်လီၤ.
15ဒီးပှၤလ့ၤဝံဖိစိာ်ယွၤအတလါလၢအဖံဘၣ်ခိၣ်အိၣ်ဒီးအနီၣ်ယိးဘိ,ဒ်စီၤမိၤရှ့မၤလိာ်ဝဲဒ်ယွၤအကလုၢ်အသိးန့ၣ်လီၤ.
16ဒီးစီၤဒၤဝံးမၤလိာ်ပှၤလ့ၤဝံဖိအခိၣ်ဒ်သိးအကပာ်အဒီပုၢ်ဝဲၢ်လၢပှၤသးဝံၣ်တၢ်ဖိ,အိၣ်ဒီးအုၣ်တၢ်အဃၢၤအဃိၢ်,တနၢ်,ဒီးသီတူၢ်,ဒီးစှၢၣ်စှံး,ဒီးထုထီၣ်အကလုၢ်သတးဒီး,မၤသီၣ်ထီၣ်ဒီးတၢ်သူၣ်ခုသးခုလီၤ.
17ဒီးပှၤလ့ၤဝံဖိပာ်စီၤယိၤအ့လးအဖိခွါစီၤဟ့မၣ်,ဒီးလၢအဒီပုၢ်ဝဲၢ်တဖၣ်အကျါန့ၣ်စီၤဘရ့ကံယၤအဖိခွါစီၤအၤစာ်,ဒီးလၢအဒီပုၢ်ဝဲၢ်အကျါ,လၢစီၤမရၤရံၤအဖိခွါတဖၣ်အကျါန့ၣ်စီၤကူၤၡါယၤအဖိခွါစီၤအ့သၣ်,
18ဒီးအိၣ်ဒီးအီၤအဒီပုၢ်ဝဲၢ်လၢအပှဲၤထီၣ်ခံတီၤတတီၤ,စီၤစကၤရယၤ,စီၤဘ့ၣ်,ဒီးစီၤယၤစံအ့လး,ဒီးစီၤၡမံၤရမိး,ဒီးစီၤယဃံအ့လး,ဒီးစီၤဧူးနံၤ,စီၤအလံအာ်,ဒီးစီၤဘနါယၤ,ဒီးစီၤမၤစ့ယၤ,ဒီးစီၤမးတံးသယၤ,ဒီးစီၤအလံဖလ့,ဒီးစီၤမံးကန့ယၤ,ဒီးစီၤဧိၤဘ့းအ့ဒိၣ်,ဒီးစီၤယံၤအ့လးန့ၣ်ပှၤပၢၤပဲတရီတဖၣ်လီၤ.
19ဒီးတၢ်ပာ်ပှၤသးဝံၣ်တၢ်ဖိ,စီၤဟ့မၣ်,စီၤအၤစာ်,ဒီးစီၤအ့သၣ်လၢအကမၤသီၣ်တၢ်လၢစှၢၣ်စှံးတိၢ်,
20ဒီးစီၤစကၤရယၤ,ဒီးစီၤဧၤစရ့လး,ဒီးစီၤၡမံၤရမိး,ဒီးစီၤယဃံအ့လး,ဒီးစီၤဧူးနံၤ,ဒီးစီၤအလံအာ်,ဒီးစီၤမၤစ့ယၤ,ဒီးစီၤဘနါယၤလၢသီတူၢ်လၢဧၤလမိးအဖီခိၣ်,
21ဒီးစီၤမးတံးသယၤ,ဒီးစီၤအလံဖလး,ဒီးစီၤမံးကန့ယၤ,ဒီးစီၤဧိၤဘ့းအ့ဒိၣ်,ဒီးစီၤယံၤအ့လး,ဒီးစီၤဧၤစါစယၤလၢတနၢ်လၢၡမံနံးအဖီခိၣ်လၢတၢ်အခိၣ်အဂီၢ်,
22ဒီးပှၤလ့ၤဝံဖိအခိၣ်စီၤကံနၤနယၤလၢတၢ်သးဝံၣ်အဂီၢ်လီၤ.မ့ၢ်အနၢ်ပၢၢ်တၢ်ဒီး,သိၣ်လိတၢ်လၢတၢ်သးဝံၣ်အဂ့ၢ်အကျိၤလီၤ.
23ဒီးစီၤဘရ့ကံယၤ,ဒီးစီၤအ့လကါနၤမ့ၢ်ပှၤပၢၤပဲတရီလၢတလါန့ၣ်အဂီၢ်လီၤ.
24ဒီးစီၤၡဘၤနယၤ,ဒီးစီၤယဟိၡၤဖး,ဒီးစီၤနၤသန့လး,ဒီးစီၤဧၤမစဲ,ဒီးစီၤစကၤရယၤ,ဒီးစီၤဘနါယၤ,ဒီးစီၤအလၤဧစၢ်,ပှၤလုၢ်တၢ်အဒိၣ်တဖၣ်အူကွဲၤလၢယွၤအတလါအမဲာ်ညါ,ဒီးစီၤဧိၤဘ့းအ့ဒိၣ်,ဒီးစီၤအဃံယၤမ့ၢ်ပှၤပၢၤပဲတရီလၢတလါန့ၣ်အဂီၢ်လီၤ.
25ဒီးစီၤဒၤဝံး,ဒီးအံၣ်စရ့လးအပှၤသူၣ်က့သးပှၢ်,ဒီးပှၤကထိတဖၣ်အခိၣ်တဖၣ်လဲၤဝဲ,ဒီးဟဲက့ၤစိာ်ယွၤအတၢ်အၢၣ်လီၤအီလီၤအတလါလၢစီၤဧိၤဘ့းအ့ဒိၣ်အဟံၣ်ပူၤအိၣ်ဒီးတၢ်သးခုလီၤ.
26ဒီးတၢ်မၤအသးလၢယွၤမၤစၢၤပှၤလ့ၤဝံဖိလၢအစိာ်ယွၤအတၢ်အၢၣ်လီၤအီလီၤအတလါန့ၣ်,ဒီးပှၤလုၢ်ဝဲလၢဂီၤဖံးဖိနွံဒု,ဒီးသိဖါနွံဒုလီၤ.
27ဒီးစီၤဒၤဝံးသိးဆ့ဖှီဝါကဆှၣ်,ဒီးပှၤလ့ၤဝံဖိလၢအစိာ်တလါန့ၣ်ခဲလၢာ်,ဒီးပှၤသးဝံၣ်တၢ်ဖိ,ဒီးပှၤအုၣ်တၢ်ဖိအခိၣ်စီၤကနၤနယၤ,ဒီးပှၤသးဝံၣ်တၢ်ဖိလီၤ.ဒီးစီၤဒၤဝံးသိးအ့ဖိးဖှီဝါကဆှၣ်တဘ့ၣ်လီၤ.
28ဒီးအံၣ်စရ့လးခဲလၢာ်ဟဲစိာ်ထီၣ်ယွၤအတၢ်အၢၣ်လီၤအီလီၤအတလါအိၣ်ဒီးတၢ်ကိးပသူထီၣ်,ဒီးကွဲၤအသီၣ်,ဒီးတနွဲ,ဒီးစှၢၣ်စှံး,ဒီးမၤသီၣ်တၢ်လၢသီတူၢ်ဒီးတနၢ်လီၤ.
29ဒီးယွၤအတၢ်အၢၣ်လီၤအီလီၤအတလါဟဲဆူစီၤဒၤဝံးအဝ့ၢ်ပူၤ,ဒီးတၢ်မၤအသးလၢစီၤစီလူးအဖိမုၣ်နီၢ်မံကၤလးကွၢ်ထီၣ်တၢ်လၢတၢ်ထူၣ်ဖျိ,ဒီးထံၣ်ဘၣ်စီၤဒၤဝံးဂဲၤကလံၣ်,ဒီးဒ့တၢ်,ဒီးတပးလ့ၢ်ပးကါဘၣ်အီၤလၢအသးကံၢ်ပူၤန့ၣ်ဘၣ်.