Genesis 21
1ဒီးယွၤအိၣ်သကိးနီၢ်စၤရါဒ်အစံးပာ်အသိး,ဒီးယွၤမၤနီၢ်စၤရါဒ်အကတိၤတၢ်အသိးန့ၣ်လီၤ.
2အဂ့ၢ်ဒ်အံၤ,နီၢ်စၤရါဒၢထီၣ်,ဒီးဆံးစၢ်န့ၢ်စီၤအၤဘြၤဟၣ်အဖိခွါလၢလၢအသးပှၢ်တ့ၢ်,ဖဲအဆၢကတီၢ်လၢယွၤစံးပာ်အီၤလီၤ.
3ဒီးအဖိခွါလၢအအိၣ်ဖျဲၣ်လၢအဂီၢ်,လၢနီၢ်စၤရါဆံးစၢ်န့ၢ်အီၤတဂၤန့ၣ်စီၤအၤဘြၤဟၣ်ယုၢ်အမံၤလၢစီၤအံၤစဲးလီၤ.
4ဒီးအဖိခွါစီၤအံၤစဲးအိၣ်ဃိးနံၤဒီး,အပၢ်စီၤအၤဘြၤဟၣ်ကူးတရံးအီၤ,ဒ်ယွၤမၤလိာ်အီၤအသိးန့ၣ်လီၤ.
5ဒီးဖဲအဖိခွါစီၤအံၤစဲးအိၣ်ဖျဲၣ်လၢအဂီၢ်န့ၣ်,စီၤအၤဘြၤဟၣ်အသးပှၢ်အနံၣ်တကယၤလီၤ.
6ဒီးနီၢ်စၤရါစံးဝဲဒၣ်,ယွၤဒုးနံၤယၤလီၤ.ကယဲၢ်ပှၤလၢအနၢ်ဟူခဲလၢာ်န့ၣ်ကနံၤဃုာ်ဒီးယၤလီၤ.
7ဒီးစံးဝဲဒၣ်,မ့ၢ်မတၤကစံးတ့ၢ်စီၤအၤဘြၤဟၣ်လၢနီၢ်စၤရါကဒုးအီၣ်နုၢ်ဖိန့ၣ်လဲၣ်.အဂ့ၢ်ဒ်အံၤ,လၢအသးပှၢ်တ့ၢ်န့ၣ်ယဆံးစၢ်န့ၢ်အဖိခွါလီၤ.
8ဒီးဖိသၣ်န့ၣ်ဒိၣ်ထီၣ်,ဒီးဖှၣ်အမိၢ်အနုၢ်န့ၣ်လီၤ.ဒီးမုၢ်နံၤလၢစီၤအံၤစဲးဖှၣ်ဒီးအမိၢ်အနုၢ်န့ၣ်စီၤအၤဘြၤဟၣ်မၤတၢ်အီၣ်တၢ်အီဖးဒိၣ်လီၤ.
9ဒီးနီၢ်စၤရါထံၣ်ပှၤအဲၤကူပတူးဖိ,နီၢ်ဟၤကၢ်အဖိခွါလၢအဆံးစၢ်န့ၢ်စီၤအၤဘြၤဟၣ်တဂၤန့ၣ်,နံၤဘၣ်ဖၣ်လဲတၢ်လီၤ.
10ဒီးစံးဘၣ်စီၤအၤဘြၤဟၣ်,ဟီထီၣ်ကွံာ်ကုၢ်ပိာ်မုၣ်န့ၣ်ဒီးအဖိခွါတက့ၢ်.အဂ့ၢ်ဒ်အံၤ,ကုၢ်ပိာ်မုၣ်အဖိခွါတန့ၢ်ဘၣ်သါတၢ်ဒီးယဖိခွါ,စီၤအံၤစဲးန့ၣ်ဘၣ်.
11ဒီးတၢ်တမံၤန့ၣ်ကီမးလၢစီၤအၤဘြၤဟၣ်အမဲာ်ညါလၢအဖိခွါအဃိလီၤ.
12ဒီးယွၤစံးဘၣ်စီၤအၤဘြၤဟၣ်,မ်အသုတမ့ၢ်တၢ်ကီလၢနမဲာ်ညါလၢနဖိသၣ်အဃိ,ဒီးလၢနကုၢ်ပိာ်မုၣ်အဃိန့ၣ်တဂ့ၤ.ကယဲၢ်တၢ်လၢနီၢ်စၤရါစံးဘၣ်တဲဘၣ်နၤခဲလၢာ်န့ၣ်ကနၣ်အကလုၢ်တက့ၢ်.အဂ့ၢ်ဒ်အံၤ,တၢ်ကကိးန့ၢ်နချံနသၣ်လၢစီၤအံၤစဲးအပူၤလီၤ.
13ဒီးယကဒုးကဲထီၣ်စ့ၢ်ကီးကုၢ်ပိာ်မုၣ်အဖိခွါလၢပှၤတကလုာ်,လၢအမ့ၢ်နချံနသၣ်အဃိလီၤ.
14ဒီးစီၤအၤဘြၤဟၣ်ဂဲၤဆၢထၢၣ်လၢဂီၤဂီၤ,ဒီးဟံးန့ၢ်ကိၣ်,ဒီးထံတထၢၣ်,ဒီးဟ့ၣ်အီၤလၢနီၢ်ဟၤကၢ်ဒီးပာ်ဝဲလၢအဖံဘၣ်ခိၣ်ဒီးမၢအလဲၤတၢ်လီၤ.ဒီးအဝဲဒၣ်ဟးထီၣ်,ဒီးလဲၤဝ့ၤဝီၤတၢ်လၢပှၢ်မုၢ်ကနၢဘ့ၢ်ၡဘၤအပူၤလီၤ.
15ဒီးထံလၢာ်ဝဲလၢထၢၣ်ပူၤ,ဒီးပာ်ဖိသၣ်န့ၣ်လၢသ့ၣ်ဖိတခိၣ်အဖီလာ်လီၤ.
16ဒီးလဲၤဆ့ၣ်နီၤသဃီၤဒီးအီၤ,အိၣ်လၢအယံၤ,ယံၤတခးချံၣ်ဃၣ်ဃၣ်လီၤ.အဂ့ၢ်ဒ်အံၤ,စံးဝဲဒၣ်,မ်ယသုတထံၣ်ဘၣ်ဖိသၣ်သံန့ၣ်တဂ့ၤ.ဒီးဆ့ၣ်နီၤဝဲသဃီၤဒီးအီၤ,ဒီးထုထီၣ်အကလုၢ်,ဒီးအမဲာ်ထံလီၤဝဲလီၤ.
17ဒီးယွၤကနၣ်ဖိသၣ်အကလုၢ်,ဒီးယွၤအကလူးကိးလီၤလၢမူခိၣ်ဆူနီၢ်ဟၤကၢ်,ဒီးစံးဘၣ်အီၤ,နီၢ်ဟၤကၢ်ဧၢ,မ့ၢ်နဘၣ်မနုၤတမံၤလဲၣ်.ဘၣ်ယိၣ်တဂ့ၤ.အဂ့ၢ်ဒ်အံၤ,ယွၤကနၣ်လံဖိသၣ်အကလုၢ်ဖဲအအိၣ်အလီၢ်န့ၣ်လံ.
18ဂဲၤဆၢထၢၣ်,ဝံၣ်ဆၢထၢၣ်ဖိသၣ်,ဒီးဟံးထီၣ်အီၤလၢနစုတက့ၢ်.အဂ့ၢ်ဒ်အံၤ,ယကပာ်အီၤလၢပှၤတကလုာ်ဖးဒိၣ်လီၤ.
19ဒီးယွၤအိးထီၣ်ပိာ်မုၣ်အမဲာ်,ဒီးထံၣ်ဘၣ်ထံပူၤတပူၤ,ဒီးလဲၤမၤပှဲၤထံထၢၣ်,ဒီးဒုးအီဖိသၣ်န့ၣ်လီၤ.
20ဒီးယွၤအိၣ်ဒီးဖိသၣ်,ဒီးဒိၣ်ထီၣ်ဝဲ,ဒီးအိၣ်ဝဲဆိးဝဲလၢပှၢ်လၢ်ကျါ,ဒီးကဲထီၣ်ပှၤခးတၢ်ဖိလီၤ.
21ဒီးအိၣ်ဝဲဆိးဝဲလၢပှၢ်လၢ်ကျါပၤရၣ်,ဒီးအမိၢ်ဟံးန့ၢ်အီၤအမါလၢကီၢ်အဲၤကူပတူးအပူၤလီၤ.
22ဒီးတၢ်မၤအသးလၢအဆၢအကတီၢ်ဖဲန့ၣ်,စီၤအဘံၤမ့လ့း,ဒီးအပှၤသုးမုၢ်အခိၣ်,စီၤဖံကိးလး,စံးဘၣ်စီၤအၤဘြၤဟၣ်ဒီးစံးဝဲဒၣ်,ကယဲၢ်နမၤတၢ်တမံၤလၢ်လၢ်န့ၣ်ယွၤအိၣ်ဒီးနၤလီၤ.
23ဒီးခဲကနံၣ်အံၤဆိၣ်လီၤနသးလၢယွၤအမဲာ်ညါလၢနတလီန့ၢ်ဘၣ်ယၤ,ဒီးယဖိခွါ,ဒီးယစၢၤယသွဲၣ်ဘၣ်န့ၣ်တက့ၢ်.ဒ်တၢ်ဘျုးတၢ်ဖှိၣ်လၢယမၤနၤအသိးန့ၣ်နဘၣ်မၤယၤ,ဒီးကီၢ်လၢနအိၣ်တမှံၤလၢအပူၤလီၤ.
24ဒီးစီၤအၤဘြၤဟၣ်စံးဝဲဒၣ်,ယကဆိၣ်လီၤယသးလီၤ.
25ဒီးစီၤအၤဘြၤဟၣ်သိၣ်ဃီၣ်စီၤအဘံၤမ့လ့းလၢထံပူၤတပူၤလၢစီၤအဘံၤမ့လ့းအကုၢ်အပှၤဟံးန့ၢ်ဆူၣ်အဃိလီၤ.
26ဒီးစီၤအဘံၤမ့လ့းစံးဝဲဒၣ်,တၢ်တမံၤအံၤမ့ၢ်မတၤမတၤမၤန့ၣ်,ယတသ့ၣ်ညါဘၣ်,ဒီးနတစံးဘၣ်တဲဘၣ်ယၤဘၣ်,ဒီးယတနၢ်ဟူဘၣ်တုၤမုၢ်မဆါတနံၤအံၤဘၣ်လီၤ.
27ဒီးစီၤအၤဘြၤဟၣ်ဟံးန့ၢ်သိဒီးမဲာ်တဲးလဲး,ဒီးဂီၤဖံးတဖၣ်,ဒီးဟ့ၣ်ဝဲလၢစီၤအဘံၤမ့လ့း,ဒီးအဝဲခံဂၤန့ၣ်မၤသကိးတၢ်အၢၣ်လီၤအီလီၤလီၤ.
28ဒီးစီၤအၤဘြၤဟၣ်ပာ်သိဖိမိၢ်နွံဒုတပူၤဒၣ်လီၤ.
29စီၤအဘံၤမ့လ့းစံးဘၣ်စီၤအၤဘြၤဟၣ်,တၢ်လၢသိဖိမိၢ်နွံဒုလၢနပာ်တပူၤဒၣ်န့ၣ်,မ့ၢ်အဘၣ်မနုၤလဲၣ်.
30ဒီးစံးဝဲဒၣ်,အဂ့ၢ်ဒ်အံၤ,သိဖိမိၢ်နွံဒု,နဘၣ်ဟံးန့ၢ်လၢယစုပူၤ,ဒ်သိးအကကဲထီၣ်တၢ်အုၣ်အသးလၢပဂီၢ်လၢယခူၣ်လီၤလံထံပူၤအံၤလီၤ.
31မၤသးဒ်န့ၣ်ဒီးတၢ်လၢအလီၢ်န့ၣ်ပှၤကိးဝဲအမံၤလၢဘ့ၢ်ၡဘၤလီၤ.အဂ့ၢ်ဒ်အံၤ,ဆိၣ်လီၤအသးဖဲန့ၣ်ခံဂၤလိာ်လီၤ.
32ဒီးမၤတၢ်အၢၣ်လီၤအီလီၤဖဲဘ့ၢ်ၡဘၤန့ၣ်လီၤ.ဒီးစီၤအဘံၤမ့လ့း,ဒီးအပှၤသုးမုၢ်အခိၣ်,စီၤဖံကိးလးန့ၣ်ဂဲၤဆၢထၢၣ်,ဒီးက့ၤက့ၤဆူပှၤဖလ့ၡသးဖိအကီၢ်လီၤ.
33ဒီးစီၤအၤဘြၤဟၣ်သူၣ်သ့ၣ်တဖုလၢဘ့ၤၡဘၤအပူၤ,ဒီးကိးထီၣ်ဖဲန့ၣ်လၢယွၤအမံၤ,ကစၢ်အထူအယိာ်လီၤ.
34ဒီးစီၤအၤဘြၤဟၣ်အိၣ်တမှံၤလၢပှၤဖလ့ၡသးဖိအကီၢ်ပူၤအါနံၤအါသီလီၤ.